Galán nga chuʼnu gaxha de ca hermanu stinu

1, 2. ¿Gunáʼ nga ti cosa nabé risaca para Jehová, ne xi racaláʼdxibe gúninu?

TI COSA nabé risaca para Jehová nga modo runi tratarnu binni. Bisiidiʼ Jesús caquiiñeʼ gannaxhiinu binni cásica nadxiinu laca laanu (Mat. 22:​37-39). Ne zusihuínninu ni ra gácanu nachaʼhuiʼ ne binni ni qué runi ni ná Jehová. Zacá zinándanu ejemplu stiʼ Bixhózenu ni nuu guibáʼ, «laa rudii lugar guzaaniʼ gubidxa stiʼ ra nuu binni malu ne ra nuu binni nachaʼhuiʼ ne rusaba nisaguié ra nuu ca ni runi jneza ne ra nuu ca ni qué runi jneza» (Mat. 5:45).

² Nadxii Jehová guiráʼ binni peru jma nadxiibe ca ni ruzuubaʼ stiidxabe (Juan 14:21). Racalaʼdxiʼ Jehová chinándanu ejemplu stiʼ ra gannaxhiinu ca hermanu, nga runi rábibe laanu: «Laganaxhiisaa» (1 Ped. 4:8; Rom. 12:10). Ne zeeda gácani casi rannaxhiinu familia stinu o ti xhamígunu.

3. ¿Xi naquiiñeʼ gúninu para guiroobaʼ guendarannaxhii ni nápanu?

³ Para ganda guiroobaʼ ti yaga caquiiñeʼ gápanu ni ne guzeʼnu ni zacaca nga naquiiñeʼ gúninu para guiroobaʼ guendarannaxhii ni nápanu. Sicaríʼ gudxi apóstol Pablo ca xpinni Cristu: «Cadi gusaana de gannaxhiisaatu casi nadxiitu familia stitu» (Heb. 13:1). Racalaʼdxiʼ Jehová cadi gusaana de gannaxhiinu xcaadxi binni. Lu artículo riʼ zadúʼyanu xiñee caquiiñeʼ chuʼnu jma gaxha de ca hermanu ne xi zanda gúninu para cadi gusaana de gúninu ni.

XIÑEE CAQUIIÑEʼ CHUʼNU JMA GAXHA DE CA HERMANU

4. ¿Xi zacané laanu gusisácanu ni riete lu Salmo 133: 1? (Laaca zanda gúʼyaluʼ ca imagen ca).

⁴ (Biindaʼ Salmo 133:1). Cásica hombre ni bicaa Salmo que, laaca rininu «pabiáʼ galán ne sicarú nga» gaca xhamígunu ca binni ni nadxii Jehová. Peru pa qué gápanu cuidadu la? zándaca maʼ qué zadúʼyanu pabiáʼ sicarú nga nuu xquidxi Jehová tobi si. Zándaca guizaacanu casi ti binni ni ruuyaʼ ti yaga naroʼbaʼ, primé biaje gúʼyabe ni nabé ridxagayaabe peru cumu guiráʼ dxi ruuyabe yaga que la? ra tidiʼ tiempu maʼ qué ridxagayaabe gúʼyabe ni. Yanna, cumu nabé seguidu ridúʼyanu ca hermanu, zándaca stale biaje lu ti semana, ¿xi zanda gacané laanu para cadi gusaana de gusisácanu laacabe cásica primé biaje bidúʼyanu laacabe yaʼ? Ni zanda gacané laanu nga guiníʼ íquenu xiñee nabé risaca cada tobi de laacabe para laanu ne xiñee risácacabe para congregación.

