Modo guiuundaʼ folletu ¡Manténgase alerta!
Ca semana 23 stiʼ mayo dede 20 stiʼ junio 2005, ca binni ridagulisaa ni nuu lu idubi naca Guidxilayú zuundacaʼ folletu ¡Manténgase alerta! ra riuu Grupuhuiiniʼ ni Ruundaʼ Libru stiʼ ca Binni Ridagulisaa. Biquiiñeʼ ca endarinabadiidxaʼ zeeda raríʼ para chuʼluʼ listu ne zaqueca para inabadiidxaluʼ ora maʼ guiuundaʼ folletu riʼ. Ora maʼ cayaca endaridagulisaa riʼ, naquiiñeʼ guiuundaʼ ca yaza maca nexheʼ guiuundaʼ ne ca textu ca biaʼ udii tiempu.
Semana 23 stiʼ mayo
◼ Yaza 3, 4: De cani cayeeteʼ raríʼ, unáʼ ni jma huayuniná lii. Xi cayabi lii cadi cayaca ca cosa riʼ ti lugar si, ne cadi málasi cayaca cani.
◼ Yaza 5: Ximodo nannuʼ dxandíʼ rizalaʼdxiʼ Dios laanu. Ximodo zusihuínninu dxandíʼ rizaláʼdxinu izíʼdinu de Dios ne izíʼdinu de cani cayúnibe yanna.
◼ Yaza 6 dede 8: Xi caníʼ Mateo 24:1-8, 14 de cani cazaaca ndaaniʼ Guidxilayú riʼ. Casi na 2 Timoteo 3:1-5, xi tiempu ndiʼ nabáninu yanna. Xii nga chiguinitilú lu ca últimu dxi riʼ. Xiñee runi creluʼ dxandipeʼ Biblia nga Stiidxaʼ Dios. Xii nga Reinu ni rininu ora maʼ ziucheechenu diidxaʼ.
◼ Yaza 9, 10: Xiñee naquiiñeʼ iníʼ ique chaahuinu lu cani rúninu iráʼ dxi ne lu cani jma naquiiñeʼ gúninu primeru lu endanabani stinu. (Rom. 2:6; Gál. 6:7.) Ora idúʼndanu ca endarinabadiidxaʼ zeeda lu yaza 10, xi textu rietenalaʼdxuʼ ni zacané lii gannuʼ xi guʼnuʼ.
Semana 30 stiʼ mayo
◼ Yaza 11: Xiñee naquiiñeʼ iníʼ ique chaahuinu lu ca endarinabadiidxaʼ zeeda lu yaza riʼ. (1 Cor. 10:12; Efe. 6:10-18.) Pur modo bicábinu ca endarinabadiidxaʼ riʼ, ñee rusihuínninu dxandíʼ zinándanu conseju stiʼ Jesús ni cá lu Mateo 24:44 la?
◼ Yaza 12 dede 14: Xii nga «dxi cuidxi Dios cuenta binni» ni rieeteʼ lu Apocalipsis 14:6, 7. Ximodo riénenu diidxaʼ «laidxibi Dios ne lausisaca laa». Xii nga Babilonia guidxi Roʼ ne xi chiguizaaca ni. Pa maʼ nánnanu xi chiguizaaca Babilonia guidxi Roʼ, xi naquiiñeʼ gúninu yanna. Xiruʼ nga chigaca dxi cuidxi Dios cuenta binni. Cumu qué gánnanu «padxi ne pora» nga cuidxi Jiobá cuenta binni, xi naquiiñeʼ ucaa nga laanu gúninu. (Mat. 25:13.)
◼ Yaza 15: Xii nga derechu napa Dios de guni mandar ne ximodo zanda uluinu nápabe derechu ca.
◼ Yaza 16 dede 19: Xii nga «ibáʼ cubi ne guidxilayú cubi». (2 Ped. 3:13.) Tuu laa cuzabiruaa guni ni. Ñee zacaanu ca ndaayaʼ gueedané ni la?
Semana 6 stiʼ junio
◼ Yaza 20, 21: Ximodo udixhená Jesús ca xpinni ni guyuu primé siglu que para uxooñecaʼ de xquídxicaʼ. (Luc. 21:20, 22.) Padxí gunda bireecabe de xquídxicabe. Xiñee biquiiñeʼ ireecabe de guidxi que nagueendaca. (Mat. 24:16-18, 21.) Xiñee nuu stale binni qué rizalaʼdxiʼ ucaadiaga ora caguixhenácabe laa. Xi uleendúʼ millón de binni ni nabeza China ne Filipinas pur bicaadiágacaʼ ni gúdxicabe laacaʼ. Xiñee caquiiñepeʼ ucaadiáganu yanna iráʼ modo caguixhená Biblia laanu ra caniʼni maʼ chiguinitilú iráʼ ca cosa malu nuu yanna riʼ. Yáquexa maʼ cadxiña dxi initilú iráʼ xixé endaquéiquiiñeʼ nuu yanna, xi riquiiñeʼ gúninu nagueendaca. (Pro. 24:11, 12.)
◼ Yaza 22, 23: Xiñee qué ñuni cré ca binni de Australia (1974) ne Colombia (1985) ora gúdxicabe laacaʼ de que zazaaca xiixa ni zuniná laacaʼ, ne xi bizaacacabe pur qué nuzuubacabe diidxaʼ. Lii pa ñuuluʼ raqué, xi ñúniluʼ ora ñánnaluʼ de ni chigaca que ne xiñee. Xi nusihuinni pa nucaadiáganu o coʼ iráʼ ni uníʼcabe chiguizaaca dxi stiʼ Noé. Xiñee stale binni uyuulaʼdxiʼ cueza gaxha de guidxi Sodoma. Xi zabeendunu pa iníʼ ique chaahuinu ni bizaaca guidxi Sodoma.
Semana 13 stiʼ junio
◼ Yaza 24 dede 27: Biquiiñeʼ ca endarinabadiidxaʼ zeeda lu yaza 27.
Semana 20 stiʼ junio
◼ Yaza 28 dede 31: Biquiiñeʼ ca endarinabadiidxaʼ zeeda lu yaza 31.
Ra idúʼndanu folletu riʼ zacaneni laanu gatananu ne chuʼnu listu. Dxiiñaʼ ni rúninu naquiiñeʼ usihuinni ni dxandíʼ rizaláʼdxinu ca diidxaʼ ni uníʼ ti ángel: «Laidxibi Dios ne lausisaca laa, purti ma bidxiña dxi cuidxi cuenta binni» (Mat. 24:42, 44; Apo. 14:7).