Jiobá rusisaca cani rúninu
«Nanna jneza runi Dios, ne qué zusiaanda irá enda nachaʼhui ni huayuni tu [...] purti nadxii tu laa.» (HEBREOS 6:10.)
1. Ximodo bisihuinni Jiobá bisisaca ni biʼniʼ Rut.
JIOBÁ guizáʼ rusisaca guiráʼ stipa ni runi ca binni ni racalaʼdxiʼ guni ni nabe ne nabé riguube ndaayaʼ laacaʼ (Hebreos 11:6). Boaz, ti hombre ni biʼniʼ ni na Dios dxiqué, gúnnabe zacá nga Dios. Laabe gúdxibe Rut, ti gunaa de Moab ni gucané suegra purtiʼ biaana viuda ca diidxaʼ riʼ: «Jiobá uguu ndaayaʼ lii pur cani cayúniluʼ» (Rut 2:12). Ñee guluu Dios ndaayaʼ Rut la? Guluu ndaayabe laa, purtiʼ cá historia stiʼ Rut lu Biblia, ne cadi ngasi, sínuque laaca bichaganáʼ Boaz laabe ne de laabe zá David ne Jesucristu (Rut 4:13, 17; Mateo 1:5, 6, 16). Ndiʼ nga tobi de ca ejemplu ni zeeda lu Biblia ni rusihuinni pabiáʼ rusisaca Jiobá ca xpinni.
2, 3. 1) Xiñee galán nga gánnanu rusisaca Jiobá cani rúninu. 2) Xiñee qué raca nagana para Jiobá gusihuinni rusisaca cani runi ca xpinni. Bizeeteʼ ti ejemplu ora guicábiluʼ.
2 Jiobá runi ni jneza, nga runi rusisácabe ni runi tuuxa. Sicaríʼ na Hebreos 6:10: «Jneza runi Dios, ne qué zusiaanda irá enda nachaʼhui ni huayuni tu ca xpinni purti nadxii tu laa. Huayacané tu laaca ne cayacané ru tu laaca dede yanna». Raríʼ ridúʼyanu rusisaca Dios ca xpinni neca gulenecaʼ donda ne neca qué ridxíñacaʼ biaʼca laabe (Romanos 3:23, NM).
3 Cumu gulenenu donda la? zándaca guiníʼ íquenu huaxieʼpeʼ nga cani rúninu para guni adorarnu Jiobá ne pur nga qué riquiiñeʼ diʼ guicaanu ca ndaayaʼ stibe. Peru Jiobá riene chaahuiʼ laanu purtiʼ nanna xi nuu ndaaniʼ ladxidoʼno ne pabiáʼ zanda gúninu, nga runi guizáʼ rusisácabe cani rúninu para guni adorarnu laabe de guidubi xhiálmanu (Mateo 22:37). Zeeda gácani casi ti gunaa ne ti xiiñiʼ. Gunaa riʼ málasi biiyaʼ nexheʼ ti bigáʼ ni qué risácapeʼ lu mexaʼ stiʼ ne ñándaca pur ngue nusáʼbibe ni oraqueca. Peru ora biiyabe nápani ti guiʼchiʼ huiiniʼ ra cá cusigaʼdeʼ dxaapahuiiniʼ xiiñibe ni laabe la? óraque maʼ bisácani para laabe, purtiʼ xiiñibe riʼ guziʼni ne guiráʼ bueltu ni bitopalú. Ngue runi jñaa dxaapahuiiniʼ riʼ maʼ qué nulabi diʼ pa baratu ni, sínuque zándaca dede bidá nisa lú ne gudiidxi laabe para gusihuinni dxandíʼ cayuulaʼdxiʼ ni bisigáʼdebe laa.
4, 5. Ximodo bisihuinni Jesús laaca rusisaca cani rúninu cásica Jiobá.
