Xi zuni Cristu ora gueeda
«CADXIIBI binni dede cayacadíticaʼ ndaaniʼ guidxi São Paulo.» Tapa gubidxa bieeteʼ nga lu ti revista láʼ Veja ni biree lu mayo stiʼ 2006. Revista ca na São Paulo nga tobi de ca guidxi jma naroʼbaʼ stiʼ Brasil ne laani nga tobi de ca guidxi ni jma napa bidxichi, peru ti grupu de binni malu gudindenecaʼ ca pulicia stiʼ guidxi que ne guirutiʼ tu nucueeza laacaʼ «dede bidxibi guidxi que laacaʼ ne biʼniʼ guidxi que ni ná ca binni malu que». Biaʼ «ti gayuaa hora de cadíndecabe ndaaniʼ guidxi que» guti ti gayuaa cincuenta binni, lade ca ni guti que guyuu pulicia, binni malu, ne binni ni nabeza ndaaniʼ guidxi que.
Ndaaniʼ stale guidxi ni nuu lu guidubi naca Guidxilayú riʼ puru guendaridinde rieeteʼ lu noticia, ne gobiernu qué ganda diʼ gucueeza cani. Ra zidiʼdiʼ dxi jma maʼ malu cayaca binni yanna riʼ. Zándaca riuuluʼ triste ora gánnaluʼ guiráʼ ladu cayaca cosa malu. Peru mayaca guiree guiráʼ cani.
Jesús bisiidiʼ ca discípulo stiʼ guinábacaʼ gueeda Reinu stiʼ Dios ne gacaʼ ni na Bixhoze «cásica raca ni ibáʼ, zaqueca gaca ni ndaani guidxilayú» (Mateo 6:9, 10). Ne cumu Dios maʼ biʼniʼ Jesucristu Rey para guni mandar lu Reinu stiʼ la? Jesucristu zabee guiráʼ guendanagana ni cayuniná binni yanna. Peru para ganda guiree cani la? caquiiñeʼ guni mandar Jesús lugar stiʼ ca gobiernu ni nuu lu Guidxilayú riʼ, ne ngapeʼ nga ni chigaca ora gueeda Cristu.
Ñee zaná ca binni ca guni mandar Jesús laacaʼ la?
Ñee zaná ca guidxi roʼ ca guni mandar Jesús laacaʼ la? Ni cacabi guendarinabadiidxaʼ riʼ zeedani lu ti visión ni biiyaʼ apóstol Juan: «Ne biiya dxa mani ngola que [guiráʼ ca gobiernu ni nuu lu Guidxilayú riʼ] ne ca rey sti guidxilayú ne ejércitu sticaʼ. Bidxiña ca para ucaa lú ca [Jesús] ni dxiʼba caballu quichi que ne ejércitu stiʼ» (Apocalipsis 19:19). Peru xi zazaaca ca gobiernu ni nuu lu Guidxilayú riʼ yaʼ. Biblia na zunidé Rey ni maʼ gulí Jiobá ca laacabe ne vara de guiibaʼ stiʼ casi racadé ti guisu de yu (Salmo 2:9). Zacá nga chiguni Reinu stiʼ Dios ca gobiernu ni nuu lu Guidxilayú riʼ: «Zunideni ne zunduuxeni guiráʼ ca reinu riʼ, ne laani ziaanani ne qué ziuu dxi guilúxeni» (Daniel 2:44).
Peru xi zazaaca cani gucaalú Reinu stiʼ Dios yaʼ. Stiidxaʼ Dios na dxi gueeda «Señor Jesús de ibáʼ ne ca ángel ni jma nandxóʼ stiʼ [z]usaba ná cani qué nicaa stiidxaʼ, ne qué ñunibiáʼ Dios» (2 Tesalonicenses 1:7, 8). Proverbios 2:22 na: «Peru ca malu ca la? zaruugucaʼ de lu guidxilayú; ne cani rudxii deche, ziaaxhacaʼ luni».
Biblia cayabi laanu xi zaca dxi gueeda Cristu: «Zuuya[cabe] zeeda be lade za» (Apocalipsis 1:7). Peru guirutiʼ qué zuuyaʼ gueeda Jesús casi binni, purtiʼ dede dxi zebe guibáʼ gúcabe espíritu ne «nabé nayaʼni ra nuu[be] dede iruti qué zanda idxiña. Nin ti binni guidxilayú qué huayuuya laa[be] ne qué zanda guʼya laa[be]» (1 Timoteo 6:16).
