Gucané Jehová laadu chuʼdu nayecheʼ ne guiaʼdu ra biseendacabe laadu

Guyé Mats ne Ann-Catrin Escuela de Galaad lu iza 1979, ne despué biseendacabe laacaʼ ndaaniʼ guidxi Irán, Zaire, Tanzania, Mauricio ne Myanmar. Jack Redford, tobi de ca instructor stiʼ Galaad, guníʼ: «Guyuu nayecheʼ ra tiica guséʼndacabe lii». Guizáʼ gucané conseju riʼ Mats ne Ann-Catrin, purtiʼ stale biaje bichaacabe laacaʼ de asignación ne yeguni servircaʼ ndaaniʼ stale guidxi. Gudiʼnu lugar gábicabe laanu historia stícabe.

¿Ñee zanda gábitu laadu ximodo binibiaʼtu Jehová la?

Mats: Guleza bixhozeʼ ndaaniʼ guidxi Polonia tiempu cayaca Segunda Guerra Mundial ne biiyabe guiráʼ ni cadi jneza runi ca xaíque stiʼ religión católica. Neca zaqué, biʼniʼ cré bixhozeʼ zanda chuʼ ti religión ni rusiidiʼ ni dxandíʼ. Ne ra gudiʼdiʼ tiempu bidieeʼ cuenta dxandíʼ ni guniʼbe que. Cumu nabé riuuladxeʼ sieʼ libru la? ti dxi guziéʼ tobi color azul ni láʼ La verdad que lleva a vida eterna. Guizáʼ guyuuladxeʼ título stiʼ libru que ne gueelaʼ queca biindaʼ guidubi ni. Ne casi peʼ biluxeʼ biindaʼ ni, bidieeʼ cuenta maʼ bidxelaʼ religión ni dxandíʼ.

Para lu beeu abril de iza 1972 biindaʼ xcaadxi publicación stiʼ ca testigu stiʼ Jehová ne biiyaʼ ximodo bicabi Biblia ca pregunta ni gupaʼ. Guníʼ Jesús ejemplu stiʼ ti hombre ni bidxela ti perla nabé risaca ne nagueendaca bitoo guiráʼ ni napa para guzíʼ ni. Bineʼ sentir casi hombre riʼ purtiʼ maʼ bidxelaʼ ni dxandíʼ ne casi ñaca bituaaʼ guiráʼ ni napaʼ ra bisaanaʼ meta ni gupaʼ de chaaʼ universidad ne gacaʼ doctor (Mat. 13:45, 46). Ne guyuaanisaʼ 10 de diciembre de iza 1972.

Despué de ti iza, biziidiʼ bixhozeʼ, jñaaʼ ne ti bicheʼ de Jehová ne guyuunísacaʼ. Bizuluáʼ de precursor regular lu beeu julio de iza 1973. Ndaaniʼ congregación stidu guyuu ti hermanahuiiniʼ ni láʼ Ann-Catrin, nabé nadxiibe Jehová ne guapa laabe. Guyuuláʼdxisaadu ne bichaganadu lu iza 1975. Tapa iza biʼniʼ servirdu Strömsund, ti guidxihuiiniʼ sicarú ni nuu Suecia ne stale binni de raqué riuuláʼdxicaʼ guiziidicaʼ de Jehová.

Ann-Catrin: Biziidiʼ bixhozeʼ de Jehová dxi canazaruʼ universidad ndaaniʼ guidxi Estocolmo. Chonna beeu de guleʼ maʼ zinebe naa reunión ne predicación. Qué ñuulaʼdxiʼ jñaaʼ ni runi bixhozeʼ que ne stale biaje gucaláʼdxibe nusihuínnibe cadi jneza rusiidiʼ ca Testigu. Peru qué ñanda ñúnibe ni, ne despué laaca biziidibe de Jehová ne guyuunísabe. Naa guyuaanisaʼ dxi napaʼ 13 iza ne gucaʼ precursora dxi napaʼ 16 iza. Despué yeguneʼ servir guidxi Umeå, ra caquiiñeʼ tu guni predicar, ne raqué biʼniʼ nombrárcabe naa precursora especial.

Despué de bichaganadu gúpadu privilegiu de gacanedu jma binni guiziidiʼ de Jehová. Tobi de laacabe nga Maivor, ti dxaapahuiiniʼ ni bisaana de quite deporte para guni jma lu xhiiñaʼ Jehová. Laabe ne bendaʼ ni jma nahuiiniʼ juntu gúcacabe precursora. Ne guirópacabe guyécabe Escuela de Galaad lu iza 1984 ne yanna nácacabe misionera ndaaniʼ guidxi Ecuador.

Laatu maʼ gúcatu misioneru gadxé gadxé guidxi. Peru ¿xi gucané laatu chuʼtu nayecheʼ ne guiaatu ra biseendacabe laatu yaʼ?

Mats: Dxandíʼ, stale biaje bichaacabe laadu de asignación, peru ni gucané laadu nga chinándadu ejemplu stiʼ Jesús ne gácadu humilde casi laa (Col. 2:6, 7). Para ganda guiaʼdu lugar ra biseendacabe laadu, bínidu stipa gunibiaʼdu ca hermanu de lugar que, guiénedu xiñee maʼ gadxé modo rúnicabe caadxi cosa ne modo riníʼ íquecabe pur modo biniisicabe. Ra jma yenándadu ejemplu stiʼ Jesús guyuʼdu nayecheʼ lu cada asignación stidu ne biʼniʼ sentirdu «casi ti yaga ni zuhuaa ra cuxooñeʼ nisa» (Sal. 1:2, 3).

Ann-Catrin: Ora ruchaacabe ti yaga de lugar, para ganda guiniisini sti ladu riquiiñeni biaaniʼ ne calor stiʼ gubidxa. Zaqueca nga laadu, para gunda guyuʼdu nayecheʼ lu ca asignación stidu, siempre biquíʼñedu stipa stiʼ Jehová ne beeda gácabe casi gubidxa para laadu (Sal. 84:11). Ne bidúʼyadu ximodo biquiiñeʼ Jehová ca hermanu que para bidiicaʼ stipa laadu ne bisihuínnicaʼ nadxiicaʼ laadu. Casi ca hermanu de congregación ni guyuu Teherán (Irán), bidúʼyadu laacabe casi ca xpinni Dios ni riete lu Biblia, purtiʼ nabé nachaʼhuiʼ gúcacabe ne riuuláʼdxicabe gudiicabe de ni nápacabe. Neca ñuuláʼdxidu ñaanadu Irán, peru lu julio de iza 1980 biʼniʼ prohibir Gobiernu de guidxi que dxiiñaʼ ni runi ca Testigu ne bidiibe laadu 48 hora para guireʼdu de guidxi que. Ngue runi, biseendaʼ ca hermanu que laadu África, ndaaniʼ ti guidxi ni binibiáʼcabe casi Zaire ne yanna rábicabe ni República Democrática del Congo.

Ora gunnaʼ chiguséʼndacabe laadu África, guizáʼ bidxibeʼ ne biinaʼ, purtiʼ runadiagaʼ riníʼcabe nuu stale beendaʼ ca lugar que ne nabé raca huará binni raqué. Peru ti guendaxheelaʼ ni biʼniʼ servir raqué xadxí, gúdxicaʼ laadu: «Maʼ guyuudu guidxi ca, nga runi cayábidu laatu chetu ne zuuyatu ziuuláʼdxitu ni». Ne zaqué gúcani. Galán modo bidxaagalú ca hermanu de África laadu ne bisihuínnicaʼ nadxiicaʼ laadu. Xhoopaʼ iza despué biʼniʼ prohibírcabe gaca predicar guidxi Zaire, ngue runi gupa xidé bireʼdu de raqué. Rietenalaʼdxeʼ dede canabaʼ Jehová gudii lugar laadu guiaanadu jma tiempu guidxi África.

¿Ñee zanda gábitu laadu xi experiencia galán huayápatu lu ca iza huayúnitu xhiiñaʼ Jehová la?

Mats: Lu ca asignación ni huayápadu huadxéladu jma xhamígudu de gadxé gadxé guidxi ni nácacaʼ misioneru. Laaca riuʼdu nayecheʼ purtiʼ ndaaniʼ ca guidxi ra huayuudu huadxéladu jma binni ni riuulaʼdxiʼ guiziidiʼ de Jehová, ne guyuu biaje gúpadu biaʼ 20 estudiu cada tóbidu. Ne qué ziuu dxi guiaandaʼ naa ximodo gunnaxhii ca hermanu de África laadu ne gúcacaʼ nachaʼhuiʼ né laadu. Dxi rigánnadu ca congregación ni nuu Tanzania, gúpadu ti combihuiiniʼ ni riquíʼñedu para guni viajárnedu ne laaca randa rásidu ndaaniʼ ni. Nuu biaje ruzuhuaʼdu ni gaxha de ra nabeza ca hermanu que, ne laacaʼ rácacaʼ nachaʼhuiʼ né laadu ne rudiicaʼ laadu stale cosa ni iquíʼñedu neca huaxiéʼ cosa nápacaʼ (2 Cor. 8:3). Ne ti cosa ni riuuláʼdxidu gúnidu guiráʼ dxi nga guinidu ca experiencia ni gúpadu. Ante chigásidu, naa ne Ann-Catrin rinidu xi experiencia galán gúpadu lu predicación ne rudiʼdu xquixe peʼ Jehová pur racané laadu.

Ann-Catrin: Rudieeʼ xquixe peʼ Jehová pur gucané naa gunebiaʼyaʼ jma hermanu ne hermana de gadxé gadxé guidxi. Huazíʼdidu chupa chonna idioma casi francés, luganda, persa ne suajili ne laaca huazíʼdidu guiaʼdu modo nabani binni de cada guidxi. Huayuni capacitardu caadxi hermanu ne huayápadu jma xhamígudu ne guizáʼ nayecheʼ bininedu laacabe xhiiñaʼ Jehová (Sof. 3:9).

Guiráʼ ca lugar ra huaseendacabe laadu huadúʼyadu ca cosa sicarú ni bizáʼ Jehová. Cada asignación bidiicabe laadu binibiaʼdu ti guidxi nacubi ne bidúʼyadu ca cosa sicarú ni nápacani ne bihuinni ca Jehová ngue cayuni dirigir laadu. De laasidu la? qué ñanda diʼ ñuudu ca guidxi ca, peru Jehová bidii laadu privilegiu riʼ.

¿Xi guendanagana huadxaagalutu ne ximodo huadxiilutu cani?

Mats: Lu ca iza huadiʼdiʼ ca huayápadu stale clase guendahuará, casi malaria (o paludismo). Ne chupa chonna biaje biʼniʼ operárcabe Ann-Catrin de urgencia. Laaca nabé riuʼdu xizaa pur jñaadu ne bixhózedu purtiʼ maʼ ziniisicaʼ. Peru rudiʼdu xquixe peʼ familia stidu purtiʼ cayápacaʼ laacabe né guendarannaxhii ne paciencia (1 Tim. 5:4). Neca zacá, nuu biaje riuʼdu triste purtiʼ zitu nuudu de laacabe ne qué zanda chuudu ra nuucabe para gacanedu laacabe.

Ann-Catrin: Dxi nuudu Zaire lu iza 1983, gucaʼ huaraʼyaʼ de cólera ne guizáʼ bininani naa. Pur ngue gudxi ti doctor Mats: «Gulee laabe de guidxi riʼ nagueendaca, purtiʼ maʼ qué ziándabe». Ngue runi, sti dxi queca bireʼdu ziuudu Suecia lu ti avión ni riné carga.

Mats: Neca doctor que guníʼ qué zianda Ann-Catrin, peru gunda biándabe. Neca zaqué, guizáʼ bíʼnadu purtiʼ guníʼ íquedu maʼ qué zanda gácadu misioneru. Peru ti iza despué biguétadu guidxi Zaire ne biʼniʼ servírdu ndaaniʼ ti congregaciónhuiiniʼ ni nuu Lubumbashi ne raqué riníʼcabe diidxaʼ suajili.

