«Laudxiiba ayubu stinne xa yanni tu»
1 Nabáninu ndaaniʼ ti guidxilayú ra nabé ridxagalú binni stale guendanagana ni riguu xizaa laacaʼ, peru ratadxí ladxidoʼno ora guicaanu invitación stiʼ Jesús ne gudxiibaʼ yánninu ayubu stiʼ (Mat. 11:29, 30). Para gudxiibaʼ yánninu ayubu ca la? naquiiñeʼ gucheechenu diidxaʼ, ne ora gúninu ni ne gacanenu xcaadxi binni gatadxí ladxidóʼ la? casi ora nudxiibaʼ yánnicabe ayubu stiʼ Jesús cásica laanu maʼ bíninu ni purtiʼ nasísini (Mat. 24:14; 28:19, 20).
2 Ora rucheechenu diidxaʼ ratadxí ladxidoʼno. Jesús qué ñabi diʼ laanu ñuanu ni nuaʼ ne ñuanu stinu. Coʼ, sínuque gusaananu cani maʼ nuanu ne guanu stibe purtiʼ laani jma nasísini. Ne zacá rácani purtiʼ maʼ qué riuʼpenu xizaa casi rizaaca stale binni de lu guidxilayú, nin qué rúnidinu dxiiñaʼ para gápasinu bidxichi (Luc. 21:34; 1 Tim. 6:17). Dxandíʼ nga nabé nuu xhiiñanu ne nápanu xidé gúninu dxiiñaʼ para guidxélanu ni guibaninenu, peru jma ricá íquenu guni adorarnu Dios (Mat. 6:33). Para ganda gatadxí ladxidoʼno ora gucheechenu diidxaʼ ne cadi gácani nanaa para laanu la? naquiiñeʼ guietenaláʼdxinu xii nga ni jma risaca ora cayúninu ni (Fili. 1:10).
3 Ni jma galán nga guiníʼ binni de ni riuulaʼdxiʼ (Luc. 6:45). Guiráʼ ca xpinni Cristu nabé nadxiicaʼ Jiobá ne nabé riuuláʼdxinu guininu de ca ndaayaʼ stiʼ Reinu stibe. Nga runi, ora guininu de ca diidxaʼ nacubi ne galán ca nabé riguuni gana laanu ne ora maʼ canagucheechenu diidxaʼ la? rusiaandanu cani riguu xizaa laanu (Rom. 10:15). Cadi dxandíʼ ora jma rúninu xiixa, jma galán rúninu ni ne jma riuuláʼdxinu gúninu ni la? Nga runi, pa laanu cueenu tiempu para gucheechenu diidxaʼ jma la? jma zaguuni gana laanu. ¡Ne nabé riéchenu ora tuuxa binni chuulaʼdxiʼ guiziidiʼ de Dios! (Hech. 15:3.) Peru nécapeʼ qué naʼ binni gucaadiaga laanu o gucaalú laanu la? ziéchenu pa cadi guiaandaʼ laanu dxiiñaʼ cayúninu ca rusiécheni Jiobá ne ora cueendunu xiixa ni galán la? nga rusihuinni caguu ndaayabe laanu (Hech. 5:41; 1 Cor. 3:9).
4 Ora guicaanu invitación stiʼ Jesús la? runinenu laabe dxiiñaʼ casi testigu stiʼ Jiobá (Isa. 43:10; Apo. 1:5). ¡Gástiruʼ sti cosa ni zaguixhedxí ladxidoʼno!