Ni rinabadiidxaʼ ca ni ruundaʼ
¿Tuu ndiʼ «ca ángel ni gulí» Dios ni riete lu 1 Timoteo 5:21?
Sicaríʼ bicaa apóstol Pablo ra nuu Timoteo, ni guca ancianu casi laabe: «Nezalú Dios ne Cristu Jesús ne nezalú ca ángel ni gulí, canabaʼ lii guʼnuʼ guiráʼ ni cayabeʼ lii riʼ, ne ora guʼnuʼ ni la? biʼniʼ ni sin guni juzgarluʼ binni dede ante ne biʼniʼ tratar binni igual» (1 Tim. 5:21). ¿Tuu ndiʼ «ca ángel ni gulí» Dios riʼ yaʼ?
Cadi caníʼ diʼ Pablo de ca 144,000 ungidu, purtiʼ tiempu bicaabe ra nuu Timoteo, caʼruʼ guzulú guiasa ca ungidu para checaʼ guibáʼ. Ne ca apóstol ne xcaadxi ungidu caʼruʼ gápacaʼ ti cuerpu de espíritu o ni qué rinitilú. Nga runi, cadi laadícabe nga «ca ángel ni gulí» Dios (1 Cor. 15:50-54; 1 Tes. 4:13-17; 1 Juan 3:2).
Laaca cadi laadícabe nga ca ángel ni bicheené Dios tiempu guca Diluvio que. Purtiʼ ca ángel que bíʼnicaʼ ni ná Binidxabaʼ ne gúcacaʼ demonio ne enemigu stiʼ Jesús (Gén. 6:2; Luc. 8:30, 31; 2 Ped. 2:4). Huidxe si zuteguyoobe laacaʼ ndaaniʼ ti abismo ti mil iza ne despué zunitilube laacaʼ né Binidxabaʼ (Jud. 6; Apoc. 20:1-3, 10).
Nga runi «ca ángel ni gulí» Dios ni bizeeteʼ apóstol Pablo lu 1 Timoteo 5:21, laacabe nga ca ángel ni ruzuubaʼ diidxaʼ, ni runiné Jehová ne Cristu Jesús dxiiñaʼ juntu guibáʼ.
Nuu stale mil de ángel ni ruzuubaʼ diidxaʼ (Heb. 12:22, 23). Peru cadi guiníʼ íquenu ngueca dxiiñaʼ rudii Jehová laacabe para gúnicabe (Apoc. 14:17, 18). Casi ti dxi, biseendaʼ Jehová ti ángel si para chiguuti ti gayuaa ochenta y cinco mil soldadu stiʼ Asiria (2 Rey. 19:35). Ne sti dxi bizeeteʼ Jesús zándaca ti grupu de ángel nga chiguseendaʼ «para cueecaʼ lu Reinu stibe guiráʼ cosa ni riné lu pecadu ne ca binni runi guendaquéiquiiñeʼ» (Mat. 13:39-41). Zándaca zaquiiñebe xcaadxi ángel para guni «reunircaʼ ca ni maʼ gulibe» para checaʼ guibáʼ (Mat. 24:31). Ne nuu xcaadxi ángel ruseendaʼ Jehová laacaʼ para gápacaʼ laanu, casi ná Salmo 91:11 (Mat. 18:10; bichaaga ni ná Mateo 18:10; 4:11 ne Lucas 22:43).
Nga runi «ca ángel ni gulí» Dios ni riete lu 1 Timoteo 5:21 zándaca caniʼni de caadxi ángel ni cayúnicaʼ ti dxiiñaʼ para gacanecaʼ ca congregación. Lu guidubi capítulo riʼ caníʼ Pablo de ca ancianu ne cayábibe ca hermanu naquiiñeʼ guni respetarcaʼ laacabe. Laaca gúdxibe ca ancianu naquiiñeʼ guni cumplircaʼ né dxiiñaʼ sticaʼ sin guni juzgarcaʼ binni o gúnicaʼ menu laacabe ne cadi nagueendaca guicaacaʼ decisión sin guiníʼ íquecaʼ. ¿Xiñee yaʼ? Purtiʼ guníʼ Pablo cayuni ca ancianu dxiiñaʼ para ca hermanu «nezalú Dios ne Cristu Jesús ne nezalú ca ángel ni gulí» para gacanecaʼ congregación. Nga runi maʼ bizíʼdinu nuu ángel ni maʼ guca asignar para gacané congregación, gápacaʼ ca xpinni Dios, gúʼyacaʼ gaca predicar ne gábicaʼ Jehová xi guiráʼ cayuuyacaʼ (Mat. 18:10; Apoc. 14:6).