Gatananu para cadi guiábanu lu tentación

1, 2. a) ¿Xiñee gudixhená Jesús laanu? b) ¿Xiñee biaba ca discípulo que lu tentación? (Biiyaʼ ca imagen ca).

«NECA racalaʼdxiʼ binni guni ni jneza, peru débil cuerpu stiʼ» (Mat. 26:41b).a Né ca diidxaʼ riʼ bisihuinni Jesús nanna nácanu binni ruchee, peru laaca caguixhenabe laanu gápanu cuidadu cadi guiníʼ íquenu qué ziuu dxi guiábanu. Chupa chonna hora ante guiníʼ Jesús ca diidxaʼ ca, né stale confianza gudxi ca discípulo stibe laabe qué ziuu dxi gusaanacaʼ laabe (Mat. 26:35). Neca galán ni nuucabe gúnicabe, peru qué niníʼ íquecabe pa zaca nagana para laacabe gúnicabe ni ora guidxaagalúcabe guendanagana. Nga runi gudxi Jesús laacabe: «Lagataná ne cadi gusaana de guni orartu para cadi guiábatu lu tentación» (Mat. 26:41a).

² ¿Xi biʼniʼ ca discípulo que ora gunaazecabe Jesús yaʼ? Triste guininu ni, peru cumu qué ñatanácabe la? biábacabe lu tentación. Ne cumu cadi cabézacabe guizaaca ngue la? bíʼnicabe ni peʼ gúdxicabe Jesús qué zúnicabe: gusaanacabe laa (Mat. 26:56).

3. a) Pa qué racaláʼdxinu guchéʼnenu Jehová, ¿xiñee cadi naquiiñeʼ gaca confiarnu? b) ¿Xi zazíʼdinu lu artículo riʼ?

³ Laanu laaca cadi naquiiñeʼ gaca confiarnu ne guiníʼ íquenu qué ziuu dxi guchéʼnenu Jehová. Neca guiranu maʼ gudixhe íquenu cadi gúninu xiixa ni guxheleʼ laanu de Jehová, peru nácanu binni ruchee ne zándaca ziuu xiixa ni uquiinde laanu gúninu cosa malu (Rom. 5:12; 7:​21-23). Zándaca ora cadi cabézanu ni, ziuu xiixa ni uquiinde laanu gúninu cosa malu ne zaca nagana para laanu gucueezanu laanu. Peru pa qué racaláʼdxinu guchéʼnenu Jehová ne Jesús la? caquiiñeʼ gulábinu conseju ni bidii Jesús laanu ne siempre gatananu. Ne nga peʼ nga ni chiguizíʼdinu lu artículo riʼ. Primeca zadúʼyanu pora nga caquiiñeʼ gápanu jma cuidadu. De racá, zaninu ximodo zanda gápanu laanu para cadi guiábanu lu tentación. Ne últimu, zadúʼyanu xi zanda gúninu para cadi gusaana de gatananu.

¿PORA NGA JMA NAQUIIÑEʼ GATANANU?

4, 5. ¿Xiñee caquiiñeʼ gatananu para cadi gúninu xiixa pecadu ni cadi tan naroʼbaʼ?

⁴ Neca nuu pecadu cadi tan naroʼbaʼ que xcaadxi, peru neca zacá zanda guxhélecani laanu de Jehová. Ne zándaca gucaacani laanu gúninu ti pecadu jma naroʼbaʼ.

⁵ Guiranu nga ziuu ora zadxaagalunu xiixa tentación, peru cada tobi de laanu nga riuuláʼdxinu xiixa ni cadi jneza ne raca nagana para laanu gucáʼnanu ni. Nga runi gadxé gadxé tipu tentación nga rudxiilú cada tobi. Zándaca nuu tu laa cudxiilú ti deseu malu ni napa para cadi guni ti pecadu naroʼbaʼ, casi ti pecadu sexual. Xcaadxi la? zándaca ruquiinde laa guni cosa dxabaʼ casi quiteʼ ra naca hombre o ra naca gunaa o guʼyaʼ pornografía. Ne nuu tu laa cayuni stipa pur gusaana de gaca modo naca binni guidxilayú, casi gaca orgulloso, guidxibi binni o guidxiichi nagueenda. Nga runi guníʼ Santiago «cada tobi ridiʼdiʼ lu prueba ora rigubayú deseu stiʼ laa ne ora ruquiindeni laa» (Sant. 1:14).

