Ñee lade ca xpinni Cristu biasa ca costumbre stiʼ Domingo de Resurrección la?

Para stale binni la? domingu riʼ nga dxi biasa Jesús lade gueʼtuʼ. Encyclopædia Britannica na laani nga «saa ni jma risaca stiʼ ca religión ni zinanda Cristu». Peru, xi rusiidiʼ Biblia yaʼ. Ñee jneza guni ca xpinni Cristu saa riʼ la?

Para gánnanu pa original ti obra de arte la? naquiiñeʼ gunibiáʼ chaahuinu ni. Ngaca nga ni naquiiñeʼ gúninu né ca costumbre ni raca lu Pascua, o Domingo de Resurrección, naquiiñeʼ ganna chaahuinu pa dxandíʼ bizulú cani lade ca xpinni Cristu.

Primé la? naquiiñeʼ gánnanu qué ñabi diʼ Jesús ca discípulo stiʼ guietenaláʼdxicaʼ dxi biásabe lade gueʼtuʼ, sínuque guietenaláʼdxicaʼ guendaguti stibe. Ne apóstol Pablu na laani nga «endaró xhi [...] gudixhe Señor gaca» (1 Corintios 11:20; Lucas 22:19, 20).

Enciclopedia ni bizéʼtenu que laaca caníʼ qué «nuzulú diʼ» ca costumbre riʼ dxi biasa Jesús lade gueʼtuʼ, sínuque zeeda cani de «ca costumbre ni maca napa binni dxiqué». Guzéʼtenu ti ejemplu. Ndaaniʼ caadxi guidxi roʼ riquiiñeʼ binni dxita bere ne coneju ora maʼ cayaca saa riʼ. Guidúʼyanu xi cusiene ti libru de ca cosa ni riquiiñeʼ ca binni riʼ: «Dxita riʼ nga ti guendanabani ni deruʼ cuzulú ne cayuni stipa para guiree lu náʼ guendaguti, o bichuga stiʼ dxita que», The Encyclopedia of Religion (La enciclopedia de la religión). Ne laaca caniʼruʼ libru riʼ: «Nanna binni nabé rapa coneju stale xiiñiʼ; ngue runi ruchaagacaʼ laame né tiempu ruzulú primavera».

Philippe Walter, ti profesor de Literatura Medieval, cusiene ximodo biuu ca costumbre stiʼ ca binni que lade saa ni raca Domingo de Resurrección. Laabe bicaabe: «Dxi maʼ ziyaca ca religión guyuu dxiqué, religión stiʼ ca xpinni Cristu» la? qué ñaca nagana para laacaʼ nuchaagacaʼ dxi biasa Jesús lade gueʼtuʼ né «ora riluxe invierno, ni zeeda gaca casi guendaguti, ne ora ruzulú primavera, ni zeeda gaca casi guendanabani». Ne laaca guniʼbe biquiiñeʼ ni guca riʼ para biuu «ca costumbre stiʼ ca xpinni Cristu» lu calendariu stiʼ ca religión que, ngue runi nagueenda bidale binni ni guníʼ maʼ xpinni Cristu laa.

Modo guca ca binni riʼ «xpinni Cristu», bizuluni guti si ca apóstol que, purtiʼ dxi nabánicabe qué nudiicabe lugar ñaca binni xpinni Cristu né guiráʼ costumbre stiʼ (2 Tesalonicenses 2:7). Maca gudixhená apóstol Pablu xi zazaaca ora «gaxha ñee» lu Guidxilayú: ziuu caadxi hombre ni «guiasa usiguii ca [discípulo] para chi nanda laacaʼ» (Hechos 20:29, 30). Ne dxi maʼ ziluxe primé siglu que, bicaa apóstol Juan maʼ nuu caadxi binni ni racalaʼdxiʼ gusiguii ca xpinni Cristu (1 Juan 2:18, 26). Beeda gaca ni biʼniʼ ca binni riʼ casi ora nixeleʼ ti puertaʼ para ganda chuʼ costumbre stiʼ binni qué runi adorar Dios lade ca xpinni Cristu.

Zándaca chuʼ tu guiníʼ cadi málupeʼ nga guyuu ca costumbre que lade ca xpinni Cristu, purtiʼ riníʼ íquecabe gucaneni binni qué runi adorar Dios guiene xi pur biasa Cristu lade gueʼtuʼ. Peru qué lica ñuulaʼdxiʼ apóstol Pablu ni bizéʼtenu riʼ. Lu ca viaje bíʼnibe lu guidubi naca Imperiu stiʼ Roma biiyabe stale costumbre stiʼ binni qué runi adorar Dios, peru qué lica niquiiñebe cani para ñacanebe binni ñunibiáʼ chaahuiʼ Jesús. Ni bíʼnibe nga gudixhenabe ca cristianu né ca diidxaʼ riʼ: «Cadi gaca né tu cani qué runi cre tobi si, purti zacá zeda gaca tu casi ti buey ni cadi cá né xcompañeru. Zanda xa guiuʼcha ni jneza ni cadi jneza, o zanda xa guiuʼcha biaani guelacahui. Ne laca cá ra na [Señor]: “Lairee de lade cabe ne laixele de laacabe, ne cadi cana tu ni cadi nayá para naa, ti icaa laatu”» (2 Corintios 6:14, 17).

Dxandíʼ cadi stale diʼ nga ni bisiénenu raríʼ, peru zanda gacaneni laanu guiénenu ti cosa nabé risaca: qué nuzulú diʼ ca costumbre stiʼ Domingo de Resurrección lade ca xpinni Cristu.