Cadi nachucu náʼ Jehová

1. ¿Ximodo bisihuinni Moisés napa confianza Jehová dxi gulee ca israelita de ndaaniʼ guidxi Egipto?

LU LIBRU stiʼ Hebreos riete ejemplu stiʼ caadxi binni ni bisihuinni napa fe ne tobi de laacabe nga Moisés (Heb. 3:​2-5; 11:​23-25). Bisihuínnibe nápabe fe ora guleebe ca israelita de Egipto. Qué nudiibe lugar nuchibi faraón ne ejércitu stiʼ laabe. Gúpabe confianza Jehová ne yenebe guidxi que lu nisadóʼ Xiñáʼ ne despué lu desiertu (Heb. 11:​27-29). Stale de ca israelita que bisaana de gápacaʼ confianza zapa Jehová laacaʼ, peru Moisés qué nusaana de ñapa confianza Jehová. Ne biaʼsi peʼ ni bíʼnibe purtiʼ Jehová nga bidii ni gó ca israelita ne zaqueca nisa para ganda guibánicaʼ lu desiertu que (Éx. 15:​22-25; Sal. 78:​23-25).a

2. ¿Xiñee gunabadiidxaʼ Jehová Moisés ni zeeda lu Números 11:​21-23?

² Biaʼ ti iza despué de biree guidxi Israel de ndaaniʼ guidxi Egipto, gudxi Jehová laacabe zudii laacabe beela. Neca naca Moisés ti hombre ni napa fe Jehová la? guca nagana para laabe guni crebe zudii Jehová beela lu desiertu para gó stale binni. Nga runi gunabadiidxaʼ Jehová laabe: «¿Ñee rábiluʼ nabé nachucu náʼ Jehová la?» (biindaʼ Números 11:​21-23 ne nota). Raríʼ diidxaʼ «náʼ Jehová» riniʼni poder stiʼ Jehová para guni xiixa, ni caninu nga espíritu santu stibe. Sti modo nininu ni gunabaʼ diidxaʼ Jehová laabe nga: «¿Ñee rábiluʼ qué zanda guneʼ ni rinieeʼ chiguneʼ la?».

3. ¿Xiñee risaca nga guni estudiarnu ni bizaaca Moisés ne ca israelita?

³ Lii yaʼ, ¿ñee huayuu biaje huanabadiidxaluʼ pa zudii Jehová ni caquiiñeluʼ ne ni caquiiñeʼ familia stiluʼ para guibánitu la? Pa huanabadiidxaluʼ ni o pa coʼ, lu artículo riʼ chiguidúʼyanu ejemplu stiʼ Moisés ne stiʼ ca israelita, bisaana de gápacaʼ confianza zapa Jehová laacaʼ. Laaca zadúʼyanu caadxi textu ni zacané laanu gápanu confianza cadi nachucu náʼ Jehová ne zanda gacané laanu.

XI RIZÍʼDINU DE EJEMPLU STIʼ MOISÉS NE STIʼ CA ISRAELITA

4. ¿Xiñee stale de ca israelita que bisaana de guni crecaʼ zapa Jehová laacaʼ?

⁴ ¿Xiñee stale de ca israelita que bisaana de gápacaʼ confianza zapa Jehová laacaʼ? Maʼ stale iza de canazá guidxi Israel lu desiertu, laacaʼ ne xcaadxi binni de gadxé gadxé guidxi ni zinanda laacabe dxi bireecabe de Egipto, ne zecaʼ para chuʼcaʼ lu Tierra Prometida (Éx. 12:38; Deut. 8:15). Biree ca binni de gadxé gadxé guidxi que gana gocaʼ maná ne bizulú gudiche ruaacaʼ ne zaqueca biʼniʼ stale de ca israelita que (Núm. 11:​4-6). Bibánacabe ca guendaró ni gudócabe ndaaniʼ guidxi Egipto. Ne pur guiráʼ ni caníʼ ca binni que biʼniʼ sentir Moisés laa peʼ nga caquiiñeʼ gudii laacabe beela para gócabe (Núm. 11:​13, 14).

