Ora gati ti binni ni nadxiinu
Ti huadxí biaʼ las siete biree ti avión lu pista stiʼ. Gudiʼdiʼ avión que lu ti carretera ne bidxelasaani ti bodega, guti biaʼ chupa gayuaa binni raqué. Guca nga martes 17 stiʼ julio 2007, ra riasa avión ni nuu ndaaniʼ guidxi São Paulo, Brasil.e
NGA nga nácabe desgracia jma naroʼbaʼ ni bizaaca ti avión ndaaniʼ guidxi Brasil, ne qué ziuu dxi guiaandaʼ ni ca binni ni guti binnilidxi raqué. Tobi de ca binni ca nga ti gunaa láʼ Claudete, laabe cayuuyabe tele ora gudiʼdiʼ ni guca avión ca. Renato, xiiñibe zeʼ ndaaniʼ avión que. Xiiñibe que deruʼ napa 26 iza, ne maʼ gudixhe guichaganáʼ octubre stiʼ iza que, xhonna beeu si cayaadxaʼ. Oraqueca guníʼ Claudete lu celular stibe. Cumu qué nicabi xiiñibe la? biábabe layú ne bizulú cayuunabe.
Sti gunaa láʼ Antje guti hombre ni chiguichaganabe ra bidxelasaa carru stiʼ, ndiʼ guca lu enero iza 1986. Dede qué nidxélabe xi ñúnibe ora gúnnabe ni. Laabe guniʼbe: «Qué liica ñuneʼ cré ora gunnaʼ ni. Rabeʼ caníʼ xcaandaʼ ngue, ne ora guibaneʼ zudiéʼ cuenta cadi dxandíʼ diʼ ngue ni gunnaʼ que. Bizuluaʼ cayacaditeʼ óraque ne bineʼ sentir ti yuubaʼ roʼ, casi ora nigápacabe ndaaneʼ». Guca huará Antje de depresión chonna iza. Neca maʼ gudiʼdiʼ jma de gande iza de guti hombre que, dede yanna ridxibi ládibe ora guietenaláʼdxibe ni.
Ora málasi guizaaca binni xiixa zacá ne gati ti binnilidxi la? qué randa diʼ ridxela ximodo guiníʼ guiráʼ ni runi sentir, ne guiráʼ ni naguu xizaa laa. Laaca zacaca nga yuubaʼ roʼ rapa binni ora gati ti binnilidxi ni maca nánnacabe zati pur xiixa guendahuará malu napa. Nin ti binni qué ridxela xi guni, purtiʼ qué huazaacacabe ni. Guníʼ ique de ni bizaaca Nanci, laa guti jñaa lu iza 2002. Neca maʼ biiyabe pabiáʼ maʼ gucaná jñaabe pur guendahuará stiʼ, qué nidxélabe xi ñúnibe ora guti. Para laabe maʼ pur gana si ngue nabánibe sin jñaabe. Neca maʼ gudiʼdiʼ gaayuʼ iza de guca nga, dede yanna ruunarube ora guietenaláʼdxibe jñaabe.
Sicaríʼ guníʼ doctora Holly G. Prigerson: «Nin qué riaandaʼ binni ora gati ti binnilidxi, sínuque riaa si binni guibani sin laacabe». Pa maʼ guti ti binni ni nadxiiluʼ la? zándaca guinabadiidxaluʼ sicaríʼ, neca maca nannuʼ zátibe: «Ñee jneza nga guiuubaʼ ladxiduáʼ la? Xi zanda gacané naa para guneʼ huantar yuubaʼ stinneʼ riʼ. Ñee zanda guuyaʼ laabe sti biaje la?». Sti tema ca zacabi ca guendarinadiidxaʼ riʼ ne xcaadxi ni zándaca rinabadiidxaluʼ.
[Paraa gucuaacabe dibuju o foto ni zeeda lu yaza 3]
EVERTON DE FREITAS/AFP/Getty Images