Nabé nandáʼ huayaca ca dxi stinu riʼ lu guidubi Guidxilayú | ¿Xi caníʼ Biblia de laani?

Lu beeu julio de 2022, nabé nandáʼ guca lu guidubi Guidxilayú.

• «Maʼ ndiʼ guiropa biaje guiníʼ gobiernu stiʼ China lu beeu riʼ, ndaaniʼ 70 guidxi jma zaca sentir guendanandáʼ» (25 de julio de 2022, servicio de noticias CNN).

• «Cumu guizáʼ huayaca sentir guendanandáʼ neza Europa la? nga runi maʼ gucuá guí stale guiʼxhiʼ» (17 de julio de 2022, The Guardian).

• «Domingu que nabé nandáʼ guca ndaaniʼ chupa chonna guidxi stiʼ Estados Unidos, ne qué huayuu dxi gaca ni zacá purtiʼ ca dxi riʼ nabé cayasa calor neza ruaaʼ nisadóʼ ladu gueteʼ ne lu región stiʼ Medio Oeste» (24 de julio de 2022, The New York Times).

¿Ñee cayabi nga laanu huidxe si maʼ qué zanda cueza binni lu Guidxilayú riʼ la? ¿Xi caníʼ Biblia de laani?

¿Ñee maca riete lu Biblia nabé nandáʼ zaca tiempu riʼ la?

Maca pue. Cumu nabé nandáʼ cayaca ca dxi stinu riʼ la? zanda guininu né laani nga chupa chonna de ca cosa ni ruzeeteʼ Biblia zazaaca ca dxi stinu. Guzéʼtenu ti ejemplu, maca guníʼ Jesús zadúʼyanu «cosa ni guchibi» laanu ne zahuinni «señal naroʼbaʼ» (Lucas 21:11). Stale binni ridxibi ora guʼyaʼ zeʼ dxi jma maʼ nandáʼ ziyaca ne cadxíbicabe gunitilú binni Guidxilayú riʼ.

¿Zedandá dxi maʼ qué zanda cueza binni lu Guidxilayú riʼ la?

Coʼ, purtiʼ bizáʼ Dios Guidxilayú riʼ para cueza binni luni para siempre (Salmo 115:16; Eclesiastés 1:4). Qué zudiibe lugar gunitilú binni Guidxilayú riʼ, sínuque laabe caniʼbe zunitilube «ca ni cunitilú guidxilayú» (Apocalipsis 11:18).

Guidúʼyanu xhupa cosa ni caníʼ Dios chiguni para Guidxilayú:

• «Desiertu ne ra gastiʼ nisa ziéchecaʼ ne ra napampa casi desiertu ziuu nayecheʼ, ne zudii guieʼ casi azafrán» (Isaías 35:1). Qué zudii Dios lugar gaca Guidxilayú riʼ casi ti desiertu ra guirutiʼ zanda cueza, sínuque chiguni chaahuibe guiráʼ ra maʼ binitilú binni.

• «Rápaluʼ guidxilayú ne ruʼnuʼ xiixa para gudii ni stale ne gapa ni stale cosa» (Salmo 65:9). Zuni Dios Guidxilayú riʼ ti paraísu sicarú.

Para gánnaluʼ ximodo cayaca cumplir ca profecía stiʼ Biblia, yanna ra cadxaa clima stiʼ Guidxilayú riʼ, biindaʼ artículo «¿Qué dice la Biblia sobre el cambio climático y nuestro futuro?».

Para gánnaluʼ jma de promesa stiʼ Biblia ra caníʼ zaca chaahuiʼ Guidxilayú, biindaʼ artículo «¿Quién salvará el planeta?».