Ndaa ra rinabadiidxaʼ
◼ Xi zanda guni binni ora chigucheeche ca xiiñihuiiniʼ diidxaʼ
Galán runi ca xpinni Cristu ora rucheechenecaʼ xiiñicaʼ diidxaʼ ne gusiidicaʼ laacabe ximodo guiníʼnecabe binni de ca diidxaʼ nacubi ne galán stiʼ Reinu stiʼ Dios. Peru ora maʼ canagucheechenécabe cani nahuiiniʼ ca diidxaʼ la? naquiiñeʼ gápacabe laacaʼ, purtiʼ nuu stale cosa ni zándaca guniná laacaʼ neza ra rucheechecabe diidxaʼ, dede né ca lugar ra ruluíʼ gastiʼ zazaacacabe. Lu ca dxi «jma nagana» riʼ jma nga rihuinni ca binni ni ruyubi gapa ni racalaʼdxiʼ ne cani ricá ique guni puru si cosa dxabaʼ, nga runi runinácabe cani nahuiiniʼ ne rilaxoocabe laacaʼ (2 Tim. 3:1-5). Ca xpinni Cristu naquiiñeʼ gúʼyacaʼ ximodo gápacaʼ ca xiiñihuiinicaʼ de ca binni ni zanda guniná laacabe. Xi zanda guni cani napa xiiñiʼ yaʼ.
Biblia na naquiiñeʼ gapa binni stale cuidadu ne guiníʼ ique dede ante xi zanda guni pa gueeda guizaaca xiixa (Pro. 22:3; Mat. 10:16). Raríʼ cadi cayaʼtaʼ diʼ xipeʼ naquiiñeʼ guni cani napa xiiñiʼ. Peru galán pa chigucheechenécabe ca xiiñicabe diidxaʼ o chiné sti binni huaniisi laacaʼ. Yanna, pa chupa ni nahuiiniʼ chigucheecheʼ diidxaʼ juntu la? galán guʼyaʼ bixhózecaʼ o jñaacaʼ laacaʼ o guʼyaʼ sti binni huaniisi laacaʼ. Ne ora maʼ ziniisi cani nahuiiniʼ ca ne gusihuínnicaʼ maʼ zanda gápacaʼ laacaʼ la? maʼ bixhózecaʼ ne jñaacaʼ guʼyaʼ pa maʼ zanda checaʼ stúbicaʼ (laaca zanda gúʼyaluʼ lu Nuestro Ministerio del Reino stiʼ octubre 1992 ra na: La caja de preguntas).
Laaca galán gapa binni ca xiiñihuiiniʼ ora maʼ zecaʼ ndaaniʼ carru ne ora maʼ zizacaʼ. Naquiiñeʼ gánnacabe xi zanda gúnicabe para cadi gueeda guizaacacabe xiixa desgracia, ne cadi chuʼ yuubaʼ ladxidóʼcabe pur ni guizaacacabe, ne para cadi quíxecabe doctor ne cadi gucheenécabe xiixa ley stiʼ ca gobiernu ni nuu lu guidxilayú riʼ, purtiʼ zeʼ dxi jma ruyúbicaʼ tíndecaʼ.
Jneza nga gusisaca cani nahuiiniʼ ca lá Jiobá (Sal. 148:12, 13). Nabé ridxagayaa binni laacabe ne rusisácacaʼ Jiobá ora ruuyacaʼ pabiáʼ sicarú riníʼcabe ora maʼ zigucheecabe diidxaʼ ne nabé nápacabe respetu binni. Nga runi, galán gacané binni xiiñiʼ ti cadi guiaanadxicaʼ de gucheechecaʼ diidxaʼ, ne cadi gusaanacaʼ de gápacaʼ laacabe de ca cosa ni zanda guniná laacabe.