Guizáʼ galán nga runi sentirnu chuʼnu gaxha de Dios

1, 2. a) ¿Xi caquiiñeʼ gúninu para gápanu ti xhamígunu? b) ¿Xi zadúʼyanu lu artículo riʼ?

¿ÑEE nuu ti binni ni nabé xhamíguluʼ la? ¿Rietenaláʼdxiluʼ xi bíʼniluʼ para gunda guca xhamígutu la? Zándaca nabé bidxaagaluʼ laabe ne gúnnaluʼ stale cosa de laabe. Gúnnaluʼ xii nga ca cosa ni riuuláʼdxibe ne xii nga ca cosa ni qué riuuláʼdxibe. Laaca biiyaluʼ nápabe cualidad galán ni riuuláʼdxiluʼ gápaluʼ. Ne despué, nabé gunnaxhiiluʼ laabe.

² Para ganda gápanu ti xhamígunu casi ni bizéʼtenu riʼ caquiiñeʼ gúninu stipa ne cueenu tiempu para guni biaʼ chaahuinu laabe. Ne ngaca nga ni caquiiñeʼ gúninu para gaca xhamígunu Jehová. Lu artículo riʼ zadúʼyanu ximodo zanda guidxíñanu jma gaxha de Jehová, ni jma xhamígunu. Peru primé, guininu xiñee nabé galán nga guidxíñanu laabe.

3. ¿Xiñee nabé risaca guiníʼ íquenu ca ndaayaʼ ni zápanu pa chuʼnu gaxha de Jehová? Bizeeteʼ ti ejemplu.

³ Nabé risaca guiníʼ íquenu guiráʼ razón nápanu para chuʼnu jma gaxha de Jehová (Sal. 63:​6-8). ¿Xiñee risaca ni yaʼ? Guzéʼtenu ti ejemplu ni zacané laanu guiénenu ni. Guiráʼ binni nanna caquiiñeʼ gó guendaró ni gacané laa chuʼ nazaaca, gueʼ nisa biaʼ caquiiñeʼ cuerpu stiʼ, guni ejerciciu ne guiziilaʼdxiʼ. Peru neca zacá stale binni qué runi ca ni bizéʼtenu riʼ ne qué rápacaʼ laacaʼ. Peru pa gatigá guiníʼ ique ti binni pabiáʼ risaca nga chuʼ nazaaca la? zúnibe stipa gúnibe ca ni bizéʼtenu riʼ. Zacaca nga laanu, zabeendunu ni galán pa chuʼnu gaxha de Jehová. Ne pa guiníʼ íquenu ca ndaayaʼ ni zápanu ra gúninu ni, zaguuni gana laanu guidxíñanu jma gaxha de laabe (Sal. 119:​27-30).

4. ¿Xi guníʼ hombre ni bicaa Salmo 73:28?

⁴ (Biindaʼ Salmo 73:28). Hombre bicaa Salmo 73 nácabe de tribu stiʼ Leví ne bixhídxibe ra templu. Zándaca maʼ zinebe stale iza de cayúnibe ni ná Jehová peru bidiibe cuenta risaca nga cadi guiaandaʼ laabe guizáʼ galán nga chuʼbe gaxha de Dios. Ne ni racaláʼdxibe nga guʼyaʼ xcaadxi pabiáʼ galán nga gaca xhamígucaʼ Jehová. Yanna, guidúʼyanu xi zabeendunu ra gaca xhamígunu Dios.

RIUʼNU NAYECHEʼ ORA RIDXÍÑANU DIOS

5. a) ¿Xiñee riuʼnu nayecheʼ ora ridxíñanu gaxha de Jehová? b) ¿Xi ribeenduluʼ ne ximodo racané guendanuuxpiaaniʼ stiʼ Jehová lii? (Proverbios 2:​6-16).

⁵ Ora qué rixélenu de Jehová jma nayecheʼ riuʼnu (Sal. 65:4). ¿Xiñee rininu ndiʼ yaʼ? Pur stale razón. Guzéʼtenu ti ejemplu, ora rinándanu ca conseju nabé galán ni zeeda lu Stiidxabe, ribeendunu ni galán. Rapa guendanuuxpiaaniʼ stiʼ Dios laanu de ca cosa malu ni nuu lu guidxilayú riʼ ne racaneni laanu cadi gucheʼnu (biindaʼ Proverbios 2:​6-16). Nga runi, Biblia ná: «Nayecheʼ nga hombre ni maʼ bidxela guendanuuxpiaaniʼ ne hombre ni guyubi guendariene» (Prov. 3:13).

6. ¿Xiñee maʼ qué ñuu hombre bicaa Salmo que nayecheʼ?

