LECCIÓN 28
Bisihuinni rusisácaluʼ ni biʼniʼ Jehová ne Jesús pur lii
¿Ximodo runi sentirluʼ ora gudii ti xhamíguluʼ lii ti regalu guizáʼ galán? Zándaca ziuuluʼ nayecheʼ ne zusisácaluʼ regalu bidiibe lii. Peru, gástiruʼ stiʼ regalu jma galán que ni bidii Jehová ne Jesús guiráʼ binni: bidii Jesús xpida para gulá binni. Guidúʼyanu ximodo zanda gusihuínninu rudiʼnu xquixe peʼ pur laani.
1. Ti modo zanda gusihuínninu rusisácanu ni biʼniʼ Dios ne Jesús pur laanu
Biblia ruzeeteʼ «tu gapa fe» Jesús zanda guibani sin qué chuʼ dxi gatiʼ (Juan 3:16). Peru ¿ximodo rusihuinni tuuxa napa fe Jesús yaʼ? Cadi caquiiñeʼ si guni cré Jesús, laaca naquiiñeʼ gusihuinni ni pur ca decisión guicaa ne pur ca cosa ni guni (Santiago 2:17). Ora rusihuínninu nápanu fe pur ca cosa ni rúninu ne pur ca ni rininu, jma raca xhamígunu Jesús ne Jehová (biindaʼ Juan 14:21).
2. ¿Xi dxi risaca zanda gusihuínniluʼ rudiiluʼ xquixe peʼ Jehová ne Jesús?
Gueelaʼ ante gatiʼ Jesús, biluiʼbe ca xpínnibe sti modo zanda gusihuínnicaʼ rudiicaʼ xquixe peʼ pur ni chigúnibe. Gudíxhebe gaca ti cosa nabé risaca, laani nga «Guendaroxhí stiʼ Señor» ne laaca runibiáʼcabe ni casi dxi rietenaláʼdxinu guendaguti stiʼ Cristu (1 Corintios 11:20). Gudíxhebe gaca ni para guietenalaʼdxiʼ ca apóstol—né ca ni dxandíʼ xpínnibe—bidiibe xpídabe pur guiráʼ binni guidxilayú. Sicaríʼ guníʼ Jesús: «Cadi gusaana de gúnitu ndiʼ para guietenaláʼdxitu naa» (Lucas 22:19). Pa cheluʼ Guendaroxhí stiʼ Señor, zusihuínniluʼ rusisácaluʼ guendarannaxhii ni rusihuinni Jehová ne Jesús pur laanu.
GUIZÍʼDIRUNU JMA
Guidúʼyanu chonna modo zanda gusihuínninu rudiʼnu xquixe peʼ Jehová ne Jesús pur guendarannaxhii ni bisihuínnicaʼ laanu. Ne guidúʼyanu pabiáʼ risaca dxi rietenaláʼdxinu guendaguti stiʼ Cristu.
3. Gusihuínninu rudiʼnu xquixe peʼ Jehová ne Jesús
Bixuiʼlú cayaca ahogarluʼ peru málasi ñeeda tuuxa nulá lii. ¿Ñee nusiaandaluʼ ni bíʼnibe pur lii la? o nuyúbiluʼ ximodo nudiiluʼ xquixe peʼ laabe?
Jehová laaca biʼniʼ xiixa para bilá laanu. Laguundaʼ 1 Juan 4:8-10 ne laiquiiñeʼ ca pregunta riʼ para güitu diidxaʼ:
¿Xiñee ti regalu nabé risaca nga ni biʼniʼ Jesús pur laanu?
¿Ximodo runi sentirluʼ ora guiníʼ íqueluʼ ni biʼniʼ Jehová ne Jesús pur lii?
¿Ximodo zanda gusihuínninu rusisácanu ni biʼniʼ Jehová ne Jesús pur laanu? Laguundaʼ 2 Corintios 5:15, 1 Juan 4:11 ne 5:3. Guiluxe gúʼndasitu cada versículo, laiquiiñeʼ pregunta riʼ para güitu diidxaʼ:
¿Xi zanda gúninu para gusihuínninu rudiʼnu xquixe peʼ Jesús pur ni biʼniʼ?
