Ximodo inínenu ca binnilídxinu de Stiidxaʼ Dios
1. Xiñee riquiiñeʼ iníʼ íquenu ximodo ucaʼnu ca binnilídxinu chuláʼdxicaʼ ucaadiágacaʼ Stiidxaʼ Dios yaʼ.
1 Ñee nuu sti cosa ni jma nusiecheʼ laanu que chúʼnenu ca binnilídxinu ndaaniʼ Guidxilayú cubi ca ne guni adorárnenu laacabe Jiobá la? Endanayecheʼ riʼ la? zácani pa inínenu ca binnilídxinu de lu Stiidxaʼ Dios. Peru para ganda chuláʼdxicabe ni gábinu laacabe ora chigucheechenu diidxaʼ ne ucaani laacabe ucaadiágacabe la? naquiiñeʼ iníʼ íquenu ximodo gúninu ni. Ti binnigola ni riganna ca binni ridagulisaa uníʼ sicaríʼ: «Ribeendunu stale ni galán pa inínenu ca binnilídxinu chaahuiʼ chaahuiʼ, zacá zucaani laacabe ucaadiágacabe». Ximodo zanda gúninu ni yaʼ.
2. Ximodo zanda uluinu dxandíʼ rizaláʼdxinu ca binnilídxinu, ne zacá ucaʼnu laacabe chuláʼdxicabe iziidicabe jma yaʼ.
2 Uyúbinu ni chuláʼdxicabe ucaadiágacabe. Uníʼ ique dede ante xi zándaca chulaʼdxiʼ ca binniliʼdxuʼ gunadiaga (Pro. 15:28). Xii nga cani racaláʼdxicabe, o xi endanagana cadíʼdicabe. Zanda uluiʼluʼ laacabe ni caníʼ xiixa revista o gúʼndaneluʼ laacabe ti textu ni cá lu Biblia ni acané laacabe lu ni cazaacacabe. Ne pa nabézacabe zitu la? zanda ucaaluʼ ti carta ra nuucabe o iníʼneluʼ laacabe pur teléfono. Ucané laacabe chuʼ Stiidxaʼ Dios ladxidóʼcabe, casi nudxiibuʼ ti semiá, sin cueeluʼ gana laacabe ne uleza usiniisi Jiobá ni (1 Cor. 3:6).
3. Ximodo zanda uzulunu güínenu binnilídxinu de lu Stiidxaʼ Dios ora gúʼyanu rizaláʼdxicaʼ gánnacaʼ de laanu yaʼ.
3 Jesús gúdxibe hombre ni uleebe stale demonio luguiáʼ que sicaríʼ: «Guyé raliʼdxuʼ, yegüí né ca binni liʼdxu pabiáʼ naroʼba ni biʼni Dios lii ne pabiáʼ biá lii» (Mar. 5:19). Ñee ruxuíʼluluʼ pabiáʼ bidxagayaa ca binnilídxibe ni úcabe riʼ la? Neca cadi izaacaluʼ xiixa endaridxagayaa casi ni uca hombre ca, peru zándaca ca binnilídxiluʼ chuláʼdxicaʼ gánnacaʼ ni rúnitu o ni runi ca xiiñitu. Iníʼneluʼ laacabe de ti libana ni bidiiluʼ lu Scuela stiʼ Cani Rucheeche Diidxaʼ, de ti endaridagulisaa roʼ ra uyeluʼ, de ora yegannuʼ Betel, o iníʼneluʼ laacabe de xiixa ni galán uleenduluʼ la? zanda acané cani lii para usiéneluʼ laacabe xcaadxi de Jiobá ne de xquidxi.
4. Xi cadi naquiiñeʼ gúninu ora inínenu ca binnilídxinu de lu Stiidxaʼ Dios.
4 Iníʼ íquenu ximodo ininu. Ora inínenu ca binnilídxinu de lu Stiidxaʼ Dios la? cadi gábicanu laacabe irani tobi si tiru. Ti bíchinu ni rietenalaʼdxiʼ ora bizulú biindaʼ Biblia, na sicaríʼ: «Stale biaje ulee gana jñaa purtiʼ nabé xadxí rueniáʼ laabe de cani caziideʼ lu Biblia, ne nuu tiru de ridinde diidxadu, peru jma nga ne bixhozeʼ». Nécapeʼ tuuxa binnilídxinu chulaʼdxiʼ ucaadiaga Stiidxaʼ Dios la? cadi icábinu laabe irani, zacá zacaláʼdxibe gánnabe jma (Pro. 25:7). Uca nachaʼhuiʼ, gupa respetu ne uniʼné laacabe diidxaʼ nadóʼ casi ñaca niníʼneluʼ ti binni ni qué runibiaʼluʼ ora maʼ ziucheecheluʼ diidxaʼ (Col. 4:6).
5. Xi naquiiñeʼ gúninu pa ca binnilídxinu qué chuláʼdxicaʼ ucaadiágacaʼ laanu.
5 Uyuu ti tiempu uníʼ ca binnilidxi Jesús maʼ binítibe endabiaaniʼ (Mar. 3:21). Peru despué maʼ biʼniʼ crecaʼ laabe (Hech. 1:14). Pa qué naʼ ca binnilídxiluʼ ucaadiágacaʼ lii ora uzulú iníʼneluʼ laacabe de ni caziidiluʼ la? cadi ireeluʼ gana. Modo nabánicabe ne modo riníʼ íquecabe ca zándaca uchaa ni. Cadi usaanaluʼ de uyúbiluʼ modo iníʼneluʼ laacabe de xiixa ni ucaa laacabe chuláʼdxicabe iziidicabe. Zándaca lii nga acaneluʼ laacabe chúʼcabe lu neza ni ziné lu endanabani ni qué zaluxe (Mat. 7:13, 14).