Gundisaʼ Jehová naa ne bisisácabe xquendanabane’

Gucaʼ ti baduhuiiniʼ nazaaca, peru dxi napaʼ ti iza ne xhoopaʼ beeu. Peru lu beeu agosto de iza 1967, málasi ti gueelaʼ gupaʼ xindxáʼ ne sti dxi que maʼ qué gapa ñeeʼ stipa, nga runi yenécabe naa ti hospital stiʼ Freetown, (Sierra Leona) guidxihuiiniʼ ra nabézadu, para gánnacabe xi cayacaʼ. Ca doctor que guniʼcaʼ napaʼ poliomelitis, ti guendahuará ni nagueenda ricá pur ti virus ni runi paralizar ne jma rinaazeʼ ni ca ni nahuiiniʼ. Qué ñacané diʼ fisioterapia naa para niguidxi ñeeʼ, ne chaahuiʼ chaahuiʼ maʼ qué ñanda nizayaʼ nin nuzuhuaaʼ. Cumu napaʼ discapacidad riʼ la? nabé guníʼ bixhozeʼ «galaa si xiiñiʼ napa». Huaxiéʼ autoestima gupaʼ purtiʼ rizáxanaʼ para ganda guneʼ xiixa. Ne guníʼ iqueʼ qué ziuu dxi guchaa modo nabaneʼ.

Ca dxi jma nagana gudideʼ

Naa ne jñaaʼ, gulézadu ndaaniʼ ti yoo ra nuu stale familia. Ne guiradu pobre laadu. Neca gunnaxhii ca binni que naa peru bixhozeʼ qué ñannaxhii naa. Nuu tu laa guníʼ cadi dxandíʼ huaraʼyaʼ, sínuque bíʼnicabe dañu naa. Ne xcaadxi gúdxicaʼ jñaaʼ chisaana naa ra ti internadu ra riuu xcuidi ni napa xiixa discapacidad. Rábicabe laabe zacatiʼ maʼ qué ziuube xizaa pur naa. Peru qué nucaadiaga jñaaʼ laacabe ne bíʼnibe guiráʼ ni nuu lu nabe para gápabe naa.

Cumu qué randa ruzuhuaaʼ ne qué randa rizayaʼ la? rizáxanaʼ para guneʼ ni. Peru nabé racanaʼyaʼ. Nga runi, racuaʼ lari nanaandeʼ ne riguaaʼ chancla nayaʼ. Despué maʼ qué niquiiñeʼ chancla ne maʼ biquiiñeʼ chupa pedazu tabla. Para gudieeʼ ti pasu riguixhenaʼyaʼ lu guiropaʼ tabla que ne rucuudeʼ decheʼ para ganda xubeyuaʼ cuerpu stinneʼ. Nabé racaná nayaʼ ne xiqueʼ. Qué nireeʼ de ra nabézadu. Purtiʼ nabé rusidxaga ni naa. Qué ñaaʼ scuela ne qué niguiteniáʼ xcaadxi xcuidi ne nabé guyuaaʼ xizaa xi gácaxa de naa ora maʼ qué guinni jñaaʼ.

Gunabaʼ Dios gacané naa purtiʼ qué racalaʼdxeʼ guinabaʼ guna lu calle. Guníʼ iqueʼ pa guidxiñaʼ Dios ne guneʼ ni nabe la? qué zusaanabe naa stubeʼ. Nga runi, lu iza 1981 guyaaʼ ndaaniʼ ti yuʼduʼ ni nuu gaxha de ra nabézadu. Nagana ne naná guca para naa chindayaʼ raqué. Ora guyuaaʼ raqué biyadxísicabe naa ne huaxiéʼ galán bineʼ sentir purtiʼ dede pastor nuu raqué qué nidxaagalú naa galán. Laga gudindenebe jñaaʼ purtiʼ guriéʼ ti lugar ni maca gudixe sti binni. Gudixhe iqueʼ qué ziuu ruʼ dxi guibiguetaʼ raqué.

Runebiaʼyaʼ Bixhozeʼ ni nuu guibáʼ

Guiráʼ dxi, riguibaʼ lu guiropa pisu ne ribiéʼ gaxha de ra ventana para guyadxiéʼ xi guiráʼ raca. Peru lu iza 1984, dxi napaʼ 18 iza, bineʼ ti cosa ni qué huayuneʼ. Ti dxi maʼ nuaaʼ luguiáʼ que bieteʼ lu patiu ra guirutiʼ riuu. Raqué biiyaʼ chupa hombre canayuni predicarcaʼ de yoo pur yoo. Bidxíñacabe ne guniʼnécabe naa de ca cosa galán ni chigaca despué. Gúdxicabe naa zuchaa modo nabaneʼ ne biindanécabe naa Isaías 33:24 ne Apocalipsis 21:3, 4. Ne bidiicabe naa ti folletu ni láʼ ¡Disfrute para siempre de la vida en la Tierra! Ne gúdxicabe naa zabiguétacabe para gusiidirúcabe naa.

Ne dxi bibiguétacabe, gúdxicabe naa sti biaje gueedacabe zeedanécabe Pauline, ti misionera para gunebiaʼyaʼ laa, ne bíʼnicabe ni. Binebiaʼyaʼ Pauline, ne beedagácabe casi jñaaʼ. Nacháʼhuibe, nápabe paciencia ne guizáʼ nadxiibe naa…; bíʼnibe stale cosa pur naa ne biiyabe cadi guiaadxaʼ gastiʼ naa. Jñaapiaʼ riguu gana naa para guundaniáʼ Pauline Biblia. Bisiidiʼ Pauline naa guundaʼ ne gucanebe naa né Libru stinneʼ de ca historia stiʼ Biblia, gunebiaʼyaʼ Bixhozeʼ ni nadxii naa, ni siempre gucalaʼdxeʼ ñapaʼ.

Guizáʼ guyuuladxeʼ ca ni caziideʼ que. Ne gunnaʼ gaxha de ra nabezaʼ que runi ca testigu stiʼ Jehová tobi de ca reunión sticaʼ ra lidxi ti hermanu. Laani nga estudiu de libru stiʼ congregación.a Ti dxi gunabadiidxaʼ Pauline pa zanda chaaʼ ne laabe gúdxibe naa zanda. Ngue runi, sti dxi que, ti martes, beedacaabe naa, gulézabe guzéʼ, gucuaʼ lari ne guyuudu juntu. Guyuu tu gudxi naa gabeʼ Pauline chiné naa lu taxi, peru gudxeʼ laacaʼ: «Coʼ, zanda chindayaʼ né ca pedazu tabla stinneʼ».

Ora bireʼdu, guizáʼ bidxagayaa jñaaʼ ne ca vecinu stidu ne cayuuyadxicaʼ laadu. Ora zidídidu lu patiu que, bicaa ca vecinu que ridxi ne rábicaʼ Pauline: «¡Cadi guni obligarluʼ laabe!».

Óraque gunabadiidxabe naa: «Jay, ¿napuʼ gana cheuʼ la?». Dxiqué nga naquiiñeʼ gusihuinneʼ pa napaʼ confianza Jehová (Proverbios 3:5, 6). Óraque gudxeʼ laabe: «¡Ya, napaʼ gana chaaʼ!». Maʼ qué niníʼ ca vecinu que gastiʼ, ne jmaruʼ si ora maʼ zidxiñaʼ gaxha de portón que. Bireesiaʼ fuera guiracaʼ gudapanacaʼ de tantu cayéchecaʼ.

¡Guizáʼ guyuuladxeʼ reunión que! Ne nabé guyuaaʼ gana. Guirutiʼ ñuni menu naa. Guirácabe bidxaagalúcabe naa ne nabé galán bineʼ sentir. De raqué maʼ bizuluáʼ guyaaʼ ca reunión guiráʼ martes. Ne despué gunabadiidxaʼ pa zanda chaaʼ reunión ni raca ra Yoo stiʼ Reinu stiʼ ca Testigu stiʼ Jehová. Neca pobre naa ne chupa si vestidu napa ne ti par chancla, gunnaʼ dxicheʼ qué zucaanáʼ xquidxi Dios naa. Ne zaqué gúcani.

Para chindayaʼ ra Yoo stiʼ Reinu, rizáxanaʼ dede ra riluxe calle stinneʼ ne ricaaʼ ti taxi. De racá ruaʼ ca hermanu naa ne riguíbadu lu ti danihuiiniʼ para chindadu ra Yoo stiʼ Reinu.

Maʼ biiyaʼ pabiáʼ nachaʼhuiʼ Jehová ne nannaʼ ra nuusibe nga zanda guilaʼyaʼ. Nga runi gudixhe iqueʼ cadi guiaadxaʼ nin ti reunión (Salmo 34:8). Ne ora riaba nisaguié, rindayaʼ maʼ nadxeʼ nuu xhabaʼ ne maʼ nazeʼ beñe, ne maʼ ra salón ruchaaʼ xhabaʼ. ¡Neca zacá, guizáʼ riecheʼ ora rindayaʼ!

Biree historia stinne’ lu Anuario de los testigos de Jehová lu iza 1985. Biindaʼ Josette, ti hermana de Suiza, historia stinneʼ ne yendá ni ndaani’ ladxidóʼ ne bisiga’de naa ti triciclo ni zanda gusaya’ né naya’. Napa triciclo que salpicadera para cadi guchani beñe lade’ ne caadxi tira de color ni ruzaani’ huaxhinni. Ora gu’ya’ ca xcuidi ni la? ridxagayaaca’ ne naca’ guizá’ riuulá’dxica’ triciclo stinne’. Yanna la? ma’ qué rizáxana’ layú; ma’ galán rune’ sentir. Ma’ qué runi binni menu naa ne maʼ respetarcaʼ naa.

Ca dxi jma galán bibaneʼ

Nagueenda biniise’ en sentido espiritual purti’ gupa’ ti guendanabani sencíu ne qué ñune’ cosa malu. Gucané triciclo que naa para ganda gune’ predicar. Ne guyuaanisaʼ 9 de agosto iza 1986. Raqué nga bizulú ca dxi jma galán para naa. Bidxá tipa ladxiduá’ de guendanayeche’ ne bine’ sentir risaca’ purti’ yanna ma’ napa’ ti Bixhoze’ ni nadxii naa ne ti familia ni dxandí’ rizaala’dxi’ naa.

Gudixhe iqueʼ quixeʼ Jehová pur guiráʼ ni maʼ bi’ni’ pur naa. Nga runi guní’ ique’ gaca’ precursora regular neca cadi nuaaʼ segura pa zanda gune’ ni (Salmo 116:12). Peru gudxe’ ni Jehová lu ti oración ne bizuluá’ guca’ precursora 1 stiʼ enero iza 1988, ne dede dxi que qué huasaanaʼ de gune’ ni. Beeda gácani ti ndaaya’ para naa. Racané ca hermanu naa para ganda gusaa’ ca hora stinneʼ ne ruuya’ ximodo racané Jehová ne espíritu sti’ naa (Salmo 89:21).

Cumu jma biniibe’ ra guca precursora la? ma’ bizulú gupa ñeeʼ stipa. Ne ra gudi’di’ tiempu guyaa’ ra ti clínica para guicaa’ fisioterapia ne xcaadxi ejerciciu. Peru raqué gudxi ti enfermera naa cunitesiá’ tiempu stinneʼ purti’ qué zabaneʼ xadxí. Ne ngueca guníʼ sti enfermera ne gulee ngue gana naa. Yendayasiá’ ra lidxe’, gunaba’ Jehová gacané naa cadi cuee ca ngue gana naa ne guidxela’ xiixa ni ganda gacané naa.

Ne ni jma gucané naa nga gune’ predicar purti’ guizá’ rune’ ejerciciu. Caadxi iza despué, gudi’di’ tobi de ca enfermera ni gudxi naa qué zabane’ xadxí que neza ra nuu Yoo sti’ Reinu ne biiya’ naa. ¡Bidxagayaabe ora bí’yabe nabaneruá’!

Neca zacá nabane’ la? rune’ bia’ gándati’ lu xhiiña’ Jehová. Ne ndaani’ congregación riguucabe gana naa purti’ cayune’ ni ná Jehová de guidubi ladxiduá’ ne rindaya’ tempranu lu ca reunión. Rune’ ni ti ganda gudieena’ya’ guirá’ ca hermanu ne gannaʼ ximodo nuucaʼ.

Bia’ tiempu huabane’, maʼ biiyaʼ pabiáʼ nacha’hui’ Jehová né naa; ne nabé huaguube ndaaya’ naa. Maʼ gucaniá’ chonna binni gunibia’ Jehová ne chúʼnisa. Tobi de laacabe nga Amelia, ni guyé clase 137 sti’ Escuela de Galaad. Ne naa la? stale biaje ma’ guyaaʼ Escuela sti’ ca Precursor. ¡Nácacani ti ndaaya’ sti’ Jehová! Yanna, rudieeʼ xquixe pe’ Jehová purtiʼ nabane’ nayeche’ ne maʼ rune’ sentir segura ne risaca’. Ma’ qué rituiluáʼ pur modo nabane’. Yanna ma’ napa’ stale xhamiguá’ ni cayuni ni ná Jehová ne cadi ndaaniʼ guidxi Freetown si, sínuque lu guidubi naca Guidxilayú.

Ma’ gudi’di’ 40 iza de dxi gúdxicabe naa maʼ bidii stiidxa’ Dios ziuu ti guidxilayú cubi ra ma’ qué zapa binni xiixa discapacidad. Dede yanna rudii promesa ca stipa naa ne ma’ cabezasiá’ dxi gaca cumplir ni. Cabeza’ né stale paciencia dxi guni cumplir Jehová ni ma’ guní’ ne nanna’ qué zandaabe (Miqueas 7:7). Pur paciencia stinne’ huabeenduá’ stale cosa purti’ huayacané Jehová naa gudxieeluá’ stale guendanagana. Qué rusaana Jehová naa stube’. Napa’ stale razón para chuaa’ nayeche’ purti’ dxandíʼ peʼ gundisa’ Jehová naa ne bisisaca naa jma que bia’ guní’ ique’.