5, 6. ¿Xi zanda guizíʼdinu pur modo gucuá modo naca ca binni de caadxi guidxi que ca israelita?

⁵ Casi maʼ bidúʼyanu, bidii ca israelita que lugar guicá modo riníʼ ique ca binni de xcaadxi guidxi que laacaʼ ne maʼ qué nudiicaʼ xquixe peʼ Jehová pur guiráʼ ni cudii laacaʼ. Zacaca zanda guizaacanu zanda guicá modo riníʼ ique binni laanu ne pur nga maʼ cadi chuʼnu nayecheʼ né ca cosa ni cudii Jehová laanu. Zándaca guibánanu ca cosa ni gúpanu dxiqué o gacaláʼdxinu gápanu ni napa xcaadxi binni. Peru pa guizíʼdinu guibaninenu biaʼ nápasinu jma nayecheʼ zabáninu.

⁶ Ni jma galán ñuni ca israelita nga cadi nusiaandacaʼ ni biʼniʼ prometer Jehová laacaʼ. Gúdxibe laacaʼ zudiibe laacaʼ stale cosa galán ora chindacaʼ lu Tierra Prometida que ne cadi tiempu nuucaʼ lu desiertu. Zacaca nga laanu, lugar de guicá íquenu gápanu cosa ni qué gápanu, ni jma galán gúninu nga guiníʼ íquenu guiráʼ ni maʼ biʼniʼ prometer Jehová zudii laanu ndaaniʼ guidxilayú cubi ca. Laaca zanda guiníʼ íquenu ni ná caadxi textu ni zeeda lu Biblia ni zanda gacané laanu gápanu jma confianza Jehová.

7. ¿Xiñee zanda chuʼnu seguru gastiʼ zanda gucueeza náʼ Jehová para gacané laanu?

⁷ Zándaca guiníʼ íquenu xiñee gunabadiidxaʼ Dios Moisés: «¿Ñee rábiluʼ nachucu náʼ Jehová la?». Zándaca gunabadiidxabe Moisés zacá purtiʼ racaláʼdxibe gacanebe laa guiene qué ziuu dxi guirá poder stibe ne zanda chindani dede ra jma zitu. Ngue runi neca nuu ca israelita que galaa desiertu, zanda gudii Jehová laacabe stale beela para gócabe. Bisihuinni Dios poder stiʼ ora guníʼ: «Zulaʼyaʼ laatu né nayaʼ ni nusigaaʼ» (Éx. 6:​6, nota). Nga runi, ora gudxíʼlunu xiixa guendanagana zanda chuʼnu seguru zacané náʼ Jehová laanu ra tiica si nuunu (Sal. 138:​6, 7).

8. ¿Xi caquiiñeʼ gúninu para cadi gácanu casi guca stale de ca israelita? (Laaca zanda gúʼyaluʼ imagen ca).

⁸ Biʼniʼ cumplir Jehová promesa ni biʼniʼ laacabe ne bidii laacabe stale berexunaxi. Peru qué nudii ca israelita que xquixe peʼ laabe pur milagru ni bíʼnibe ne stale de laacaʼ jma gucuá íquecaʼ gápacaʼ jma ne guidubi ti dxi arondaʼ bitópacaʼ guiráʼ ca berexunaxi ni gucaláʼdxicaʼ. Guizáʼ bidxiichiné Jehová ca binni ni bisihuinni racalaʼdxiʼ «puru si para laa» ne biʼniʼ castigarbe laacaʼ (Núm. 11:​31-34). ¿Xi rusiidiʼ ejemplu riʼ laanu yaʼ? Caquiiñeʼ gápanu cuidadu para cadi gachelunu gápanu jma. Pa nácanu ricu o pobre, ni jma risaca lu xquendanabáninu nga guyúbinu gutálenu «tesoro guibáʼ» ne zanda gúninu ni ra guidxíñanu jma gaxha de Jehová ne de Jesús (Mat. 6:​19, 20; Luc. 16:9). Pa gúninu ni la? nanna dxíchinu zudii Jehová guiráʼ ni caquíʼñenu.

