Stale millón de binni ruyubi modo ugaanda xpueltu para tidiné dxi. Ne stale biaje jma nadipaʼ raca ni para laacabe pur ca guendanagana nuu lu Guidxilayú riʼ. ¿Xiñee yaʼ?
Ora nuu guendanagana xiixa lugar la? riguiʼbaʼ lu stale cosa, casi lu guendaró ne lu renta.
Stale binni riaana sin dxiiñaʼ o huaxiéʼ riguíxecabe laa.
Ca desastre natural o xiixa desgracia guizaaca runinácani lidxi binni ne stale negocio. Ne pur laacani stale binni runiti guiráʼ ni napa.
¿Ñee nannuʼ ni la?
Pa iquiiñeluʼ bueltu stiluʼ jneza la? zápaluʼ ni iquiiñeluʼ ora huaxiéʼ bueltu nuu.
Zedandá dxi maʼ qué zasaca bueltu, ahorro ne ca ni napa binni biaʼ risaca ni yanna.
Nuu cosa ni qué zanda siʼ binni, casi guendanayecheʼ o chuʼ familia stiʼ tobi si.
¿Xi zanda gúniluʼ?
Biblia ná: «Inque si nápanu ni guidoʼno ne ni gácunu la? né nga si ziuʼnu nayecheʼ» (1 Timoteo 6:8).
Cadi caquiiñeʼ gápanu guiráʼ ni racaláʼdxinu para chuʼnu nayecheʼ, sínuque ni caquiiñesinu. Nabé risaca guietenaláʼdxinu ndiʼ, jmaruʼ si ora huaxiéʼ bueltu nápanu.
Zándaca caquiiñeʼ guchaaluʼ modo nabániluʼ para chuʼluʼ nayecheʼ. Pa gúniluʼ gastu jma que biaʼ runi ganarluʼ la? zanda guiaanaluʼ sin bueltu o gueeda guzaabiluʼ.