Jiobá zacané ca xpinni
«Ñee na tu qué zacané Dios ca xpinni ni cucaa ridxi laa ridxí ne huaxhiini la?» (LUCAS 18:7.)
1. Tuu nga ca binni ni riguu gana laanu, ne xiñee.
STALE testigu stiʼ Jiobá maʼ zinecaʼ stale iza de cayúnicaʼ ni nabe ne qué huasaanacaʼ laabe. Ñee runibiaʼluʼ tobi de ca bíʼchinu o bizáʼnanu ni nabé nadxiinu riʼ la? Zándaca caníʼ íqueluʼ tuuxa bizáʼnanu maʼ nagola ni maʼ xadxí de guyuunisa ne nuu si biaje riaadxaʼ tobi de ca guendaridagulisaa ni rápanu ndaaniʼ Yoo stiʼ Reinu. O tuuxa bíʼchinu ni maʼ nagola ni napa stale iza de cucheeche diidxaʼ ne ca binni ridagulisaa ne qué huasaana de guni dxiiñaʼ ca. Stale de laacabe guníʼ ique para ca dxi riʼ maʼ ñeeda Armagedón. Peru cadi purtiʼ nuuruʼ ca binni malu riʼ niníʼ íquecabe maʼ qué zuni Jiobá guiráʼ cani maʼ bizabiruaa, ne laacabe naguixhe iquerúcabe guni huantárcabe dede dxi guiluxe guiráʼ cosa malu riʼ (Mateo 24:13). Dxandíʼ, ora guʼyaʼ guiráʼ ca binni ridagulisaa pabiáʼ naguidxi fe stícabe la? riguuni gana laacaʼ (Salmo 147:11).
2. Xiñee riuʼnuʼ triste nuu tiru.
2 Peru nuu tiru ridúʼyanu nuu Testigu ni bicheeche diidxaʼ stale iza maʼ qué gapa fe ne maʼ qué ridagulisaané laanu. Riuʼnuʼ triste purtiʼ maʼ bisaanacabe Jiobá, nga runi racaláʼdxinu gacanenu guiráʼ ca dendxuʼ ni maʼ bireechú para guidagulisaanecaʼ laanu sti biaje (Salmo 119:176; Romanos 15:1). Peru, ora guidúʼyanu nuuruʼ tu cayuni ni na Jiobá ne xcaadxi maʼ qué gapa fe la? rucaa nga laanu guiníʼ íquenu sicaríʼ: Xiñee nuu stale Testigu dede yanna runi crecaʼ zuni Jiobá guiráʼ ni maʼ bizabiruaa ne xcaadxi maʼ qué runi cré pa zúnibe ni yaʼ. Xi naquiiñeʼ gúninu ti cadi gusaananu de guni crenu maʼ gaxha nuu dxi stiʼ Jiobá yaʼ (Sofonías 1:14). Guidúʼyanu ti ejemplu zeeda lu Evangeliu stiʼ Lucas.
Ti ejemplu ni caguixhená cani guibani dxi gueeda «Hombre Biseendaʼ Dios»
3. Tuu nga cani zanda gacané ejemplu stiʼ viuda ne juez que, ne xiñee.
3 Lu capítulo 18 stiʼ Lucas cá ti ejemplu ni guníʼ Jesús stiʼ ti viuda ne ti juez. Zeeda gácani casi ejemplu stiʼ hombre ni qué nidxaga dede ra bicuaani xhamigu que, ni bidúʼndanu lu tema gudiʼdiʼ ca (Lucas 11:5-13). Peru sti ejemplu ni chiguidúʼyanu riʼ la? guiniʼbe ni para ca binni ni nabani ca dxi gueeda «Hombre Biseendaʼ Dios», ne lu iza 1914 nga bizulú ca dxi ca (Lucas 18:8).a
