¿Xii nga ley «guié lú pur guié lú»?

Ni ricabi Biblia

Lade ca ley ni bidii Dios Moisés para ca israelita zeeda ley «guié lú pur guié lú». Laaca bizeeteʼ Jesús ni lu Sermón del Monte (Mateo 5:38; Éxodo 21:24, 25; Deuteronomio 19:21). Ley riʼ ná naquiiñeʼ quixe binni biaʼ bininá tuuxa.a

Laaca biquiiñeʼ ley riʼ para binni ni laa peʼ guniná stobi. Ley ni gucuaa Moisés que ná: «Dxita ladi pur dxita ladi, guié lú pur guié lú, laya pur laya; naquiiñeʼ guninatu laabe biaʼca bininabe sti binni» (Levítico 24:20).

¿Xi para guʼtaʼ ley «guié lú pur guié lú»?

Cadi guʼtaʼ ley riʼ para guquixe binni ni gúnicabe laa, sínuque gucané ley riʼ ca juez de dxiqué para quíxhecaʼ castigu, nin tan naguudxi nin tan naná.

Gucané ley riʼ binni guiníʼ ique ante guniná stobi o pa bininá tuuxa. Ca binni ni guʼyaʼ modo ná Ley stiʼ Dios gaca juzgar tuuxa, zadxíbicaʼ ne maʼ qué zúnirucaʼ xiixa cosa malu (Deuteronomio 19:20).

¿Ñee naquiiñeʼ chinanda ca xpinni Cristu ley «guié lú pur guié lú» la?

Coʼ, maʼ cadi naquiiñeʼ chinanda ca xpinni Cristu ley riʼ. Biluxe Ley stiʼ Moisés que dxi gutiʼ Jesús (Romanos 10:4).

Peru racané ley riʼ laanu gánnanu ximodo riníʼ ique Dios. Rusiene ni risaca para Dios guni ni jneza (Salmo 89:14). Laaca rusiidini laanu jneza ruuyaʼ Dios gaca castigar ti binni biaʼ caquiiñeʼ ni ora biʼniʼ ti cosa malu (Jeremías 30:11).

Cosa ni cadi jneza riníʼ ique binni de ley «guié lú pur guié lú»

Nuu binni riníʼ ique: Nabé nadipaʼ ley «guié lú pur guié lú».

Ni dxandíʼ: Cadi ná diʼ ley riʼ naquiiñeʼ gaca juzgar tuuxa nadipaʼ ne naná. Purtiʼ ante quixheʼ ca juez que castigu ni chiguicaa ti binni ni bininá, naquiiñeʼ gánnacaʼ primeru xi guca ne xi bicaa binni riʼ guniná stobi (Éxodo 21:28-30; Números 35:22-25). Ngue runi, ley «guié lú pur guié lú» gucaneni para cadi tan peʼ guninácabe ti binni ora gaca castigar.

Nuu binni riníʼ ique: Ley «guié lú pur guié lú» rucaani binni cadi gusaana de gaca vengar.

Ni dxandíʼ: Ley gucuaa Moisés que ná: «Cadi guquíxeluʼ ni guni ca xiiñiʼ binni xquídxiluʼ lii ne cadi gapuʼ xiana laacabe» (Levítico 19:18). Lugar de nuquixe binni ni bíʼnicabe laa, bicaa Ley que laacabe gápacabe confianza Dios ne modo gudixhe gaca chaahuiʼ xiixa guendanagana (Deuteronomio 32:35).

Bisiene Jesús cadi jneza ni riníʼ ique binni

Nanna Jesús cadi jneza modo riene caadxi binni ley «guié lú pur guié lú». Ngue runi, bisiénebe laacaʼ: «Binadiágatu guníʼcabe: “Guié lú pur guié lú ne laya pur laya”. Peru naa cayabeʼ laatu: cadi gucaalutu ti binni malu, ne pa chuʼ tu capa xhágatu ladu derechu la? lagudiica né sti ladu ca» (Mateo 5:38, 39).

Guidúʼyanu xiñee guníʼ Jesús ca diidxaʼ riʼ: «Binadiágatu guníʼcabe». Zándaca guniʼbe ni pur ca líder stiʼ ca religión stiʼ ca judíu, purtiʼ laacaʼ bisiidicaʼ guquixe binni ni gúnicabe laa. Sicaríʼ bisiene ti hombre ni nanna de Biblia ni láʼ Adam Clarke de ley guié lú pur guié lú: «Zándaca biquiiñeʼ ca judíu ley riʼ [...] para gusihuínnicaʼ jneza ni rúnicaʼ ora ruquíxecaʼ ni runi binni laacaʼ ne guiráʼ ca cosa ni cadi jneza rúnicaʼ ora raca vengarcaʼ». Ra bicaa ca líder stiʼ ca religión stiʼ ca judíu binni gaca vengar, bisihuínnicaʼ maʼ bichaacaʼ modo naquiiñeʼ chinanda binni Ley stiʼ Dios (Marcos 7:13).

Peru Jesús bisiidiʼ pur nadxii Dios binni nga gudixhe ca ley stiʼ. Sicaríʼ guniʼbe: «“Gunnaxhii Jehová Dios stiluʼ [...]”. Ndiʼ nga primé mandamientu ne ni jma risaca. Ne guiropa ni zeeda gaca casi laani que, ná: “Gunnaxhii prójimo stiluʼ cásica nadxiiluʼ lii”. Lu guiropaʼ mandamientu riʼ nga biree guidubi naca Ley» (Mateo 22:37-40). Bisiidiʼ Jesús zunibiáʼ binni ca discípulo stiʼ pur nadxiisaacaʼ ne cadi pur guquíxecaʼ ni gúnicabe laacaʼ (Juan 13:34, 35).

a Lade ca ley ni gupa ca guidxi que dxiqué, laaca zeeda ley riʼ ne biree lani ley del talión (lu diidxaʼ latín lex talionis).