5. Guendarannaxhii ni rusihuinni xquidxi Dios, ¿xi zanda gucaani xcaadxi binni guni?

⁵ Nuu binni ora rié reunión primé biaje nabé ridxagayaa purtiʼ ruuyaʼ pabiáʼ nadxiisaanu ne riuucaʼ seguru laani nga religión ni rusiidiʼ ni dxandíʼ. Jesús guníʼ: «Sicaríʼ nga zanna binni nácatu discípulo stinneʼ: pa nadxiisaatu» (Juan 13:35). Guzéʼtenu ni bizaaca ti joven láʼ Chaithra, bizulú gucuaabe estudiu ne gunabe chebe ti asamblea regional. Despué de primé dxi stiʼ asamblea que gúdxibe hermana ni cudii laabe estudiu que: «Qué huayuudxí quiidxi bixhozeʼ ne jñaaʼ naa. ¡Peru primé dxi stiʼ asamblea riʼ gudiidxicabe naa biaʼsi 52 biaje! Bineʼ sentir caquiiñeʼ Jehová familia stiʼ para gusihuinni pabiáʼ nadxii naa. Racalaʼdxeʼ chuaaʼ ndaaniʼ xquídxibe». Qué nusaana Chaithra de nicaa estudiu ne guyuunísabe lu iza 2024. Ora ruuyaʼ ca ni nacubi caziidiʼ de Jehová ca cosa ni rúninu ne pabiáʼ nadxiisaanu, stale biaje nga rucaa laacabe gúnicabe ni ná Jehová (Mat. 5:16).

6. Ora riuʼnu gaxha de ca hermanu, ¿ximodo rápani laanu?

⁶ Ra jma guidxíñanu ca hermanu rápani laanu. Sicaríʼ gudxi Pablo ca xpinni Cristu: «Naquiiñeʼ uguutu gana stobi guiráʼ dxi […] ti cadi quiteʼ poder stiʼ pecadu nin tobi de laatu ne iguidxi ladxidoʼto» (Heb. 3:13). Pa chuʼ biaje guireʼnu gana ne guni sentirnu cayaca nagana para laanu gúninu ni jneza zanda iquiiñeʼ Jehová ti hermanu para gacané laanu (Sal. 73:​2, 17, 23). ¡Guizáʼ galán nga nuu ca hermanu para gacanecaʼ laanu!

7. ¿Ximodo racané guendarannaxhii ca laanu chuʼnu tobi si? (Colosenses 3:​13, 14).

⁷ Nuunu lade binni ni runi stipa gusihuinni nadxiisaa ne pur nga ricaanu stale ndaayaʼ (1 Juan 4:11). Guzéʼtenu ti ejemplu, guendarannaxhii ca nga ni rucaa laanu guni huantarsaanu ne nga racané laanu para chuʼnu tobi si né ca hermanu stinu (Efes. 4:​2-6; biindaʼ Colosenses 3:​13, 14). Nga runi galán runi sentirnu ora riuunu ca reunión ca, ne lade si ca hermanu nga runi sentirnu zacá.

GUNI RESPETARNU CA HERMANU STINU

8. ¿Ximodo racané Jehová laanu chuʼnu tobi si?

⁸ Chuʼ ca xpinni Jehová tobi si lu guidubi naca guidxilayú nácani ti milagru stiʼ Jehová purtiʼ nácanu binni ruchee (1 Cor. 12:25). Biblia ná: «Dios peʼ nga cusiidiʼ laatu gannaxhiisaatu» (1 Tes. 4:9). ¿Ximodo rúnibe ni yaʼ? Lu Stiidxabe rábibe laanu xi peʼ nga naquiiñeʼ gúninu para chuʼnu jma gaxha de ca hermanu stinu. Ne rudiʼnu lugar gusiidiʼ Jehová laanu ra guni estudiar chaahuinu ni cayábibe laanu ne ra gúninu ni (Heb. 4:12; Sant. 1:25). Ne laanu, ca testigu stiʼ Jehová, rúninu stipa pur gúninu ni cayábibe laanu.

9. ¿Xi rusiidiʼ Romanos 12:​9-13 laanu de modo guni respetarnu xcaadxi binni?

⁹ ¿Ximodo zanda gacané Stiidxaʼ Dios laanu para guidxíñanu jma gaxha de ca hermanu stinu yaʼ? Guidúʼyanu ni guníʼ Pablo lu Romanos 12:​9-13 (biindaʼ ni). Sicaríʼ guniʼbe: «Primeca laatu nga gusihuínnitu runi respetartu xcaadxi binni». ¿Xi riníʼ ca diidxaʼ riʼ yaʼ? Naquiiñeʼ guyúbinu ximodo gusihuínninu nadxiinu ca hermanu stinu de gadxé gadxé modo, casi guni perdonarnu laacaʼ ora gucheenecaʼ laanu, guidxaagalunu laacaʼ ra lídxinu ne gudiʼnu de guidubi ladxidoʼno de ni nápanu (Efes. 4:32). Cadi cuézanu sti binni nga guyubi guidxiña laanu. Primeca laanu nga gúninu ni, zacá zadúʼyanu dxandíʼ peʼ nga ca diidxaʼ ni guníʼ Jesús: «Jma nayecheʼ riuu binni ora rudii que ora ricaa» (Hech. 20:35).

