¿Ñee huaníʼ íqueluʼ casi ca binni riʼ la? Zándaca gucaláʼdxiluʼ gúʼndaluʼ Biblia, peru guyuu xiixa ni bicueeza lii. Stale binni riníʼ ique pa gúʼndacaʼ libru riʼ zareecaʼ gana. Peru ¿xi niníʼ íqueluʼ pa ñábicabe lii zacané libru riʼ lii guibániluʼ galán ne nayecheʼ yaʼ? ¿Yanna pa ñábicabe lii nuu stale modo zanda gúʼndaluʼ ni sin guireeluʼ gana yaʼ? ¿Ñee ñuuluʼ dispuestu ñánnaluʼ xi rusiidiʼ Biblia la?

Biiyaʼ xi guníʼ caadxi binni ni bizulú biindacaʼ Biblia ne guleenducaʼ stale cosa galán ra bíʼnicaʼ ni.

Ezekiel, ti joven ni napa jma de 20 iza, guníʼ: «Dxiqué gucaʼ casi ca binni ni zeʼ lu ti carretera ni qué ganna pa ladu cheʼ, peru huayacané Biblia naa gannaʼ xi zanda guneʼ né xquendanabaneʼ. Luni zadxélaluʼ stale cosa galán ni zacané lii guiráʼ dxi».

Frieda, ti gunaa ni laaca napa jma de 20 iza, guníʼ: «Dxiqué nagueenda ridxiicheʼ, peru huayacané Biblia naa gucueeza laca naa. Maʼ qué ridxiicheʼ nagueenda ne yanna maʼ napaʼ jma xhamigaʼ ne xhamiguaʼ».

Ti gunaa láʼ Eunice ni napa jma de 50 iza, guníʼ: «Cayacané Biblia naa gacaʼ ti binni jma nachaʼhuiʼ ne guneʼ ni jneza».

Pa gúʼndaluʼ Biblia, zabániluʼ jma nayecheʼ, casi ca binni ni bizéʼtenu riʼ ne millón de binni ni huayuni ni (Isaías 48:17, 18). Zacané ni lii guicaaluʼ decisión galán, gápaluʼ xhamíguluʼ, cadi gápaluʼ estrés ne ni jma galán nga zanda guiziidiluʼ de Dios ni bizáʼ guiráʼ ni nuu. Ca conseju ni zeeda lu Biblia zeeda ca ni de Dios, nga runi zanda chinándanu ca ni. ¿Xiñee yaʼ? Purtiʼ nabé galán guiráʼ ca conseju ni rudiibe.

Ora gúʼndaluʼ ca xcaadxi artículo ni zeeda lu revista riʼ, zadxélaluʼ caadxi sugerencia ni zacané lii guzululuʼ gúʼndaluʼ Biblia ne cueenduluʼ ni galán ra gúniluʼ ni.

¿Xi zanda gúniluʼ para chuuláʼdxiluʼ gúʼndaluʼ Biblia ne cueenduluʼ ni galán? Guidúʼyanu gaayuʼ cosa ni huayacané stale binni.

Gulí ti lugar. Biyubi ti lugar ra gastiʼ guchiiñaʼ lii. Pa cuiluʼ ti lugar ra cadi gaca distraerluʼ, ra nuu biaaniʼ ne ra rundubi bi, jma zaca concentrarluʼ ora maʼ cayuundaluʼ.

Gudixhe ique guiéneluʼ ni gúʼndaluʼ. Naca Biblia ti regalu nabé galán maʼ bidii Bixhózenu ni nuu guibáʼ laanu. Para cueenduluʼ ni galán de laani, biindaʼ ni casi runi ti xcuidihuiiniʼ ora racalaʼdxiʼ guiziidiʼ de bixhoze. Cadi guiníʼ íqueluʼ qué risaca ni ná Biblia, sínuque bidii lugar gusiidiʼ Dios lii (Salmo 25:4).

Biʼniʼ orar ante guzululuʼ. Lu Biblia zeeda stale conseju ni maʼ bidii Dios, nga runi caquiiñenu tu gacané laanu guiénenu ca ni. Maʼ guniʼbe zudiibe espíritu santu stibe ca ni guinabaʼ ni laabe (Lucas 11:13). Zanda gacané espíritu santu lii guiníʼ íqueluʼ casi Dios. Ne ra tidiʼ tiempu ziéneluʼ «dede ca cosa stiʼ Dios ni jma nagana» (1 Corintios 2:10).