9. ¿Xi nanna dxíchinu?

⁹ Dede yanna nga nuu Jehová listu para gacané ca xpinni. Peru nga qué riníʼ qué ziuu dxi guiaadxaʼ laacaʼ bueltu o guendaró.b Nga runi zanda chuʼnu seguru qué ziuu dxi gusaanaʼ Jehová laanu. Zudiibe laanu stipa para guni huantarnu intiica guendanagana. Guidúʼyanu chupa guendanagana ra zanda gusihuínninu nápanu confianza zapa Jehová laanu: Primé, ora qué gápanu bueltu ne, guiropa, ora quixhe íquenu xi zanda gúninu para cadi guiaadxaʼ ni iquíʼñenu ora maʼ huaniisinu.

ORA GUIAADXAʼ BUELTU LAANU

10. ¿Xi guendanagana zándaca guidxaagalunu?

¹⁰ Ra jma maʼ zedadxiña dxi guiluxe guidxilayú riʼ, zándaca jma ziaadxaʼ bueltu binni. Zándaca gunítinu dxiiñaʼ stinu, ca cosa risaca ni nápanu o lídxinu pur modo cayuni mandar ca gobiernu ca, pur guerra o pur ca pandemia nacubi guihuinni. Zándaca caquiiñeʼ guyúbinu sti dxiiñaʼ neza ra nabézanu o guiníʼ íquenu chindézanu sti lugar né familia stinu para gápanu ni caquíʼñenu. ¿Xi zanda gacané laanu guicaanu decisión ni gusihuinni nápanu confianza zacané Jehová laanu yaʼ?

11. ¿Xi zanda gacané laanu ora guiaadxaʼ bueltu laanu? (Lucas 12:​29-31).

¹¹ Ti cosa nabé risaca ne ni zacané laanu nga gábinu Jehová xi naguu xizaa laanu (Prov. 16:3). Guinábanu laabe gudiibe laanu guendabiaaniʼ para guicaanu decisión jneza ne quixhedxibe ladxidoʼno para cadi chuʼ xhaatanu xizaa (biindaʼ Lucas 12:​29-31). Guinábanu laabe gacanebe laanu chuʼnu nayecheʼ né ca cosa ni nápanu (1 Tim. 6:​7, 8). Guyúbinu lu ca publicación stinu ni zacané laanu para gudxíʼlunu ca guendanagana ni gápanu ora guiaadxaʼ bueltu laanu. Stale tu laa maʼ huayacané ca videu ne ca artículo ni zeeda lu jw.org ni caníʼ de tema riʼ.

12. ¿Gunáʼ nga ca pregunta ni zanda gacané ti xpinni Cristu guicaa decisión jneza ni gacané familia stiʼ?

