Ximodo gusiéchenu Dios

XIMODO zanda gusiéchenu Dios yaʼ. Ñee zanda gudiʼnu laabe xiixa la?... Jiobá guníʼ: Stinneʼ nga guiráʼ xixé maniʼ duxhuʼ ni nuu ndaaniʼ guiʼxhiʼ, ne stinneʼ plata ca, oro ca laaca stinneʼ (Salmo 24:1; 50:10; Ageo 2:8). Peru nuu xiixa ni zanda gudiʼnu laabe. Xi laani yaʼ....

Jiobá rudii lugar laasinu guiníʼ íquenu pa zúninu ni nabe o coʼ. Qué rucaadibe laanu gúninu ni nabe. Guidúʼyanu pa ganda guiénenu xiñee bizáʼ Dios laanu para guiníʼ íquenu pa zúninu ni nabe o coʼ.

Zándaca nannuʼ xii nga ti robot. Nga nga ti máquina ni guyáʼ párapeʼ guni guiráʼ ni na binni ni bizáʼ ni. Ti robot qué riníʼ ique diʼ laa si. Ñándaca ñuni Jiobá laanu casi robot para ñúninu ni ñacaláʼdxisibe. Peru qué nuzáʼdibe laanu zacá. Nannuʼ xiñee la?... Nuu tuudxi juguete ni zeeda gaca casi robot. Ora quieluʼ ti botón stiʼ ni la? rúnini cásipeʼ racalaʼdxiʼ binni ni bizáʼ ni. Ñee huayuuyaluʼ xiixa juguete zacá la?... Binni riree gana cani, purtiʼ ni maca nexheʼ si nga runi cani. Dios qué racalaʼdxiʼ diʼ guzúʼbanu stiidxaʼ casi ti robot ni maca nexheʼ si ni guni, sínuque racaláʼdxibe gúninu ni nabe purtiʼ nadxiinu laabe ne purtiʼ racaláʼdxinu guzúʼbanu stiidxabe.

Ximodo raʼbuʼ riuu Bixhózenu ni nuu guibáʼ ora ruzúʼbanu stiidxabe purtiʼ riuláʼdxinu yaʼ.... Gudxi naa: ñee rusiécheluʼ bixhózeluʼ ne jñaaluʼ pur cani rúniluʼ la?... Biblia na ora nuu xpiaaniʼ xiiñiʼ binni la? rusiecheʼ bixhoze, peru ora nahuati la? runiná ladxidóʼ jñaa (Proverbios 10:1). Ñee huayuuyaluʼ pabiáʼ nayecheʼ riuu bixhózeluʼ ne jñaaluʼ ora rúniluʼ ni gábicabe lii la?... Peru, ximodo riuucabe ora qué ruzuubaluʼ stiidxacabe yaʼ....

Yanna guiníʼ íquenu de Jiobá, Bixhózenu ni nuu guibáʼ. Laabe cayábibe laanu ximodo gusiéchenu laabe. Ndaaniʼ Proverbios 27:11 Dios cayabi laanu: «Guluu xpiaanuʼ xiiñehuiineʼ ne bisiecheʼ ladxeduáʼ, ti ganda guicabeʼ ni cucaalú ne cuxidxi naa». Ñee nannuʼ ximodo nga gucaalúcabe ne guxídxicabe de ti binni la?... Nga nga ora tuuxa ugaanda lii ne guiníʼ qué zúnidiluʼ xiixa ni guniʼluʼ. Zacapeʼ nga runi Binidxabaʼ Jiobá. Nannuʼ ximodo la?... Guidúʼyanu ximodo.

Bietenalaʼdxiʼ ni bizíʼdinu lu capítulo 8 stiʼ libru riʼ, Binidxabaʼ racalaʼdxiʼ guisaca jma, ne guiráʼ binni guni ni nabe. Laabe nabe runi adorarnu Jiobá purtiʼ si zacá zacaanu guendanabani ni qué zaluxe. Despué de bicaabe Adán ne Eva gucheenecaʼ Jiobá la? Binidxabaʼ bicaalube Dios ora gúdxibe laa: Binni runi ni naluʼ pur guicaa xiixa, peru pa gudiiluʼ lugar naa la? zanda guxhaleʼ tutiica binni de lii.

Dxandíʼ, neca ndaaniʼ Biblia cadi zacapeʼ cá ca diidxaʼ ca, peru ora gúʼndanu historia stiʼ Job zuyadxíchinu laaca zacagá nga ni gudxi Binidxabaʼ Dios. Cásica Jiobá ne zaqueca Binidxabaʼ nabé bisaca para laacabe gúʼyacabe pa guchee Job o pa coʼ. Ndaaniʼ libru stiʼ Job, capítulo 1 ne 2, chigúʼyanu xi guca.