10. ¿Ximodo rusihuínninu riuuláʼdxinu gúninu dxiiñaʼ ora runi respetarnu xcaadxi binni? (Laaca zanda gúʼyaluʼ imagen ca).

¹⁰ Guidúʼyanu ti cosa ni guníʼ Pablo despué si de bizeetebe primeca laanu naquiiñeʼ gusihuínninu runi respetarnu xcaadxi binni. Sicaríʼ guniʼbe: «Laguni dxiiñaʼ cadi gácatu nachaabaʼ». Tuuxa ni riuuladxiʼ guni dxiiñaʼ runi xhiiñaʼ né stale gana ne rúnini casi peʼ modo gunábacabe ni laa. Proverbios 3:​27, 28 cayabi laanu: «Cadi gusaana de gacaneluʼ tuuxa ni caquiiñeʼ ni, pa nuu lu naluʼ gúniluʼ ni». Nga runi pa guidúʼyanu caquiiñeʼ tuuxa gacanenu laa, gúninu guiráʼ ni nuu lu nanu para gacanenu laabe. Cadi guiníʼ íquenu despué gacaniaʼ laabe o stiʼ binni gacané laabe (1 Juan 3:​17, 18).

11. ¿Xi zanda gacané laanu chuʼnu jma gaxha de ca hermanu?

¹¹ Sti modo rusihuínninu rusisácanu xcaadxi binni nga ra runi perdonarnu laacaʼ pur xiixa ni bíʼnicaʼ laanu. Efesios 4:26 ná: «Cadi gudiitu lugar guiaaziʼ gubidxa cadxiichirutu». ¿Xiñee yaʼ? Purtiʼ casi ná versículo 27 para «cadi gudiitu lugar gaca ni ná Binidxabaʼ». Lu Stiidxaʼ Dios, gatigá cayabi Jehová laanu naquiiñeʼ guni perdonarnu. Colosenses 3:13 ná: «Laguni perdonar de guidubi ladxidoʼto ni guni stobi laatu». Ti cosa ni racané laanu para chuʼnu jma gaxha de ca hermanu stinu nga guni perdonarnu ni gúnicaʼ laanu. Zacá ziuʼnu tobi si ne qué zadíndenu (Efes. 4:3). Ni caninu nga qué zanda diʼ chuʼnu tobi si pa qué guni perdonarnu.

12. ¿Ximodo racané Jehová laanu guni perdonarnu?

¹² Zándaca ziuu biaje zaca nagana para laanu guni perdonarnu tuuxa ni guizáʼ bininá laanu. Peru zanda gacané espíritu stiʼ Dios laanu guni perdonarnu laabe. Despué de ruzeeteʼ Biblia lagannaxhiisaa ne laguni dxiiñaʼ, ruzeeteni: «Lagusihuinni nápatu stale espíritu santu». Ni caninu raríʼ nga «pur poder stiʼ “espíritu”» santu, zanda gusihuinni ti xpinni Cristu «guizáʼ napa gana» guni ni jneza, ne ládeni nga zeeda gusihuinni nadxii binni ne runi perdonar de guidubi ladxidóʼ (biiyaʼ guiropa nota de estudiu stiʼ Romanos 12:11). Nga runi guinábanu Jehová de guidubi ladxidoʼno gacané laanu (Luc. 11:13).

«CADI CHUʼ DIVISIÓN LÁDETU»

13. ¿Xi zándaca gucaa laanu gusaana de chuʼnu tobi si né ca hermanu stinu?

¹³ Gadxé gadxé nga modo naca cada tobi de laanu ni nuu ndaaniʼ ti congregación (1 Tim. 2:​3, 4). Cumu maʼ gadxé nga modo biniisinu la? zándaca gadxé gadxé decisión nga guicaanu ora guidúʼyanu ximodo guzuchaahuinu, xi tratamientu guicaanu ne xi gúninu para chuʼnu nayecheʼ ti ratu (Rom. 14:4; 1 Cor. 1:10). Peru maʼ bisiidiʼ Dios laanu gannaxhiisaanu ne pur nga qué rininu jma jneza ca decisión ni ricaanu que ca decisión ni ricaa xcaadxi hermanu (Filip. 2:3).

14. ¿Xi cadi naquiiñeʼ gusaana de gúninu, ne xiñee?

