Gunna dxichi nadxii Jehová lii

1. ¿Xiñee bidiiluʼ xquendanabániluʼ Jehová? (Laaca zanda gúʼyaluʼ ca imagen ca).

¿ÑEE rietenaláʼdxiluʼ dxi bidiiluʼ xquendanabániluʼ Jehová la? Gucuaaluʼ decisión riʼ purtiʼ binibiaʼluʼ Jehová ne guizáʼ gunnaxhiiluʼ laa. Nga runi gúdxiluʼ laabe ni jma risaca lu xquendanabániluʼ nga gúniluʼ ni nabe ne qué zusaana de gannaxhiiluʼ laabe de guidubi ladxidoʼloʼ, guidubi xhiálmaluʼ, guidubi xquendabiaaniluʼ ne guiráʼ stipa stiluʼ (Mar. 12:30). Dede dxiqué, guendarannaxhii ni nápaluʼ Jehová zéʼ dxi ziroobani. Nga runi, pa guinabadiidxaʼ tuuxa lii «¿Ñee nuuluʼ seguru nadxiiluʼ Jehová la?», nagueendaca zacábiluʼ: «¡Nuaaʼ seguru pue! Ne qué zanda diʼ guchaagaʼ guendarannaxhii ni napaʼ Jehová ne guendarannaxhii ni napaʼ ti binni o xiixa purtiʼ guizáʼ nadxieeʼ laabe».

2, 3. ¿Xi racalaʼdxiʼ Jehová? (Jeremías 31:3). ¿Xi zadúʼyanu lu artículo riʼ?

² Yanna, pa ninabadiidxacabe lii, «¿Nuuluʼ seguru nadxii Jehová lii la?» Zándaca nibézaluʼ o niníʼ íqueluʼ xi nicábiluʼ, purtiʼ zándaca riníʼ íqueluʼ qué runi merecerluʼ gannaxhii Jehová lii. Ti hermana ni nabé nagana modo biniisi guníʼ: «Nannaʼ nadxieeʼ Jehová. Peru stale biaje riníʼ iqueʼ pa nadxiibe naa». Yanna, ¿xi peʼ nga runi sentir Jehová pur lii yaʼ?

³ Racalaʼdxiʼ Jehová chuʼluʼ seguru dxandíʼ peʼ nadxiibe lii (biindaʼ Jeremías 31:3). Laapebe gucaláʼdxibe gaca xhamígube lii ne pur nga bichíñabe lii ra nuube. Dxi bidiiluʼ xquendanabániluʼ Jehová ne guyuunísaluʼ, bidiibe lii ti cosa nabé risaca: guendarannaxhii stibe ni qué ziuu dxi guirá. Guizáʼ naroʼbaʼ guendarannaxhii riʼ ne qué ziuu dxi guirá ni. Laani nga guendarannaxhii ni runi sentir Jehová pur cada tobi de ca xpinni ne lii nga tobi de laacabe. Purtiʼ stibe lii ne nácaluʼ ti binni nabé risaca para laabe (Mal. 3:17, nota). Qué racalaʼdxiʼ Jehová guiníʼ íqueluʼ cadi nadxiibe lii, sínuque gápaluʼ confianza ni gupa apóstol Pablo ora bicaa «Purtiʼ nannaʼ dxicheʼ nin guendaguti, nin guendanabani, nin ca ángel, nin ca gobiernu, nin ca cosa ni nuu yanna, nin ca cosa ni gueedaruʼ, nin poder, nin ni nuu luguiáʼ, nin ni nuu xagueteʼ, ne ninruʼ sti creación qué zanda guxheleʼ laanu de guendarannaxhii stiʼ Dios» (Rom. 8:38, 39). Lu artículo riʼ, zadúʼyanu xiñee risaca chuʼnu seguru nadxii Jehová laanu ne xi zacané laanu guni crenu dxandíʼ ni.

XIÑEE NABÉ RISACA CHUʼNU SEGURU DXANDÍʼ NADXII JEHOVÁ LAANU

4. ¿Gunáʼ nga tobi de ca trampa ni jma riquiiñeʼ Binidxabaʼ, ne xi zanda gúninu para cadi guiábanu luni?

