Jiobá rudii espíritu santu cani rinabaʼ ni laa
«Pa laatu cadi nachaʼhui tu ne nanna tu gudii tu ni galán xiiñi tu la? lágaxa Bixhoze tu ni nuu ibáʼ qué udii Espíritu Santu ni inaba laa.» (LUCAS 11:13.)
1. Pora nga jma riquiiñenu espíritu santu stiʼ Dios.
«MAʼ QUÉ zanda diʼ guneʼ huantar ndiʼ. Caquiiñeʼ espíritu santu stiʼ Dios para guneʼ huantar ni.» Huayuu dxi guiniʼluʼ zacá la? Stale de ca xpinni Cristu huaniʼcaʼ zacá. Zándaca huaniʼluʼ zacá pur xiixa guendahuará malu nápaluʼ o pur guti xheelaluʼ ni gulezaneluʼ stale iza. O zándaca ti binni nayecheʼ lii ne málasi guizáʼ chuʼluʼ triste pur stale cosa ni bininá lii. Zándaca riníʼ íqueluʼ gunda gudíʼdiluʼ lu guirani purtiʼ gucané espíritu santu stiʼ Jiobá lii (2 Corintios 4:7-9; Salmo 40:1, 2).
2. 1) Xi guendanagana ridxaagalú cani dxandíʼ xpinni Cristu. 2) Xi chupa guendarinabadiidxaʼ chiguicábinu lu tema riʼ.
2 Cani dxandíʼ xpinni Dios la? zeʼ dxi jma stale guendanagana cadxagalucaʼ ne laaca nuu stale binni malu cucaalú laacaʼ (1 Juan 5:19). Ne cumu nácanu discípulo stiʼ Cristu la? nabé cayuniná Binidxabaʼ laanu, purtiʼ laa qué liica riá modo rucaalú «cani ruzuuba stiidxa Dios ne zinanda stiidxa Jesucristu» (Apocalipsis 12:12, 17). Nga runi, yánnapeʼ nga jma caquiiñenu gacané espíritu stiʼ Dios laanu. Xi zanda gúninu para gápanu ni guiráʼ ora yaʼ. Ximodo nánnanu nuuca Jiobá listu para gudii laanu stipa ni caquiiñenu ora maʼ cadídinu ra nagana yaʼ. Zánnanu ni ra guidúʼndanu chupa ejemplu ni guníʼ Jesús.
Cadi gusaananu de guni orarnu
3, 4. Xi ejemplu bizeeteʼ Jesús, ne ximodo bichaagabe ni ne ca oración ni rúninu Dios.
3 Ti biaje la? ti discípulo stiʼ Jesús gunabaʼ: «Señor, bisiidi laadu iní né du Dios» (Lucas 11:1). Jesús bicabi laabe ne chupa ejemplu ni rusiidiʼ ti cosa. Lu primé ca bizeetebe de ti hombre ni gupa ti biuuzaʼ, ne lu guiropa ca guniʼbe de ti hombre ni bidii ni canabaʼ xiiñiʼ laa. Guininu de laacani.
4 Sicaríʼ gudxi Jesús ca discípulo stiʼ: «Pa ñapa tobi de laatu ti xhamigu, ne ñe ralidxi xhamigu que biaʼ galaa gueela ne ñabi laabe: “Xhamiguaʼ, bitiiñe laʼ naa chonna xqueta luʼ, purti beeda biuuza ralidxeʼ, peru qué gapa ni quixhe lú.” Ne nicabi ngue de ndaani yoo, niná: “Cadi uchiiña lu naa. Ma biseegua ra puertaʼ ne irá du ma nexhe du. Qué zanda guiasa udiee ni lii”. Zaa naca ñasa be nudii be ni lii pur xhamigu be lii, peru [ziásabe para gudiibe] irá ni caquiiñu para ma cadi [siñe] rouʼ laabe». Óraque bichaga Jesús ejemplu riʼ ne ca oración ni rúninu Dios, nabe: «Nga runi cayabe laatu: Lainaba lu Dios, zudii laatu. Lauyubi, zadxela tu. Lauxhidxi náʼ, zaxele chuʼ tu. Purti tutiica inaba zacaa, ne ni uyubi zadxela, ne ni uxhidxi náʼ zaxele chuʼ» (Lucas 11:5-10).