¹² Nuu tu laa huayuni dxiiñaʼ sti ladu ne rusaana familia stiʼ. Peru ra maʼ gudiʼdiʼ tiempu maʼ bidii cuenta cadi jneza decisión ni gucuaa. Ante guicaa tuuxa ti dxiiñaʼ cadi caquiiñeʼ si guiníʼ ique pabiáʼ zaguíxecabe laa sínuque caquiiñeʼ guiníʼ ique pa zuxheleʼ ni laa de Jehová (Luc. 14:28). Guníʼ ique ndiʼ: «¿Xi zazaaca pa chuaaʼ zitu de xheelaʼ? ¿Ñee ziaaʼ guiráʼ reunión, zuneʼ predicar ne zapaʼ tiempu para chuaaʼ gaxha de ca hermanu la?». Pa nápaluʼ xiiñiluʼ, laaca galán guiníʼ íqueluʼ pregunta nabé risaca riʼ: «¿Ximodo gusiniiseʼ ca xiiñeʼ casi ná Dios ne casi ná ca conseju stiʼ pa nuaaʼ zitu de laacabe yaʼ?» (Efes. 6:4). Ne ora chiguicaaluʼ xiixa decisión guníʼ ique xi decisión riuulaʼdxiʼ Dios guicaaluʼ ne cadi ni riuulaʼdxiʼ ca familia stiluʼ o ca xhamíguluʼ ni qué rinanda ca principiu ni zeeda lu Biblia.c Tony, ni nabeza Asia occidental, bidiicabe laa ti dxiiñaʼ nabé galán peru caquiiñeʼ chebe sti guidxi. Despué de biʼniʼ orarbe ne guníʼnebe xheelabe de laani, gudixhe íquebe cadi guicaabe dxiiñaʼ que ne bíʼnibe stipa guibaninebe huaxiéʼ bueltu. ¿Ximodo biiyabe decisión ni gucuaabe que yaʼ? Laabe guniʼbe: «Maʼ gunda gucaniáʼ stale binni gunibiaʼcaʼ Jehová ne maʼ gucanedu ca xiiñidu gannaxhiicaʼ Jehová. Maʼ bizíʼdidu, pa chinándadu ni ná lu Mateo 6:33 zapa Jehová laadu».

ORA QUIXHE ÍQUENU XI GÚNINU PARA CADI GUIAADXAʼ NI IQUÍʼÑENU ORA MAʼ HUANIISINU

13. ¿Xi zanda gúninu yanna para cadi guiaadxaʼ ni iquíʼñenu despué?

¹³ Laaca zanda gusihuínninu pabiáʼ nápanu confianza Jehová ora quixhe íquenu xi gúninu para cadi guiaadxaʼ ni iquíʼñenu ora maʼ huaniisinu. Riguu Biblia gana laanu gúninu dxiiñaʼ nadipaʼ para gápanu ni iquíʼñenu despué (Prov. 6:​6-11). Pa zanda la? galán guindísanu ti ndaa bueltu para iquíʼñenu despué. Dxandíʼ, zanda gacané bueltu ca laanu ora cadídinu lu xiixa guendanagana peru qué racaláʼdxinu gácani ni jma risaca para laanu (Ecl. 7:12).

14. ¿Ximodo racané Hebreos 13:5 laanu ora quixhe íquenu xi gúninu para cadi guiaadxaʼ ni iquíʼñenu ora maʼ huaniisinu?

¹⁴ Biquiiñeʼ Jesús ti ejemplu para bisiene pur gana si gapa binni cosa risaca pa «cadi ricu laa nezalú Dios» (Luc. 12:​16-21). Qué gánnanu xi zazaaca de xquendanabáninu guixíʼ (Prov. 23:​4, 5; Sant. 4:​13-15). Laaca guníʼ Jesús guiráʼ tu racalaʼdxiʼ gaca discípulo stibe naquiiñeʼ chuʼ dispuestu gusaana guiráʼ cosa risaca stiʼ (Luc. 14:​33, nota). Ne nga peʼ nga ni biʼniʼ ca xpinni Cristu de guidxi Judea lu primé siglu que ne bíʼnicabe ni de guidubi ladxidóʼcabe (Heb. 10:34). Ca dxi stinu riʼ, stale hermanu maʼ biníticaʼ dxiiñaʼ sticaʼ o ca cosa risaca nápacaʼ purtiʼ qué nacaʼ guni apoyarcaʼ xiixa partidu políticu (Apoc. 13:​16, 17). Maʼ bisihuínnicaʼ nápacaʼ confianza promesa ni biʼniʼ Jehová ra guníʼ: «Qué zusaanaʼ lii ne qué ziaanadxieeʼ de gacaniaʼ lii» (biindaʼ Hebreos 13:5). Rúninu stipa quixhe íquenu xi zanda gúninu para cadi guiaadxaʼ ni iquíʼñenu ora maʼ huaniisinu ne nápanu confianza zacané Jehová laanu pa guizaaca xiixa ni cadi gudixhe íquenu.