⁴ Pa nuunu seguru nadxii Jehová laanu zanda guzuhuaʼnu dxiichiʼ ne qué ziábanu «lu ca trampa stiʼ Binidxabaʼ» (Efes. 6:11). ¿Xi trampa nga riquiiñeʼ Binidxabaʼ para gucaa laanu gusaana de gúninu ni ná Jehová yaʼ? Rucaabe laanu guiníʼ íquenu cadi nadxii Jehová laanu. Cadi guiaandaʼ laanu nabé nexhená Binidxabaʼ. Biblia ná nácabe casi ti lión (1 Ped. 5:8, 9). Stale biaje ca lión ca jma nga rucaalúcame ca manihuiiniʼ ni huaxiéʼ stipa napa. Zacaca nga Binidxabaʼ, stale biaje rucaalube laanu ora huaxiéʼ stipa nápanu, ora maʼ bidxáganu, ora maʼ cayuuba ladxidoʼno pur ca cosa ni bizaacanu dxiqué, laaca rucaalube laanu ora maʼ cadxagalunu guendanagana ne ora riuʼnu xizaa pur ni guizaaca despué (Prov. 24:10). Para cadi guiábanu lu ca trampa stibe ne cadi gaca xcúxtube, naquiiñeʼ gucaʼlunu laabe ne gúninu guiráʼ ni nuu lu nanu para guni crenu dxandíʼ nadxii Jehová laanu (Sant. 4:7).

5. ¿Xiñee nabé risaca nga guni sentirnu nadxii Jehová laanu ne rusisaca laanu?

⁵ Pa nuunu seguru dxandíʼ nadxii Jehová laanu, ziuʼnu jma gaxha de laabe. ¿Xiñee yaʼ? Purtiʼ bizáʼ Jehová laanu para gannaxhiinu binni ne guni sentirnu nadxiicabe laanu. Ora rusihuinni tuuxa nadxii laanu ni rúninu nga laaca rannaxhiinu laabe. Nga runi, ora jma runi sentirnu nadxii Jehová laanu ne rusisaca laanu jmaruʼ si rannaxhiinu laabe (1 Juan 4:19). Ne ora jma gannaxhiinu laabe, jma rannaxhiibe laanu, Biblia ná: «Laguidxiña ra nuu Dios ne laa zadxiña laatu» (Sant. 4:8). Yanna, guidúʼyanu xi zanda gacané cada tobi de laanu para chuʼnu seguru dxandíʼ nadxii Jehová cada tobi de laanu.

¿XI ZACANÉ LII CHUʼLUʼ SEGURU NADXII JEHOVÁ LII?

6. ¿Xi zanda guinábaluʼ Jehová pa raca nagana para lii guni creluʼ nadxiibe lii?

⁶ Cadi gusaana de guinábaluʼ Jehová gacané lii guiéneluʼ xiñee nadxiibe lii (Luc. 18:1; Rom. 12:12). Zándaca stale biaje caquiiñeʼ guni orarluʼ para gacané Jehová lii gúʼyaluʼ dxandíʼ nadxiibe lii. Pa rucaa ladxidoʼloʼ lii cadi guni creluʼ nadxii Jehová lii, cadi guiaandaʼ lii jma nandxóʼ Jehová que ladxidoʼloʼ (1 Juan 3:19, 20). Jehová si nga ni jma runibiáʼ chaahuiʼ lii ne ruuyabe ca cualidad galán ni nápaluʼ dede ca cualidad ni qué gánnaluʼ pa nápaluʼ (1 Sam. 16:7; 2 Crón. 6:30). Nga runi gudxi Jehová guiráʼ xixé ni runi sentirluʼ ne gunabaʼ laabe gacanebe lii chuʼluʼ seguru dxandíʼ nadxiibe lii (Sal. 62:8). Ne despué de guni orarluʼ, biʼniʼ guiráʼ ni nuu lu naluʼ. Guidúʼyanu caadxi cosa ni zanda gúniluʼ.

7, 8. ¿Ximodo racané ca versículo ni zeeda lu Salmo laanu chuʼnu seguru nadxii Jehová laanu?