¹⁴ Sti cosa ni zanda gacané laanu para cadi gusaana de chuʼnu tobi si ndaaniʼ congregación nga gúninu stipa pur cuʼnu gana ne quixhedxinu ladxidóʼ xcaadxi (1 Tes. 5:11). Tiempu riʼ stale hermanu ni guyuu inactivu o ca ni biree ndaaniʼ congregación maʼ bibiguétacaʼ ra nuu Jehová ne nayecheʼ ridxagalunu laacabe (2 Cor. 2:8). Sicaríʼ guníʼ ti hermana dxi bibiguetaʼ ra Yoo stiʼ Reinu despué de guyuu 10 iza inactiva: «Guizáʼ cayecheʼ ca hermanu que ora rugapadiúxicaʼ naa» (Hech. 3:19). Pur ni biʼniʼ ca hermanu riʼ, ¿ximodo gucané ni laabe yaʼ? Sicaríʼ guniʼbe: «Biiyaʼ dxicheʼ Jehová ngue cayacané naa guibiguetaʼ guibaneʼ nayecheʼ». Ora rúninu stipa pur cuʼnu gana stobi zanda iquiiñeʼ Jesús laanu para quixhedxinu ladxidóʼ «ca ni nuáʼ stale cosa nanaa» (Mat. 11:​28, 29).

15. ¿Xi sti modo zanda gacanenu chuʼnu tobi si? (Laaca zanda gúʼyaluʼ imagen ca).

¹⁵ Laaca zanda gacanenu chuʼ ca hermanu tobi si pur ca diidxaʼ ni guininu. Job 12:11 ná: «¿Ñee qué zudii diáganu cuenta pa galán ca diidxaʼ cayunadiaga cásica rudii lúdxinu cuenta pa nanixe ti guendaró la?». Cásica ti cocineru chaʼhuiʼ runi prueba pa nanixe biree guendaró stiʼ ante gudii ni gó binni. Zaqueca nga laanu ante guininu xiixa, galán guiníʼ íquenu xi chiguininu ti zacá ca diidxaʼ guininu cúʼcani gana, quixhedxícani ladxidóʼ ne gacanécani binni ni cucaadiaga laanu (Sal. 141:3; Efes. 4:29).

16. ¿Tuu nga ca ni jma naquiiñeʼ guni stipa pur guiníʼ diidxaʼ ni cuʼ gana?

¹⁶ Ca hombre ni maʼ bichaganáʼ ne zaqueca ca hombre ne ca gunaa ni napa xiiñiʼ laacaʼ nga jma naquiiñeʼ gúnicaʼ stipa pur guiniʼcaʼ diidxaʼ ni cuʼ gana (Col. 3:​19, 21; Tito 2:4). Laaca riguu ca ancianu gana ne riguixhedxicaʼ ladxidóʼ ca dendxuhuiiniʼ stiʼ Jehová (Is. 32:​1, 2; Gál. 6:1). Cadi guiaandaʼ laanu ni ná ti proverbio: «¡Ne guizáʼ sicarú ti diidxaʼ guiníʼ tuuxa ora peʼ caquiiñeʼ ni!» (Prov. 15:23).

«GANNAXHIINU DE DXANDÍʼ NE GUSIHUÍNNINU NI»

17. ¿Xi zanda gúninu para gusihuínninu dxandíʼ peʼ nadxiinu ca hermanu stinu?

¹⁷ Sicaríʼ guni apóstol Juan: «Cadi guinísinu nadxiinu stobi, sínuque gannaxhiinu de dxandíʼ ne gusihuínninu ni ra gacanenu» (1 Juan 3:18). ¿Xi zanda gúninu para gusihuínninu dxandíʼ nadxiinu ca hermanu yaʼ? Ora jma chuʼnu juntu né ca hermanu jma riuʼnu gaxha de laacaʼ ne jma rannaxhiinu laacaʼ. Nga runi guyúbinu chuʼnu juntu né laacabe ra reunión ne zaqueca lu predicación. Laaca galán chigánnanu laacabe ra lídxicabe. Pa gúninu ni, zaníʼ binni: «Dios peʼ nga cusiidiʼ laatu gannaxhiisaatu» (1 Tes. 4:9). Ne laapenu zadúʼyanu «pabiáʼ galán ne sicarú nga chuʼ ca hermanu tobi si» (Sal. 133:1).