Jesús cadi naquiiñeʼ gaca casi ti binni para gúʼyacabe laa lu Guidxilayú. Casi dxi biseendaʼ Jiobá chii plaga ndaaniʼ guidxi Egipto dxi bibani Moisés que. Neca guirutiʼ ñuuyaʼ laabe la? guiráʼ ca binni que bidiicaʼ cuenta Jiobá ngue biseendaʼ chii plaga que, ne gúnnacabe nápabe stale poder (Éxodo 12:31). Zacaca zaca ora guseendaʼ Dios Cristu para gueeda gunduuxeʼ guiráʼ binni malu, dxi ca zánnacabe Jesús nga Juez ni biseendaʼ Dios. Ne zánnacaʼ ni purtiʼ Jiobá maca gudxi ni laacabe dede ante. Ya, «irá binni zuuya laabe [...] ne zuuna cabe ora guʼya cabe laabe» (Apocalipsis 1:7).
Peru para ganda guibani binni galán lu Guidxilayú riʼ ne gápacaʼ ni guibaninecaʼ la? caquiiñeʼ guiree ca gobiernu ni qué ganda guni mandar jneza. Ne Cristu nga chiguni ni, de racá zuni mandarbe Guidxilayú riʼ ne zuni chaahuibe guiráʼ ni nuu luni.
Modo guibani binni ora gaca chaahuiʼ Guidxilayú riʼ
Ti biaje, bizeeteʼ apóstol Pedru modo «[chit]ixhe chaahui Dios irá ni naquiiñeʼ gacaʼ casi uníʼ de ruaa ca profeta sti dede ma xadxí» (Hechos 3:21). Ne Guidxilayú riʼ zaca chaahuini ora maʼ guni mandar Cristu luni. Isaías bibani lu siglu VIII ante gueeda Jesús. Laabe nga tobi de cani riguixhená ni biquiiñeʼ Dios para guiníʼ «ma gudixhe chaahui Dios irá ni naquiiñe». Isaías guníʼ zaguu Jesucristu guendariuudxi lu Guidxilayú riʼ purtiʼ laa nga «Príncipe ni rudii Guendariuudxi». Ne laaca guniʼbe modo chiguni mandar Cristu: «Dede ra ugaanda guni mandarbe ne guendariuudxi qué ziuu diʼ dxi guiluxe» (Isaías 9:6, 7). Ca diidxaʼ ca rusihuinni cani zacané Jesús ca xpinni para gápacaʼ guendariuudxi lu xquendanabánicaʼ «ne zadxélacabe guendanayecheʼ purtiʼ ziuu stale guendariuudxi» (Salmo 37:11).
Ñee ziuu binni pobre ne binni ni qué zazaa ni go ora guni mandar Cristu la? Isaías guníʼ sicaríʼ: «Jiobá, Dios stiʼ stale binni nanda guiibaʼ zuni [...] ti guendaró ni napa stale za lu dani riʼ ne ziuu vinu de ni jma galán ne guendaró ni napa stale tuétano» (Isaías 25:6). Ne ni bicaa salmo riʼ na: «Ziuu stale biidxiʼ lu guidxilayú; lu ca dani ca jma stale ziuu» (Salmo 72:16). Laaca cayeeteʼ xi zuni binni: «Dxandipeʼ zucuícabe yoo, ne zaquiiñecabe ni, ne dxandipeʼ zudxiibacabe uva lu layú ne zócabe ni gudiini. Qué zucuícabe ne stobi iquiiñeʼ ni; qué zudxiibacabe ne stobi go ni. Purtiʼ cásica ca dxi stiʼ ti yaga zaca ca dxi stiʼ ca binni xquidxeʼ; ne dxiiñaʼ gúnicabe ne nácabe cani bibí stinneʼ zaquiiñecabe de guiráʼ xixé ni» (Isaías 65:21, 22).