4. Xi bizeeteʼ Jesús ante guiníʼ ejemplu ni cá lu capítulo 18 stiʼ Lucas.
4 Ante guiníʼ Jesús ejemplu riʼ la? guniʼbe: «Casi [rihuinni] xpiaani rayu de ti ladu para sti ladu» zacaca zahuinni guiráʼ ladu ora maʼ gueedabe casi Rey (Lucas 17:24; 21:10, 29-33). Peru stale binni ni guibani dxi guinitilú ca cosa malu ca qué zulábicaʼ guiráʼ ni gusihuinni maʼ beedabe casi Rey (Daniel 12:4). Xiñee yaʼ. Purtiʼ ca binni ca zeeda gácacaʼ casi ca binni ni qué nulábicaʼ guiráʼ ni gudxi Jiobá laacaʼ dxi bibani Noé ne Lot que. Biblia na: «Cayó cabe, cayéʼ cabe, cazí cabe, cutoo cabe, caguu cabe biní, ne cucuí cabe yoo» dede dxi «binitilú [Jiobá] irá cabe» (Lucas 17:26-29). Gúticabe purtiʼ jma bicaa íquecabe xhiiñacabe ne qué nicá íquecabe ñúnicabe ni na Dios (Mateo 24:39). Zacaca nga yanna, binni cá ique puru si xhiiñaʼ, nga runi qué ruuyacabe guiráʼ ni cusihuinni maʼ cadxiña dxi guinitilú guiráʼ cosa malu riʼ (Lucas 17:30).
5. 1) Tuu nga cani gudixhená Jesús, ne xiñee. 2) Xiñee maʼ qué gapa caadxi de ca xpinni Cristu fe.
5 Jesús guyuu xizaa pa cueechú binni guidxilayú ca xpinni, ngue runi gudixhenabe laacaʼ ti cadi guibiguetaʼ guicaacaʼ cani maʼ bisaanacaʼ (Lucas 17:22, 31). Peru nga nga ni huayuni caadxi xpinni Cristu. Stale iza gulézacabe guedandá dxi gunitilú Jiobá ca binni malu nuu lu guidxilayú riʼ. Peru cumu qué ñedandá Armagedón ca dxi guníʼ íquecabe ñeedani la? bireecabe gana ne maʼ qué ñuni crécabe pa maʼ gaxha nuu dxi para guni juzgar Jiobá binni. Nga runi bisaanacabe de gucheechecabe diidxaʼ ne chaahuiʼ chaahuiʼ jma gucuá íquecabe xhiiñacabe dede guca nagana para laacabe gúnicabe ni na Jiobá (Lucas 8:11, 13, 14). Nga runi qué nindaa diʼ bibiguétacabe lu cani maʼ bisaanacabe. ¡Guizáʼ triste nga ni bíʼnicabe ca!
Naquiiñeʼ guinínenu Dios sin guireʼnu gana
6-8. 1) Guníʼ ejemplu stiʼ viuda ne juez que. 2) Ximodo bisiene Jesús ejemplu ca.
6 Xi zanda gúninu ti cadi gusaananu de guni crenu zuni Jiobá cani maʼ bizabiruaa (Hebreos 3:14). Jesús bicabi ca diidxaʼ riʼ biluxe gudixhenásibe ca discípulo que para cadi guibiguétacaʼ lu ca cosa malu ni runi ca binni ni nuu lu naʼ Binidxabaʼ.
7 Lucas na «gudixhe Jesús ti ejemplu para usiidi laacabe iníʼ né cabe Dios sin iree cabe gana». Sicaríʼ guníʼ Jesús: «Uyuu ti juez ndaani ti guidxi, qué ridxibi Dios ne qué rizaalaʼdxi binni. Ne ndaani guidxi queca uyuu ti viuda, ne gatigá ma ze ra nuu be, zinaba acané be laa purti nuu tu cadinde né laa. Xadxí qué niná be nulabi be laa, peru bidxiña dxi na be: “Neca qué ridxibe Dios ne qué rizaaladxe binni, peru modo canaziñe gunaa ri naa la? chi acaniá laa, ti ma cadi gueeda uchiichi ru naa”».
8 Biluxe guníʼ si Jesús ejemplu ca la? bisiénebe ni sicaríʼ: «Laguuya si laatu xi na juez malu que. Ñee na tu qué zacané Dios ca xpinni ni cucaa ridxi laa ridxí ne huaxhiini la? Zandaa para icabi be laaca la? Naa cayabe laatu, qué zandaa diʼ, nagueenda zacané be laacaʼ. Peru nanna pa zadxela ru Hombre Biseenda Dios tu napa fe dxi ibigueta sti tiru yaʼ» (Lucas 18:1-8).