4. Chinándanu ejemplu stiʼ Jesús
Sti modo zanda gusihuínninu rudiʼnu xquixe peʼ nga chinándanu ejemplu stiʼ Jesús. Laguundaʼ 1 Pedro 2:21 ne laiquiiñeʼ pregunta riʼ para güitu diidxaʼ:
¿Ximodo zanda chinándaluʼ ejemplu stiʼ Jesús casi peʼ modo gudixhe ni?
Nabé gunnaxhii Jesús Stiidxaʼ Dios, biʼniʼ predicar ca noticia galán ne gucané binni.
5. Guietenaláʼdxinu guendaguti stiʼ Cristu
Para gánnatu xi bizaaca primé biaje guca Guendaroxhí stiʼ Señor, laguundaʼ Lucas 22:14, 19, 20. Despué laiquiiñeʼ ca pregunta riʼ para güitu diidxaʼ:
¿Xi guca ra bíʼnicabe Guendaroxhí stiʼ Señor?
¿Xi runi representar pan ne vinu? (Laguuyaʼ versículo 19 ne 20).
Gunabaʼ Jesús ca discípulo stiʼ gúnicaʼ Guendaroxhí stiʼ Señor guiráʼ iza ne gúnicaʼ ni dxi gútibe. Nga runi, ca testigu stiʼ Jehová raca reunirdu guiráʼ iza para guietenaláʼdxidu guendaguti stiʼ Cristu ne rúnidu ni casi peʼ modo gudíxhebe gaca ni. Para gánnaluʼ ximodo raca ni, laguuyaʼ VIDEU riʼ. Despué laiquiiñeʼ pregunta riʼ para güitu diidxaʼ:
¿Ximodo rietenaláʼdxidu guendaguti stiʼ Cristu?
Pan ca runi representar ni cuerpu sin donda stiʼ Jesús, ni bidii casi sacrificiu. Ne vinu ca runi representar ni rini stibe.
NUU TU NÁ: «Biʼniʼ cré si Jesús maca bilaluʼ».
¿Ximodo niquiiñeluʼ Juan 3:16 ne Santiago 2:17 para nusiéneluʼ caquiiñeʼ guni binni xcaadxi cosa para guilá?
XI BIZÍʼDINU
Rusihuínninu rudiʼnu xquixe peʼ pur ni biʼniʼ Jesús pur laanu ra gápanu fe laabe ne ra chuunu dxi rietenaláʼdxinu guendaguti stiʼ Cristu.
Xi biziidiluʼ
¿Ximodo rusihuinni ti binni napa fe Jesús?
¿Ñuuláʼdxiluʼ nuluiʼluʼ Jehová ne Jesús rusisácaluʼ ni bíʼnicaʼ pur lii la? ¿Ximodo zanda gusihuínniluʼ ni?
¿Xiñee nabé risaca cadi guiáʼdxanu dxi rietenaláʼdxinu guendaguti stiʼ Cristu?
BIIYAʼ XIRUʼ ZANDA GUIZIIDILUʼ
Biiyaʼ xi rucaa guendaguti stiʼ Jesús laanu gúninu.
Biiyaʼ xi rusiidiʼ Biblia de fe ne ximodo zanda gusihuínninu ni.
«Gápanu fe lu cani maʼ bidii stiidxaʼ Jiobá» (Torre stiʼ ni rapa, octubre de 2016)
Biiyaʼ ximodo bichaa xquendanabani ti gunaa ra biene pabiáʼ risaca ni biʼniʼ Jesús pur laa. Biindaʼ historia stibe ni láʼ «Runeʼ sentir nuaaʼ nayá, nabaneʼ ne gastiʼ cuchiiñaʼ naa».
«Gucané Biblia laacabe para bichaacabe» (Torre stiʼ ni rapa, 1 de octubre de 2011)
Biiyaʼ xiñee huaxiéʼ si nga tu zanda gó pan ne gueʼ vinu dxi rietenaláʼdxinu guendaguti stiʼ Cristu.