Nabé nadipaʼ cayaca gusibá | ¿Xi caníʼ Biblia de laani?

• «Iza riʼ, guizáʼ nandáʼ cayaca sentir China ne biaʼ zinécabe cuenta maʼ chonna iza de nuu gusibá» (The Guardian, 7 de septiembre de 2022).

• «Zándaca iza riʼ gusaa gaayuʼ iza de nuu gusibá Gran Cuerno de África» (Noticias ONU, 26 de agosto de 2022).

• «Maʼ gudixhenácabe jma de galaa de Europa purtiʼ zándaca ziuu ti gusibá guizáʼ nadipaʼ ni qué huayaca raca 500 iza» (BBC News, 23 de agosto de 2022).

Ca binni ni runi estudiar clima nacaʼ qué ziaanadxí ca gusibá riʼ o jma nadipaʼ zaca ca ni. ¿Ñee zanda gaca chaahuiʼ ni cazaca riʼ la? ¿Xi caníʼ Biblia de laani?

Gusibá ne ca profecía zeeda lu Biblia

Ndiʼ nga ni ná Biblia zazaaca lu ca dxi stinu riʼ:

• «Ne ziuu hambre [...] ti lugar ne sti lugar» (Lucas 21:11).

Ora guiaba gusibá la? stale biaje riuu hambre. Lu ca profecía zeeda lu Biblia riete ziuu hambre ne xi zazaaca pur laani: ziuu guendananá ne guendaguti (Apocalipsis 6:6, 8).

¿Xiñee jma nadipaʼ ca gusibá ca yanna?

Biblia cuzeeteʼ xi razón nuu. Tobi de laani nga:

• «Cadi lu náʼ diʼ binni nuu guni mandar ra guzuhuaa ñee» (Jeremías 10:23).

Ca diidxaʼ riʼ cusihuinni ca ni qué zabeendú binni ni galán pa gacalaʼdxiʼ «guni mandar ra guzuhuaa ñee» o guni ni gapa gana. Pur ca decisión cadi jneza ricaa hombre riaadxaʼ nisa ne riuu gusibá.

• Stale de ca científicu ca nacaʼ pur guiráʼ ni cayuni binni nabé nandáʼ cayaca sentir lu guidubi Guidxilayú. Ne nga runi jma riuu gusibá lu guidubi Guidxilayú.

• Maʼ canitilú ca lugar ra ridá nisa lu Guidxilayú. ¿Xiñee yaʼ? Purtiʼ binni ruyubi para laasi. Ne ca acuerdu ni rúnicabe para guni ganárcabe bueltu la? redané ni guendanagana. Cusirácabe yaga, cayuni contaminárcabe ne cadi jneza caquiiñecabe ca recursu ni napa Guidxilayú.

Peru Biblia rudii laanu ti esperanza.

¿Ñee ziuu dxi zaca chaahuiʼ ca guendanagana riʼ la?

Biblia cayabi laanu maʼ qué ziuu gusibá. ¿Ximodo chiguni chaahuiʼ Dios guendanagana riʼ yaʼ?

1. 1. Zunitilú Dios «ca ni cunitilú guidxilayú» (Apocalipsis 11:18). Zunitilú Dios ca binni malu ne ni ruyubi para laasi ni cayuniná Guidxilayú riʼ ne zacá maʼ qué ziuu gusibá (2 Timoteo 3:1, 2).

2. 2. «Ne layú ra maʼ bicuiidxiʼ xhuxhu gubidxa zaca casi ti laguna dxaʼ nite ndaaniʼ» (Isaías 35:1, 6, 7). Zuni chaahuiʼ Dios guiráʼ ra maʼ bininá gusibá ne zúnibe Guidxilayú riʼ ti paraísu ra ziuu ziáʼ nisa.

3. 3. «Rápaluʼ guidxilayú ne ruʼnuʼ xiixa para gudii ni stale ne gapa ni stale cosa» (Salmo 65:9). Né ndaayaʼ stiʼ Dios, ziuu stale guendaró ndaaniʼ Guidxilayú ne ziáʼ nisa nayá para guiráʼ binni.