Ni zanda gúniluʼ para guiéneluʼ Biblia

2. Biindaʼ ni sin guiníʼ íqueluʼ cadi jneza ni zeeda luni

Ñee huayuu tuuxa ni gudxi lii ti cosa ni cadi galán de ti binni ni qué runibiaʼluʼ la? Xi bizaaca ora binibiaʼluʼ binni ni bizeetecabe que yaʼ. Zándaca guca nagana para lii gúʼyaluʼ ca guenda sicarú nápabe. Zacaca nga rizaaca stale binni ora guzulú guʼndaʼ Biblia.

APOSTOL Pablu gunna nagana raca para binni guʼndaʼ Stiidxaʼ Dios ora maʼ gúdxicabe laa cadi jneza ni cá luni. Ngapeʼ nga ni biʼniʼ caadxi judíu lu primé siglu que, sicaríʼ guniʼbe de laacaʼ: «Dxandí rucaa ique cabe guni cabe ni na Dios, peru cuchee cabe modo na cabe» (Romanos 10:2).

Stiidxaʼ Dios ni gucuá lu diidxaʼ hebreu maca bizeeteʼ zeeda ti Mesías, peru cumu guníʼ ique ca binni que cadi jneza ngue ni cá luni la? ngue runi qué ñuni crecaʼ Jesús ora beeda. Neca cahuinni cayuni Jesús de Nazaret ni na ca diidxaʼ riguixhená que, ca judíu qué ñénecaʼ ni cusiidiʼ Stiidxaʼ Dios purtiʼ maca dede ante guníʼ íquecabe cadi jneza ni.

Xi rizíʼdinu de ni biʼniʼ ca binni ca yaʼ. Rizíʼdinu naquiiñeʼ cueenu de ndaaniʼ íquenu guiráʼ cosa ni cadi jneza huaníʼcabe de Biblia ora guidúʼndanu ni. Pa qué cueenu ca cosa ca de ndaaniʼ íquenu la? qué zacanedícani laanu guiénenu Stiidxaʼ Dios.

Ti maestru ni rusiidiʼ de Religión ni nuu Carolina del Norte (Estados Unidos) guníʼ zeeda gaca Biblia casi «ti libru ni biʼniʼ caadxi binni para guʼndaʼ xcaadxi, zeeda stale cosa ni cadi biaʼsi luni ne qué zanda diʼ gacané ca conseju stini para guibani binni galán». Yanna pa guiníʼ íquenu naca Biblia «ti libru ni biʼniʼ caadxi binni para guʼndaʼ xcaadxi», ñee cadi dxandíʼ zucaa nga laanu gucáʼnanu ca ley ne ca conseju ni qué chuuláʼdxinu la?

Peru Biblia cayabi laanu guiduʼndaʼ chaahuinu ni, cásica biʼniʼ ca binni de Berea dxi bibani Pablu. Ca binni que cadi bicaadiágasicaʼ «stiidxa Dios ne stale gana», sínuque «irá dxi ma cuyubi ca lu Xquiʼchi Dios pa jneza ni caziidi ca» (Hechos 17:11). Pa racaláʼdxiluʼ guiene chaahuiluʼ Biblia la? naquiiñeʼ gúniluʼ casi biʼniʼ ca binni que. Biindaʼ ni sin guiníʼ íqueluʼ cadi jneza ni zeeda luni ne cadi gulábiluʼ xcaadxi cosa ni cadi jneza guiníʼcabe de laani. Nga runi, ora gúʼndaluʼ Biblia guníʼ ique xi guiráʼ cosa sicarú chigusiidiʼ Dios lii, ne biʼniʼ stipa pur cueeluʼ de ndaaniʼ íqueluʼ ca cosa ni cadi jneza ni huayunadiágaluʼ de laani.