XI GÚNILUʼ ORA QUIBAʼ LU GUIRÁʼ COSA

Guyuu nayecheʼ né biaʼ nápaluʼ

Jma galán ribani binni ni riechené biaʼ napa si. Ne ora ruchaa modo nabánicaʼ, nagueendaca riaacaʼ ne ribaninecaʼ biaʼ nápasicaʼ.

NI JMA RISACA GÚNINU

Ti psicóloga láʼ Jessica Koehler bizeeteʼ ora ti binni nuu nayecheʼ né biaʼ napa, riníʼ ique puru cosa galán ne qué rapa envidia. