¿Ñee jneza nga guni orarnu bidóʼ la?

Ni rusiidiʼ Biblia

Qué rusiidiʼ diʼ Biblia naquiiñeʼ guni orarnu ca bidóʼ ca. Caquiiñeʼ guni orarnu Dios si ne gúninu ni lu lá Jesús. Laabe gúdxibe ca discípulo stibe: Naquiiñeʼ guni orartu sicaríʼ: «Bixhózedu ni nuu guibáʼ, guisácapeʼ laluʼ» (Mateo 6:9). Qué niníʼ diʼ Jesús naquiiñeʼ guni adorarnu ti bidóʼ, ti ángel o sti binni, sínuque Dios si.

Jesucristu laaca guníʼ:« Naa nga neza ca, ne rusiide ni dxandíʼ ne rudiee enda nabani ni qué zaluxe. Iruti zie ra nuu Bixhoze pa cadi pur naa» (Juan 14:6). Jesús si nga napa derechu para guiníʼ pur laanu nezalú Dios (Hebreos 7:25).

¿Ñee zanda guni orarnu Dios ne laaca guni orarnu ca bidóʼ ca la?

Lu tobi de ca Chii Mandamientu que, guníʼ Dios: «Purtiʼ naa Jehová Dios stiluʼ, nacaʼ ti Dios ni rinabaʼ guni adorárcabe laa si» (Éxodo 20:5). ¿Ximodo nga rinabaʼ Dios guni adorárcabe laa si yaʼ? Ti nota ni zeeda lu Biblia de América cusiene versículo ca sicaríʼ: «Laabe nga tobi lucha Dios [...] nin ti bidóʼ qué ziuu lugar stibe». Dios rinabaʼ guni adorarnu laa si, ne tobi de ca modo rúninu ni nga ora runi orarnu laabe (Isaías 48:11).

Pa guni orarnu bidóʼ, tuuxa ángel o tutiica laa la? zuninanu ladxidóʼ Dios. Libru stiʼ Apocalipsis (Revelación) ná ora biaba apóstol Juan xañee ti ángel para guni adorarbe laa, ná ángel que rabi laabe: «Cadi guʼnu nga. Naa laca rune xhiiña Dios casi ruʼnuʼ, lii ne ca xcaadxi hermanu stiuʼ ni qué riree chu lu stiidxa Jesús. Bisisaca Dios» (Apocalipsis 19:10).