6. ¿Xii nga ni jma jneza gúninu?

⁶ ¿Ñee nánnaluʼ gunáʼ nga ca cosa ni cadi jneza ni riuuláʼdxiluʼ ni raca nagana para lii gucaanaluʼ la? Ti peligru nga gúninu casi ora qué raca nagana para laanu gucáʼnanu xiixa ni cadi jneza o guiníʼ íquenu zuhuaʼnu dxiichiʼ ne qué ziuu dxi guiábanu lu ti tentación (1 Juan 1:8). Ne Pablo guníʼ dede «ca ni napa ca cualidad stiʼ espíritu» naquiiñeʼ chuʼcaʼ cuidadu para cadi chuʼ xiixa ni guni tentar laacaʼ (Gál. 6:1). Nga runi, cadi quítenu laca laanu, ni jma jneza gúninu nga guiénenu nuu cosa ni raca nagana para laanu gucáʼnanu (2 Cor. 13:5).

7. ¿Xi ca cosa naquiiñeʼ chuʼnu jma cuidadu? Bizeeteʼ ti ejemplu.

⁷ Pa maʼ nánnanu gunáʼ nga ca cosa ni cadi jneza ni riuuláʼdxinu ni raca nagana para laanu gucáʼnanu, ¿xi caquiiñeʼ gúninu yaʼ? ¡Caquiiñeʼ gúninu xiixa para gápanu laanu! Guiníʼ íquenu ndiʼ: tiempu gucuá Biblia, ndaaniʼ ca guidxi ni napa muru guidubi vuelta, ra puertaʼ que nga lugar ra jma naquiiñeʼ gápacabe. Purtiʼ ladu que nga jma nagueenda chuʼ tuuxa enemigu. Ngaca nga ni caquiiñeʼ gúninu, jma naquiiñeʼ chuʼnu cuidadu né ca cosa ni ruquiinde laanu gucheʼnu (1 Cor. 9:27).

XIMODO ZANDA GÁPANU LAANU

8, 9. ¿Xi naquiiñeʼ ñuni joven ni riete lu capítulo 7 stiʼ Proverbios para cadi ñuni ti pecadu naroʼbaʼ? (Proverbios 7:​8, 9, 13, 14, 21).

⁸ ¿Ximodo zanda gápanu laanu para cadi guiábanu lu xiixa tentación? Guidúʼyanu xi cusiidiʼ capítulo 7 stiʼ Proverbios laanu. Racá riete de ti joven ni biʼniʼ ti pecadu sexual né ti gunaa ni qué rinanda ca ley stiʼ Dios. Lu versículo 22 ca ná «málasi» zinándabe gunaa que. Peru pa guidúʼndanu ca versículo ni cá ante zudiʼnu cuenta maca bíʼnibe caadxi cosa ne chaahuidugá chaahuidugá bicaacani laabe gucheebe.

⁹ ¿Xi ca cosa nga bíʼnibe ante yaʼ? Primé la? maʼ huaxhinni gudíʼdibe «gaxha de squina ra nabeza gunaa que». De raqué, biyúbibe neza ra lidxi gunaa que (biindaʼ Proverbios 7:​8, 9). Despué, ora bíʼyabe gunaa que, qué nibiguétabe ne qué nixélebe de laa. Lugar de ngue, bidiibe lugar gudii gunaa que ti bixiduʼ laabe ne guiníʼ de ca sacrificiu de paz ni bidii, zándaca para gucaa laabe guni crebe naca ti gunaa nachaʼhuiʼ (biindaʼ Proverbios 7:​13, 14, 21). Pa ñaca qué ñuni joven riʼ ca cosa ca, qué ñábabe lu tentación ne qué ñúnibe pecadu que.

