¿Xiñee reedaruʼ ca testigu stiʼ Jehová ra lidxeʼ pa maʼ gudxeʼ laacaʼ qué riuuladxeʼ?

Laadu, ca testigu stiʼ Jehová riuuláʼdxidu guinínedu guiráʼ binni de lu Biblia, dede né cani maʼ huayabi laadu qué riuuláʼdxicaʼ. ¿Xiñee rúnidu ni yaʼ? Purtiʼ nadxiidu Dios ne binni (Mateo 22:37-39). Guendarannaxhii ni nápadu Dios nga rucaa laadu chinándadu mandatu ni bisaana Xiiñibe, gusíʼdidu binni de Stiidxaʼ Dios biaʼ gándatiʼ (Hechos 10:42; 1 Juan 5:3). Nga runi, rúnidu casi biʼniʼ ca profeta ni bibani dxiqué, laaca qué rusaanadu de chinedu ca diidxaʼ ni rusiidiʼ Biblia ra nuu binni (Jeremías 25:4). Né guendarannaxhii ni nápadu binni rucaa ni laadu gusíʼdidu guiracaʼ de ca noticia galán stiʼ Reinu, dede né cani qué rusihuinni pa riuulaʼdxiʼ, purtiʼ zanda gulá ni laacaʼ (Mateo 24:14).

Ne ora ribiguétadu ra lidxi ca binni ni qué nusihuinni pa riuulaʼdxiʼ, stale biaje huadxéladu tuuxa ni riuulaʼdxiʼ gucaadiaga. Ne ndiʼ nga ca razón pur ribiguétadu:

• Rindeza binni sti lugar.

• Riuulaʼdxiʼ xcaadxi binni ni nabeza ti ra yoo gucaadiaga.

• Ruchaa binni modo riníʼ ique. Guiráʼ ni cazaaca lu Guidxilayú ne cani rizaaca lu xquendanabani binni zándaca gucaa ni laacaʼ gudiicaʼ cuenta «caquiiñecaʼ Dios» ne chuuláʼdxicaʼ guiziidicaʼ jma de Biblia (Mateo 5:3, TNM). Dede né cani qué riná gucaadiaga cani rusíʼdinu de Biblia zanda guchaacaʼ modo riníʼ íquecaʼ, casi biʼniʼ apóstol Pablo (1 Timoteo 1:13).

Peru qué riuu hora gucaʼdu binni gucaadiaga laadu (1 Pedro 3:15). Nánnadu cada tobi nga naquiiñeʼ cuí xi religión gapa (Deuteronomio 30:19, 20).