Ann-Catrin: Dxi nuudu Lubumbashi gucaʼ xiiñeʼ, peru gutiʼ baduhuiiniʼ que ante gale. Ne guizáʼ bininá ngue laadu, peru qué nusaana Jehová laadu stúbidu ne biyúbibe modo uguube gana laadu. Bidxéladu jma binni ni riuulaʼdxiʼ guiziidiʼ de Jehová ne bidiʼdu laacabe estudiu. Ne menu de ti iza, biroobaʼ congregación stidu, de 35 publicador maʼ gúcadu 70 ne dxiqué rié 40 binni reunión peru despué maʼ guyé chupa gayuaa gande. Ra jma biʼniʼ predicardu ne bidúʼyadu modo guluu Jehová ndaayaʼ dxiiñaʼ ni cayúnidu, guizáʼ guluuni gana laadu ne gudixhedxini ladxidoʼdo. Peru neca zacá dede yanna rietenaláʼdxidu baʼduhuiiniʼ stidu ne gatigá ruzéʼtedu de laabe. Guizáʼ maʼ racaláʼdxidu guidúʼyadu xi chiguni Jehová pur laadu ndaaniʼ paraísu ca.

Mats: Ti tiempu despué, biʼniʼ sentir Ann-Catrin guizáʼ maʼ bidxaga ne maʼ qué gapa stipa. Ne tiempu queca gudxi doctor naa napaʼ cáncer de colon ne maʼ avanzadu nuu guendahuará que ne pur ngue gupa xidé biʼniʼ operárcabe naa. Yanna maʼ nuaaʼ nazaaca ne Ann-Catrin cayúniruʼ biaʼ gándatiʼ lu xhiiñaʼ Jehová.

Nánnadu cadi laasidu ridxaagaludu guendanagana. Lu iza 1994 bizulú ti guendaridinde ndaaniʼ guidxi Ruanda ne biitisaa ca binni que laacaʼ, ne pur ngue stale de ca hermanu stinu bixooñecaʼ de xquídxicaʼ ne guyecaʼ ndaaniʼ ca campu de refugiadu. Ora yegánnadu ca hermanu que bidúʼyadu pabiáʼ fe nápacaʼ ne nayecheʼ bidxagalucaʼ laadu neca nápacaʼ guendanagana. Raqué bidiʼdu cuenta napa Jehová poder para gacané ca xpinni gudxiilucaʼ intiica guendanagana (Sal. 55:22).

Ann-Catrin: Despué bidxaagaludu sti guendanagana naroʼbaʼ. Lu iza 2007 biʼniʼ invitárcabe laadu dxi guca dedicar sucursal stiʼ Uganda ne ora bilúxeni biguétadu Nairobi (Kenia) ne biʼniʼ viajárnedu biaʼ 25 misioneru ne betelita. Ante chindadu Kenia, málasi guyuu sti carru lu carril stidu ne bidxelasaani carru ra ziuudu que. Ne oraqueca gutiʼ hombre ni zigusá carru que ne gaayu hermanu ne maʼ despué gutiʼ sti hermana ra hospital. ¡Guizáʼ maʼ racaláʼdxidu guidúʼyadu stiʼ biaje ca hermanu stidu riʼ! (Job 14:13-15).

Naa laaca gucanaʼyaʼ lu accidente que ne ra gudiʼdiʼ dxi biandaʼ. Peru naa ne Mats ne xhupa xhonna de ca ni zeʼ ndaaniʼ carru que, dede yanna runiná ni bizaacadu que laadu. Nuu biaje ribaneʼ de lu bacaandaʼ maʼ cadxibeʼ ne runeʼ sentir casi ñaca maʼ cabezadxí ladxiduáʼ. Ti cosa ni gucané laadu nga runi orardu Jehová, ridúʼndadu ca textu ni riuuláʼdxidu, ne riníʼ íquedu ni ridúʼndadu, ngue gucané laadu gudxíʼludu guendanagana que. Laaca biyúbidu gacané ti doctor laadu. Chaahuiʼ chaahuiʼ cusiáʼndadu ni bizaaca que ne rinábadu Jehová gacané ca hermanu ni nápacaʼ guendanagana casi ca ni gúpadu riʼ.