10. Casi bizaaca joven ni riete lu Proverbios, ¿xii nga ca cosa ni zanda gucaa tuuxa guchee?

¹⁰ Tutiica xpinni Jehová zanda guizaaca ni bizaaca joven riʼ. Zándaca guni tuuxa ti pecadu naroʼbaʼ ne guiníʼ ique «málasi» bizaaca ni. Zándaca guiniʼbe: «Qué gannaʼ ximodo bizaaca ni». Peru pa guietenaláʼdxibe ni bíʼnibe ante la? zudiibe cuenta maca bíʼnibe caadxi cosa ni bicaa laabe guiábabe lu tentación. Zándaca bidxaagabe binni ni cadi nadxii Jehová, biiyabe o bicaadiágabe xiixa ni cadi jneza, o yechuube xiixa lugar o xiixa sitiu lu internet ra cadi naquiiñeʼ chuʼ ti xpinni Cristu. Zándaca maʼ qué runi orarbe, maʼ qué ruundabe Biblia, maʼ qué riebe reunión o maʼ qué riguni predicarbe. Cásica bizaaca joven ni riete lu Proverbios ca, jma seguru nga cadi «málasi bicheebe».

11. ¿Xi caquiiñeʼ gúninu pa qué racaláʼdxinu gúninu ti pecadu?

¹¹ ¿Xi rusiidiʼ ndiʼ laanu yaʼ? Cadi naquiiñeʼ si gucáʼnanu xiixa pecadu, laaca naquiiñeʼ chuʼnu cuidadu cadi gúninu ca cosa ni zucaa laanu gúninu xiixa ni cadi jneza. Ne nga peʼ nga ni bisiene Salomón despué de guníʼ ni bizaaca joven ne gunaa que. Ndiʼ nga ni guníʼ Salomón de gunaa que: «Cadi guinítiluʼ lu ca neza stibe» (Prov. 7:25). Ne laaca bidiibe conseju riʼ: «Bixeleʼ de laabe ne cadi guidxíñaluʼ ra puertaʼ lídxibe» (Prov. 5:​3, 8). Ndiʼ nga ni rizíʼdinu, pa qué racaláʼdxinu gúninu ti pecadu la? naquiiñeʼ guixélenu de guiráʼ ca cosa ni zanda gucaa laanu gúninu ni.b Dede né ca cosa ni cadi malu para ti xpinni Cristu, peru pa nánnanu zucaani laanu gucheʼnu la? jma galán gucáʼnanu ni (Mat. 5:​29, 30).

12. ¿Xi decisión gucuaa Job, ne ximodo gucaneni laabe cadi gucheebe? (Job 31:1).

¹² Pa racaláʼdxinu gucáʼnanu ca cosa ni zucaa laanu gúninu ti pecadu, zanda chinándanu ejemplu stiʼ Job. Para cadi guyadxibe sti gunaa ne guiníʼ íquebe cosa ni cadi jneza, de laabe biale guicaabe ti decisión ni zacané laabe. Sicaríʼ guniʼbe: «Maʼ bineʼ ti acuerdu né bizaluáʼ» (biindaʼ Job 31:1). Cumu yenándabe acuerdu que la? gucaneni laabe cadi gucheenebe xheelabe. Laanu laaca caquiiñeʼ guiale de laanu gucáʼnanu intiica cosa ni zanda gusaba laanu lu tentación.

13. ¿Xiñee caquiiñeʼ gápanu cuidadu né ca cosa ni riníʼ íquenu? (Biiyaʼ ca imagen ca).

¹³ Laaca caquiiñeʼ gápanu cuidadu né ni riníʼ íquenu (Éx. 20:17). Nuu tu laa riníʼ ique cadi malu nga guxuiʼlú cayuni cosa malu pa cadi dxandíʼ cayuni ni. Peru cadi jneza modo riníʼ íquecabe. Purtiʼ ra jma guiníʼ íquenu cayúninu cosa malu, jma zudii gana laanu gúninu ni. Casi ñaca laapenu caguíxhenu tentación ca lunu ne jma nagana zaca para gudxíʼlunu ni. Dxandíʼ nga nuu biaje ridiʼdiʼ cosa malu ndaaniʼ íquenu, ¿peru xi zanda gúninu ora guizaaca ndiʼ yaʼ? Nagueendaca naquiiñeʼ cueenu ni de ndaaniʼ íquenu ne guiníʼ íquenu cosa galán. Zacá qué zudiʼnu lugar gaca ca cosa malu ni ridiʼdiʼ ndaaniʼ íquenu ca jma nadipaʼ, dede maʼ qué ganda gucáʼnanu cani ne gucaacani laanu gúninu ti pecadu naroʼbaʼ (Filip. 4:8; Col. 3:2; Sant. 1:​13-15).

