Xi zacané lii guiaaluʼ ti congregación ra nacubi bidxaaluʼ

Peru maʼ gadxé ni bizaaca Nicolas ne Céline, purtiʼ gunabaʼ sucursal stiʼ Francia chécabe chiguni servírcabe stiʼ Congregación. Bizeeteʼ guendaxheelaʼ riʼ xi bidxaagalucaʼ pur ni bizaaca riʼ, laacabe nácabe: «Primeru ga que guizáʼ nayecheʼ nuudu peru despué gúcani nagana purtiʼ bizulú bibánadu ca xhamígudu. Caru diʼ gúʼyadu ca hermanu de congregación nacubi que casi xhamígudu».a Yanna, ¿ximodo zanda gudxiiluluʼ ca guendanagana gápaluʼ ne guiaaluʼ congregación nacubi ca yaʼ? ¿Xi zanda guni ca hermanu ca para gacané ca lii? ¿Ne ximodo zanda uguuluʼ gana xcaadxi ne cúʼcabe gana lii?

TAPA PRINCIPIU NI ZACANÉ LII GUIAALUʼ CONGREGACIÓN RA NACUBI BIDXAALUʼ

1. Gupa confianza Jehová (Sal. 37:5). Kazumi nga ti hermana de guidxi Japón, maʼ zinebe gande iza de cayúnibe ni ná Jehová ndaaniʼ ngueca congregación, peru gupa xidé bidxaabe de congregación ora biseendacabe xheelabe chiguni dxiiñaʼ stiʼ lugar. ¿Xi bíʼnibe para gusaanabe ca cosa ca «lu náʼ Jehová» yaʼ? Laabe nabe: «Bixheleʼ ladxiduáʼ nezalú Jehová, gudxeʼ laa runeʼ sentir nuaaʼ stubeʼ ne guizáʼ ridxibeʼ dede qué ridxelaʼ xi guneʼ. Ne qué nusaana Jehová de nudii stipa naa».

¿Xi zacané lii jma gápaluʼ confianza Jehová? Fe stinu zeeda gácani casi ti yagahuiiniʼ ni caquiiñeʼ nisa ne ca cosa ni gacané laa guiniisi ne gaca naguidxi. Nicolas, hermanu ni bizéʼtenu lu primé párrafo que, guníʼ íquebe ejemplu stiʼ Abrahán, Jesús ne Pablo —laacaʼ bíʼnicaʼ stale sacrificiu para gúnicaʼ ni racalaʼdxiʼ Dios— ngue gucané laabe chuʼbe seguru laaca zacané Jehová laabe. Gápaluʼ ti programa para gúʼndaluʼ Biblia guiráʼ dxi cadi zacané si ni lii gánnaluʼ xi gúniluʼ ora guidxaa xquendanábaniluʼ, sínuque laaca zacané ni lii para gápaluʼ ca cualidad ni caquiiñeʼ para gacaneluʼ ca hermanu ndaaniʼ congregación nacubi ca.

2. Cadi guchaagaluʼ congregación ni bisaanaluʼ né congregación ra nuuluʼ yanna (Ecl. 7:10). Jules guníʼ, ora bisaana guidxi Benín ne guyé Estados Unidos, biiyabe maʼ gadxé si ca costumbre stiʼ ca binni de raqué. Laabe nabe: «Bineʼ sentir caquiiñeʼ gabeʼ cada binni ni deruʼ cayunebiaʼyaʼ modo guca xquendanabaneʼ». Cumu qué runi sentirbe galán ne cadi biabe gúnibe ni la? chaahuiʼ chaahuiʼ bizulú bixhélebe de ca hermanu de congregación que. Peru bizeetebe, ra zidiʼdiʼ tiempu binibiáʼ chaahuibe ca hermanu que ne bichaa modo riníʼ íquebe, laabe nabe: «Maʼ bidieeʼ cuenta ra tiica si nuunu biáʼqueca nga risaca guiráʼ binni. Ni runi laanu maʼ gadxé de xcaadxi binni nga modo ruinu diidxaʼ. Bidieeʼ cuenta, cadi galán diʼ nga gacaláʼdxinu guchanu modo laacabe». Nga runi cadi guchaagaluʼ congregación ni bisaanaluʼ né congregación ra nuuluʼ yanna. Ti precursora láʼ Anne-Lise guníʼ: «Qué nidxaaʼ de congregación para si guneʼ ni maca biaaʼ guneʼ, sínuque para guiziideʼ guneʼ xcaadxi cosa».

Laaca cadi naquiiñeʼ guchaaga ca ancianu congregación ra guyuucaʼ ne ra nuucaʼ yanna. Zándaca gadxé modo raca caadxi cosa ndaaniʼ congregación ra nuucabe yanna, peru qué riníʼ diʼ nga cadi jneza rácacani. Galán nga gánnacabe xi caquiiñeʼ congregación ca ante gacaláʼdxicabe guchaacabe xiixa (Ecl. 3:​1, 7b). Ne jma galán nga gaca tuuxa ejemplu para xcaadxi que gacalaʼdxiʼ gaca ni ná (2 Cor. 1:24).

