Naquiiñeʼ gusihuínninu nadxiinu binni ti gucaadiaga laanu
1 «Latáʼ ra nuaaʼ, zaziilaʼdxi ladxidóʼ to.» (Mat. 11:28.) Ca diidxaʼ riʼ rusihuinni cani pabiáʼ nadxii Jesús binni. Ca dxi stinu riʼ, ca xpinni Cristu nadxiicaʼ binni casi biʼniʼ Jesús, ne rusihuínnicaʼ ni ora racanecaʼ laacabe purtiʼ nuucabe lade binni ni cadi nadxiisaa. Ora rucheeche ca xpinni Cristu diidxaʼ, ximodo rusihuínnicaʼ nadxiicaʼ binni.
2 Cani guininu. Cumu gunnaxhii Jesús binni la? bicaani laabe guiníʼnebe laacaʼ de Stiidxaʼ Dios ora tiica si (Juan 4:7-14). Pa nadxiinu binni la? zucaani laanu guinínenu laacabe de Stiidxaʼ Dios ra tiica nuunu. Ti biaje guyé ti dxaapahuiiniʼ de xhoopaʼ iza ra nuu doctor. Laga cabézabe tiidibe la? guníʼnebe ti gunaa ni zuba cueʼbe de Stiidxaʼ Dios. Xi bicaa laabe guiníʼnebe gunaa riʼ yaʼ. Laabe guniʼbe: «Guníʼ iqueʼ caquiiñeʼ gunibiáʼ gunaa riʼ Jiobá».
3 Zusihuínninu rizaaláʼdxinu binni pa guxidxinenu laacabe ne gusihuínninu casi ora maca runibiaʼnu laacabe. Ne laaca zusihuínninu nadxiinu binni ora gucaadiáganu ni gábicaʼ laanu, ora rizaaláʼdxinu laacaʼ ne ora gábinu laacaʼ nánnanu xiñee cadíʼdicaʼ lu guendanagana (Pro. 15:23). Cásica biʼniʼ Jesús, laanu laaca naquiiñeʼ guininu guiráʼ ni chiguni Reinu stiʼ Dios, ne guzéʼtenu pabiáʼ nadxii Jiobá binni, nga runi racaláʼdxibe gacanebe laacaʼ (Mat. 24:14; Luc. 4:18).
4 Cani gúninu. Jesús gúnnabe xi caquiiñeʼ binni ne gucanebe laacaʼ (Mat. 15:32). Zándaca ora maʼ canagucheechenu diidxaʼ guidxélanu tuuxa caquiiñeʼ gacanécabe laa. Ti gunaa Testigu biiyaʼ qué ganda guiene ti gunaa xi cayábicabe laa lu teléfono. Testigu riʼ gúdxibe gunaa que zanda gábibe laa ni caníʼ binni que. Ni bíʼnibe riʼ la? gucaneni laabe para guiníʼnebe gunaa que de Stiidxaʼ Dios ne bizulú biindanebe laa Biblia. Guidúʼyanu ni bizaaca sti xpinni Cristu ora bibiguetaʼ yeganna ti hombre. Ora yendabe ra lidxi binni que biiyabe guizáʼ maʼ biree hombre que gana purtiʼ nagáʼ ti sofá ra puerta lidxi. Gucanésibe hombre que biree ni raqué la? gurícabe luni. Cumu cayecheʼ hombre que gucané Testigu que laa la? oraqueca guná guʼndanebe laa de Biblia.
5 Ora gucheechenu diidxaʼ la? rusihuínninu nadxiinu Dios ne laaca nadxiinu binni (Mat. 22:36-40). Pa gusihuínninu nadxiinu binni pur cani gábinu laa ne pur cani gúninu la? zacanenu binni ni riuulaʼdxiʼ guiziidiʼ gánnacaʼ laanu nga rusíʼdinu ni dxandíʼ.