Dios biquiiñeʼ María para gaca ni gudixhe ique
T I BIAJE cusiidiʼ Jesús stale binni, málasi biree ti gunaa bicaa ti ridxi ne na: «Dichosa de ni uxana lii ne bigadxi lii». Pa ñacalaʼdxiʼ Jesús ñuni adorar ca discípulo que jñaabe la? raqué nga ñábibe laacaʼ ñúnicaʼ ni. Peru sicaríʼ gudxi Jesús gunaa que: «Jma dichoso cani ucaa diaga stiidxa Dios ne guni ni na ni» (Lucas 11:27, 28).
Qué ñuu dxi niníʼ Jesús naquiiñeʼ gusisaca binni jñaabe, ne laaca qué ñábibe ca discípulo stibe ñúnicaʼ ni. Yanna, xiñee runi adorar stale binni María yaʼ. Guidúʼyanu xi riníʼ Stiidxaʼ Dios de caadxi cosa ni runi cré stale binni de jñaa Jesús.
Gucuaabe ndaayaʼ ne gúcabe dichosa lade guiráʼ gunaa
Ante gabi ángel Gabriel María xi chiguni para gaca ni naguixhe ique Dios la? bigapadiuxi laabe ne guníʼ ca diidxaʼ riʼ: «Ma ulí Dios lii, María. Dichosa lii lade irá xixé gunaa» (Lucas 1:28). Xcaadxi Biblia rucaa ca diidxaʼ ca sicaríʼ: «Dios gulá lii, nápaluʼ ndaayaʼ stiʼ Dios, nuuné Señor lii». Sti dxi yeganna María Elisabet, ne ora biiyaʼ Elisabet laabe guníʼ: «Dichosa lii lade irá xixé gunaa ne dichoso badu huiini naca xiiñi lu ca» (Lucas 1:42). Ñee rusihuinni ca diidxaʼ ca naquiiñeʼ gaca adorar María la?
Coʼ, cadi zacá diʼ ni. Nécapeʼ riquiiñeʼ ca católicu ca diidxaʼ guníʼ Gabriel ne ni guníʼ Elisabet ca lu ti resá ni rúnicaʼ para María, Biblia qué liica rusiidiʼ naquiiñeʼ guni orarnu laabe. Ca diidxaʼ que bisihuínnicani ndaayaʼ ni gucuaa María pur gupa Mesías, peru qué liica ruluíʼcani caquiiñeʼ guni orar binni laabe. Ni runi cré ca binni riʼ cadi zeedadini lu Biblia. Ne ora bisiidiʼ Jesús ca discípulo stiʼ guni orarcaʼ guniʼbe tuu nga naquiiñeʼ guinínenu lu ca oración stinu, sicaríʼ guniʼbe: «Bixhoze du ni nuu ibáʼ» (Mateo 6:9).
Chiguni mandarnebe Jesús guibáʼ
Sti cosa ni runi cré stale binni nga naca María ti «Gunaa ni runi mandar guibáʼ». Peru Biblia qué liica ruzeeteʼ diʼ pa labe zacá. Ni ruzeeteni nga napa María ti dxiiñaʼ risaca guibáʼ. Xi dxiiñaʼ ca yaʼ.
Jesús bisiidiʼ ziuu caadxi de ca discípulo que zuni mandárnecaʼ laabe lu Reinu stibe (Lucas 22:28-30). Ne laabe nga bidiibe derechu cani bibí riʼ para gácacaʼ «sacerdote [...], ne rey para guni mandar[caʼ] binni guidxilayú» (Apocalipsis 5:10). Pur cani ruzeeteʼ Biblia ca zanda guininu María nga tobi de cani bibí. Xiñee rininu zacá yaʼ.
Lu tema ni gudídinu ca bidúʼyanu guti si Jesús que, guyuu María, ca biʼchiʼ Jesús ne ca discípulo stiʼ «tobi si ne cadi cayaana dxí cabe de iníʼ né cabe Dios». Biaʼ ti gayuaa gande binni bidagulisaa para guni orarcaʼ ne ládecabe guyuu «caadxi gunaa» (Hechos 1:12-15). Biblia na «nuu ca xpinni Cristu que tobi si lugar» dxi guca Pentecostés que, ora bisaba Dios espíritu santu luguiácabe ne zaqué gunda guníʼcabe gadxé gadxé diidxaʼ (Hechos 2:1-4).
Cumu nuu María ne xcaadxi gunaa lade cani gucuaa espíritu santu stiʼ Dios la? nga rusihuinni gulí Dios laabe para guni mandarnebe Cristu lu Reinu stiʼ guibáʼ. Nga runi, zanda guininu maʼ nuu María guibáʼ ra nuu Jesús yanna riʼ (Romanos 8:14-17). Xi dxiiñaʼ chigúnibe ne xcaadxi xpinni Cristu ni bibí para gaca ni naguixhe ique Dios yaʼ.
Zacanebe para guibani binni galán
Biblia na 144,000 binni nga chiguiasa para cheʼ guibáʼ ne racá zácacabe sacerdote, juez ne rey cueʼ Jesús (Apocalipsis 14:1, 4; 20:4, 6). Ora maʼ gácacabe sacerdote zacanécabe guixá donda stiʼ guiráʼ binni ni guzuubaʼ diidxaʼ, ne zanda gúnicabe nga pur guendaguti stiʼ Jesús. Óraca maʼ ziuu ca binni ca nayá nezalú Dios, zabánicaʼ galán ne ziuucaʼ nazaaca (Apocalipsis 21:1-4). ¡Guizáʼ maʼ racalaʼdxiʼ ca xpinni Dios ni ruzuubaʼ diidxaʼ guedandá dxi ca!a
Nabé risaca nga dxiiñaʼ ni biʼniʼ María para guca ni gudixhe ique Dios dxiqué ne laaca risaca dxiiñaʼ ni cayúnibe yanna. Nácabe ti ejemplu para guiranu purtiʼ nabé gunnaxhiibe ca xiiñibe, qué nudxiibabe laca laabe, bizuubabe diidxaʼ ne gúpabe stale fe; ne laaca zanda guizíʼdinu de laabe purtiʼ biʼniʼ huantarbe ca guendanagana gúpabe. Peru cadi caquiiñeʼ si chinándanu ejemplu stibe, sínuque laaca caquiiñeʼ guni respetarnu laabe purtiʼ gúpabe Mesías ne purtiʼ chigacanebe para uguu Dios ndaayaʼ binni lu Guidxilayú.
Peru ti cosa ni jma risaca rizíʼdinu de María nga dede yanna runi adorarbe Jiobá, cásica runi guiráʼ ca xpinni Dios. Laabe nácabe tobi de ca xpinni Cristu ni bibí ni nuu guibáʼ ra nuu Jesús ne cayuundacaʼ: «Cadi guiaana dxí nu de udxiʼba nu ne usisaca nu ni zuba lu trono ca [Jiobá Dios], ne Dendxu huiiniʼ [Jesucristu]. Stícabe irá enda risaca ne irá enda nandxóʼ» (Apocalipsis 5:13; 19:10).
[Cani cá ñee yaza]
a Zadxélaluʼ jma ni caníʼ de laani lu capítulo 8 stiʼ libru Xipeʼ ndiʼ cusiidiʼ Biblia, ni biʼniʼ ca testigu stiʼ Jiobá.
[Ni caníʼ yaza 10]
Cadi gudxíʼbanu laca laanu, gápanu fe ne guzúʼbanu diidxaʼ casi biʼniʼ María