Caquiiñedu acaneluʼ laadu
1 «Xquíxepeʼ laatu pur iráʼ ni rúnitu pur laadu. Xhiiñatu nabé risaca ni.» Ca diidxaʼ ca rusihuinni cani de que nuunu nayecheʼ ne ca binnigola ne ca siervu ministerial ni nuucaʼ ra ridagulisaanu. Ra jma ziniisi xquidxi Dios la? jma caquiiñeʼ hombre ni nanna xii nga jneza ne ni cadi jneza para acanecaʼ ndaaniʼ casi ti gayuaa mil neza binni ridagulisaa ni nuu lu idubi naca Guidxilayú. Pa ti hombre ni maʼ uyuunisa lii la? caquiiñedu acaneluʼ.
2 Bicaa ique ugaandaluʼ xiixa guenda. Ximodo zanda ugaandaluʼ xcaadxi guenda para guʼnuʼ xcaadxi dxiiñaʼ yaʼ. (1 Tim. 3:1.) Ni naquiiñeʼ nga, ácaluʼ ti ejemplu lu iráʼ ni guʼnuʼ (1 Tim. 4:12; Tito 2:6-8; 1 Ped. 5:3). Bicheeche diidxaʼ biaʼ gándatiʼ ne ucané xcaadxi guni zaqueca (2 Tim. 4:5). Biluíʼ de que dxandíʼ racaláʼdxiluʼ acaneluʼ para chuʼ ca bíchinu ne ca bizánanu galán (Rom. 12:13). Uca ti binni ni ruundaʼ Stiidxaʼ Dios ne biyubi ximodo usiidiluʼ jneza (Tito 1:9; 1 Tim. 4:13). Ne stale gana biʼniʼ ca dxiiñaʼ ni udii ca binnigola lii (1 Tim. 3:10). Pa maʼ bichaganaluʼ ne napuʼ xiiñuʼ la? «[biʼ]ni mandar ndaani lidxi[luʼ]» jneza (1 Tim. 3:4, 5, 12).
3 Intiica guenda gápatu ra ridagulisaatu, riquiiñeʼ ni dxiiñaʼ nadipaʼ ne acanetu ora tiica iquiiñecabe laatu (1 Tim. 5:17). Nga runi, pa racaláʼdxiluʼ ugaandaluʼ tobi de laaca ni la? bicaa ique acaneluʼ xcaadxi ne endanachaʼhuiʼ (Mat. 20:25-28; Juan 13:3-5, 12-17). Uníʼ ique modo nabé nagueenda uca Timoteu para ucané stobi ne biʼniʼ stipa pur guʼnuʼ zaqueca (Fili. 2:20-22). Cásica laabe, uleza gúʼyacabe modo lii ne nga zusihuinni pa zanda icaaluʼ ca guenda ca (Hech. 16:1, 2). Pa guʼnuʼ stipa pur ácaluʼ cásipeʼ naquiiñeʼ para ganda guʼnuʼ xcaadxi dxiiñaʼ ne chinándaluʼ ca conseju ni udiicabe lii para saluʼ jma jneza la? zuuyacabe «ze dxi ziyene luʼ jma» (1 Tim. 4:15).
4 Cani napa xiiñiʼ, lagusiidiʼ laacabe acanécabe. Ca xiiñitu zanda iziidicabe acanécabe dede nahuiinirucabe. Bisiidiʼ laacabe gánnacabe ucaadiágacabe ca endaridagulisaa ca, chigucheechecabe diidxaʼ ne chuʼdxícabe ndaaniʼ Yoo stiʼ Reinu ne ra scuela. Ne laaca bisiidiʼ laacabe acanécabe xcaadxi binni, casi acanécabe guia ndaaniʼ Yoo stiʼ Reinu ne acanécabe ca binni huaniisi o lu xcaadxi cosa. Zacá zánnacabe xii nga endanayecheʼ runi sentir binni ora rudii (Hech. 20:35). Usiidiluʼ laacabe gúnicabe zacá la? zacaneni laacabe ácacabe precursor, siervu ministerial ne binnigola despué.