XI GÚNILUʼ ORA QUIBAʼ LU GUIRÁʼ COSA
Biziidiʼ iquiiñeluʼ xpuéltuluʼ
Ora riguiʼbaʼ lu guiráʼ cosa, jma nagana modo ribani binni. Peru cadi naquiiñeʼ quidxinanu, nuuruʼ ni zanda gúninu.
NI JMA RISACA GÚNINU
Pa qué gúninu xiixa para gápanu xpuéltunu, nin qué zudiʼnu cuenta zará ni, ne jmaruʼ si nagana zabáninu ne ziuʼnu xizaa. Ne pa huaxiéʼ bueltu nápanu la? nuu ni zanda gúninu para ugaanda xpuéltunu.
NI ZANDA GÚNILUʼ
Biʼniʼ stipa guibanineluʼ biaʼ nápaluʼ. Pa gúniluʼ ni la? qué ziuuluʼ xizaa ne zánnaluʼ xi gúniluʼ ora guizaaca xiixa ni cadi cabézaluʼ.
Para guibanineluʼ biaʼ nápaluʼ, biʼniʼ ti presupuestu: bicaa pabiáʼ riáxaluʼ, gunáʼ nga ca cosa ni jma caquiiñeluʼ ne despué bicaa ximodo iquiiñeluʼ xpuéltuluʼ. Biʼniʼ stipa cadi guni gástuluʼ biaʼ maʼ gudíxheluʼ ne pa quibaʼ lu ca cosa ca o pa maʼ huaxiéʼ cayáxaluʼ, bichaa presupuestu stiluʼ. Ne pa maʼ bichaganaluʼ la? cadi guicaaluʼ decisión stúbiluʼ, guniʼné xheelaluʼ de laani.
Biʼniʼ stipa gúniluʼ ndiʼ: Ora ganda la? guzíʼ ca tobi si tiru ne cadi cueeluʼ ni créditu. Stale binni huadii cuenta, ora runi ni bizéʼtenu riʼ, jma racaneni laa iquiiñeʼ biaʼ maʼ gudixhe guni gastu ne cadi guzaabi. Ne cadi guiaandaʼ lii pagala nápaluʼ. Ra gánnaluʼ pabiáʼ guni gástuluʼ zacaneni lii cadi chuʼluʼ xizaa.
Guibanineluʼ biaʼ nápaluʼ zándaca gácani nagana. Peru pa quíxheluʼ pabiáʼ chiguiquiiñeluʼ guizáʼ zacaneni lii, ne maʼ qué ziuuluʼ xizaa pa zugaanda xpuéltuluʼ.
Biʼniʼ xhiiñaluʼ jneza. ¿Xi zanda gúniluʼ para cadi uchuugucabe lii de dxiiñaʼ? Biʼniʼ stipa chindaluʼ tempranu ne biʼniʼ stipa chuuláʼdxiluʼ xhiiñaluʼ. Bicaa ique guiziidiluʼ gúniluʼ xhiiñaluʼ jneza ne gupa respetu binni. Yenanda ni maʼ gudixhe jefe stiluʼ ne biʼniʼ stipa guiziidirouʼ jma.
Cadi quíteluʼ xpuéltuluʼ. Guníʼ ique ndiʼ «¿Ñee riziéʼ stale cosa ni cadi caquiiñeʼ o dede riziéʼ cosa ni runiná naa la?». Stale binni riguite xpueltu para siʼ droga, siʼ juegu ra raca ganar bueltu, gueza o nisadxuʼniʼ. Pa gúniluʼ tobi de ca cosa riʼ, zanda gaca huaraluʼ o uchuugucabe lii de dxiiñaʼ.
Gundisaʼ ti ndaa bueltu para ora gápaluʼ xiixa emergencia. Ora ganda la? gundisaʼ ti ndaa bueltu pa málasi guizaaca xiixa o gápaluʼ xiixa emergencia. Pa gúniluʼ ni, maʼ qué ziuuluʼ xizaa pa málasi guizaaca xiixa ni cadi cabézaluʼ. Casi gaca huaraluʼ o gaca huará ti familia stiluʼ o uchuugucabe lii de dxiiñaʼ.