Modo guni adorarluʼ Dios né binnilídxiluʼ ne ora gúʼndaluʼ stúbiluʼ
DXIQUÉ la? ca testigu stiʼ Jiobá biquiiñecaʼ chupa gueelaʼ para gúnicaʼ chupa guendaridagulisaa, peru dxi biuʼnu lu beeu enero iza 2009 maʼ bizulú bíʼnicabe guirópani ti gueelaʼ si. Grupu ni Zaniruʼ guníʼ iquiiñecabe ti gueelaʼ ni biaana ca para guni adorárcabe Dios né binnilídxicabe o para gúʼndacabe Biblia stubisícabe. Ñee caquiiñenu tiempu ca jneza para gúninu ni gudixhécabe gaca riʼ la?
Xi tema zanda guʼndaʼ ca xpinni Cristu ora guni adorarcaʼ Dios né binnilídxicaʼ yaʼ. Grupu ni Zaniruʼ qué riguixhe diʼ xi gúʼndacabe dxi ca. Gadxé gadxé nga ni caquiiñeʼ cada familia. Nga runi, cani naca xaíque ndaaniʼ ti familia naquiiñeʼ gúʼyacaʼ xi caquiiñeʼ binnilídxicaʼ ne gúʼyacaʼ xi zacané laacabe. Cani qué gapa binnilidxi zanda gúʼyacaʼ ximodo iquiiñecaʼ tiempu sticaʼ jma jneza.
Xi zanda gúʼndacabe dxi ca yaʼ. Nuu tu laa ruundaʼ ni chiguiuundaʼ lu ca guendaridagulisaa, peru cadi ngasi nga ni zanda gúʼndacabe. Zanda gúʼndacabe Stiidxaʼ Dios, guiníʼcabe xi biziidicabe de xiixa tema zeeda lu ca libru o revista stinu, o dede zanda gusihuínnicabe ximodo bizaaca xiixa historia zeeda lu Biblia, jmaruʼ si pa nuu xcuidihuiiniʼ ndaaniʼ familia stiluʼ. Ora guni adorartu Dios né binnilídxitu, cadi caquiiñeʼ gúnitu ni casi raca ra ridagulisaanu, racá ruundacabe ca párrafo ca ne rinabadiidxacabe. Ora maʼ cayúninu ni, jma galán gúninu ni casi ora cayuinu diidxaʼ, purtiʼ zacá zanda guininu de ni nuu ndaaniʼ ladxidoʼno. Pa gúninu ni zacá la? guiráʼ biaje guidúʼndanenu binnilídxinu ziuu guiranu nayecheʼ.
Ti xpinni Cristu ni napa chonna xiiñiʼ bicaa ca diidxaʼ riʼ: «Jma nga ridúʼndadu Stiidxaʼ Dios. Dede ante ridúʼndadu ca capítulo ca, ne ca hombrehuiiniʼ stinneʼ ruundacaʼ jma de xiixa ni guyuuláʼdxicaʼ ra biindacaʼ. Despué maʼ riuʼdu guiradu para gusiénecabe laadu ni biziidicabe. Michael [ni napa gadxe iza] runi ti dibuju o rucaa ti párrafo huiiniʼ. David ne Kaitlyn [primeca napa 13 iza ne stobi ca 15] rucaacaʼ xiixa relatu casi ñaca laacaʼ bíʼyacaʼ ora bizaaca historia ca. Ti biaje, dxi bidúʼndadu de bacaandaʼ stiʼ panaderu ne copero stiʼ faraón ni zeeda lu capítulo 40 stiʼ Génesis la? Kaitlyn bicaa historia ca casi ñaca ñuunebe José ndaaniʼ lidxi guiibaʼ que».
Cumu gadxé gadxé cada familia la? cada familia zanda cuí xi zanda guʼndané binnilidxi. Lu sti yaza ca zeeda caadxi tema ni zanda gúʼndaluʼ stúbiluʼ o gúʼndaneluʼ binnilídxiluʼ. Ñee maʼ guníʼ íqueluʼ xcaadxi modo zanda guʼnuʼ ni la?
[Cuadro ne dibuju/foto ni zeeda lu yazas 6, 7]
Familia ni maʼ caniisi xiiñiʼ:
• Gúʼndacabe ne guiníʼcabe xi biénecabe lu ti capítulo stiʼ libru Los jóvenes preguntan.
• Gúʼndacabe ti relatu stiʼ Biblia ne guinabadiidxacabe: «Xi ñúniluʼ pa nizaacaluʼ ni» (biiyaʼ Torre stiʼ ni rapa 15 stiʼ mayo 1996, yaza 14, párrafo 17 ne 18).
• Guiníʼcabe xi zanda ugaanda ca xiiñicabe yanna ne despué.
• Gúʼyacabe ti película ni ribee xquidxi Dios ne guiníʼcabe xi biziidicabe de laani.
• Gúʼndacabe Torre stiʼ ni rapa ra na «Para ca hombrehuiiniʼ ne ca dxaapahuiiniʼ».
Guendaxheelaʼ ni qué gapa xiiñiʼ:
• Gúʼndacabe capítulo 1, 3 ne 11 dede 16 stiʼ libru El secreto de la felicidad familiar.
• Gúʼndacabe ne guiníʼcabe xi biénecabe ora biindacabe Biblia laasícabe.
• Gúʼndacabe ni chitiidiʼ lu Guendaridagulisaa ra Riuundaʼ Biblia o ra riuundaʼ revista Torre stiʼ ni rapa.
• Gúʼyacabe ximodo zanda gúnicabe jma lu xhiiñaʼ Dios.
Ca solteru ne cani nuu stubi ndaaniʼ xquidxi Dios:
• Gúʼndacabe ca libru cubi ni riree lu ca guendaridagulisaa de chonna gubidxa.
• Gúʼndacabe Anuario stiʼ iza riʼ o stiʼ xcaadxi iza ni maʼ gudiʼdiʼ.
• Guyúbicabe xi zanda guicábicabe binni de ni rinabadiidxaʼ laacabe ora rucheechecabe diidxaʼ.
• Guni ensayárcabe ximodo guiniʼnécabe binni ora gucheechecabe diidxaʼ.
Familia ni napa baʼduhuiiniʼ:
• Gúnicabe casi modo guca ca historia ni zeeda lu Biblia.
• Laiquiiñeʼ tiempu stitu jneza ne laguinabadiidxaʼ laacabe xiixa, ti gúʼyatu pabiáʼ nánnacabe ne zanda iquiiñetu ca yaza 30 ne 31 stiʼ revista ¡Despertad!
• Gatigá biʼniʼ xiixa ni gucaa laacabe guiníʼ íquecabe (zanda gúʼyaluʼ tema ni láʼ: «Ribeendunu ni galán ora rúninu stipa», ni beeda lu Torre stiʼ ni rapa 15 stiʼ febrero 2011, yaza 11).
• Gúʼndanetu laacabe revista Torre stiʼ ni rapa ra na: «Ni gusiiditu ca xiiñitu».