Isaías laaca guníʼ maʼ qué ziuu diʼ guendahuará nin guendaguti. Ne bicaabe ca diidxaʼ ni bizabiruaa Dios chiguni riʼ: «Dxi ca cani nacheepaʼ lú zaxaleʼ lucaʼ, ne zunadiaga cani qué runadiaga. Dxi ca binni nachiitaʼ ñee zaguiʼbaʼ dani casi runi ti bidxiña, ne ni qué riníʼ zucaacaʼ ridxi ne stale guendanayecheʼ» (Isaías 35:5, 6). Ne maʼ «guirutiʼ tu cueza racá zaníʼ: “Huaraʼyaʼ”» (Isaías 33:24). Dxandipeʼ zabi Dios «guendaguti ne maʼ qué ziuuruʼ ni, ne Jiobá, Señor Ni Jma Nandxóʼ, zuchaa nisa rieeteʼ lú guiráʼ binni» (Isaías 25:8).
Xi zeeda gaca de cani caziilaʼdxiʼ ndaaniʼ ca baʼ ca yaʼ (Juan 5:28, 29). Isaías guníʼ: «Ca gueʼtuʼ stiluʼ zabánicaʼ [...;] ziásacaʼ» (Isaías 26:19). Nga runi, cani maʼ guti zabánicaʼ sti biaje.
Dios bidii poder Xiiñiʼ para cadi gusaana de guni mandar
Ora gueeda Cristu zaca chaahuiʼ Guidxilayú riʼ, ne zácani ti paraísu sicarú ra chuʼ binni tobi si ne guni adorarcaʼ Dios ni dxandíʼ. Ñee zanda guni crenu de guidubi ladxidoʼno zabee Jesús guiráʼ guendaquéiquiiñeʼ ne guni chaahuiʼ guiráʼ cosa ni nuu ndaaniʼ Guidxilayú riʼ la?
Guidúʼyanu paraa gucuaa Jesús poder ne derechu de guni mandar. Sicaríʼ caníʼ Biblia de Xiiñiʼ Dios: «Lii nga [Xiiñiʼ] Dios ne qué ziuu dxi guiaana dxí de guni mandar luʼ, ne zuni mandar lu jneza. Rucaa ique lu guni lu ni nachaʼhuiʼ, ne nanalaʼdxi lu ni nadxabaʼ» (Hebreos 1:8, 9). Trono stiʼ Jesús zeedani de Jiobá, ne Laabe nga bidiibe derechu ca Xiiñibe. Nga runi guiráʼ guendanagana ca zanda guni chaahuiʼ Jesús cani.
Biasa si Jesús lade gueʼtuʼ, gúdxibe ca diidxaʼ riʼ ca apóstol stibe: «Irá xixé ni nuu ibáʼ ne ni nuu guidxilayú ma nexhe ladxi nayaʼ» (Mateo 28:18). Apóstol Pedru laaca bizeeteʼ «irá ca ángel ne cani runi mandar ne cani nandxóʼ ruzuuba ca stiidxa» Jesús (1 Pedro 3:22). Nin ti gobiernu qué zanda gucueeza Jesús de guni ni maʼ gudixhe ique. Guirutiʼ zucueeza laabe de gacanebe binni guidxilayú ne gudiibe laacaʼ ndaayaʼ.
Xi zuni Jesús pur binni ora maʼ gueeda
Dxi bicaa Pablu ti carta ra nuu ca xpinni Cristu de Tesalónica, gúdxibe laacaʼ: «Runi tu xhiiña Dios purti runi cre tu laa ne nadxii tu laa, ne qué huasaana tu de icá lú tu Jesucristu Señor stinu. Ne irá nga ruzeʼte du lu Dios ora riní né du laa» (1 Tesalonicenses 1:3). Lu textu riʼ Pablu na gunda biʼniʼ ca xpinni Dios dxiiñaʼ ni bidii Dios laacaʼ ne qué nusaana de ñúnicaʼ ni purtiʼ biʼniʼ crecaʼ Jesucristu. Yanna riʼ la? laaca qué rusaana de guni ca xpinni Cristu ni na Dios ora ridíʼdicaʼ lu guendanagana, purtiʼ runi crecaʼ Jesucristu ne nga racané laacaʼ gánnacaʼ dxandíʼ zeedabe ne zuni chaahuibe guidxilayú riʼ.
