¿Ximodo riaxa dxiiñaʼ runi ca testigu stiʼ Jehová?

Randa raca dxiiñaʼ stidu pur ca donación ni rudii ca testigu stiʼ Jehová de guidubi ladxidoʼcaʼ.a Zanda gusaba binni donación stiʼ ndaaniʼ ca caja ni nuu ndaaniʼ ca Yoo stiʼ Reinu o laaca zanda guidxela ximodo guni ni lu sitiu de Internet jw.org. Zanda guʼyuʼ pa zudiiluʼ donación stiluʼ para obra mundial, para ca gastu ni raca ndaaniʼ Yoo stiʼ Reinu o para guiropaʼ ni.

Cadi nexheʼ diʼ pabiáʼ bueltu gudii cada testigu stiʼ Jehová. Qué rudiicabe diezmu ne guirutiʼ rinabaʼ laacabe gudiicabe parte de sueldu stícabe (2 Corintios 9:7). Ora raca ca reunión stidu qué raca colecta ne qué riguixe binni para chuʼ. Qué riaxa ca ministru stidu ora cuʼnísacaʼ tuuxa, ora gudiicaʼ discursu ra gutiʼ binni o para ti guendaxheelaʼ. Qué rutoʼdo guendaró o xcaadxi cosa para gutópadu bueltu. Laaca qué rúnidu rifa, qué rutoʼdo boletu, qué rutoʼdo guendaroxhí ne qué rúnidu saa o xcaadxi cosa casi laacani para gutópadu bueltu, laaca qué rizadu para guinábadu binni bueltu. Ne qué lica ruzéʼtedu lá ca binni ni gudii xiixa donación (Mateo 6:2-4). Laaca qué rúnidu anunciu lu sitiu o lu ca publicación stidu para gutoʼdo xiixa.

Guiráʼ beeu rudiicabe ti informe de cuenta ndaaniʼ cada congregación stiʼ ca testigu stiʼ Jehová, ne zanda gucaadiaga guiráʼ binni ni. Maʼ nexheʼ padxí gaca revisar cuenta stiʼ cada congregación para gúʼyacabe iquiiñeʼ ca donación ca jneza (2 Corintios 8:20, 21).

Ximodo gudiʼnu donación

• Caja ra riaba bueltu: Zanda gusábaluʼ donación stiluʼ, bueltu o cheque, ndaaniʼ ca caja ra riaba bueltu ni nuu ndaaniʼ ca Yoo stiʼ Reinu, Salón de Asamblea o xcaadxi lugar ra ridagulisaadu.

• Donación pur Internet: Ndaaniʼ stale guidxi riquiiñecabe página ni nuu lu diidxastiá, “Donar a los testigos de Jehová” para guni donárcabe né tarjeta de crédito o débito, gúnicabe xiixa transferencia o xcaadxi modo raca ni lu Internet.b Caadxi testigu riguixhe íquecaʼ cueecaʼ ti ndaa bueltu guiráʼ beeu, nga runi riquiiñecaʼ tobi de ca método riʼ para guni programarcaʼ donación sticaʼ (1 Corintios 16:2).

  

• Donación ni maca nexheʼ gacaʼ: Nuu caadxi donación ni caquiiñeʼ gaca planificar ne gapa asesoría legal. Ndiʼ zacané lii guni aprovecharluʼ ca beneficiu fiscal nuu ndaaniʼ xquídxiluʼ. Stale tu laa huayuuyaʼ jma galán guinabadiidxaʼ dede ante ximodo zanda guni xiixa donación laga nabani o despué de gatiʼ. Zanda guiniʼluʼ ra sucursal stiʼ ca testigu stiʼ Jehová ni nuu xquídxiluʼ para gánnaluʼ jma ximodo zanda gúniluʼ donación ra iquiiñeluʼ:

  • cuenta de bancu

  • seguru ne plan de jubilación

  • bienes raíces

  • acciones ne bonos

  • testamentu ne fideicomisu

Pa racaʼdxiluʼ gánnaluʼ jma de xcaadxi método de donación nuu neza ra nabázaluʼ la? zanda chuʼluʼ lu página ni nuu lu diidxastiá, “Donar a los testigos de Jehová”.