5. Ximodo naquiiñeʼ guni orarnu casi bizíʼdinu lu ejemplu stiʼ hombre ni bizeeteʼ Jesús que.
5 Modo gunabaʼ hombre ca ni caquiiñeʼ la? cusihuínnini zacaca naquiiñeʼ guni orarnu. Jesús guníʼ gucuaa hombre que ni caquiiñeʼ purtiʼ nabé guziñe (Lucas 11:8). Diidxaʼ «riziñe» ca la? ti biaje si zeedani lu Biblia ora gucuani lu diidxaʼ griegu ne ndiʼ nga ni riniʼni lu diidxaʼ ca «ni qué rituilú». Nuu tiru feu rihuinni tuuxa ora maʼ canabaʼ xiixa ni cadi caquiiñeʼ sin guituilú. Peru, ora tuuxa guizáʼ caquiiñeʼ xiixa la? zanda guinábabe ni sin guituílube. Ngapeʼ nga ni biʼniʼ hombre ni bizeeteʼ Jesús ca, qué nituídilube ora guzíñebe xhamígube gudii laabe ni caquiiñebe. Cumu gudixhe Jesús laabe casi ti ejemplu para laanu la? galán gúninu casi bíʼnibe ca, cadi guireʼnu gana ora guinábanu xiixa ni caquiiñenu lu ca oración stinu. Jiobá cayabi laanu guinábanu, guyúbinu ne guxhidxinanu sin guireʼnu gana. Pa gúninu nga la? zudii Jiobá «Espíritu Santu» laanu.
6. Xiñee nabé risaca para ca binni ni bibani dxi stiʼ Jesús que guidxaagalucaʼ xpiuuzacaʼ galán.
6 Jesús cayabi laanu cadi gusaananu de guni orarnu, peru laaca cayábibe laanu xiñee naquiiñeʼ gúninu ni. Para guiene chaahuinu xi cusiidiʼ ejemplu ni guniʼbe ca laanu la? guidúʼyanu pabiáʼ risaca para ca binni ni ruzeeteʼ Biblia guidxaagalucaʼ biuuzaʼ sticaʼ galán. Zacá rihuinnini lu stale historia ni zeeda lu Biblia, ne jmaruʼ si para ca xpinni Dios (Génesis 18:2-5; Hebreos 13:2). Dxiqué la? ora gapa binni biuuzaʼ ne qué gapa xiixa ni quixhe lube la? rituilú (Lucas 7:36-38, 44-46). Cumu maʼ nánnanu nga la? guidúʼyanu ejemplu ni guníʼ Jesús que sti biaje.
7. Lu ejemplu ni guníʼ Jesús que, xiñee qué nituilú hombre que ora bicuaaniʼ xhamigu.
7 Lu ejemplu que rieeteʼ de ti hombre ni yeganna tuuxa laa biaʼ galaa gueelaʼ. Hombre que racalaʼdxiʼ gudii xiixa ni gobe «peru qué gapa ni quixhe lú[be]». Para laabe la? risaca ngue gudiibe xiixa ni go binni que oraqueca, ne yeyúbibe ni dede ra bidxélabe ni. Ngue runi qué nituidilube yegucuaanibe xhamígube ra lidxi. Hombre que guníʼ: «Xhamiguaʼ, bitiiñe laʼ naa chonna xqueta luʼ», ne guzíñebe laa dede ora gucuaabe ni caquiiñebe que. Cumu maʼ nápabe gueta que la? maʼ zanda guidxaagalube xpiuuzabe galán.