4 Cumu nanna Jiobá xi nuu ndaaniʼ ladxidoʼno ne dede pabiaʼtiʼ zanda gúninu lu xhiiñaʼ la? nabé rusisácabe cani rúninu neca huaxiéʼ cani. Jesús laaca guca cásipeʼ Bixhoze. Guietenaláʼdxinu historia stiʼ viuda ni bidii bueltu que: «Biiya [Jesús] ra cusaba ca ricu vueltu ndaani caja ra riaba ni usigaʼde cabe Dios. Ne biiya be bisaba ti viuda pobre chupa de gaayu huiiniʼ. Para na be: Gabe caʼ laatu, jma stale bisaba viuda riʼ que ca xcaadxi ca. Purti ca xcaadxi ca bidii ca Dios ni ma biaana si sticaʼ, ne laabe huaxiéʼ napa be peru bisaba be irá ni napa be para ibani né be» (Lucas 21:1-4).
5 Jesús nanna dxichi ximodo nabani gunaa que, nánnabe viuda ne pobre laa, ngue runi guizáʼ bisisácabe ni bidii, ne laaca zacaca nga Jiobá (Juan 14:9). Nga runi gastiʼ zanda gucueeza laanu para gusiéchenu Jiobá ne Jesús ora gúninu ni nácabe de guidubi ladxidoʼno. Ñee cadi dxandíʼ riéchenu ora gánnanu nga la?
Jiobá guluu ndaayaʼ ti hombre de Etiopía pur ni biʼniʼ
6, 7. Ximodo bisihuinni Jiobá bisisaca ni biʼniʼ Ébed-mélec, ne xiñee biʼniʼ Jiobá ni.
6 Stale biaje rieeteʼ lu Stiidxa Dios rusisaca Jiobá guiráʼ ca binni ni runi ni nabe. Zacá bihuínnini lu ni bizaaca Ébed-mélec, ti etíope. Hombre riʼ bibani ca dxi bibani Jeremías ne gúcabe mozo ra lidxi Sedequías, ti rey de guidxi Judá ni qué nuzuubaʼ stiidxaʼ Dios. Ti dxi gunna Ébed-mélec cugaaniʼ ca príncipe de Judá donda luguiáʼ Jeremías ni riguixhená que, purtiʼ nácabe cuchíbibe ca binni de guidxi que. Ngue runi guluucabe laabe ndaaniʼ ti bizé para gátibe raqué (Jeremías 38:1-7). Cumu nanna Ébed-mélec nanaláʼdxicabe Jeremías pur ni guníʼ que la? guyebe ra nuu rey que neca nánnabe zándaca guuticabe laabe, ne gúdxibe laa: «Señor, rey stinneʼ, cadi jneza diʼ guiráʼ ni biʼniʼ ca hombre ca Jeremías ni riguixhená, hombre ni bilaacabe ndaaniʼ bizé ca, zátibe ra nuube ca purtiʼ gastiʼ cadi cayobe». De raqué gucuaa Ébed-mélec treinta hombre para yendeecaʼ ni riguixhená stiʼ Dios que ndaaniʼ bizé que, purtiʼ zaqué gudxi rey que laabe gúnibe (Jeremías 38:8-13).
7 Jiobá na pur fe ngue biʼniʼ Ébed-mélec zaqué, ne fe ca nga gucané laabe para cadi nidxíbibe intiica cosa. Para gusihuinni Jiobá cusisaca ni bíʼnibe que la? Jiobá gudxi Jeremías gabi laabe ca diidxaʼ riʼ: «Chiguneʼ ni guniéʼ luguiáʼ guidxi riʼ para gacanácabe cadi para chúʼcabe galán [...]. Ne dxandipeʼ zulayaʼ lii dxi ca [...], ne qué ziaʼbuʼ lu naʼ ca hombre ni cadxíbiluʼ ca. Purtiʼ dxandipeʼ zulayaʼ lii [...]; ne dxandíʼ ziaananeluʼ guendanabani si stiluʼ, purtiʼ biʼniʼ creluʼ naa» (Jeremías 39:16-18). Ne zaquepeʼ nga biʼniʼ Jiobá, bilá laabe ne bilá Jeremías de lu naʼ ca príncipe malu stiʼ Judá que, ne laaca bilá laacabe de lu naʼ ca babilonio dxi binitilucaʼ Jerusalén. Sicaríʼ na Salmo 97:10 de Jiobá: «Laabe cayápabe xhialma cani qué rusaana laabe; de lu naʼ ca binni qué iquiiñeʼ rulabe laacaʼ».