Guzéʼtenu de Carlos. Laa nabeza ndaaniʼ guidxi São Paulo (Brasil). Lu beeu agosto iza 2003 gúnnabe nápabe cáncer. Ne dede dxi ca maʼ guca operarbe xhono biaje, maʼ bininá ca operación ca laabe ne maʼ huaxiéʼ stipa nápabe. Neca nuube zacá cayacanérube binni. Ti biaje canagucheechebe diidxaʼ lu calle neza ra nuu ti hospital, bidxélabe ti bizáʼnabe ni naca testigu stiʼ Jiobá ne xheelaʼ gunaa riʼ cacaa quimioterapia. Cumu laaca nápabe cancer la? gunda gucanebe gunaa riʼ ne xheelaʼ. Gudiʼdiʼ si ti tiempu, gunaa riʼ ne xheelaʼ guníʼcabe ximodo gucané Carlos laacabe ne dede dxiqué cayanda cayuni huantárcabe yuubaʼ stícabe. Zaqué gunna Carlos dxandíʼ ca diidxaʼ ni guníʼ Pablu riʼ: «Rusieche be laanu ora tiica acaná ladxidóʼ no, ne zacá riziʼdi nu usieche nu stobi ni cayacaná ladxidóʼ, cásica bisieche be laanu» (2 Corintios 1:4).
Neca huará Carlos, xi racané laa para ganda gacané xcaadxi binni yaʼ. Cumu runi crebe dxandíʼ zeeda Cristu ne nánnabe xi guiráʼ zuni ora maʼ gueeda la? nga racané laabe «cadi iréʼ [be] gana de guni [be ni] jneza» (Gálatas 6:9).
Yanna, guidúʼyanu ni bizaaca Samuel. Gúpabe ti bíʼchibe jma nahuiiniʼ que laabe. Bíʼchibe riʼ biiticabe laa biaʼ 50 metru de ra lidxi bixhózebe. Hombrehuiiniʼ riʼ bidiicabe chii balasu laa ne qué nindisagá diʼ pulicia laabe purtiʼ biyúbirucaʼ ximodo gútibe. Biaanabe raqué xhono hora. Qué ganda diʼ gusiaandaʼ Samuel ni guca dxi que. Peru ni racané laabe nga gánnabe maʼ cadi candaa diʼ zabee Cristu guiráʼ ca guendaquéiquiiñeʼ ni nuu lu guidxilayú riʼ ne zedané ti gobiernu ni zuni ni jneza ne zudii stale ndaayaʼ. Samuel riníʼ ique quiidxi biʼchiʼ ora guiasa lade gueʼtuʼ dxi gaca Guidxilayú riʼ ti paraísu (Hechos 24:15).
Xi naquiiñeʼ gúniluʼ
Zabáninu nayecheʼ pa guni crenu dxandíʼ zeeda Cristu ne zanda guni chaahuibe modo nabáninu. Dxandipeʼ nánnanu zabee Jesús guiráʼ ca guendaquéiquiiñeʼ nuu lu guidxilayú riʼ ne ca guendanagana ni runiná laanu.
Xi naquiiñeʼ gúniluʼ para ganda guicaaluʼ ca ndaayaʼ ni zedané gobiernu stiʼ Cristu yaʼ. Biindaʼ chaahuiʼ Stiidxaʼ Dios, Biblia. Dxi biʼniʼ orar Jesús Bixhoze, gúdxibe laa ca diidxaʼ riʼ: «Zacaa cabe enda nabani ca ra gunibiáʼ cabe lii ne ra gunibiáʼ cabe Jesucristu ni biseenda luʼ. Lii nga tobi lucha Dios ni dxandíʼ» (Juan 17:3). Bicaa ique gánnaluʼ xi cusiidiʼ Biblia. Ca testigu stiʼ Jiobá ni nabeza neza ra liʼdxuʼ ziuuláʼdxicaʼ gacanecaʼ lii. Rinábadu lii guyúbiluʼ laacabe o bicaa ra nuu cani bicaa revista riʼ.
[Dibuju/foto ni zeeda lu yaza 7]
Ni cá xagueteʼ cuadru: Rhino and Lion Park (Gauteng, Sudáfrica)
[Credit Line 7]
Dxi gueeda Cristu zuni chaahuiʼ guidubi naca Guidxilayú riʼ