NI RINABADIIDXAʼ CA JOVEN
¿Xi zanda guneʼ pa qué ganda gacaʼ concentrar?
¿Xiñee qué ganda gacaʼ concentrar?
«Dxiqué ruundaʼ stale libru peru yanna maʼ coʼ. Ne ora ruuyaʼ xiroobaʼ ti párrafo la? rireeʼ gana ne maʼ qué ruundaʼ ni» (Elaine).
«Ora rudieeʼ cuenta nabé nanene cadiʼdiʼ videu ni cayuuyaʼ la? rutiideʼ ni nagueenda» (Miranda).
«Nuu biaje ora cayuneʼ xiixa nabé risaca ne runadiagaʼ chuʼ ti mensaje lu teléfono stinneʼ la? nagueendaca riníʼ iqueʼ “¿Tu laabe pue?”» (Jane).
¿Ñee zanda gucueeza tecnología laanu para cadi gaca concentrarnu la? Nuu tu ná zanda. Nicholas Carr, ti escritor ne ti hombre ni nanna de administración, guníʼ: «Ra jma iquiiñenu internet, jma nagueenda zaca distraernu, jma nagueenda ne jma biaʼsi zúninu dxiiñaʼ stinu, peru qué zaca concentrarnu».a
Guidúʼyanu chonna cosa ra zanda gucueeza tecnología lii para cadi gaca concentrarluʼ.
Ora caníʼneluʼ tuuxa. Ti baʼdudxaapaʼ láʼ María guníʼ: «Nuu binni ora maʼ caniʼné lii maʼ naazecaʼ teléfono, cuseendacaʼ mensaje, caguítecaʼ o maʼ cayuucaʼ lu red social lugar de guuyadxicaʼ ne guinínecaʼ lii».
Ora nápaluʼ clase ra scuela. Libru ni láʼ Niños conectados ná stale de ca baʼduʼ scuela riquiiñecaʼ dispositivu electrónicu sticaʼ ora nuucaʼ ndaaniʼ clase para guseendacaʼ mensaje, gúʼndacaʼ o gúʼyacaʼ xcaadxi cosa lu internet lugar de niguíxhecaʼ atención ni caníʼ maestru ca.
Ora cayuni estudiarluʼ. Chris, ni napa 22 iza, guníʼ: «Raca nagana para naa cadi guuyadxieeʼ teléfono stinneʼ ora xhidxi ni». Pa gudiiluʼ lugar gaca distraerluʼ pur ca dispositivu electrónicu stiluʼ qué zandaaluʼ ti hora para guilúxeluʼ ca tarea stiluʼ, sínuque zandaaluʼ jma tiempu.
Ni naquiiñeʼ gánnaluʼ: Pa gudiiluʼ lugar gucueeza tecnología ne guni controlar ni lii la? nabé nagana zaca para lii gaca concentrarluʼ.
Ti guendabiaaniʼ ni raca nagana para laa gaca concentrar, zeeda gaca casi ti caballu naduxhuʼ: zúnini ni gápani gana.
¿Ximodo zanda gacaʼ concentrar?
Ora caníʼneluʼ tuuxa. Biblia ná cadi guyúbinu puru si para laasinu, sínuque guizaaláʼdxinu binni (Filipenses 2:4). Bicaadiaga chaahuiʼ xcaadxi ne zacá zusihuínniluʼ rizaaláʼdxiluʼ laacaʼ. Biiyadxí lúcabe ne cadi gudiiluʼ lugar guni distraer celular ne tablet stiluʼ lii.
«Biʼniʼ stipa cadi gúʼyadxiluʼ teléfono stiluʼ ora maʼ cayuiʼluʼ diidxaʼ. Pa quíxheluʼ atención binni ca la? zusihuínniluʼ runi respetarluʼ laa» (Thomas).
NI ZANDA GÚNILUʼ: Ora caníʼneluʼ tuuxa xiñee qué quíxheluʼ teléfono stiluʼ ti lugar ra cadi gúʼyaluʼ ni. Ca expertu ca nacaʼ pa gapa binni teléfono stiʼ gaxha de laa la? zaca nagana para laa gaca concentrar purtiʼ zanda xhidxi ni ora tiica si.
Ora nápaluʼ clase ra scuela. Biblia ná: «Laguuyaʼ chaahuiʼ ximodo rucaadiágatu» (Lucas 8:18). Casi ná ca diidxaʼ riʼ, pa nápaluʼ internet ra scuela, cadi iquiiñeluʼ ni para gúʼndaluʼ ca mensaje stiluʼ, para quíteluʼ o para guseendaluʼ mensaje, sínuque guca concentrar para guiziidiluʼ.
«Bicaadiaga chaahuiʼ maestru stiluʼ. Bicaa guiráʼ ni guiniʼbe, ne pa ganda la? gurí ca lugar ni nuu delante ti cadi gaca distraerluʼ» (Karen).
NI ZANDA GÚNILUʼ: Xiñee qué gucaaluʼ ni guiníʼ maestru ca lu ti cuadernu ne cadi gucaaluʼ ni lu ca dispositivu electrónicu stiluʼ. Maʼ bihuinni pa gúniluʼ ni bizéʼtenu riʼ, huaxiéʼ zaca distraerluʼ ne jma zietenaláʼdxiluʼ ni biziidiluʼ.
Ora cayuni estudiarluʼ. Biblia ruzeeteʼ: «Guca binni nuu xpiaaniʼ, guca binni ni riene» (Proverbios 4:5). Nga riníʼ gúniluʼ stipa guiene chaahuiluʼ xiixa ne cadi gúʼndasiluʼ para tídiluʼ ti examen.
«Ora maʼ cayuneʼ estudiar, riguixheʼ tablet stinneʼ modo avión ne runeʼ stipa gacaʼ concentrar lu ni cayuneʼ. Qué ruuyaʼ ca mensaje guséʼndacabe ra nuaaʼ. Ne pa napaʼ gana guietenalaʼdxeʼ xiixa la? rucaaʼ ni» (Chris).
NI ZANDA GÚNILUʼ: Biʼniʼ stipa guyúbiluʼ ti lugar ra guni estudiarluʼ ne gaca concentrarluʼ. Ti lugar nayá ne ra gastiʼ ni guchiiñaʼ lii.
a Libru ni láʼ Superficiales: ¿Qué está haciendo Internet con nuestras mentes?