Bixhózetu «ruuya ni runi binni ra nagaʼchiʼ, ne zaguixe laatu»
8, 9. Casi rihuinni lu ejemplu stiʼ Jesús, xi oración nga riuulaʼdxiʼ Jiobá gucaadiaga.
8 Sti cosa ni rusihuinni rusisaca Jiobá cani rúninu para guni adorarnu laa nga pur ni ruzeeteʼ Biblia de oración. Sicaríʼ guníʼ ti hombre nuu xpiaaniʼ: «Oración stiʼ cani runi ni jneza nga ni guizáʼ riuulaʼdxiʼ [Dios]» (Proverbios 15:8). Ca dxi guyuu Jesús raríʼ la? stale de ca hombre ni bisiidiʼ ndaaniʼ ca religión que biʼniʼ orarcaʼ nezalú stale binni purtiʼ guyuuláʼdxicaʼ guiníʼ binni nabé runi orarcaʼ Dios, cadi purtiʼ de ladxidoʼcaʼ rápacaʼ gana guiníʼnecaʼ laabe. Ngue runi guníʼ Jesús: «Zaa usisaca binni laacabe peru ngue si nga laani». De raqué gudxi Jesús ca xpinni: «Peru laatu, ora chi iníʼ né tu Dios la? lachuu ndaani lidxi tu, lauseegu ra puerta ne lainíʼ né Bixhoze tu ni qué rihuinni, ti laa ruuya ni runi binni ra nagaʼchiʼ, ne zaguixe laatu» (Mateo 6:5, 6).
9 Rihuínnica qué niníʼ diʼ Jesús cadi jneza guni orarnu nezalú stale binni, purtiʼ dede laabe biʼniʼ orarbe chupa chonna tiru zacá (Lucas 9:16). Ni guniʼbe nga riuulaʼdxiʼ Jiobá gucaadiaga ca oración ni riree de ladxidoʼno, ne cadi purtiʼ racaláʼdxinu guʼyaʼ binni laanu. Ne ora runi orarnu ti lugar ra nuunu laasinu la? rusihuínninu guizáʼ nadxiinu Dios ne runi crenu zacanebe laanu. Nga runi riénenu xiñee biyubi Jesús ti lugar ra zanda chuʼ stubi para guni orar. Ti dxi «nuxcanda ru biasa be» para guni orarbe; sti dxi «udxiʼba be lú ti dani yeníʼ né be Dios», ne ante cuibe tuu nga cani chigaca ca apóstol stibe que la? guidubi ti gueelaʼ qué ñásibe para biʼniʼ orarbe Dios stubi lúchabe (Marcos 1:35; Mateo 14:23; Lucas 6:12, 13).
10. Xi naquiiñeʼ ganna dxíchinu zaca pa guni orarnu Jiobá de guidubi ladxidoʼno.
10 Guníʼ ique si ximodo bicaadiaga Jiobá ca oración ni biree ndaaniʼ ladxidóʼ Xiiñiʼ. Guyuu ora gunabaʼ Jesús gacané Dios laa «dede biina ne bicaa ridxi. Bicaa diaga Dios laabe purti qué nudxiiba be laca laabe sínuque biʼni be irá ni na» (Hebreos 5:7; Lucas 22:41-44). Zacaca naquiiñeʼ gúninu. Pa guni orarnu Bixhózenu ni nuu guibáʼ de guidubi ladxidoʼno la? naquiiñeʼ ganna dxíchinu dxandíʼ zucaadiágabe laanu ne zusisácabe laanu, purtiʼ «Jiobá nuu gaxha de guiráʼ cani rinabaʼ ruaa laabe, [...] ne rúnicaʼ ni nabe» (Salmo 145:18).
11. Ñee risaca para Jiobá gúninu ni na ora nuunu stúbinu la?
11 Pa riuulaʼdxiʼ Jiobá guni orarnu laa ora nuunu stúbinu, ñee cadi jma ziuuláʼdxibe guzúʼbanu stiidxabe ora guirutiʼ cayuuyaʼ laanu la? Laabe nánnabe xi rúninu ora maʼ nuunu laasinu (1 Pedro 3:12). Pa laanu guzúʼbanu stiidxaʼ Jiobá ora guirutiʼ cayuuyaʼ laanu la? zusihuínninu rúninu ni nabe de guidubi ladxidoʼno, zusihuínninu puru si ni galán nga nuu ndaaniʼ ladxidoʼno ne zucaani laanu gúninu ni jneza (1 Crónicas 28:9). ¡Guizáʼ zusiéchenu ladxidóʼ Jiobá pa gúninu zacá! (Proverbios 27:11; 1 Juan 3:22.)