⁷ Gupa confianza dxandíʼ ni riníʼ Jehová. Biquiiñeʼ Jehová espíritu santu stiʼ para gacané ca hombre que gucaacaʼ lu Biblia modo peʼ nácabe. Guzéʼtenu ti ejemplu, guizáʼ galán caadxi diidxaʼ ni guníʼ David de Jehová, laabe guniʼbe: «Nuu Jehová gaxha de ca ni maʼ gucadé ladxidóʼ; rulabe ca ni maʼ biree gana» (Sal. 34:18). Pa zacá nga cayuni sentirluʼ, zándaca riníʼ íqueluʼ guirutiʼ ziene lii o guirutiʼ zanda gacané lii. Peru Jehová cayuni prometer lii qué zaxélebe de lii purtiʼ nánnabe óraca nga jma peʼ caquiiñeluʼ gacanebe lii. Lu sti salmo guníʼ David: «Gudaa nisa ni riete luaʼ ndaaniʼ odre stiluʼ» (Sal. 56:8). Dxiqué la? odre ca nga riquiiñeʼ ca ni zeʼ de viaje para guidaa nisa sticaʼ ne guizáʼ risaca dede últimu gota daʼ ndaanini. Zaqueca nga lii, ora cadíʼdiluʼ lu ti guendanagana guizáʼ riuubaʼ ladxidóʼ Jehová ne zanda guininu rutópabe cada gota nisa riete luluʼ para gusihuínnibe pabiáʼ rizaaláʼdxibe lii. Laaca gudxi David Jehová: «Runibiáʼ chaahuiluʼ guiráʼ ca neza stinneʼ» (Sal. 139:3). Ruuyaʼ Jehová guiráʼ ca neza stiluʼ, ni caninu raríʼ nga ruuyabe guiráʼ ca cosa ni rúniluʼ ne jmaruʼ si ca cosa galán ni rúniluʼ (Heb. 6:10). ¿Xiñee yaʼ? Purtiʼ guizáʼ rusisácabe guiráʼ ca cosa galán ni rúniluʼ para gusiécheluʼ laabe.a

⁸ Pur ca versículo riʼ casi ñaca ñabi Jehová lii: «Racalaʼdxeʼ gánnaluʼ guizáʼ nadxieeʼ lii ne guizáʼ rizaaladxeʼ lii». Peru casi maʼ bidúʼyanu, racalaʼdxiʼ Binidxabaʼ guiníʼ íqueluʼ cadi nadxii Jehová lii. Nga runi, pa chuʼ biaje guiníʼ íqueluʼ, ¿ñee nadxii Jehová naa la? galán guiníʼ íqueluʼ ndiʼ: «¿Tu laa guneʼ cré? “bixhoze guiráʼ ni rusiguii” la? o “Dios ni riníʼ ni dxandíʼ”?» (Juan 8:44; Sal. 31:5).

9. ¿Xi maʼ prometer Jehová ca binni ni nadxii laa? (Éxodo 20:6).

⁹ Guníʼ ique ni runi sentir Jehová pur ca binni ni nadxii laa. Zanda guiníʼ íqueluʼ ca diidxaʼ ni gudxi Moisés ca israelita (biindaʼ Éxodo 20:6). Maʼ biʼniʼ prometer Jehová qué ziuu dxi gusaanaʼ de gannaxhii ca binni ni nadxii laa. Cumu naca Jehová ti Dios ni qué rixeleʼ de ca xpinni la? qué ziuu dxi gusaana Jehová de gannaxhii tuuxa ni nadxii laa (Neh. 1:5). Nga runi, pa chuʼ biaje gaca nagana para lii guni creluʼ nadxii Jehová lii, galán guiníʼ íqueluʼ: «¿Ñee nadxieeʼ Jehová la?». Ne despué guníʼ ique: pa lii nadxiiluʼ Jehová ne rúniluʼ stipa pur gúniluʼ ni riuuláʼdxibe, guyuu seguru laaca guizáʼ nadxiibe lii (Dan. 9:4; 1 Cor. 8:3). Ni caninu nga, pa nuuluʼ seguru nadxiiluʼ Jehová, laaca zanda chuʼluʼ seguru guizáʼ nadxiibe lii ne qué ziuu dxi gusaanabe lii.

10, 11. ¿Ximodo racalaʼdxiʼ Jehová guidúʼyanu ni biʼniʼ pur laanu ra bidii xiiñiʼ beeda gati pur laanu? (Gálatas 2:20).

¹⁰ Guníʼ ique pabiáʼ risaca ni biʼniʼ Jesús pur laanu. Ra biseendaʼ Jehová Jesús lu guidxilayú para gueeda gati pur laanu, laani nga regalu ni jma naroʼbaʼ ni bidii Jehová guiráʼ xixé binni (Juan 3:16). Biseendaʼ Jehová Xiiñiʼ beeda gati pur lii. Guníʼ ique ni bizaaca apóstol Pablo. Ante gácabe xpinni Cristu bíʼnibe stale cosa feu ne despué gupa xidé bíʼnibe stipa para maʼ cadi guibiguetaʼ gúnibe cosa ni cadi jneza (Rom. 7:24, 25; 1 Tim. 1:12-14). Peru neca zaqué, biiyabe guendaguti stiʼ Jesús casi ti regalu ni bidii Jehová laabe (biindaʼ Gálatas 2:20). Cadi guiaandaʼ lii biquiiñeʼ Jehová espíritu santu stiʼ para gacané Pablo gucaa ca diidxaʼ riʼ, ne pa cá cani lu Biblia la? cá cani purtiʼ racalaʼdxiʼ Jehová gusiidiʼ laanu xiixa (Rom. 15:4). Racaláʼdxibe gúʼyaluʼ guendaguti stiʼ Xiiñibe casi ti regalu ni bidiibe lii. Ne ora gúʼyaluʼ ni casi ti regalu jmaruʼ si ziuuluʼ seguru dxandíʼ nadxii Jehová lii.