Lu capítulo 1 stiʼ Job caníʼ ora guyé ca ángel que ra nuu Jiobá la? Binidxabaʼ laaca guyuu ládecabe. Ngue runi Jiobá gunabadiidxaʼ laabe: «Padé zeedaluʼ». Binidxabaʼ gudxi laabe beeda gudii ti bieque lu Guidxilayú riʼ. Óraque gunabadiidxaʼ Jiobá laabe sti biaje: Ñee maʼ biiyaluʼ Job, ti hombre ni runi ni rabeʼ ne qué runi ni malu la? (Job 1:6-8).

Binidxabaʼ qué ñulaʼdxiʼ diʼ ñaca Job zaqué. Ngue runi guniʼbe: Job runi adorar lii purtiʼ guiráʼ ni rúnibe riree ni laabe jneza. Peru pa gusaanuʼ de gapuʼ laabe la? zaguube dí lii nezaluluʼ. Jiobá bicabi laabe: Biasi naluʼ, zanda guʼnuʼ laabe guiráʼ ni gacalaʼdxuʼ, peru cadi guninádiluʼ laabe (Job 1:9-12).

Xi biʼniʼ Binidxabaʼ yaʼ.... Biquiindebe tuudxi hombre cuánacaʼ guiráʼ yuze ne burru stiʼ Job ne guuticabe cani cayapa laacame. Despué biaba ti rayu ni binduuxeʼ ca dendxuʼ stibe ne ca hombre que. Ne laaca guláʼnacabe ca camellu stibe ne biiticabe cani cayapa laacame. Últimu la? Binidxabaʼ bisaba ti bi guizáʼ nadipaʼ dede bisaba ni yoo ra nuu chii xiiñiʼ Job, ne guirácabe gúticabe. Peru, neca guca Job guiráʼ ngue, bíʼnirube ni na Jiobá (Job 1:13-22).

Ora bibiguetaʼ Jiobá guniʼné Binidxabaʼ la? gúdxibe laa cayúniruʼ Job ni nabe. Binidxabaʼ bicaarube Jiobá guiníʼ ique, ngue runi gúdxibe laa: Bidii lugar gunenaʼyaʼ laapebe, ne óraque guʼyuʼ ximodo uguube dí lii nezaluluʼ. Para bidii Jiobá lugar guniná Binidxabaʼ Job, peru gúdxibe laa cadi guuti diʼ laabe.

Binidxabaʼ gulee tuudxi guiʼdxuʼ guidubi naca ladi Job. Guizáʼ rindáʼ dxabaʼ cani ne guirutiʼ tu riná guidxiña laabe. Dede xheelabe gudxi laabe: «¡Guluu dí Dios ne guti!». Tuudxi hombre, ni nacaʼ xhamígucaʼ Job, yegánnacabe laabe ne jmaruʼ si feu modo bisaanacabe laabe, ne nácabe cadíʼdibe lu stale guendanagana purtiʼ bíʼnibe stale cosa ni qué iquiiñeʼ. Nécapeʼ guluu Binidxabaʼ laabe lu guendanagana ne bininá laabe, bíʼnirube ni na Jiobá ne qué nucheebe (Job 2:1-13; 7:5; 19:13-20).

Ximodo raʼbuʼ guyuu Jiobá ora biʼyaʼ qué nucheené Job laa yaʼ.... Guizáʼ biéchebe, gunda gúdxibe Binidxabaʼ: ¡Biiyaʼ Job! Rúnibe ni rabeʼ purtiʼ zacá racaláʼdxibe. Ñee zácaluʼ casi Job, tobi hombre ni biquiiñeʼ Jiobá para bisihuínnibe rusiguii Binidxabaʼ la?... Guizáʼ risaca nga ne ni gúninu guicabi Jiobá Binidxabaʼ, purtiʼ laa na zanda guxhaleʼ tutiica binni de guni ni na Jiobá. Para Jesús la? bisaca ni stálepeʼ.

Maestru Ni Jma Nanna Gusiidiʼ que, qué ñuu dxi nudiibe lugar nucaa Binidxabaʼ laabe nucheebe. ¡Guníʼ ique si pabiáʼ bisiecheʼ nga Bixhózebe! Jiobá gunda biquiiñeʼ Jesús para bicábibe Binidxabaʼ: ¡Biiyaʼ Xiiñeʼ! Qué liica nucheenédibe naa purtiʼ nadxiibe naa. Laaca guníʼ ique pabiáʼ biecheʼ Jesús ora bisiéchebe Bixhózebe. Pur guendanayecheʼ ca la? dede gunda biʼniʼ huantarbe gútibe lu ti yaga (Hebreos 12:2).

Racaláʼdxiluʼ gácaluʼ casi Maestru Ni Jma Nanna Gusiidiʼ que ne gusiécheluʼ Jiobá la?... Zanda gúniluʼ ni pa cadi gusaanuʼ de guiziidiluʼ ni cabeza Jiobá gúniluʼ.