12, 13. Xi zanda gúninu para cadi gaca biidiʼ xquendabiaaninu ne ladxidoʼno ti gácanu casi Natanael ni biʼniʼ na Dios que.
12 Nga runi, ca xpinni Cristu ni ruzuubaʼ diidxaʼ la? rucaanacaʼ intiica cosa ni guni biidiʼ xquendabiaanicaʼ ne ladxidoʼcaʼ ora maʼ nuucaʼ stúbicaʼ, casi gúʼyacaʼ película ra riree hombre ne gunaa xie ladi ni cayúnicaʼ xiixa cosa malu o ra nabé cadíndecaʼ. Nécapeʼ zanda gucáʼchinu xiixa cosa malu ni gúninu nezalú binni la? Jiobá «ruuya dxichi be irá xixé ni nuu, ne laabe cuidxi be cuenta laanu» (Hebreos 4:13; Lucas 8:17). Pa gucáʼnanu intiica cosa ni qué riuulaʼdxiʼ Jiobá la? ziuu xquendabiaaninu nayá ne guizáʼ nayecheʼ ziuʼnu purtiʼ galán nuunu nezalube. Nga runi nanna dxíchinu rusisaca Jiobá ca binni ni cadi cuchee, cani cayuni ni jneza ne cani riníʼ puru si ni dxandíʼ (Salmo 15:1, 2).
13 Yanna, xi zanda gúninu ti cadi guni biidiʼ guiráʼ ca cosa malu ni nuu lu guidxilayú riʼ xquendabiaaninu ne ladxidoʼno yaʼ (Proverbios 4:23; Efesios 2:2.) Nápanu xidé iquiiñenu guiráʼ ni cudii Jiobá laanu para iguidxi fe stinu, laaca naquiiñeʼ gúninu stipa guiráʼ ora para gucáʼnanu intiica cosa malu ne gúninu ni galán. Peru para nga la? naquiiñeʼ guyúbinu modo gucáʼnanu ca cosa malu ca nagueendaca ti cadi guicaa xcúcani ndaaniʼ ladxidoʼno ne gucaacani laanu gucheʼnu (Santiago 1:14, 15). Guníʼ ique si pabiáʼ nayecheʼ ñuʼnuʼ pa niníʼ Jesús de laanu cásica guniʼbe de Natanael: «Laguuya ndi nga tobi ni [...] qué rusiguii» (Juan 1:47). Natanael riʼ laaca binibiáʼcabe laabe casi Bartolomé, laabe gúcabe tobi de ca doce apóstol stiʼ Jesús (Marcos 3:16-19).
Ti ni ruzaaquiʼ guʼxhuʼ ni rilaselaʼdxiʼ ne qué ruchee
14. Ximodo biiyaʼ Jesús ni biʼniʼ María que neca xcaadxi qué ñuulaʼdxiʼ ni.
14 Cumu casi Dios nga Jesús la? rúnibe cásipeʼ modo runi ne rusisácabe ca binni ni runi ni na Bixhózebe de guidubi ladxidoʼcaʼ (Colosenses 1:15). Guidúʼyanu ti ejemplu ra rihuinni ni bizéʼtenu ca. Ti biaje guca invitar Jesús ne ca discípulo stiʼ para checaʼ ra lidxi Simón ndaaniʼ guidxi Betania, dxi cayaadxaʼ gaayuʼ gubidxa para gátibe. Huaxhinni que biasa María, benda Marta ne bizaʼnaʼ Lázaro, gucuaa «ti libra aceite rindáʼ naxhi ni nabé risaca» (biaʼ riáxacabe lu ti iza dxiiñaʼ) ne guxúbini ñeebe ne íquebe (Juan 12:3). Ora biʼniʼ María ngue la? caadxi de cani nuu raqué na «xiñee gudxite si be aceite que». Peru Jesús gadxé modo biiyaʼ ni biʼniʼ gunaa que: para laabe guizáʼ nachaʼhuiʼ ngue guca gunaa que ne risácapeni purtiʼ maʼ cadxiña dxi gátibe ne igaachibe. Lugar de niniʼbe cadi jneza ni biʼniʼ María que la? bisisácabe laa purtiʼ nabe: «Ratiica güi cabe stiidxa Dios ndaani idubi naca guidxilayú riʼ, zuzeete cabe ni biʼni be, ti cadi guiaanda be» (Mateo 26:6-13).
15, 16. Xiñee galanpeʼ nga para laanu beeda Jesús casi binni raríʼ para guni ni na Dios.
15 ¡Guizáʼ sicarú nga naca Jesús Xaíque stinu ni rusisaca ca discípulo stiʼ! Cumu bibánibe ndaaniʼ Guidxilayú riʼ casi binni la? biziidibe modo gúnibe dxiiñaʼ ni bidii Jiobá laabe. Dxiiñaʼ ni gucuaabe nga gácabe Xaíque stiʼ cani ruzaaquiʼ guʼxhuʼ ne Rey para ca binni bibí ni cheʼ guibáʼ ne para guiráʼ xixé binni (Colosenses 1:13; Hebreos 7:26; Apocalipsis 11:15).
16 Ne dede ante gueedabe lu Guidxilayú riʼ maca bisihuínnibe rizaaláʼdxibe binni ne nadxiibe laacaʼ (Proverbios 8:31). Peru ora bibánibe casi binni la? jmaruʼ si biénebe xi guiráʼ nga ridídinu pur cayúninu ni na Dios. Sicaríʼ guníʼ apóstol Pablu de laabe: «Gupa be xidé guca be casi pe ca biʼchi be, purti zacá si zanda guiá be laanu, ne uzuhuaa be lu Dios pur laanu casi runi ti sacerdote gola ni runi xhiiña jneza. Ne [...] biʼni binidxaba pur nuchee be, ne naná guca ni para laabe. Nga runi zanda acané be cani cuquiinde binidxaba laa». Jesús «zanda guiá [...] laanu», purtiʼ «udiʼdi irá ni rididi nu. Xi si la? qué nuchee be» (Hebreos 2:17, 18; 4:15, 16).
17, 18. 1) Ximodo cusihuinni ca carta ni gucuaa gadxe neza binni ridagulisaa ni guyuu Asia Menor que pabiáʼ riá Jesús laanu. 2) Ca xpinni Cristu ni bibí para cheʼ guibáʼ que, xi para cayuucabe listu.
17 Nánnanu nabé riene Jesús xi guiráʼ guendanagana ridídinu, peru, biásasibe lade gueʼtuʼ la? jmaruʼ si bihuinni riénebe laanu. Guníʼ ique si xiná ca carta ni gúdxibe apóstol Juan gucaa ra nuu gadxe neza binni ridagulisaa ni guyuu Asia Menor que. Neza binni ridagulisaa ni guyuu Esmirna que gúdxibe laacaʼ: «Nanna xi irá [guenda]nagana ni huadiʼdi tu». Ne cumu biziidibe guiabe binni pur ca guendananá ni gudíʼdibe dede ra gútibe la? gúdxibe laacaʼ gúnicaʼ sicaríʼ: «Peru qué chi ixele tu dede dxi gati tu, ne zudiee laatu enda nabani casi ti premiu» (Apocalipsis 2:8-10).
18 Ca carta ni gucuaa gadxe neza binni ridagulisaa que cusihuínnicani riene chaahuiʼ Jesús xi guiráʼ guendanagana nga ridiʼdiʼ ca discípulo stiʼ ne rusisácabe laacaʼ purtiʼ qué rusaanacaʼ Dios (Apocalipsis 2:1–3:22). Cadi guiaandaʼ laanu gucuá ca carta que para ca xpinni Cristu ni chiguni mandárnecaʼ laabe guibáʼ. Cásica Jesús, Señor stícabe la? laaca cayuucabe listu ti ganda gúnicabe dxiiñaʼ ni chiguicaacabe: gacanécabe Jesús para guixá donda stiʼ guiráʼ binni pur guendaguti stiʼ, ne ora gúnicabe nga la? jma zuluíʼcabe pabiáʼ riácabe binni ni cayacaná (Apocalipsis 5:9, 10; 22:1-5).