⁶ Peru nga qué riníʼ qué ziuu dxi chuʼ ca xhamigu Jehová triste. Guidúʼyanu ni bizaacaʼ hombre bicaa Salmo 73 ora guníʼ íquebe lu ca cosa ni ruluíʼ cadi jneza cayaca, maʼ qué ñuube nayecheʼ. Guyuube triste purtiʼ guníʼ íquebe jma galán nabani ca binni ni qué runi respetar Dios ne qué rinándacaʼ ni ná ca ley stiʼ, dede guchelube guibánibe modo nabánicaʼ. Para laabe ca binni malu ne ca ni rudxiibaʼ laca laa jma nápacaʼ bueltu, jma nazaaca nuucaʼ ne qué racanacaʼ. Peru ni dxandíʼ la? cadi zacá ni (Sal. 73:​3-7, 12). Cumu maʼ bixhacaláʼdxibe modo nabánibe bizulú guníʼ íquebe pa risaca guiráʼ stipa ni rúnibe pur gúnibe ni ná Jehová. Cayuubaʼ ladxidoʼbe guniʼbe: «Rihuinni dxichi pur gana si bisiayaʼ ladxiduáʼ ne pur gana gudiibeʼ nayaʼ para gusihuinneʼ qué gapaʼ donda» (Sal. 73:13).

7. ¿Xi zacané laanu chuʼnu nayecheʼ ora guni sentirnu nuunu triste? (Laaca zanda gúʼyaluʼ imagenca).

⁷ Biʼniʼ hombre bicaa Salmo que xiixa para maʼ cadi chuʼ triste. Guyuube «ndaaniʼ santuariu nandxóʼ stiʼ Dios» ne raqué nga gucané Jehová laabe guchaabe modo riníʼ íquebe (Sal. 73:​17-19). Cumu Jehová nga ni jma xhamígunu la? nánnabe ora nuunu triste. Caquiiñeʼ guinábanu laabe gábibe laanu xi gúninu ne despué gudiʼnu lugar gacané Stiidxabe laanu ne laaca gudiʼnu lugar gacané congregación laanu. Zacá zápanu stipa para gúninu ni nabe neca nuunu triste. Ne ora qué guidxélanu xi gúninu purtiʼ nuunu xizaa, zaguixhedxí Jehová ladxidoʼno ne zacané laanu chuʼnu nayecheʼ (Sal. 94:19).a

CHUʼNU GAXHA DE DIOS RACANENI LAANU GUIBÁNINU NAYECHEʼ NE GÁPANU ESPERANZA

8. ¿Gunáʼ nga xhupa ndaayaʼ ricaanu ora ridxíñanu gaxha de Dios?

⁸ Guidúʼyanu xhupa ndaayaʼ ni ricaanu ora ridxíñanu gaxha de Dios. Primé la? zanda guibáninu nayecheʼ pur guiráʼ ni gúninu. Ne guiropa, rudiini laanu ti esperanza (Jer. 29:11). Yanna, guzéʼtenu ca ndaayaʼ riʼ tobi pur tobi.

9. ¿Xiñee nayecheʼ ribáninu ora raca xhamigu Jehová?

⁹ Ora raca xhamígunu Jehová ribáninu nayecheʼ. Tiempu riʼ stale binni qué runi cré pa nuu Dios. Nga runi nuu de laacaʼ qué gánnacaʼ xi pur nabáninu ne runi crecaʼ zedandá dxi maʼ qué ziuu binni lu guidxilayú riʼ. Peru pur ni maʼ bizíʼdinu lu Stiidxaʼ Dios, nanna dxíchinu «dxandíʼ nuube ne rudiibe premiu ca ni ruyubi laabe sin guiree gana» (Heb. 11:6). Bizáʼ Jehová laanu, Bixhózenu ni nuu guibáʼ, para guni adorarnu laa. Nga runi guizáʼ nayecheʼ ribáninu ora rúninu ni nabe (Deut. 10:​12, 13).

10. Casi riete lu Salmo 37:​29, ¿xi cabeza ca ni naguixheʼ confianza sticaʼ lu náʼ Jehová?

¹⁰ Stale binni qué gapa esperanza, nabánicaʼ para si gúnicaʼ dxiiñaʼ, guichaganacaʼ, gusiniisicaʼ xiiñicaʼ, guindísacaʼ ti ndaa bueltu para gápacaʼ ni iquiiñecaʼ ora maʼ qué ganda gúnicaʼ dxiiñaʼ. Purtiʼ qué gánnacaʼ xi maʼ biʼniʼ prometer Dios chiguni. Peru laanu, ca xpinni Jehová riguíxhenu esperanza stinu lu nabe (Sal. 25:​3-5; 1 Tim. 6:17). Nápanu confianza xhamígunu, Dios stinu, ne nánnanu zúnibe guiráʼ ni maʼ guniʼbe. Stale cosa galán nga cabézanu gaca ne ládecani nga nuu guni adorarnu Jehová sin qué chuʼ dxi gátinu ndaaniʼ Paraísu (biindaʼ Salmo 37:29).