Bi’ni’ stipa guiéneluʼ ni cayuundaluʼ. Cadi gúʼndaluʼ ti luguiá si. Ora maʼ ziyuundaluʼ, guníʼ ique ni cayuundaluʼ. Gunabadiidxaʼ laca lii: «¿Xi cualidad bisihuinni binni ni riete lu relatu riʼ? ¿Ximodo zanda guneʼ ni caziideʼ lu xquendanabaneʼ?».

Gudixhe ique cueenduluʼ ni galán. Para chuuláʼdxiluʼ gúʼndaluʼ Biblia, biʼniʼ stipa guiziidiluʼ xiixa ni gusiecheʼ lii. Zanda quixhe íqueluʼ gunibiaʼluʼ jma de Dios, gácaluʼ ti binni jma nachaʼhuiʼ, guibanineluʼ xheelaluʼ nayecheʼ o xcaadxi cosa. Despué gulí xi sección de lu Biblia ñuuláʼdxiluʼ ñuundaluʼ.a

Zanda gacané gaayuʼ cosa riʼ lii, peru ¿xi zanda gúniluʼ para chuuláʼdxiluʼ gúʼndaluʼ Biblia yaʼ? Lu stiʼ artículo ca zadxélaluʼ xcaadxi sugerencia.

Pa qué racaláʼdxiluʼ guireeluʼ gana ora maʼ cayuundaluʼ Biblia la? caquiiñeʼ gúniluʼ xiixa. Guidúʼyanu caadxi cosa ni zanda gúniluʼ ti chuuláʼdxiluʼ gúʼndaluʼ Biblia.

Gulí ti traducción nacubi ne ni zanda gápaluʼ confianza. Pa lu Biblia ni cayuundaluʼ riete diidxaʼ nagana, huaxiéʼ ziéneluʼ ni cayuundaluʼ. Nga runi, biyubi ti Biblia ni guiéneluʼ ni cá luni ne chindá ca diidxaʼ stini ndaaniʼ ladxidoʼloʼ. Laaca naquiiñeʼ gaca ni ti traducción biaʼsi ne ni zanda gápaluʼ confianza.a

Zanda iquiiñeluʼ ca tecnología jma nacubi ni nuu. Tiempu riʼ, laaca zanda gápaluʼ ti Biblia lu formatu electrónicu. Zanda gúʼndaluʼ ni lu Internet o guni descargarluʼ ni lu ti computadora, tableta o teléfono. Lu caadxi versión stiʼ Biblia zanda gúʼyaluʼ ximodo guca traducir ti versículo lu stale traducción stiʼ Biblia o zanda guchaagaluʼ ni cayuundaluʼ né ni zeeda lu sti traducción. Ne pa qué racaláʼdxiluʼ gúʼndaluʼ Biblia la? zanda gucaadíagaluʼ audio stini. Stale binni riuulaʼdxiʼ gucaadiaga audio stiʼ Biblia ora zecaʼ ra dxiiñaʼ, ora caguiibicaʼ lari ne ora cayúnicaʼ xcaadxi cosa. ¿Guná de ca cosa riʼ ñuuláʼdxiluʼ ñúniluʼ? ¿Xiñee qué gúniluʼ ca ni bizéʼtenu riʼ yaʼ?

Biyubi jma información. Nuu caadxi cosa ni zanda gúniluʼ para chuuláʼdxiluʼ gúʼndaluʼ Biblia. Guzéʼtenu ti ejemplu, zanda gúʼyaluʼ ca mapa ra zeeda ca lugar ni riete lu Biblia ne guiníʼ íqueluʼ ni bizaaca racá. Laaca zanda gúʼyaluʼ xcaadxi artículo ni zeeda lu revista riʼ ne ni zeeda lu sección ni láʼ «Ca ni rusiidiʼ Biblia» ni nuu lu sitiu jw.org. Últimu riʼ zacané ni lii guiéneluʼ ca relatu ni zeeda lu Biblia.

Biyubi modo gúʼndaluʼ Biblia. Pa rireeluʼ gana gúʼndaluʼ Biblia de ra ruzulú ni hasta riluxe ni la? zanda gúniluʼ xiixa ti chuuláʼdxiluʼ gúʼndaluʼ ni. Para gánnaluʼ jma de ti personaje ni riete lu Biblia, zanda gúʼndaluʼ ni pur personaje. Recuadru ni láʼ «Biziidiʼ jma de Biblia ra gunibiaʼluʼ ca personaje ni riete luni» zanda gacané ni lii pa racaláʼdxiluʼ gánnaluʼ jma de ti personaje. Laaca zanda gúʼndaluʼ ni pur tema ne pur orden cronológico. ¿Xiñee qué gúniluʼ ca ni bizéʼtenu riʼ yaʼ?