Ora caquiiñenu xiixa jma naquiiñeʼ guinábanu ni
8. Xiñee rinábanu espíritu santu stiʼ Dios sin guireʼnu gana.
8 Xiñee naquiiñeʼ guni orarnu sin guireʼnu gana casi bizíʼdinu lu ejemplu ni bidúʼyanu que. Hombre que gunabaʼ gueta dede ra gucuaani. Xiñee yaʼ. Purtiʼ ngue nga ni caquiiñebe óraque (Isaías 58:5-7). Pa qué nidxélabe gueta que la? qué ñanda nidxagalube xpiuuzabe galán. Laanu laaca qué rusaananu de guinábanu Dios espíritu santu stiʼ, purtiʼ nánnanu guizáʼ riquiiñenu ni para ganda gucheechenu diidxaʼ (Zacarías 4:6). Pa qué gápanu espíritu santu ca la? qué zanda diʼ gúninu dxiiñaʼ ca (Mateo 26:41). Maʼ biiyaluʼ xi rizíʼdinu lu ejemplu ca la? Rizíʼdinu naquiiñeʼ guinábanu espíritu stiʼ Dios guiráʼ ora, purtiʼ laani nga ni jma caquiiñenu yanna riʼ.
9, 10. 1) Xi sti ejemplu rusihuinni riquiiñeʼ guinábanu espíritu santu stiʼ Dios guiráʼ ora. 2) Xi naquiiñeʼ guiníʼ íquenu, ne xiñee.
9 Guidúʼyanu ti ejemplu de yanna riʼ para guiene chaahuinu ni bisiidiʼ Jesús ca. Guníʼ ique ñacahuará ti binnilídxiluʼ biaʼ galaa gueelaʼ. Ñee nigucuaaniluʼ ti doctor para ñacané lii pa cadi málupeʼ modo nuube la? Coʼ xa. Peru, xi ñuʼnuʼ pa maʼ biaʼ qué gátisibe yaʼ. Ñee cadi dxandíʼ qué nituíluluʼ nicaaluʼ doctor ca óraque la? Xiñee qué nituíluluʼ yaʼ. Purtiʼ caquiiñeluʼ laabe oraqueca. Lii nánnaluʼ doctor ca si nga ni zanda gacané lii, ne pa qué chiyubuʼ laabe la? zándaca gati binnilídxiluʼ ca. Zanda guininu zacaca nga nuu ca xpinni Cristu, caquiiñecaʼ tu gacané laacaʼ purtiʼ Binidxabaʼ nuu «casi ti lion ni canaguu beedxeʼ, canayubi tu uxuuxe» (1 Pedro 5:8). Para chuʼnu gaxha de Dios la? naquiiñeʼ guinábanu espíritu santu stibe para gacané laanu, purtiʼ pa qué guinábanu ni zaxélenu de laabe. Nga runi, cadi gusaananu de guni orarnu Dios ne guinábanu laa espíritu santu stiʼ (Efesios 3:14-16). Zacatiʼ zanda gápanu stipa para guni huantarnu dede ora guinitilú guiráʼ cosa malu nuu lu Guidxilayú riʼ (Mateo 10:22; 24:13).
10 Pur cani maʼ guninu ca la? galanpeʼ nga guiníʼ íquenu: «Ñee rinabaʼ ni caquiiñeʼ lu ca oración stinneʼ guiráʼ ora la?» Cadi guiaandaʼ ndiʼ laanu, pa nánnanu caquiiñeʼ gacané Dios laanu la? jmaruʼ si zanábanu espíritu stibe guiráʼ ora.