3. Biyubi gacaneluʼ ndaaniʼ congregación (Filip. 1:27). Dxandíʼ, stale dxiiñaʼ nga rapa tuuxa ora guidxaa de lugar ne rineni laa stale tiempu, nga runi nagueendaca biyubi cheluʼ reunión ndaaniʼ congregación nacubi ca ne pa zanda la? biʼniʼ stipa guyé ti gunibiáʼ ca hermanu ca lii. Purtiʼ, ¿ximodo gacané ca hermanu ca lii pa qué huayuuyacabe o huaxiéʼ ruuyacabe lii yaʼ? Ruzeeteʼ Lucinda xi biʼniʼ laa ne ca xiiñiʼ ora yendeza ti guidxi roʼ ni nuu Sudáfrica, laabe guniʼbe: «Gudixheʼ iqueʼ chinandaʼ ca conseju ni bidii ca xhamiguaʼ naa: guneʼ stipa guneʼ apoyar ca arreglu ni napa congregación ra nuaaʼ riʼ, guneʼ predicar ne gadxé gadxé hermanu ne guneʼ comentar lu ca reunión. Laaca bidieeʼ lídxidu para gaca reunir ca hermanu ca ora rireecaʼ serviciu».

Pa gúniluʼ stipa de guni apoyarluʼ ca arreglu ni napa congregación ra nuuluʼ yanna riʼ la? zusihuínniluʼ cayúniluʼ stipa para guni predicarluʼ ca noticia galán ni runi creluʼ. Bidii ca ancianu conseju riʼ Anne-Lise, hermana ni bizeʼtenu que, guni stipa guni predicar ne guiráʼ hermanu de congregación. Laabe bizeetebe: «Ndiʼ nga tobi de ca cosa ni racané para guiaa tuuxa congregación ra nacubi bidxaa». Ne pa quixhe íqueluʼ gúniluʼ ca dxiiñaʼ ni raca ndaaniʼ congregación casi gusialuʼ despué de guiluxe reunión o gacaneluʼ lu mantenimientu stiʼ Yoo stiʼ Reinu, zuuyaʼ ca hermanu ne ca hermana maʼ cayaaluʼ congregación. Ra jma gúniluʼ stipa guiaaluʼ congregación ra bidxaaluʼ riʼ, ziuulaʼdxiʼ ca hermanu ne hermana chuʼcaʼ gaxha de lii ne zuni sentirluʼ nayecheʼ ndaaniʼ familia nacubi stiluʼ.

4. Biyubi gaca xhamíguluʼ ca hermanu (2 Cor. 6:​11-13). Ti modo jma galán para gaca xhamíguluʼ tuuxa nga guizaaláʼdxiluʼ laa. Nga runi gulee tiempu para guiníʼneluʼ ne gunibiáʼ chaahuiluʼ ca hermanu ca ante guzulú reunión ne despué de guilúxeni. Biʼniʼ stipa guiziidiluʼ lá ca tobi de ca hermanu ne hermana ni nuu ndaaniʼ congregación cubi ca. Pa lii gácaluʼ nachaʼhui né laacabe ne guietenaláʼdxiluʼ tu lácabe la? zándaca ziuuláʼdxicabe guidxíñacabe lii ne zanácabe gácacabe xhamíguluʼ.

Cadi guyúbiluʼ gúniluʼ xiixa cosa para si guiábaluʼ ca hermanu ca. Bisihuinni modo nácaluʼ. Zanda chinándaluʼ ejemplu stiʼ Lucinda, laabe nabe: «Gudixhe íquedu guni invitardu ca hermanu ra lídxidu ne pur ni bínidu riʼ yanna maʼ nápadu stale xhamígudu».

«LACHUU NAYECHEʼ ORA GUIDXAAGALUTU STOBI»

Nuu hermanu raca nagana para laa chuʼ ndaaniʼ Yoo stiʼ Reinu ra qué runibiáʼ guirutiʼ. Nga runi, pa tuuxa bidxaa congregación ra nuuluʼ, ¿ximodo zanda gacaneluʼ laabe yaʼ? Apóstol Pablo guníʼ: «Lachuu nayecheʼ ora guidxaagalutu stobi, cásica bidxaagalú Cristu laatu né guendanayecheʼ» (Rom. 15:7). Zanda chinanda ca ancianu ejemplu stiʼ Cristu ra gacanecaʼ ca ni nacubi ni nuu ndaaniʼ congregación guni sentircaʼ galán (biiyaʼ cuadru ni láʼ «Xi naquiiñeʼ gúniluʼ para guidxaaluʼ sti congregación»). Guiráʼ ca hermanu dede ca ni nahuiiniʼ zanda gacanecaʼ guni sentir ca ni nacubi galán casi ñaca nuucaʼ lade ca xhamígucaʼ.