15. Ca hermanu ni napa xiiñiʼ, ¿ximodo naquiiñeʼ gúʼyacabe ca xiiñicabe? (Laaca zanda gúʼyaluʼ ca imagen ca).

¹⁵ Nuu lugar riguixhe ique ca guendaxheelaʼ ca gápacaʼ xiiñicaʼ purtiʼ riníʼ íquecaʼ ca xiiñicaʼ nga caquiiñeʼ guʼyaʼ ne gudii guiráʼ ni caquiiñecaʼ ora maʼ huaniisicaʼ. Peru Biblia ná ca ni napa xiiñiʼ nga caquiiñeʼ gápacaʼ xiiñicaʼ ne gudiicaʼ ni caquiiñecabe (2 Cor. 12:14). Dxandíʼ, ora maʼ ziniisi bixhoze ne jñaa binni zándaca caquiiñecaʼ gacané ca xiiñicaʼ laacaʼ o gudiicaʼ laacabe bueltu ne stale xiiñiʼ binni rúnicaʼ ni de guidubi ladxidoʼcaʼ (1 Tim. 5:4). Peru ca xpinni Cristu ni napa xiiñiʼ, ni jma risaca para laacaʼ nga gacanecaʼ ca xiiñicaʼ gúnicaʼ ni ná Jehová ne cadi gusiniisicabe laacaʼ para gúnicaʼ dxiiñaʼ ne gápacaʼ bueltu ti gudiicaʼ laacabe ni iquiiñecabe (3 Juan 4).

16. ¿Ximodo zanda gacanetu ca xiiñitu guiziidicaʼ gápacaʼ ni guibáninecaʼ despué? (Efesios 4:28).

¹⁶ Laatu, ca ni napa xiiñiʼ lagusiidiʼ laacaʼ gánnacaʼ ximodo zanda gápacaʼ ni guibaninecaʼ despué, laquixhe ti ejemplu galán nezalucaʼ ne lagusiidiʼ laacaʼ gápacaʼ confianza Jehová. Dede nahuiinicabe lagusiidiʼ laacabe gánnacabe pabiáʼ risaca gúnicabe dxiiñaʼ (Prov. 29:21; biindaʼ Efesios 4:28). Ra maʼ ziniisi ca xiiñitu, lagacané laacabe guchácabe gana ra scuela. Laguyubi lu ca publicación stinu ca principiu ni zeeda lu Biblia ni zacané laacabe guicaacabe ti decisión jneza ora guiníʼ íquecabe pabiáʼ guni estudiárcabe. Meta stitu nga gacanetu ca xiiñitu guidxélacaʼ ti dxiiñaʼ ni gacané laacaʼ gápacaʼ ni tidinecaʼ dxi ne gápacaʼ tiempu para guni predicarcaʼ jma o dede gácacaʼ precursor.

17. ¿Xi nanna dxíchinu?

¹⁷ Nanna dxichi ca xpinni Jehová zanda gudii Jehová ni caquiiñecaʼ ne racalaʼdxiʼ guni ni. Ra jma mayaca guinitilú guiráʼ cosa malu riʼ, zadídinu lu guendanagana ni zusihuinni pa dxandíʼ nápanu confianza Jehová. Peru intiica si guizaaca nápanu confianza zaquiiñeʼ Jehová poder stiʼ para gudii laanu ni caquíʼñenu ne nanna dxíchinu cadi nachucu náʼ Jehová, sínuque zindá nabe dede ra tiica si nuunu.