Cadi usaananu de gúʼyadxinu ni jneza
1. Xii nga gúʼyanu ni jneza, ne xiñee risaca ni.
1 Lu Libana de lu Dani ni bidii Jesús que, guniʼbe pabiáʼ nga nadipaʼ lunu, cásica ne ca cosa stiʼ Jiobá ne zaqueca lu xquendanabáninu. Laabe guniʼbe: «Guielú tu nga zeda gaca casi biaani sti cuerpu stitu. Nga runi pa ruyubi tu guʼya tu ni jneza la? ziaani xquenda biaani tu. Peru pa ruyubi tu guʼya tu ni cadi jneza la? zacahui xquenda biaani tu.» (Mat. 6:22, 23.) Gúʼyanu ni jneza nga gúʼyadxinu ti cosa si, nga nga gúninu ni na Dios, ne qué zudiʼnu lugar de que guendarapa bidxichi ucaabieque laanu (Mat. 6:19-21, 24-33). Ximodo ndiʼ cadi usaananu de gúʼyanu ni jneza yaʼ.
2. Xi cayabi Stiidxaʼ Dios laanu gúninu ti cadi icá íquenu gápanu stale cosa.
2 Guiechenenu ni nápasinu. Biblia nga cayabi laanu de que naquiiñeʼ guni tendernu cani caquiiñeʼ binnilídxinu (1 Tim. 5:8). Peru cadi cucaa diʼ nga laanu icá íquenu gúninu jma dxiiñaʼ para gápanu ni jma galán ne ni nacubi caree (Pro. 27:20; 30:8, 9). Sínuque, Stiidxaʼ Dios cayabi laanu de que chuʼnu nayeche ne cani caquiiñesinu para ibaninenu, ndiʼ nga rábinu «ni idóʼ no ne ni gacu nu» (1 Tim. 6:8; Heb. 13:5, 6). Pa ucaadiaga chaahuinu conseju riʼ la? zuuyadxinu ti cosa si.
3. Ximodo ucueezanu de gápanu stale cosa ni uchiiñaʼ laanu.
3 Cadi galán diʼ nga uzaabinu pur xiixa ni cadi caquiiñenu o gápanu dxiiñaʼ ni cuee xtiémpunu ne stipa stinu (1 Tim. 6:9, 10). Ximodo cadi guiábanu lu ca nga yaʼ. Ora iníʼ íquenu gúninu xiixa la? naquiiñeʼ ininenu Jiobá pa jneza nga ni rábinu gúninu ca ne gúʼyanu pa qué zuchiiñaʼ ni laanu ora gúninu xhiiñabe. Quixhe íquenu usisácanu jma dxiiñaʼ stiʼ Jiobá (Fili. 1:10; 4:6, 7).
4. Xiñee riquiiñeʼ usixieʼnu cani nápanu.
4 Usixieʼnu cani nápanu. Stobi ni zacané laanu cadi guiábanu lu guendarapa bidxichi nga gúninu stipa pur usixieʼnu cani nápanu. Ti bíchinu ni bidii cuenta de que binnilidxi zanda ibani sin stale luju guníʼ sicaríʼ: «Yanna zanda guneʼ jma para acaniáʼ ca bicheʼ ni nuu ra ridagulisaadu. Dxandipeʼ runeʼ cré de que Jiobá riguu ndaayaʼ ca xpinni ora riguixhe íquecaʼ guni adorarcaʼ laabe primé que uyúbicaʼ ni racaláʼdxicaʼ». Ñanda nicaaluʼ jma ndaayaʼ ra usixieʼluʼ cani nápaluʼ la?
5. Xiñee naquiiñeʼ gúninu stipa para cadi usaananu de gúʼyadxinu ni jneza.
5 Cadi usaanadinu de gúninu stipa pur udxiilunu cani rucaa Binidxabaʼ laanu gúninu, ne guidxilayú stibe ni cuyubi gapa puru bidxichi si ne ni rucaa beela ládinu ca laanu gúninu. Lugar de gúʼyadxinu guirá ladu la? ucaanu lunu gúʼyadxi ti ladu si, nga nga gúninu ni na Dios ne gúʼyadxinu ni bizabiruaabe gudiibe laanu, ti endanabani ni qué ziuu dxi iluxe (Pro. 4:25; 2 Cor. 4:18).