Gunabaʼ viuda que gacané juez que laa
9. Xidepeʼ nga cayeeteʼ lu ejemplu ra caníʼ de viuda que ne ti juez.
9 Ni jma risaca cayeeteʼ lu ejemplu riʼ nga naquiiñeʼ gaca ni jneza, purtiʼ bizeeteʼ Jesús ni, viuda que laaca bizeeteʼ ni ne juez que. Viuda que nabé gunabaʼ chigacané juez que laa. Ngue runi na juez que: «Chi acaniá laa[be]». Ne Jesús gunabadiidxaʼ: «Ñee na tu qué zacané Dios ca xpinni» la? Sicaríʼ na Jesús chiguni Jiobá ni: «Qué zandaa diʼ, nagueenda zacané be», zacá nga bisihuinni Jesús nagueendaca zuni Dios ni jneza (Lucas 18:3, 5, 7, 8). Peru padxí nga gacané Dios laacabe yaʼ.
10. 1) Lu primé siglu que, padxipeʼ nga gucané Dios ca xpinni. 2) Padxí nga gacané Dios ca xpinni ni nuu yanna riʼ, ne ximodo chigúnibe ni.
10 Lu primé siglu que bedandá dxi biquixe Dios ni biʼniʼ Jerusalén, o dxi bíʼnibe ni jneza, ne gúcani ora binitilú guidxi que ne yuʼduʼ stiʼ lu iza 70 (Lucas 21:22). Peru yanna riʼ la? zacané Dios ca xpinni ora gueedané «dxi jma risaca stiʼ» (Sofonías 1:14; Mateo 24:21). Dxi ca «zusaba ná [Jiobá] cani cayaani ná» ca xpínnibe, ne Jesús nga chiguiquiiñebe «para usaba ná cani qué nicaa stiidxaʼ, ne qué ñunibiá Dios» (2 Tesalonicenses 1:6-8; Romanos 12:19).
11. Ximodo naquiiñeʼ guiénenu ca diidxaʼ «nagueenda zacané» Jiobá ca xpinni.
11 Yanna, ximodo naquiiñeʼ guiénenu ni bizeeteʼ Jesús ora guníʼ «nagueenda zacané» Jiobá ca xpinni yaʼ. Neca na Biblia nanna Jiobá cueza la? laaca ruzeeteni nagueendaca runitilube guiráʼ cosa malu ora gúʼyabe maʼ naquiiñeʼ gácani (Lucas 18:7, 8; 2 Pedro 3:9, 10). Casi dxi bibani Noé que la? nagueendaca biaba Nisaguié naroʼbaʼ que para binitilú guiráʼ binni malu que. Zaqueca bizaaca dxi bibani Lot, biaba bele de guibáʼ ne binduuxeʼ guiráʼ binni qué iquiiñeʼ que. Ne Jesús guníʼ: «Zacaca nga zaca ni dxi guenda sti tiru» (Lucas 17:27-30). Ya, «mala inaaze» Jiobá guiráʼ ca binni malu (1 Tesalonicenses 5:2, 3). Nga runi, nanna dxíchinu zunitilube ca binni ni cayuni ni na Binidxabaʼ dxi maʼ gudíxhebe gaca ni jneza ne qué zudiibe lugar guibánirucaʼ nin sti dxi.
«Zacané be laacaʼ»
12, 13. 1) Xi rizíʼdinu de Jiobá lu ejemplu ra cayeeteʼ de viuda que. 2) Xiñee nánnanu zucaadiaga Jiobá ca oración stinu ne zúnibe ni jneza para gacanebe laanu.
12 Lu ejemplu ra cayeeteʼ de ti viuda ne ti juez que laaca zeeda xcaadxi cosa ni naquiiñeʼ gánnanu. Biluxe guníʼ si Jesús modo gucané juez que viuda que neca malu laa la? gunabadiidxaʼ: «Ñee na tu qué zacané Dios ca xpinni [la?]». Peru cadi na diʼ Jesús cásica biʼniʼ juez que viuda que zaqueca zuni Jiobá ca xpinni. Ni bisiidibe ca discípulo stibe nga, gadxepeʼ Jiobá de juez que. Ximodo rihuinni gadxé laacabe yaʼ.