Ra bidxiilutu ca guendanagana que, ¿xiñee guniʼtu yené Jehová laatu casi riné binni «dxita bere» yaʼ?

Mats: Lu diidxa suajili nápacabe ti dichu ni ná: «Tumebebwa kama mayai mabichi», ne riníʼ ni «Yenécabe laadu casi rinécabe dxita bere». Cásica né stale cuidadu riné tuuxa caadxi dxita bere para cadi guilaacani la? zaqueca né stale cuidadu huayapa Jehová laadu lu ca asignación ni huayápadu. Qué huasiadxa diʼ Jehová laadu gastiʼ ne nuu biaje rápadu jma de biaʼ ni caquíʼñedu. Laaca ridúʼyadu ximodo riquiiñeʼ Jehová Grupu ni Zániru para gacané ne gusihuinni pabiáʼ nadxii laadu.

Ann-Catrin: Ora guníʼ Mats gupa Jehová laadu né stale cuidadu, bietenalaʼdxeʼ ni bizaacadu. Ti dxi gúdxicabe naa nexheʼ bixhozeʼ ra hospital ne nabé grave nuube. Ne tiempu que deruʼ peʼ cayanda Mats de guendahuará láʼ malaria ne qué gápadu bueltu para chuudu Suecia. Ngue runi guníʼ íquedu gutoʼdo carruhuiiniʼ stidu. Peru málasi guninécabe laadu chupa biaje. Primé biaje que ti guendaxheelaʼ ni gunna ni cazaacadu que gúdxicaʼ laadu zaguíxecaʼ saca ti boletu de avión que. Ne guiropaʼ biaje que gúcani ti hermana huaniisi ni biʼniʼ ahorrar ti ndaa bueltu ndaaniʼ ti caja ra bicaabe «Para tuuxa ni caquiiñeʼ ni». Ne bidiibe laadu bueltu que. Raqué bidúʼyadu ximodo gucané Jehová laadu lu chupa chonna si minutu (Heb. 13:6).

¿Xii ndiʼ maʼ biziiditu lu 50 iza ni maʼ zinetu de cayúnitu xhiiñaʼ Jehová yaʼ?

Ann-Catrin: Maʼ bizíʼdidu dxandíʼ ni ná Isaías 30:15, zápanu stipa pa cadi gacalugunu ne gápanu confianza Jehová. Ora rápanu confianza Jehová, casi ñaca nudiʼnu lugar Jehová nudxiilú ca guendanagana stinu (2 Crón. 20:15, 17). Cumu de guidubi ladxidoʼdo rúnidu xhiiñaʼ Jehová lu ca asignación huacaadu la? nga runi huadii Jehová laadu stale ndaayaʼ ni qué niníʼ íquedu ñápadu pa ñúnidu sti cosa.

Mats: Ti cosa risaca ni maʼ biziideʼ nga caquiiñeʼ gapaʼ confianza Jehová ora gapaʼ xiixa guendanagana, ne zacá zuuyaʼ xi zúnibe para gacanebe naa (Sal. 37:5). Qué huayuu dxi gusaana Jehová laadu stúbidu ne dede yanna cayacanebe laadu lu sti asignación gucuaadu de guni servirdu Betel ni nuu Myanmar.

De guidubi ladxidoʼdo ribézadu chuʼ jma hermanu ne hermana ni racalaʼdxiʼ guni jma lu xhiiñaʼ Jehová ne zacá gúʼyacaʼ ximodo zapa Jehová laacaʼ cásica cayápabe laadu. Ne nuudu seguru zapa Jehová laacabe pa chúʼcabe nayecheʼ lu intiica asignación guicaacabe.