Xi rucaa laanu guni orarnu de guidubi ladxidoʼno
11. Ora guníʼ Jesús de oración, xiñee bidiibe ti ejemplu de xi runi binni ne xiiñiʼ.
11 Ejemplu ni guníʼ Jesús de hombre ni qué nusaana de ninabaʼ ni caquiiñeʼ que la? cusihuínnini gastiʼ ni rucueeza ca xpinni Cristu para guinábacaʼ xiixa lu oración sticaʼ. Peru sti ejemplu riʼ cusihuinni laaca gastiʼ ni rucueeza Jiobá para gucaadiaga ca oración ca. Sicaríʼ gunabadiidxaʼ Jesús: «Tu tobi de laatu ninaba xiiñi laa ti gueta, nudii ti guie, o ninaba laa ti benda, nudii ti beendaʼ, o ninaba laa ti dxita, nudii ti meuxubi» yaʼ. Jesús guníʼ xi rusiidiʼ ca diidxaʼ ca: «Pa laatu cadi nachaʼhui tu ne nanna tu gudii tu ni galán xiiñi tu la? lágaxa Bixhoze tu ni nuu ibáʼ qué udii Espíritu Santu ni inaba laa» (Lucas 11:11-13).
12. Ximodo rihuinni pabiáʼ racalaʼdxiʼ Jiobá guicabi ca oración stinu lu ejemplu ra guníʼ Jesús de tuuxa ni rudii ni guinabaʼ xiiñiʼ laa.
12 Cásica hombre ni bidii ni canabaʼ xiiñiʼ que la? zacaca na Jesús rudii Jiobá guiráʼ ni caquiiñeʼ ca binni ni runi orar laabe (Lucas 10:22). Lu primé ejemplu guníʼ Jesús que la? qué ninagá diʼ xhamigu hombre que nudii laa gueta; peru Jiobá cadi zacá diʼ laa. Laabe nácabe casi tuuxa ni nadxii xiiñiʼ, runi intiica cosa ti gudii ni guinabaʼ xiiñiʼ laa (Salmo 50:15). Lu sti ejemplu bidii Jesús ca la? bisihuínnibe dxandíʼ racalaʼdxiʼ Jiobá gacané laanu. Xiñee ya. Purtiʼ guniʼbe pa bixhoze binni neca malu laa pur gulené donda peru nanna gudii cosa galán ca xiiñiʼ la? jmaruʼ si zudii Bixhózenu ni nuu guibáʼ espíritu santu ca xiiñiʼ ni runi adorar laa, purtiʼ guizáʼ nacháʼhuibe (Santiago 1:17).
13. Xi riquiiñeʼ gánnanu ora guni orarnu Jiobá.
13 Xi rusiidiʼ ejemplu ca laanu yaʼ. Rusiidini laanu dxandíʼ racalaʼdxiʼ Bixhózenu ni nuu guibáʼ gudii espíritu santu laanu ora guinábanu ni laa (1 Juan 5:14). Neca guni orarnu laabe stale biaje la? nánnanu qué ziuu dxi gábibe laanu ni guníʼ hombre ni bizeeteʼ Jesús primé que: «Cadi uchiiña lu naa. Ma biseegua ra puertaʼ» (Lucas 11:7). Para gusihuinni Jesús qué runi diʼ Jiobá casi biʼniʼ hombre ni bizeetebe que la? guniʼbe ca diidxaʼ riʼ: «Lainaba lu Dios, zudii laatu. Lauyubi, zadxela tu. Lauxhidxi náʼ, zaxele chuʼ tu» (Lucas 11:9, 10). Dxandíʼ, zacabi Jiobá laanu ora guinínenu laa (Salmo 20:9; 145:18).
14. 1) Xii nga ni cadi jneza riníʼ ique caadxi xpinni Dios ora nápacaʼ guendanagana. 2) Xiñee nánnanu zucaadiaga Jiobá laanu pa guni orarnu laa de guidubi ladxidoʼno ora cadídinu ra nagana.