19, 20. Ximodo rusihuinni «jma binni» ca rusisácacaʼ Jiobá ne Xiiñiʼ.
19 Jesús nadxii ca xpinni ni bibí ca, peru laaca nadxiibe ca binni ni zeeda gaca «xcaadxi dendxu» ni ruzuubaʼ stiidxabe, ne millón de laacaʼ nga «jma binni» ni «za ca de irá ladu ne de irá guidxi» ni qué záticaʼ ora gueeda ca dxi «jma nagana» ca (Juan 10:16; Apocalipsis 7:9, 14). Laacabe nuucabe pur Jesús purtiʼ rusisácacabe guendaguti stiʼ ni zulá laacabe ne cabézacabe guibánicabe sin qué chuʼ dxi gáticabe. Peru ximodo rusihuínnicabe rusisácacabe nga yaʼ. Rihuínnini ra «cusisaca cabe [Dios] ridxí ne huaxhinni» (Apocalipsis 7:15-17).
20 Ra zeeda pabiáʼ dxiiñaʼ guca lu guidubi naca Guidxilayú lu iza 2006 (biiyaʼ ca yaza 27-30 lu La Atalaya 1 stiʼ febrero 2007, diidxastiá) cusihuinni dxandíʼ «cusisaca cabe [Dios] ridxí ne huaxhinni». Guiráʼ ca binni riʼ ne sti grupu huiiniʼ de ca xpinni Cristu ni bibí ni nuurucaʼ lu Guidxilayú riʼ bíʼnicaʼ 1,333,966,199 hora ra bicheechecaʼ diidxaʼ: ¡biaʼ si rudii ca hora ca jma de ti gayuaa cincuenta mil iza!
Cadi gusaananu de gusisácanu Jiobá ne Jesús
21, 22. 1) Xiñee yanna nga jma naquiiñeʼ guni ca xpinni Cristu stipa para gusihuínnicaʼ cudiicaʼ xquíxepeʼ Jiobá. 2) Xi chiguidúʼndanu lu sti tema ca.
21 Pur guiráʼ ni runi Jiobá ne Jesús para laanu neca gulenenu donda la? rusihuínnicabe guizáʼ rusisácacabe laanu. Peru stale binni qué riníʼ íquepeʼ de Dios, sínuque nisi maʼ cá íquecaʼ ni racaláʼdxisicaʼ. Sicaríʼ guníʼ Pablu ora bicaa ximodo zaca ca binni ni guibani lu ca últimu dxi riʼ: «Zuyubi binni para laa si, zannaxhii bidxichi, [...] ne qué zudiicaʼ xquíxepeʼ binni» (2 Timoteo 3:1-5, La Palabra de Dios para Todos). ¡Guizáʼ maʼ gadxé ca xpinni Cristu! Purtiʼ laacabe dxandíʼ rusisácacabe guiráʼ ni maʼ biʼniʼ Dios para laacabe, ne rusihuínnicabe ni lu ca oración ni rúnicabe de ladxidóʼcabe, ora ruzuubacabe stiidxabe ne ora rúnicabe ni nabe ne stale gana (Salmo 62:8; Marcos 12:30; 1 Juan 5:3).
22 Lu sti tema ca ziuundaʼ gunáʼ nga caadxi de cani huadii Jiobá laanu para iguidxi fe stinu. Naquiiñeʼ guiníʼ íquenu cani huadiibe laanu ti gusisácanu cani jma (Santiago 1:17).
Xi nicábiluʼ
• Ximodo huasihuinni Jiobá naca ti Dios ni rusisaca ni runi ca xpinni.
• Ximodo zanda gusiéchenu ladxidóʼ Jiobá pur cani gúninu ora maʼ nuunu stúbinu.
• Ximodo bisihuinni Jesús rusisaca cani rúninu.
• Ra bibani Jesús lu Guidxilayú riʼ, ximodo biziidibe gácabe ti rey ni riá binni ne rusisaca ni runi ca xpinni.
[Dibuju/foto ni zeeda lu yaza 17]
Cásica ti gunaa rusisaca ni gudii xiiñiʼ laa neca cadi caru ni la? Jiobá laaca rusisaca ni gudiʼnu laa de guidubi ladxidoʼno