¿Ñee dxandíʼ nuu Binidxabaʼ la?
Ni ricabi Biblia
Dxandíʼ nuu Binidxabaʼ, nácabe ti espíritu ni qué ñuni ni jneza ne bicaalube Dios, ne laabe cayuni mandarbe «guidxilayú riʼ» (Juan 14:30; Efesios 6:11, 12). Biblia ruzeeteʼ xcaadxi lá ni nápabe. Ndiʼ nga caadxi de laacani:
Binidxabaʼ, riníʼ ni «ni rucaaluʼ» (Job 1:6).
Diablu, riníʼ ni «ni caguite guiráʼ binni» (Apocalipsis 12:9).
Beendaʼ, riníʼ ni ni rusiguii (2 Corintios 11:3).
Ni rucaa stobi guchee (Mateo 4:3).
Ni rusiguii (Juan 8:44).
Cadi ti símbolo de cosa malu nga Binidxabaʼ
Nuu binni runi cré zacá nga laabe ne ngaca riníʼ íquecaʼ de Dios. Lu Biblia riete byuiʼné Dios Binidxabaʼ diidxaʼ. Peru pa Dios perfectu laa ne nayá, ¿ximodo ndiʼ guni cosa malu yaʼ? (Deuteronomio 32:4; Job 2:1-6.) Yanna ¿xi zanda guininu dxi biʼniʼ tentar Binidxabaʼ Jesús, ti hombre perfectu yaʼ? (Mateo 4:8-10); 1 Juan 3:5.) Rihuinni dxichi rusiidiʼ Biblia dxandíʼ nuu Binidxabaʼ ne cadi ti símbolo de cosa malu laabe.
Nuu binni runi cré cadi dxandíʼ nuu Binidxabaʼ. ¿Ñee caquiiñeʼ guidxagayaanu ndiʼ la? Coʼ, purtiʼ Biblia ná ruyubi Binidxabaʼ guni ni racalaʼdxiʼ (2 Tesalonicenses 2:9, 10). Ne tobi de ca cosa ni maʼ bíʼnibe nga rucaabe binni guiníʼ íquecaʼ cadi dxandíʼ nuube (2 Corintios 4:4).
Caadxi cosa ni cadi dxandíʼ riníʼ ique binni de Binidxabaʼ
Ni cadi dxandíʼ: Lucifer nga sti lá modo runibiáʼcabe Binidxabaʼ.
Ni dxandíʼ: Lu caadxi Biblia riete diidxaʼ hebreu «Lucifer» ne riníʼ ni «ni ruzaaniʼ» (Isaías 14:12). Diidxaʼ riʼ riete ni lu ti profecía ne riete ni ora caníʼ ni de ca ni zá de Babilonia, ca binni ni binitilú Dios purtiʼ feu xpiaʼcaʼ (Isaías 14:4, 13-20). Lu profecía riʼ ná ora rati ti rey de Babilonia, riníʼcabe «ruzaanibe» para guni búrlacaʼ laabe.
Ni cadi dxandíʼ: Runiné Binidxabaʼ Dios dxiiñaʼ.
Ni dxandíʼ: Naca Binidxabaʼ enemigu stiʼ Dios, ne cadi xpínnibe laa. Laaca naca Binidxabaʼ enemigu stiʼ ca xpinni Dios, ne pur nga rizanándabe laacaʼ ne rindísabe falsu luguiacaʼ (1 Pedro 5:8; Apocalipsis 12:10).