¹¹ Guizáʼ rudiʼnu xquixe peʼ Jehová purtiʼ biseendaʼ Xiiñiʼ beeda gati pur laanu. Peru cadi para si gatiʼ Jesús nga beeda ndaaniʼ guidxilayú. Laaca beedabe para gusiidibe laanu ni dxandíʼ de Jehová ne xi runi sentir Jehová pur ca xiiñiʼ ne nga nga ni chiguidúʼyanu (Juan 18:37).

BISIIDIʼ JESÚS NADXII JEHOVÁ LII

12. ¿Xiñee zanda guni crenu dxandíʼ ni guníʼ Jesús de Jehová?

¹² Dxi guyuu Jesús lu guidxilayú, guizáʼ guyuuláʼdxibe gusiidibe binni de Jehová (Luc. 10:22). Ne zanda guni crenu dxandíʼ guiráʼ ni bisiidibe de bixhózebe. ¿Xiñee yaʼ? purtiʼ guirútiruʼ runibiáʼ chaahuiʼ Jehová jma que laabe. Purtiʼ maʼ zinebe stale iza de nuube gaxha de laa (Col. 1:15). Laapebe maʼ biiyabe pabiáʼ rusihuinni nadxii Jehová ca xiiñiʼ ni qué rusaana laa. Cásica ca xiiñiʼ ni nuu guibáʼ ne cani nabani lu guidxilayú. Guidúʼyanu ni bisiidiʼ Jesús para chuʼnu seguru nadxii Jehová laanu.

13. ¿Ximodo racalaʼdxiʼ Jesús guidúʼyanu Jehová?

¹³ Racalaʼdxiʼ Jesús guidúʼyanu Jehová casi modo ruuyabe laa: naca Bixhózenu ni guizáʼ nadxii laanu. Lu ca Evangeliu riete gúdxibe Jehová «Bixhozeʼ» jma de ti gayuaa sesenta biaje. Ne ora guníʼnebe ca discípulo stibe nabé biquiiñebe diidxaʼ «Bixhózetu» ne «Bixhózetu ni nuu guibáʼ» (Mat. 5:16; 6:26). Nota de estudiu stiʼ Mateo 5:16 rusiene: «Ca xpinni Dios de dxiqué nabé biquiiñecabe stale título para guiníʼcabe de Jehová casi ni jma napa poder, ni jma risaca, ne ni bizáʼ guiráʼ cosa […]. Ne ra nabé biquiiñeʼ Jesús diidxaʼ ni cadi nagana ne ni runibiáʼ binni casi “Bixhozeʼ” rusihuinni ni pabiáʼ gaxha riuu Jehová de ca ni runi adorar laa». Guidúʼyanu ra biquiiñeʼ Jesús diidxaʼ «Bixhozeʼ» chupa biaje para guiníʼ de Jehová.

14. ¿Ximodo bisihuinni Jesús nabé risaca cada tobi de laanu para Jehová? (Mateo 10:29-31; laaca zanda gúʼyaluʼ imagen ca).

¹⁴ Primé, guidúʼyanu ca diidxaʼ ni guníʼ Jesús ni zeeda lu Mateo 10:29-31 (biindaʼ ni). Racá Jesús guníʼ nanna Bixhózenu ni nuu guibáʼ pora riaba cada tobi de ca gorrión ca layú. Pa nanna Jehová xi rizaaca cada tobi de ca manihuiiniʼ riʼ neca qué runi adorárcame laabe ne qué rannaxhiicame laabe, yanna guiníʼ íquenu pabiáʼ rizaalaʼdxiʼ Jehová cada tobi de ca xpinni, ni runi adorar laa purtiʼ nadxiicaʼ laabe. Ne lu versículo 30 stini ná «dede guicha íquetu nánnabe panda». Lu Biblia diidxastiá zeeda ti nota de estudiu ra ná: «Ra gánnanu runibiáʼ chaahuiʼ Jehová dede ca cosa ni jma huaxiéʼ risaca ni nápanu rusihuínnini pabiáʼ rizaaláʼdxibe cada tobi de ca xpinni Cristu». Rihuinni dxíchica racalaʼdxiʼ Jesús chuʼnu seguru guizáʼ risaca cada tobi de laanu para Bixhózenu ni nuu guibáʼ.