14 Lu ejemplu ni bizeeteʼ Jesús de hombre ni nadxii xiiñiʼ que la? laaca rusihuínnini jma nachaʼhuiʼ Jiobá ne jma nadxii laanu que biaʼ nadxii binni xiiñiʼ. Nga runi, qué liica riquiiñeʼ guiníʼ íquenu pur cadi cayuulaʼdxiʼ Jiobá ni cayúninu nga nápanu xiixa guendanagana. Binidxabaʼ nga racalaʼdxiʼ guiníʼ íquenu zacá, purtiʼ laa nga ni jma xhenemígunu (Job 4:1, 7, 8; Juan 8:44). Cadi na diʼ Biblia rutiidiʼ Jiobá laanu lu guendanagana para guʼyaʼ pa dxandíʼ rúninu ni na (Santiago 1:13). Bixhózenu ni nuu guibáʼ qué zudii diʼ laanu guendanagana ni zeeda gaca casi beendaʼ o meuxubi. Coʼ, sínuque rudiibe cosa galán cani rinabaʼ ni laabe (Mateo 7:11; Lucas 11:13). Ora guiénenu pabiáʼ nachaʼhuiʼ Jiobá ne nuuca para gacané laanu la? jmaruʼ si zucaa nga laanu guni orarnu laabe de guidubi ladxidoʼno purtiʼ nánnanu zucaadiagabe laanu. Ne ora gúninu nga zuni sentirnu ni biʼniʼ sentir hombre ni bicaa salmo riʼ: «Dxandíʼ maʼ bicaadiaga Dios; maʼ bicaadiágabe oración stinneʼ (Salmo 10:17; 66:19).
Racané espíritu santu laanu
15. 1) Xi para guníʼ Jesús zacaa ca discípulo stiʼ espíritu santu. 2) Bizeeteʼ ximodo racané espíritu santu ca laanu.
15 Ante gati Jesús la? bizeetebe sti biaje ni guniʼbe lu ca ejemplu bidiibe que. Laabe gúdxibe ca discípulo stibe zacané espíritu santu laacaʼ: «Naa zanaba lu Bixhoze udii laatu stobi ni guiaana né ca laatu para acané laatu» (Juan 14:16). Jesús gudxi ca discípulo stiʼ zacané espíritu santu laacaʼ guiráʼ dxi, ne dede yanna cayácani. Ximodo racané espíritu santu ca laanu yaʼ. Racaneni laanu para gudxíʼlunu guiráʼ ca guendanagana gápanu. Apóstol Pablu, ti hombre ni nabé gudiʼdiʼ lu stale guendanagana la? bizeeteʼ lu ti carta ni bicaa ra nuu ca xpinni Cristu de Corinto ximodo gucané espíritu stiʼ Dios laa. Guidúʼyanu xi rusiidiʼ cani guniʼbe ca laanu.
16. Xiñee nuu tiru zándaca guni sentirnu cásica biʼniʼ sentir Pablu.
16 Lu carta ni bicaa Pablu que gúdxibe ca xpinni Cristu: «Beeda ti yuuba luguiaʼya casi ra ridaabi guichi [ne] ma chonna tiru unaba lu Señor [Jiobá] cuee ni de naa» (2 Corintios 12:7, 8). Nécapeʼ nabé gunabaʼ Pablu nibee Dios ni cuchiiñaʼ laa que la? qué nibeediʼ Dios ni. Zándaca laaca nuuluʼ casi guyuube ca, ne maʼ stale biaje gunabuʼ de guidubi ladxidoʼloʼ cuee Jiobá ni cuchiiñaʼ lii ca ne nuuruni. Yanna, ñee pur nga si guiniʼluʼ cadi cacabi Jiobá ca oración stiluʼ ne cadi cayacané espíritu stibe lii la? Cadi galán diʼ guiníʼ íqueluʼ zacá (Salmo 10:1, 17). Guidúʼyanu xiruʼ bizeeteʼ apóstol Pablu.