11. ¿Xi ndaayaʼ ricaanu ora raca xhamígunu Dios, ne xi runi sentirbe ora raca xhamígunu laabe?

¹¹ Nuu stale razón ni rusihuinni galán nga gaca xhamígunu Dios. Guzéʼtenu ti ejemplu, cayuni prometer Jehová laanu zuni perdonar ca pecadu stinu pa gaca arrepentirnu (Is. 1:18). Ndiʼ riníʼ zanda gúninu ni nabe sin guchiiñaʼ conciencia stinu laanu pur ca cosa ni cadi jneza bíninu dxiqué (Sal. 32:​1-5). Ne laaca rusiéchenu ladxidóʼ Jehová ne nga nabé rusiecheʼ laanu (Prov. 23:15). Ne zándaca huacaaluʼ xcaadxi ndaayaʼ pur naca Jehová xhamíguluʼ. Yanna, ¿xi naquiiñeʼ gúninu para guidxíñanu jma gaxha de laabe yaʼ?

XI CAQUIIÑEʼ GÚNINU PARA GUIDXÍÑANU JMA GAXHA DE DIOS

12. ¿Xi caquiiñeʼ gúniluʼ para guidxíñaluʼ jma gaxha de Dios?

¹² Pa nácaluʼ ti testigu stiʼ Jehová ni maʼ guyuunisa, nga riníʼ maʼ biziidiluʼ stale cosa de laabe ne de Jesucristu, maʼ guca arrepentirluʼ de ca pecadu stiluʼ, maʼ bisihuínniluʼ nápaluʼ fe Dios ne cayúniluʼ stipa chinándaluʼ ca ley stibe. Nga rusihuinni nuuluʼ gaxha de Jehová. Ne ndiʼ nga ca cosa ni cadi naquiiñeʼ gusaana de gúninu para ganda guidxíñanu jma gaxha de Dios (Col. 2:6).

13. ¿Xi chonna cosa zacané laanu guidxíñanu jma gaxha de Jehová?

¹³ ¿Xi zacané laanu guidxíñanu jma gaxha de Jehová? Primé, cadi naquiiñeʼ gusaana de guidúʼndanu ne guni estudiarnu Biblia. Qué racaláʼdxisinu gánnanu ca cosa ni cadi nagana de Dios, sínuque laaca racaláʼdxinu guizíʼdinu xi naguixhe ique Dios guni para laanu ne guibáninu casi ná ca principiu zeeda lu Biblia (Efes. 5:​15-17). Guiropa, caquiiñeʼ guquídxinu fe stinu ra guiníʼ íquenu guiráʼ ni maʼ biʼniʼ Jehová para gusihuinni nadxii laanu. Ne guionna, caquiiñeʼ gacananaláʼdxinu ca cosa ni runiná ladxidóʼ Jehová ne cadi gaca xhamígunu ca binni ni runi cani (Sal. 1:1; 101:3).

14. ¿Xi caquiiñeʼ gúninu para gusiéchenu Jehová? (1 Corintios 10:31; laaca zanda gúʼyaluʼ ca imagen ca).

¹⁴ (Biindaʼ 1 Corintios 10:31). Nabé risaca gúninu stipa pur gúninu ca cosa ni nánnanu zusiecheʼ Jehová. Cadi caquiiñeʼ si guni predicarnu ne chuunu reunión, sínuque guiráʼ ni gúninu lu xquendanabáninu caquiiñeʼ gusiéchecani Jehová. Guzéʼtenu chupa chonna ejemplu, nánnanu riuuladxiʼ Jehová gácanu honradu lu guiráʼ ca cosa ni gúninu ne gudiʼnu de guidubi ladxidoʼno de ni nápanu xcaadxi binni (2 Cor. 8:21; 9:7). Laaca ribézabe gusihuínninu rusisácanu guendanabani ni maʼ bidiibe laanu. Nga runi, raca xhamígunu laabe ora rápanu ni ridoʼno ne ni rideʼnu ne ora ruyúbinu xcaadxi modo para chuʼnu nazaaca. Ora ruuyaʼ Jehová rúninu stipa pur gusihuínninu rudiʼnu xquixe peʼ laa pur guiráʼ ni runi pur laanu jma rannaxhii laanu (Luc. 16:10).

15. ¿Ximodo racalaʼdxiʼ Jehová guni tratarnu xcaadxi binni?