13 Juez que malu laa, peru Jiobá la? runi ni jneza (Salmo 7:11; 33:5). Qué liica nizaalaʼdxiʼ juez que viuda que, peru Jiobá la? rizaalaʼdxiʼ cada tobi de laanu (2 Crónicas 6:29, 30). Ne qué ñuulaʼdxiʼ juez que ñacané viuda que, peru Jiobá dxandipeʼ riuulaʼdxiʼ gacané ca xpinni (Isaías 30:18, 19). Ndiʼ nga ni rusiidiʼ ejemplu ca laanu: pa juez que neca malu laa, peru bicaadiaga ni cayabi viuda que laa ne gucanebe laa la? jmaruʼ si zucaadiaga Jiobá ca oración stiʼ ca xpinni para gúnibe ni jneza ti gacanebe laacaʼ, purtiʼ nacháʼhuibe (Proverbios 15:29).
14. Xiñee cadi jneza diʼ nga gusaananu de guni crenu mayaca guedandá dxi guni juzgar Dios binni.
14 Nga runi, cadi jneza diʼ nga chuʼ tu gusaana de guni cré mayaca guedandá dxi guni juzgar Dios binni. Xiñee yaʼ. Purtiʼ ora maʼ qué runi crécabe pa «maʼ gaxha nuu dxi jma risaca sti Jiobá» la? casi ora niníʼ íquecabe ruluíʼ maʼ qué zúnibe cani maʼ bizabiruaabe. Peru, guirutiʼ qué gapa xidé guiníʼ ique pa zuni Dios ni maʼ guníʼ o pa coʼ (Job 9:12). Nga runi, naquiiñeʼ guiníʼ íquenu: «Ñee zúnirunu ni na Jiobá sin guchéʼnenu laa la?». Ngapeʼ nga bizeeteʼ Jesús ora biluxe guníʼ ejemplu stiʼ viuda ne juez que.
«Ñee dxandíʼ zadxélabe fe ca lu guidxilayú la?»
15. 1) Xi gunabadiidxaʼ Jesús, ne xiñee. 2) Xi naquiiñeʼ guiníʼ íquenu.
15 Nabé risaca ni gunabadiidxaʼ Jesús riʼ: «Ora gueeda Xiiñiʼ hombre que, ñee dxandíʼ zadxélabe fe ca lu guidxilayú la?» (Lucas 18:8, ni cá ñee yaza, NM). Ora guníʼ Jesús «fe ca» la? cadi caníʼdibe de fe ni napa guiráʼ binni, sínuque caniʼbe de fe ni gupa viuda que. Qué nicabi diʼ Jesús ni gunabadiidxaʼ ca, purtiʼ ni racaláʼdxibe nga guiníʼ ique ca discípulo stibe ximodo nuu fe sticaʼ. Ñee maʼ cará fe stícabe dede ruluíʼ zabiguétacabe lu cani maʼ bisaanacabe la? O nápacabe fe casi gupa viuda que la? Yanna riʼ laaca naquiiñeʼ guiníʼ íquenu: «Xi clase fe cadxela Xiiñiʼ hombre que ndaaniʼ ladxiduáʼ yaʼ».
16. Xi fe gupa viuda que.
16 Para chuʼnu lade ca binni ni chigacané Jiobá la? naquiiñeʼ gácanu casi viuda que. Xi fe gúpabe yaʼ. Gúpabe ti fe ni bicaa laabe chebe ra nuu juez que gatigá para guinábabe laa gacané laabe. Viuda que nanna zacané juez que laa pa qué guiree gana, neca malu juez que. Nga runi jma nápanu razón para guni crenu zacané Jiobá laanu, neca para laanu casi ora candaabe. Ximodo rusihuínninu runi crenu zuni Dios cani maʼ guníʼ yaʼ. Rusihuínninu ni ora runi orarnu laabe sin guireʼnu gana, ne ora rininenu laabe ridxíʼ ne huaxhinni (Lucas 18:7). Nga runi, pa ti xpinni Cristu maʼ cadi canabaʼ gacané Jiobá laa la? zusihuinni maʼ qué runi cré zanda gacané Jiobá ca xpinni.
