ÑEE NANNUʼ NI LA?

Ximodo bibani ca esclavu tiempu biʼniʼ mandar Roma

Tiempu biʼniʼ mandar Roma, stale de ca binni que gunaazeʼ ca soldadu que laacaʼ o biʼniʼ secuestrárcabe laacaʼ lu ca guerra guyecaʼ. Bitoocabe laacaʼ casi esclavu ne stale de laacaʼ maʼ qué ñuu ruʼ dxi ñuuyacaʼ binnilídxicaʼ.

Stale de laacaʼ bíʼnicaʼ dxiiñaʼ ndaaniʼ ca mina que dede ora gáticaʼ, peru ca esclavu ni biʼniʼ dxiiñaʼ lu layú o ndaaniʼ yoo la? ribánicaʼ xcaadxi galán. Xpixuaanacabe zanda ugaanda laacabe ti bigaʼ de guiibaʼ ni ca letra lu o ti placa ni na zaguíxecabe binni ni gudxiguetaʼ laacabe pa gacaláʼdxicabe guxooñelúcabe. Ca esclavu ni guxooñelú chupa chonna biaje, rucaacabe ti seña lucuacaʼ, ni jma riquiiñecabe nga letra F ni riníʼ fugitivus (ni cuxooñelú).

Filemón, ti libru ni zeeda lu Biblia cuzeeteʼ ni dxi bidxiguetaʼ apóstol Pablu Onésimo, ti esclavu ni bixooñelú de Filemón, ni naca xpixuaanaʼ. Nécapeʼ gupa Filemón derechu de guni castigar esclavu stiʼ que la? qué ñúnidibe ni purtiʼ gunabaʼ Pablu laabe cadi gúnibe ni, bíʼnibe zaqué purtiʼ xhamígucabe. Pablu gunabaʼ laabe guidxagalube Onésimo galán ne gannaxhiibe laa (Filemón 10, 11, 15-18).

Xiñee nabé binibiáʼ binni color púrpura bíʼnicabe Fenicia

Guidxi Fenicia guyuu ni ladu nuu Líbano yanna. Ne nabé binibiáʼ binni ni pur color púrpura tiria stícabe, ne zacá rábicabe ni pur guidxi Tiro. Para guiluxe yuʼduʼ biʼniʼ rey Salomón, biquiiñebe lana color púrpura ni bitieeʼ ti artesano de Tiro (2 Crónicas 2:13, 14).

Nabé risaca púrpura tiria que dxiqué, purtiʼ nadipaʼ dxiiñaʼ para gaca ni. Ni rúnicabe primé nga ribeecabe stale bichuʼ, o concha, ni rábicabe Murex,a ndaaniʼ nisadóʼ. Ne riquiiñecabe doce mil de laacame para gutieecabe ti lari si. De racá ribeecabe ca manihuiiniʼ ca ndaaniʼ bichuʼ sticaʼ ti gáxhacabe ti bolsahuiiniʼ ra daʼ tinta ndaanicame. Óraque ruguuchacabe cani zidi ne rusaanacabe cani chonna dxi ti lugar ra rinaazeʼ bi ne Gubidxa. Riquiiñecabe nisa stiʼ nisadóʼ para ugaaguicabe cani ndaaniʼ ti traste naroʼbaʼ ni guieeguʼ dxiichiʼ ruaa ne rusaanacabe ni lu belehuiiniʼ stale dxi.

Stale gayuaa iza biʼniʼ ca fenicio púrpura tiria ne bitoocaʼ ni, ne laaca bíʼnicaʼ ni ndaaniʼ ca guidxi ra biʼniʼ ganarcaʼ. Huadxélacabe caadxi cosa ni culuíʼ bíʼnicabe púrpura ruaa nisadóʼ Mediterráneo, ne ndaaniʼ xcaadxi guidxi jma zitu casi Cádiz (España).