17. Ximodo bicabi Jiobá ca oración stiʼ Pablu.
17 Sicaríʼ bicabi Dios apóstol Pablu: «Naa nuaa para acaniá lii, ne nga si caquiiñuʼ. Purti jma rihuinni enda nandxóʼ stinne ora cayaadxa stipa lii». Nga runi guníʼ Pablu: «Jma rieche ora huaxiéʼ stipa napaʼ, purti óraque jma rusi rihuinni enda nandxóʼ sti Cristu luguiaʼyaʼ» (2 Corintios 12:9; Salmo 147:5). Xi cusiidiʼ Pablu laanu ne ca diidxaʼ riʼ yaʼ. Cusiidibe laanu bisihuinni Dios guendanandxóʼ stiʼ ora biquiiñeʼ Cristu para gupa laabe, casi ñaca niguu laabe ndaaniʼ ti yoo de lari. Yanna riʼ laaca zacagá ricabi Jiobá ca oración stinu, purtiʼ rápabe laanu casi ora niguube laanu ndaaniʼ yoo de lari.
18. Xi caquiiñenu para guni huantarnu ca guendanagana stinu.
18 Ti yoo la? qué rucueeza diʼ de guiaba nisaguié o de gundubi bi, peru rulani laanu. Zacaca nga yanna riʼ, cadi purtiʼ si cayapa «enda nandxóʼ sti Cristu» laanu la? maʼ qué zápanu guendanagana. Peru racaneni laanu gudxíʼlunu guiráʼ guendaquéiquiiñeʼ ni nuu yanna ne cani culaa Binidxabaʼ luguianu ti cadi guixélenu de Dios (Apocalipsis 7:9, 15, 16). Nga runi, pa qué ganda tiidiʼ ca guendanagana stiluʼ la? gunna dxichi nanna Jiobá guiráʼ ni cadíʼdiluʼ ne maʼ bicaadiágabe ca oración stiluʼ (Isaías 30:19; 2 Corintios 1:3, 4). Sicaríʼ bicaa Pablu: «Peru jneza runi Dios, ne qué zudii lugar gueeda xiixa luguiá tu ni qué zanda gua tu, sínuque laga zacané laatu tidi tu ni ora idxiña tu ni, ti ganda gua tu ni» (1 Corintios 10:13; Filipenses 4:6, 7).
19. Xi naquiiñeʼ quixhe íquenu gúninu, ne xiñee.
19 Lu ca últimu dxi riʼ jma nagana cabáninu purtiʼ «mayaca izaa xhi guidxilayú» (2 Timoteo 3:1). Neca nagánacani la? zanda gudxiilú ca xpinni Dios guirácani. Xiñee zanda yaʼ. Purtiʼ nápacabe espíritu santu, ni racané ne rapa laacabe. Ne Jiobá rudii espíritu riʼ cani qué rusaana de guinabaʼ ni laa de guidubi ladxidóʼ. Nga runi, quixhe íquenu guiráʼ dxi guinábanu Jiobá gudii espíritu santu stiʼ laanu (Salmo 34:6; 1 Juan 5:14, 15).
Xi nicábiluʼ
• Xi riquiiñeʼ gúninu para gudii Dios laanu espíritu santu.
• Xiñee nanna dxíchinu zudii Jiobá laanu espíritu santu ora guinábanu ni laa.
• Ximodo racané espíritu santu laanu para guni huantarnu guiráʼ guendanagana gápanu.
[Dibuju/foto ni zeeda lu yaza 13]
Xi rizíʼdinu lu ejemplu ni guníʼ Jesús de hombre ni guziñe ti xhamigu dede gucuaa ni caquiiñeʼ que
[Dibuju/foto ni zeeda lu yaza 14]
Ñee rinábaluʼ espíritu stiʼ Dios guiráʼ ora la?
[Dibuju/foto ni zeeda lu yaza 15]
Xi rizíʼdinu de Jiobá lu ejemplu stiʼ hombre ni nadxii xiiñiʼ que