Ucané ca xiiñiluʼ iziidicaʼ ucheechecaʼ diidxaʼ jma jneza
1 Iráʼ ca Testigu ni napa xiiñiʼ la? naquiiñeʼ usiidicabe laacaʼ gánnacaʼ ucheechecaʼ diidxaʼ dede nahuiinicaʼ. Nuu stale modo zanda acanetu laacabe gúnicabe ni. Nuu baʼduhuiiniʼ, dede ante ganna guʼndaʼ maʼ nanna ti textu ne riníʼ xiná ni dede ridxagayaa cani rucaadiaga laa. Ra maʼ ziniisicabe jma la? maʼ zanda gúnicabe jma lu dxiiñaʼ riʼ. Ximodo zanda acanetu laacabe ti gúnicabe dxiiñaʼ riʼ yaʼ. Zanda iquiiñetu cani zeeda raríʼ.
2 Ugapadiúxisiluʼ la? zanda iniʼluʼ:
◼ «Xiiñeʼ riʼ, [uníʼ tu láʼ hombrehuiiniʼ ca], racalaʼdxiʼ gunadiágaluʼ ti textu ni cusiidiʼ xiixa ni nabé risaca.» De racá zanda iniʼbe: «Lu versículo stiʼ Salmo riʼ biziideʼ tu láʼ Dios [hombrehuiiniʼ ca gúʼndabe Salmo 83:18 o iniʼbe ni zacasi pa nánnabe ni]. Ca revista riʼ cusiene cani xi chiguni Jiobá pur laanu. Riuladxeʼ usaananiáʼ cani lii.» Ora maʼ iluxe iníʼneluʼ binni ca zanda uzeeteluʼ paraa reeda bueltu para dxiiñaʼ rúninu lu idubi Guidxilayú.
3 Sti modo zanda ácani nga sicaríʼ:
◼ «Xi tal xa. Cusiideʼ xiiñeʼ riʼ, [uníʼ tu láʼ dxaapahuiiniʼ ca], ganna ximodo zanda acané ca vecinu stinu. Laabe racaláʼdxibe gábibe lii caadxi diidxaʼ ni zeeda lu Biblia ni zanda acané lii.» De racá zanda iniʼbe: «Riuladxeʼ gabeʼ binni xi caníʼ Biblia chiguni Dios para laanu despué [dxaapahuiiniʼ ca gúʼndabe Apocalipsis 21:4 o iniʼbe ni zacasi pa nánnabe ni]. Ca revista riʼ cusiene cani xi chiguni Reinu stiʼ Dios para laanu. Ziuuláʼdxiluʼ gúʼndaluʼ cani.»
4 Pa gatigá iquiiñecabe ti modo iniʼnécabe binni ne cadi ácani nagana la? ca baʼduhuiiniʼ ca chahuidugá zaziidicaʼ ucheechecaʼ stiidxaʼ Reinu sin idxíbicaʼ. Ora maʼ cusiiditu laacabe la? lagabi laacabe pabiáʼ risaca nga iníʼcabe jneza ne iníʼcabe biaʼ ganda gunadiaga binni, zacá maʼ ziuucabe listu para ucheechecabe diidxaʼ ratiica nuucabe. Usiidiʼ chaahuitu laacabe ne gábitu laacabe jneza modo cayúnicabe ni la? zacané nga laacabe iníʼcabe de ni runi crécabe.
5 Ora bixhoze ca baʼduhuiiniʼ riʼ racanecaʼ laacabe zacá la? stale de laacaʼ maʼ zanda gúnicaʼ iráʼ ni na Jiobá ne maʼ zácacaʼ ni rucheeche diidxaʼ ni caʼruʼ chuʼ nisa. ¡Izáʼ riéchenu nga gúʼyanu pabiáʼ ziziidiʼ ca baʼduhuiiniʼ ca gánnacaʼ ucheechecaʼ diidxaʼ jma jneza! (Sal. 148:12, 13.)