Para guidxaagalunu ca ni nacubi ne guni sentircaʼ galán la? quixhe íquenu guni invitarnu laacabe ra lídxinu ne guyúbinu caadxi modo ganda gacanenu laacabe. Guzéʼtenu ni biʼniʼ ti hermana, laabe guleebe tiempu para guluiʼbe stiʼ hermana ni nacubi yendá lugar que gunibiáʼ guidxi que ne bisiidibe laa ximodo guicaa carru. Hermana ni nacubi yendá lugar que guníʼ guizáʼ galán ni biʼniʼ hermana que pur laa, guizáʼ gucaneni laabe guiaabe lugar que.

BIIYAʼ NI TI MODO PARA GUINIISILUʼ NDAANIʼ XQUIDXI DIOS

Pa deruʼ bidxaaluʼ ndaaniʼ ti congregación nacubi la? zándaca cadxíbiluʼ o nuuluʼ xizaa. Peru zanda guiníʼ íqueluʼ ejemplu riʼ: cásica nuu manihuiiniʼ ora ziniisi ruchaa guidiladi para ganda guipapa, zaqueca nga zeeda gaca ora guidxaa tuuxa de congregación, caquiiñeʼ gusaana guiráʼ ni riguu xizaa laa para ganda guni ni ná Jehová cásixa ñaca maʼ nuu listu para «guipapa» ne guni jma lu xhiiñaʼ Jehová. Nicolas ne Céline guniʼcaʼ: «Stale cosa nga riziidiluʼ ora cheluʼ sti lugar. Biziididu gaca yebardu xcaadxi ne guiaadu lugar ca, ndiʼ gucané laadu gápadu xcaadxi cualidad galán». Jean-Charles, hemanu ni bizéʼtenu que, guníʼ xi ndaayaʼ gucuaa familia stiʼ. Laabe nabe: «Ra bidxaadu de congregación, gucané ni ca xiiñidu guiniisicaʼ ndaaniʼ xquidxi Dios ne chuʼcaʼ jma gaxha de Jehová. Qué nindaa chupa chonna beeu maʼ bitiidiʼ dxaapahuiiniʼ stidu asignación lu reunión ni raca ndaaniʼ semana ne hombrehuiiniʼ stidu guca publicador ni caʼruʼ chúʼnisa».

Yanna, ¿xi zanda gúniluʼ pa qué zanda guidxaaluʼ sti congregación neca ñuuláʼdxiluʼ yaʼ? Galán quixhe íqueluʼ chinándaluʼ ca conseju ni bidúʼyanu lu artículo riʼ. Ne gúniluʼ cani ndaaniʼ congregación ra nuuluʼ, zacá zuni sentirluʼ casi ñaca ñuuluʼ ndaaniʼ ti congregación nacubi. Gupa confianza Jehová, biʼniʼ stipa guni apoyarluʼ ca arreglu ni napa congregación stiluʼ, zanda guni predicarneluʼ gadxé gadxé hermanu ne guyúbiluʼ gaca xhamíguluʼ laacaʼ o pa maʼ nápaluʼ xhamíguluʼ ndaaniʼ congregación ra nuuluʼ ca la? biyubi gaca amistad stitu jma naguidxi. Galán guiníʼ íqueluʼ ximodo gacaneluʼ ca ni nacubi nuu ndaaniʼ congregación stiluʼ o ca ni caquiiñeʼ gacanécabe laa. Pa quixhe íqueluʼ gúniluʼ ni bizeʼtenu riʼ la? zacané ni lii guiniisiluʼ ndaaniʼ xquidxi Dios ne zusihuínniluʼ guendarannaxhii, laani nga cualidad ni jma risaca ni rusihuinni tuu nga ca ni dxandíʼ xpinni Cristu (Juan 13:35). Zanda ganna dxíchiluʼ zeeda gácacani «casi ti sacrificiu ni riuulaʼdxiʼ Dios guicaa» (Heb. 13:16).

Dxandíʼ, nuu stale cosa ni ridxaagalú tuuxa ora ridxaa de congregación, peru stale xpinni Cristu gunda biaacaʼ congregación ra nuucaʼ yanna ne nuucaʼ nayecheʼ cayúnicaʼ ni ná Jehová. ¡Lii laaca zanda gúniluʼ ni! Anne-Lise guníʼ: «Ra bidxaaʼ de congregación gucaneni naa guxheleʼ ladxiduáʼ ne gannaxhieeʼ ca hermanu ca». Kazumi gunna dxichi gucané Jehová laa ora bidxaa de congregación, laabe guniʼbe: «Dxi bidxaaʼ de congregación, biiyaʼ ximodo gucané Jehová naa de ti modo ni qué huayuudxí guuyaʼ». Yanna, Jules yaʼ, ¿xi biʼniʼ sentir? Laa guníʼ: «Maʼ napaʼ stale xhamiguaʼ ne nga huayacané naa guneʼ sentir galán. Yanna maʼ runeʼ sentir nacaʼ de congregación ra nuaaʼ riʼ, dede zaca nagana para naa gusaanaʼ congregación riʼ».