15. ¿Xi rusiidiʼ ni zeeda lu Juan 6:44 de Jehová?

¹⁵ Laaca bizeeteʼ Jesús diidxaʼ «Bixhozeʼ» lu Juan 6:44 (biindaʼ ni). Racá ridúʼyanu bichiña Bixhózeluʼ ni nuu guibáʼ lii ra nuu purtiʼ biiyabe nachaʼhuiʼ ladxidoʼloʼ (Hech. 13:48). Lu nota de estudiu stiʼ Juan 6:44 riete zándaca caníʼ Jesús ca diidxaʼ ni bicaa Jeremías, laani nga ca diidxaʼ ni zeeda lu textu stiʼ artículo riʼ: «Bichiñaʼ lii ra nuaaʼ purtiʼ naroʼbaʼ guendarannaxhii ni napaʼ lii». Laaca zanda gaca traducir versículo riʼ casi: «Qué nusaanaʼ de ñannaxhieeʼ lii» (Jer. 31:3; nota; bichaaga ni né Oseas 11:4). Guníʼ ique: cadi cusaana Bixhózeluʼ ni nuu guibáʼ de gannaxhii lii, ne nga riníʼ guiráʼ dxi ruuyabe ca cosa galán ni rúniluʼ neca lii qué rúdiluʼ cuenta pa rúniluʼ cani.

16. a) ¿Xi cusiidiʼ Jesús laanu, ne xiñee zanda guni crenu laabe? b) ¿Xi zacané lii chuʼluʼ seguru Jehová nga ni jma galán gaca Bixhózeluʼ? (Biiyaʼ cuadru ni láʼ «Jehová nga Bixhózenu ni caquíʼñenu»).

¹⁶ Ora guníʼ Jesús naca Jehová Bixhózenu, casi ñaca niniʼbe: «Cadi naa siaʼ nga Bixhozeʼ Jehová, laaca Bixhózeluʼ laabe. Ne gunna dxichi nadxiibe lii ne guizáʼ rizaaláʼdxibe lii». Nga runi, pa chuʼ biaje gaca nagana para lii guni creluʼ nadxii Jehová lii la? galán guiníʼ íqueluʼ ni guníʼ Jesús ne guni creluʼ laabe purtiʼ siempre riníʼ Jesús ni dxandíʼ ne laabe nga jma runibiáʼ chaahuibe Bixhózenu ni nuu guibáʼ (1 Ped. 2:22).

BIʼNIʼ STIPA CHUʼLUʼ SEGURU NADXII JEHOVÁ LII

17. ¿Xiñee caquiiñeʼ chuʼnu seguru nadxii Jehová laanu?

¹⁷ Casi maʼ bidúʼyanu, naca Binidxabaʼ ti enemigu ni nabé nexhená ne zúnibe stale cosa para gusaana de gúninu ni ná Jehová. Tobi de ca trampa ni riquiiñebe nga gucaabe laanu guiníʼ íquenu cadi nadxii Jehová laanu. ¡Qué chuʼ dxi gudiʼnu lugar guni Binidxabaʼ ni racalaʼdxiʼ! (Job 27:5). Nga runi, caquiiñeʼ gúninu stipa chuʼnu seguru nadxii Jehová laanu.

18. ¿Xi zanda gacané lii chuʼluʼ seguru nadxii Jehová lii?

¹⁸ Lu artículo riʼ, maʼ bidúʼyanu caadxi cosa ni zanda gacané lii chuʼluʼ seguru nadxii Jehová lii. Zanda guinábaluʼ gacanebe lii gúʼyaluʼ ca cualidad ni ruuyabe nápaluʼ ne guiníʼ íqueluʼ ca textu ni zeeda lu Biblia ni rusihuinni pabiáʼ nadxii Jehová ca xpinni. Laaca galán guietenaláʼdxiluʼ qué ziuu dxi gusaana Jehová de gannaxhii ca binni ni nadxii laa. Cadi guiaandaʼ lii gúʼyaluʼ guendaguti stiʼ Jesús casi ti regalu ni bidii Jehová lii. Ne bietenalaʼdxiʼ ni guníʼ Jesús: Jehová nga Bixhózeluʼ. Nga runi ora chuʼ tu guinabadiidxaʼ lii «¿ñee nuuluʼ seguru nadxii Jehová lii la?» nagueendaca zacábiluʼ: «¡Nannaʼ dxicheʼ nadxii Jehová naa! Ne qué zusaanaʼ de guneʼ stipa pur gusihuinneʼ nadxieeʼ laabe».