¹⁵ Nachaʼhuiʼ Jehová ne ca binni ni runi ni jneza ne zaqueca cani qué runi ni jneza (Mat. 5:45). Ne ribézabe gácanu nachaʼhuiʼ ne xcaadxi binni. Guzéʼtenu ti ejemplu, racalaʼdxiʼ Jehová cadi guiníʼ ca xpinni mal de tuuxa, cadi tíndecaʼ ne racaláʼdxibe gácacaʼ nadóʼ né guiráʼ binni (Tito 3:2). Nga runi, qué riníʼ íquenu jma risácanu que ca binni ni qué runi cré ni runi crenu (2 Tim. 2:​23-25). Pa qué gusaana de gácanu nachaʼhuiʼ ne xcaadxi binni la? zadxíñanu jma gaxha de Jehová.

ZANDA GUIDXÍÑANU DIOS ORA CAREʼNU GANA

16. ¿Ximodo biʼniʼ sentir hombre bicaa Salmo 73?

¹⁶ Pa chuʼ dxi guni sentirnu cadi nuu Jehová gaxha de laanu. Cadi guiaandaʼ laanu ni bizaaca hombre bicaa Salmo 73, nabé triste nuube guniʼbe: «Bilá maʼ qué ñapa ñeeʼ stipa para nuzuhuaaʼ dxiicheʼ» (Sal. 73:2). Bizeetebe bidaabe xiana, gúcabe «ti binni ni qué riuu razón», ne nezalú Jehová gúcabe «casi ti maniʼ ni qué riene» (Sal. 73:​21, 22). ¿Peru ñee guníʼ íquebe pur ca cosa ni cadi jneza guniʼbe maʼ cadi nadxii Jehová laabe ne maʼ qué gápabe remediu la?

17. a) ¿Xi biʼniʼ hombre bicaa Salmo que ora guyuu triste? b) ¿Xi rusiidiʼ ni bizaacabe ca laanu? (Laaca zanda gúʼyaluʼ ca imagen ca).

¹⁷ Pa guyuu biaje guníʼ ique hombre ni bicaa Salmo que maʼ cadi nadxii Jehová laa la? zándaca cadi xadxí biʼniʼ sentirbe zaqué. ¿Ximodo nánnanu ni yaʼ? Purtiʼ ora guyuube triste pur ni bizaacaʼ riʼ, bidiibe cuenta caquiiñeʼ guyúbibe chuʼbe gaxha de Jehová. Ne nánnanu zacá ni pur ni guniʼbe: «Peru yanna qué zusaanaʼ lii; naazeluʼ nayaʼ ladu derechu. Zudiiluʼ conseju naa para gannaʼ xi guneʼ, ne despué zusisácaluʼ naa» (Sal. 73:​23, 24). Laanu laaca galán gúninu stipa cadi guixélenu de Jehová, Guié naroʼbaʼ stinu, para gacané laanu guzuhua dxiichinu lu ni runi crenu ora rudxíʼlunu xiixa debilidad ni nápanu o nuunu triste pur ca cosa ni cadi jneza bíninu dxiqué (Sal. 73:26; 94:18). Yanna, ¿xi zanda gúninu pa chuʼ ora guchéʼnenu Jehová yaʼ? Zanda guibiguétanu ra nuube purtiʼ nuunu seguru nuube listu para guni perdonarbe laanu (Sal. 86:5). Nabé risaca nga chuʼnu gaxha de Jehová jmaruʼ si ora guizáʼ nuunu triste ne nabé careʼnu gana (Sal. 103:​13, 14).

QUÉ CHUʼ DXI GUSAANA DE GUIDXÍÑANU GAXHA DE DIOS

18. ¿Xiñee qué ziuu dxi gusaana de guidxíñanu gaxha de Jehová?

¹⁸ Qué ziuu dxi gusaana de guidxíñanu gaxha de Jehová purtiʼ qué zusaana de guizíʼdinu cosa nacubi de laabe. Ruzeeteʼ Biblia guirutiʼ zanda guiene guendanuuxpiaaniʼ, guendananna ne ca neza stiʼ Jehová (Rom. 11:33).

19. ¿Xi rusiidiʼ ca Salmo riʼ laanu?

¹⁹ Salmo 79:13 ná: «Laadu, xquídxiluʼ ne dendxuʼ stiluʼ, qué zusaana de gudiʼdu xquixe peʼ lii ne zusisácadu lii, generación ni nuu yanna riʼ ne ni guibani despué». Zanda chuʼluʼ seguru pa qué gusaana de guidxíñaluʼ gaxha de Jehová, qué ziuu dxi gusaana de cuʼbe ndaayaʼ lii, ne zanda guiniʼluʼ: «Dios nga guié naroʼbaʼ stiʼ ladxiduáʼ, ne ni raca caber naa guicaaʼ biaʼ dxi guibaneʼ» (Sal. 73:26).