17. Xi razón nápanu para cadi gusaananu de guni orarnu ne gápanu fe zedandá dxi guni juzgar Dios binni.
17 Laanu jma nápanu razón para cadi gusaananu de guni orarnu que viuda que. Xiñee yaʼ. Viuda que gunabaʼ ni racalaʼdxiʼ neca guirutiʼ tu ñabi laa ñúnini. Peru laanu la? gatigá cayabi Stiidxaʼ Dios laanu cadi gusaananu de guni orarnu (Romanos 12:12). Ne viuda que qué ganna pa zulábicabe laa, peru Jiobá cayabi laanu zuni ni jneza para gacané laanu. Casi ni gúdxibe tobi de cani riguixhená stibe guiníʼ: «Neca guindaani la? gulézaruʼ ni; purtiʼ dxandíʼ zácani. Qué zandaani» (Habacuc 2:3; Salmo 97:10). Ne stobi la? guirutiʼ ñapa viuda que para niníʼ pur laa nezalú juez que ti ñuuyaʼ dxandíʼ caquiiñebe gacanécabe laabe. Peru laanu la? nápanu tuuxa ni risaca ni zanda gacané laanu, nga nga Jesús, laa «nuu cueʼ Dios» ne «caníʼ pur laanu» (Romanos 8:34; Hebreos 7:25). Viuda que neca ruluíʼ nagana para gacanécabe laa la? gupa fe ne biʼniʼ cré de guidubi ladxidóʼ zuni juez que ni jneza para gacané laa. Nga runi, laanu jma naquiiñeʼ gápanu fe zedandá dxi guni juzgar Dios binni.
18. Ximodo zacané ca oración gúninu para iguidxi fe stinu, ne ximodo zacanécani para gacané Dios laanu.
18 Lu ejemplu stiʼ viuda que rizíʼdinu rihuinni nápanu fe ora runi orarnu. Laaca culuiʼni zaca fe stinu jma naguidxi pa guni orarnu sin guireʼnu gana. Peru cadi guiníʼ íquenu zaguidxi fe stinu ora guininu ngueca ngueca lu ca oración stinu ne cadi guireecani de ladxidoʼno (Mateo 6:7, 8). Ora guni orarnu naquiiñeʼ gusihuínninu riquiiñenu Dios lu guiráʼ ni gúninu, purtiʼ zacá zadxíñanu laabe ne zaguidxi fe stinu. Ne para guilanu la? naquiiñeʼ gápanu fe, nga runi gudxi Jesús ca discípulo que guni orárcabe «sin iree cabe gana» (Lucas 18:1; 2 Tesalonicenses 3:13). Nánnanu zedandá «dxi jma risaca stiʼ Jiobá» neca guni orarnu o coʼ. Peru para gacané Dios laanu ne gulá laanu lu dxi ni jma risaca stiʼ la? naquiiñeʼ gápanu fe ne naquiiñeʼ guluinu risaca para laanu guni orarnu.
19. Ximodo zanda gusihuínninu dxandíʼ runi crenu zuni Dios ni jneza.
19 Guietenaláʼdxinu ni gunabadiidxaʼ Jesús que: «Ora gueeda Xiiñiʼ hombre que, ñee dxandíʼ zadxélabe fe ca lu guidxilayú la?». Ximodo zanda guicábinu ni gunabadiidxabe ca yaʼ. Nabé riéchenu nga guidúʼyanu lu guidubi naca Guidxilayú nuu millón de ca xpinni Jiobá ni rusihuínnicaʼ nápacaʼ fe ca, purtiʼ cadi cusaanacaʼ de guni orarcaʼ ne cabézacaʼ gacané Dios laacaʼ. Yanna maʼ nánnanu zadxela Jesús binni ni napa fe ca. Nga runi, neca cuquiichináʼ ca binni ni cayuni ni na Binidxabaʼ ca laanu ne cadídinu lu stale guendananá la? runi crenu zuni Dios ni jneza para gacané ca xpinni.
[Cani cá ñee yaza]
a Para guiene chaahuiluʼ pabiáʼ risaca ejemplu riʼ la? biindaʼ Lucas 17:22-33. Ora gúʼndaluʼ Lucas 17:22, 24 ne 30 ra cayeeteʼ de «Hombre Biseendaʼ Dios» ca la? zacané nga lii guicábiluʼ ni gunabadiidxaʼ Jesús lu Lucas 18:8.
Rietenalaʼdxuʼ la?
• Xiñee nuu xpinni Cristu maʼ qué gapa fe.
• Xiñee naquiiñeʼ gápanu fe zedandá dxi guni juzgar Jiobá binni.
• Xi pur naquiiñeʼ guni orarnu sin guidxáganu.
• Ximodo zacané ca oración ca para iguidxi fe stinu.
[Dibuju/foto ni zeeda lu yaza 20]
Xi rizíʼdinu lu ejemplu ra cayeeteʼ de viuda que ne ti juez
[Ca dibuju/foto ni zeeda lu yaza 29]
Millón de binni runi cré dxandíʼ zuni Dios ni jneza