Ximodo zanda gacaneluʼ ca xiiñiluʼ gudxiilucaʼ ca guendanagana sticaʼ

Ziuu biaje zuchee ca xiiñiluʼ ora maʼ cayúnicaʼ xiixa ne zándaca pur nga guni sentircaʼ triste o guidxiichicaʼ. ¿Ximodo zanda gacaneluʼ laacabe yaʼ?

• Ni naquiiñeʼ gánnaluʼ

• Ni zanda gúniluʼ

Ni naquiiñeʼ gánnaluʼ

Ziuu biaje zucheʼnu. Biblia riníʼ «guiranu rucheʼnu» (Santiago 3:2). Laaca ruchee ca xcuidi ca. Peru ora ruchee ca xcuidi ca racané ni laacaʼ: purtiʼ riziidicaʼ gudxiilucaʼ guendanagana sticaʼ. Qué ralenédicabe cualidad riʼ peru zanda guni cultivárcabe ni. Laura, ti gunaa ni napa xiiñiʼ, guníʼ: «Naa ne xheelaʼ bidiʼdu cuenta, jma galán gusíʼdidu ca xiiñidu gudxiilucaʼ guendanagana sticaʼ qué gábidu laacaʼ jneza guiráʼ ni rúnicaʼ. Zacá riziidicabe cadi guireecabe gana ora chuʼ xiixa ni qué guiree modo cabézacabe».

Stale xcuidihuiiniʼ qué gánnacaʼ xi gúnicaʼ ora qué guiree xiixa modo racaláʼdxicaʼ. Nuu caadxi xcuidihuiiniʼ qué gánnacaʼ gudxiilucaʼ ca guendanagana sticaʼ purtiʼ siempre rapa bixhózecabe laacabe ti cadi gacanácabe. Casi ora guni reprobárcabe examen, nagueendaca rudxiibaʼ bixhózecabe donda ique maestru stícabe. Ne pa gápacabe xiixa guendanagana né tuuxa xhamígucabe la? riníʼ bixhózecabe xhamígube ca nga napa donda.

Peru, pa gúnicabe nga, ¿zaziidiʼ ca xcuidi ca gácacaʼ responsable la?

Ni zanda gúniluʼ

• Bisiidiʼ ca xiiñiluʼ zacanacaʼ pa gúnicaʼ xiixa ni cadi jneza

  Biblia ná: «Purtiʼ ni gudxiibaʼ binni la? ngaca guni cosechar» (Gálatas 6:7).

  Ora guni binni xiixa ni cadi jneza la? zándaca guniná tuuxa ne zándaca guicaa ti castigu pur laani. Galán guiziidiʼ ca baʼduhuiiniʼ ca ora gúnicaʼ xiixa ne qué guiree ni jneza la? galán guiénecabe laaca nápacabe donda. Lugar de ugaaniluʼ donda ique sti binni o guiniʼluʼ jneza guiráʼ ni runi xiiñiluʼ la? bidii lugar gúʼyabe nuu ti castigu biaʼ laabe pur iza stibe. Gucané ca xiiñiluʼ guiénecaʼ pa gúnicaʼ xiixa ni cadi jneza la? zedaneni ti castigu para laacaʼ.

• Gucané ca xiiñiluʼ guni chaahuicaʼ guendanagana sticaʼ

  Textu ni zanda gacané lii: «Peru neca guiaba ti binni runi ni jneza gadxe biaje, ziásabe sti biaje» (Proverbios 24:16).

  Neca naná nga ora guchee binni, peru cadi racá diʼ nga riluxe guidxilayú. Gucané ca xiiñiluʼ guni chaahuicaʼ ni qué ñúnicaʼ jneza ne cadi maʼ caníʼ íquecaʼ nuu tu bininá laacaʼ. Guzéʼtenu ti ejemplu, pa guni reprobar xiiñiluʼ ti examen, gudxi laabe zándaca biaadxaʼ ñuni estudiarbe jma (Proverbios 20:4). Pa gudindené xiiñiluʼ tuuxa xhamiga, gucané laabe guni chaahuibe ni neca cadi laabe gúpabe donda (Romanos 12:18; 2 Timoteo 2:24).

• Bisiidiʼ ca xiiñiluʼ cadi guiníʼ íquecaʼ jma risácacaʼ qué xcaadxi

  Textu ni zanda gacané lii: «Cayabeʼ cada tobi de laatu cadi guiníʼ ique jma risaca que biaʼ naca» (Romanos 12:3).

  Cadi galán diʼ nga gábiluʼ xiiñiluʼ biaʼsi guiráʼ ni runi. Purtiʼ dede ca baʼduʼ scuela ni jma nanna laaca rucheecaʼ ne ca ni guizáʼ nanna quiteʼ xiixa deporte laaca runíticaʼ. Ca xcuidihuiiniʼ ni riene nuu tiru zanda gueeda guchee la? qué racanápecaʼ ora qué guiree xiixa ni gúnicaʼ jneza.

  Biblia ruzeeteʼ racané ca guendanagana ca laanu guni huantarnu ne gácanu jma nadipaʼ (Santiago 1:2-4). Nga runi, neca chúʼcabe triste ora gucheecabe, gucané laacabe cadi guireecabe gana.

  Cásica riziidiʼ binni xcaadxi cosa, riquiiñeʼ tiempu ne stipa para gusiidiluʼ ca xiiñiluʼ cadi guireecaʼ gana ora gudxiilucaʼ xiixa guendanagana nápacaʼ. Ne zuuyaluʼ ora maʼ jovenhuiiniʼ laacabe la? galán guleeluʼ tiempu para bisiidiluʼ laacabe. Libru Letting Go With Love and Confidence (Bidii lugar guiziidicabe né amor ne confianza) ná: «Ca jovenhuiiniʼ ni nanna guni chaahuiʼ guendanagana stiʼ la? qué zúnicaʼ xiixa sin guiníʼ íquecaʼ pa zuniná ni laacaʼ. Ne ora guizaaca xiixa lu xquendanabánicabe la? laaca racaneni laacabe». Cadi guiaandaʼ laanu, neca maʼ huaniisinu caquiiñeruʼ guizíʼdinu cadi guireʼnu gana ora qué guiree ni racaláʼdxinu gúninu.

Ti sugerencia: Bidii ti ejemplu galán ca xiiñiluʼ. Pa nánnaluʼ modo gudxiiluluʼ ca guendanagana stiluʼ la? laaca zaziidiʼ ca xiiñiluʼ gúnicaʼ ni.