Cadi intiica si libru nga Biblia. Luni zadxélaluʼ conseju stiʼ Dios ni bizáʼ guiráʼ ni nuu (2 Timoteo 3:16). Zanda gacané mensaje stini lii. Ne Biblia peʼ ná: «Nabani stiidxaʼ Dios ne napa poder» (Hebreos 4:12). Zanda gacané libru riʼ lii de chupa modo: zanda gudii ni lii conseju ne gacané ni lii gunibiaʼluʼ Dios ne ca promesa stiʼ (1 Timoteo 4:8; Santiago 4:8).

Rudii ni conseju. Lu Biblia zeeda conseju ni racané laanu guibáninu galán ne laaca racané ni laanu lu xcaadxi cosa.

• Guidxaaganu xcaadxi binni (Efesios 4:31, 32; 5:22, 25, 28, 33).

• Chuʼnu nazaaca (Salmo 37:8; Proverbios 17:22).

• Gúninu ni jneza (1 Corintios 6:9, 10).

• Gápanu ni iquiiñenu (Proverbios 10:4; 28:19; Efesios 4:28).a

Bidii ti guendaxheelaʼ de Asia cuenta ximodo racané ca conseju stiʼ Biblia. Cumu nacubi bichaganácabe la? cayaca nagana para laacabe chúʼcabe de acuerdu. Peru bizulú bíʼnicabe ni rusiidiʼ Biblia. ¿Xi guleendúcabe yaʼ? Vicent, guníʼ: «Ni biindaʼ lu Biblia gucané naa gudxieeluáʼ ca guendanagana né guendarannaxhii. Yanna ra maʼ zinándanu ca conseju stiʼ Biblia, maʼ nabánidu nayecheʼ». Ne Annalou, xheelabe, guníʼ: «Ti cosa ni gucané laadu nga guidúʼndadu ca ejemplu sti hombre ne gunaa ni riete lu Biblia. Yanna maʼ nuaaʼ nayecheʼ ne maʼ gudixhe íquedu gúnidu jma cosa casi guendaxheelaʼ».

Racané ni gunibiaʼluʼ Dios. Laaca bizeeteʼ Vicent ca diidxaʼ riʼ: «Ora ruundaʼ Biblia, runeʼ sentir nuaaʼ jma gaxha de Jehová». Ni guníʼ hombre riʼ racané ni laanu gudiʼnu cuenta zanda gacané Biblia laanu gunibiaʼnu Dios. Ora gúʼndaluʼ Biblia, zabeenduluʼ ni galán de ca conseju ni zeeda luni, peru laaca zacané ni lii gácaluʼ xhamigu Dios. Laaca zaziidiluʼ zabáninu jma galán despué, zudii Dios laanu ti guendanabani ni qué zaluxe ne zabáninu para siempre ndaaniʼ ti lugar nabé sicarú (1 Timoteo 6:19). Nin lu sti libru qué riete guiráʼ ca ndaayaʼ riʼ.

Pa guzulú gúʼndaluʼ Biblia ne gúniluʼ ni guiráʼ dxi la? zabániluʼ jma nayecheʼ ne zunibiaʼluʼ Dios. Peru zándaca ra ziyuundaluʼ ni, zápaluʼ stale guendarinabadiidxaʼ. Pa guizaacaluʼ ni bizéʼtenu riʼ, bietenalaʼdxiʼ ni biʼniʼ ti hombre etíope ni bibani raca jma de chupa mil iza. Gupa hombre riʼ stale pregunta ora bizulú biindaʼ Biblia, nga runi, Felipe, ti discípulo stiʼ Jesús, gunabadiidxaʼ laabe pa cayénebe ni cayuundabe, para gúdxibe hombre que: «¿Ximodo guieneʼ ni pa guirutiʼ gusiene ni naa?».b Óraque, bidiibe lugar gacané Felipe laabe (Hechos 8:30, 31, 34). Ngaca lii, pa racaláʼdxiluʼ guiéneluʼ jma de Biblia, runi invitardu lii guni rellenarluʼ formulariu ni nuu lu jw.org o gucaaluʼ ra dirección ni zeeda lu últimu yaza stiʼ revista riʼ. Laaca zanda guiníʼneluʼ ti testigu stiʼ Jehová ni nabeza neza ra lídxiluʼ o cheluʼ ra ti Yoo stiʼ Reinu. Riguʼdu gana lii gúʼndaluʼ Biblia ne gudiiluʼ lugar gacané libru riʼ lii guibániluʼ jma nayecheʼ.