14. ¿Xiruʼ zanda gacané laanu para gatananu ne cadi guiábanu lu tentación?

¹⁴ ¿Xiruʼ zanda gacané laanu para gatananu ne cadi guiábanu lu tentación? Caquiiñeʼ chuʼnu seguru jma galán zabáninu pa chinándanu ca ley stiʼ Jehová. Ziuu ora zaca nagana para laanu gucueezanu ca deseu ni cadi jneza rápanu ne ca cosa malu ni riníʼ íquenu, peru pa gúninu stipa gudxíʼlunu cani la? ziuʼnu nayecheʼ, purtiʼ zápanu ti conciencia nayá.

15. ¿Xiñee caquiiñeʼ gúniluʼ stipa chuuláʼdxiluʼ gúniluʼ ca cosa ni riuulaʼdxiʼ Jehová?

¹⁵ Caquiiñeʼ gúninu stipa chuuláʼdxinu gúninu ca cosa ni riuulaʼdxiʼ Jehová ne guizíʼdinu gacananaláʼdxinu cosa malu ne gannaxhiinu ni jneza (Amós 5:15). Pa gúninu ni la? qué zaca nagana para laanu gúninu ni jneza ne gucáʼnanu intiica cosa ni zucaa laanu gucheʼnu. Peru laaca zacaneni laanu gácanu nadipaʼ para ganda gudxíʼlunu ca tentación ni guidxaagalunu ora cadi cabézanu cani ne ora qué zanda guireecueʼnu de laacani.

16. ¿Xiñee caquiiñeʼ gúninu cosa ni zacané laanu gannaxhiinu Jehová jma? (Biiyaʼ ca imagen ca).

¹⁶ ¿Xi zanda gúninu para chuuláʼdxinu gúninu ca cosa ni riuulaʼdxiʼ Jehová? Guyúbinu gúninu cosa ni zacané laanu gannaxhiinu Jehová jma. Ora riuunu reunión ne riguni predicarnu, racanécani laanu jma chuuláʼdxinu gúninu ni ná Jehová ne qué lica zaníʼ íquenu gúninu xiixa cosa ni cadi jneza (Mat. 28:​19, 20; Heb. 10:​24, 25). Ne pa guidúʼndanu, guni estudiarnu ne guiníʼ íquenu ni ná Stiidxaʼ Dios, jma zacaneni laanu gannaxhiinu ni jneza ne gacananaláʼdxinu cosa malu (Jos. 1:8; Sal. 1:​2, 3; 119:​97, 101). Ne cadi guiaandaʼ laanu conseju bidii Jesús riʼ: «Cadi gusaana de guni orartu para cadi guiábatu lu tentación» (Mat. 26:41). Ora ribeenu tiempu para guinínenu Bixhózenu ni nuu guibáʼ, ridúʼyanu modo racanebe laanu ne jma rucaani laanu gusiéchenu ladxidóʼ Jehová (Sant. 4:8).

QUÉ CHUʼ DXI GUSAANA DE GATANANU

17. ¿Xi guca nagana para Pedro gudxiilú?

¹⁷ Lade ca cosa ni cadi jneza ni riuuláʼdxinu gúninu, nuu cosa ni qué zaca nagana para laanu gusaananu, peru zándaca nuu xcaadxi cosa ni jma zaca nagana para laanu gudxíʼlunu. Ne nga peʼ nga ni bizaaca apóstol Pedro. Nabé bidxíbibe binni ne pur ngue chonna biaje guniʼbe qué runibiaʼbe Jesús (Mat. 26:​69-75). Peru gudiʼdiʼ si ti tiempu, né stale valor guniʼbe de Jesús nezalú Sanedrín. Ca dxi qué ruluíʼ maʼ qué lica ridxíbibe binni (Hech. 5:​27-29). Peru chupa chonna iza despué bidxíbibe ti grupu de binni ni runi apoyar circuncisión, ngue runi maʼ qué ninabe ñónebe ca xpinni Cristu ni cadi naca judíu (Gál. 2:​11, 12). Pur ni bíʼnibe que, bihuinni caʼruʼ gusaana de guidxíbibe binni. Ne nanna pa bedandá dxi bisaanabe ni yaʼ.

