Ñee zanda gucheecheʼ diidxaʼ la?
1. Xi zacané laanu para cadi guiníʼ íquenu qué zanda gucheechenu diidxaʼ.
1 Pa huayuu ora guiníʼ íqueluʼ qué zanda gucheecheluʼ diidxaʼ la? ¡cadi guireeluʼ gana! Cadi pur guzanu scuela roʼ o pur gulenenu xiixa guenda nga zanda gúninu xhiiñaʼ Dios. Bietenalaʼdxiʼ, caadxi de ca primé discípulo stiʼ Cristu que binibiáʼ binni laacaʼ casi hombre ni «huaxié napa ca scuela ne iruti nacaca». Neca zaqué, nabé jneza modo bicheechecabe ca diidxaʼ nacubi ne galán que. Xiñee yaʼ. Purtiʼ gudixe íquecabe chinándacabe ejemplu stiʼ Jesús (Hech. 4:13; 1 Ped. 2:21).
2. Bizeeteʼ chupa chonna modo bisiidiʼ Jesús.
2 Ximodo bisiidiʼ Jesús. Dxi bisiidiʼ Jesús la? biquiiñebe diidxaʼ ni riene binni ne guniʼbe ximodo zanda gúnicaʼ ni cusiidibe que lu xquendanabánicaʼ. Pur ca ejemplu biquiiñebe ne pur modo gunabadiidxabe la? nabé guyuulaʼdxiʼ ca binni que gucaadiágacaʼ laabe (Mat. 6:26). Laaca nabé bizaaláʼdxibe binni (Mat. 14:14). Ne bisiidibe casi tobi ni runi mandar ne casi tuuxa ni nanna xi cusiidiʼ, purtiʼ nánnabe Jiobá ngue cayacané laabe, ne laa nga bidii laabe dxiiñaʼ ni cayúnibe que (Luc. 4:18).
3. Ximodo racané Jiobá laanu para ganda gucheechenu diidxaʼ.
3 Racané Jiobá laanu. Jiobá nga Dios ni jma nanna gusiidiʼ. Ne riquiiñebe Stiidxabe ne xquídxibe para gusiidibe laanu ximodo gucheechenu ca diidxaʼ nacubi ne galán ca jma jneza (Isa. 54:13). Gudixhe Jiobá guicá lu Biblia ximodo bicheeche Jesús diidxaʼ, para guidúʼndanu cani ti ganda gúninu casi bíʼnibe. Laaca rudiibe espíritu santu laanu ne rusiidibe laanu lu ca guendaridagulisaa ca (Juan 14:26). Ne ora gucheechenu diidxaʼ ne ca xpinni Cristu ni maʼ xadxí de cayuni dxiiñaʼ ca la? rizíʼdinu gúninu ni jma jneza.
4. Xi razón nápanu para guininu zanda gucheechenu ca diidxaʼ nacubi ne galán ca ra nuu xcaadxi binni.
4 Nga runi, gastiʼ nin ti razón para guininu qué zanda gucheechenu diidxaʼ, purtiʼ Dios nga cusiidiʼ laanu gúninu ni (2 Cor. 3:5). Pa gudiʼnu lugar gacané Jiobá laanu ne iquiiñenu guiráʼ ni cudiibe laanu la? zanda guiziidiʼ chaahuinu ne guireendú dxiiñaʼ ni cayúninu (2 Tim. 3:17).