Zaquiiñenu ca guiʼchihuiiniʼ ca la?
1 Ti invitación ni uca raca gayuaa iza, yanna riʼ laaca cayaca ni lu 235 guidxi, ndiʼ nga lani: «Latáʼ ne quíbanu lu dani stiʼ Jiobá, [...] ne laabe zusiidibe laanu de neza stibe, ne dxandipeʼ zazanu luni» (Isa. 2:3). Uguu jnézanu ca binni ca ndaaniʼ xquidxi Jiobá nga tobi de ca modo zanda acanenu laacabe para iniisicabe lu Stiidxaʼ Dios ti ugaandacabe endanabani ni qué ziuu dxi iluxe. Nga runi cadi naquiiñeʼ indaʼnu para guni invitarnu ca binni ca ne uguʼnu gana laacabe chécabe ca endaridagulisaa ca. Ximodo zanda gúninu ni yaʼ. Zanda gúninu ni ra iquiiñenu ca guiʼchihuiiniʼ ni gabi laacabe ximodo nga ca endaridagulisaa stinu. Xi ca guiʼchihuiiniʼ nga caninu yaʼ. Nga nga tuudxi guiʼchiʼ ra zanda icá paladu riaana Yoo stiʼ Reinu ne pora raca iráʼ ca endaridagulisaa rápanu. Décheni laaca cá ximodo zanda iziidicabe de Biblia dede ra lídxicabe sin quíxecabe.
2 Ne stale endanayecheʼ cayábidu laatu maʼ zuzulú zaquiiñenu ca guiʼchihuiiniʼ riʼ ora ucheechenu diidxaʼ Méjicu, dede lu beeu enero stiʼ 2006. Ndaaniʼ stale guidxi nuu lu guidxilayú maca riquiiñecabe ni (biluíʼ ti guiʼchihuiiniʼ cani cucaadiaga).
3 Xi zanda ininu ora udiʼnu binni guiʼchihuiiniʼ riʼ yaʼ. Zanda uzeeteluʼ qué rutópadinu bueltu ora maʼ cayaca ca endaridagulisaa ca. Laaca zanda usiéneluʼ ximodo raca cada tobi de ca endaridagulisaa ca. Biluíʼ binni ca dxandíʼ risaca nga usiidicabe laabe de Biblia ne laanu rudiʼnu ni iziidinécabe. Ne gudxi laabe binni xquídxinu nga rié ra raca cani, ne zanda cheʼ baʼduhuiiniʼ de irá iza. Peru laanu naquiiñeʼ acanenu cani caquiiñeʼ chuʼ tu acané laa para cheʼ.
4 Ora udiitu ti guiʼchihuiiniʼ riʼ ti binni la? zuuyatu pabiáʼ zacaneni laatu ti ganda uzulú iníʼnetu binni. Cadi naquiiñeʼ iníʼ íquenu qué risaca guiʼchihuiiniʼ riʼ, purtiʼ laaca neni caadxi diidxaʼ ni zucaa binni guʼyaʼ pabiáʼ nga risaca iziidicabe de Stiidxaʼ Dios (biindaʼ Zacarías 4:10; Heb. 4:12; Sant. 3:4, 5).
5 Cani napa xiiñiʼ zanda gábicabe xiiñicabe udiicaʼ ti guiʼchihuiiniʼ riʼ ca binni ni uxheleʼ ra puertaʼ. Ne laaca zanda guni invitárcabe ca binni ca ra Yoo stiʼ Reinu ra iníʼcabe paladu riaanani ne pora raca ca endaridagulisaa ca, ne gábicabe binni ca zadxagalúcabe laa galán. Ca yoo ra qué guinni irutiʼ la? zanda uguucabe ti guiʼchihuiiniʼ ca xaʼnaʼ puertaʼ, ne gúʼyacabe chuʼ ni ndaaniʼ yoo ca ti cadi guʼyaʼ cani tiidiʼ lu neza ni. Cani rucheeche diidxaʼ pur carta zanda useendacabe ti guiʼchihuiiniʼ ca ne guni invitárcabe binni cheʼ ca endaridagulisaa rápanu.
6 Para nga Betel stiʼ Méjicu zuseendaʼ ca guiʼchihuiiniʼ riʼ ra nuu ca neza binni ridagulisaa iráʼ iza. Ora maʼ nápanu cani, ximodo zanda iquiiñenu cani jma jneza yaʼ. Zándaca ca binnigola gúnicaʼ ti sellu para icá paladu riaana Yoo stiʼ Reinu ne pora raca ca endaridagulisaa ca ne ucaacabe ni lu guiʼchiʼ ca. Galán nga udiʼnu ti guiʼchihuiiniʼ riʼ iráʼ binni ni inínenu. Nuu binni ni qué riuulaʼdxiʼ guʼndaʼ o raca nagana para laa guʼndaʼ, peru ñulaʼdxiʼ nucaadiaga ti libana zeeda lu Biblia ni ridiʼdiʼ ante guiuundaʼ revista La Atalaya.
7 Lu tobi de ca últimu versículo ni zeeda ndaaniʼ Biblia zeeda ti invitación para icaanu cani cudii Jiobá laanu ti zacá gápanu endanabani: «Na Espíritu Santu ne xheela Dendxu huiini que: Gudáʼ. [...] Ni cayati nisa la? gueeda gué nisa ni rudii enda nabani sin quixe gastiʼ» (Apo. 22:17). Xhiiñanu nga guni invitarnu binni ti cheʼ ca endaridagulisaa stinu ne cadi naquiiñeʼ usaananu de gúninu ni. Nga runi, ñee zaquiiñenu ca guiʼchihuiiniʼ riʼ jneza ora maʼ ziucheechenu diidxaʼ la?