18. ¿Xi zándaca guizaaca né xiixa cosa malu ni rábinu maʼ bisaananu?

¹⁸ Laanu laaca zándaca guibiguetaʼ uquiinde laanu gúninu xiixa cosa malu ni rábinu maʼ bisaananu. Ti hermanu guníʼ: «Biaʼ chii iza maʼ qué ñuuyaʼ pornografía ne guníʼ iqueʼ maʼ qué lica ziaba luni sti biaje. Peru qué ñuu dxi niree deseu malu que ndaaniʼ ladxiduáʼ, beeda gácani casi ti maniʼ duxhuʼ ni cabeza si pora gucaalú». Galán nga qué niree hermanu riʼ gana. Biénebe pa qué racaláʼdxibe guiábabe lu tentación la? naquiiñeʼ gudxiilube ni guiráʼ dxi, ne zándaca biaʼ dxi guibánibe. Cásica xheelabe ne ca ancianu huayábicaʼ laabe xi zanda gúnibe para cadi gúʼyabe pornografía.

19. ¿Xi zanda gúninu pa raca nagana para laanu gudxíʼlunu xiixa deseu malu?

¹⁹ Pa raca nagana para laanu gudxíʼlunu xiixa deseu malu, ¿xi caquiiñeʼ gúninu para cadi gucaani laanu gúninu ti pecadu yaʼ? Chinándanu conseju bidii Jesús, laabe guniʼbe: «Lagataná». Nga runi, cadi gusaana de gucaanaluʼ ca cosa ni zucaa lii guiábaluʼ lu tentación, gutaná dede né ora guni sentirluʼ maʼ qué ziábaluʼ (1 Cor. 10:12). Ne cadi gusaana de gúniluʼ ca cosa ni huayacané lii cadi guiábaluʼ lu xiixa tentación. Proverbios 28:14 ná: «Nayecheʼ riuu ti binni ni qué rusaana de gataná» (2 Ped. 3:14).

XIÑEE RISACA CADI GUSAANA DE GATANANU

20, 21. a) ¿Xiñee risaca nga gatananu? b) ¿Ximodo zacané Jehová laanu pa gúninu guiráʼ ni nuu lu nanu? (2 Corintios 4:7).

²⁰ ¿Ñee dxandíʼ peʼ risaca nga gatananu para cadi guiábanu lu tentación la? ¡Risaca pue! Pa gucheeluʼ pur xiixa ni riuuláʼdxiluʼ gúniluʼ, ziécheluʼ ti ratu si, peru pa chinándaluʼ ca ley stiʼ Jehová qué zusaana de chuʼluʼ nayecheʼ (Heb. 11:25; Sal. 19:8). Ne zacá nga bizáʼ Jehová laanu, para ganda gúninu ni riuulaʼdxiʼ (Gén. 1:27). Pa gúninu ni nabe zápanu ti conciencia nayá ne zanda guibáninu sin qué chuʼ dxi gátinu (1 Tim. 6:12; 2 Tim. 1:3; Jud. 20, 21).

²¹ Dxandíʼ, nuu tiru raca nagana para laanu gudxíʼlunu xiixa ni ruquiinde laanu gucheʼnu, peru qué riníʼ diʼ nga qué zanda gúninu ni ná Jehová. Purtiʼ laapebe zacanebe laanu (biindaʼ 2 Corintios 4:7). Peru caquiiñeʼ guiénenu ndiʼ: zanda gudii Jehová laanu poder stiʼ ne jma nadipaʼ ni. Peru laaca risaca iquiiñenu poder stinu, ndiʼ riníʼ gúninu stipa guiráʼ dxi para cadi guiábanu lu tentación. Pa gúninu guiráʼ ni nuu lu nanu, zanda chuʼnu seguru zudii Jehová laanu jma stipa que biaʼ guinábanu laabe lu oración (1 Cor. 10:13). Nga runi zanda gatananu ne gucáʼnanu intiica tentación purtiʼ Jehová peʼ zacané laanu.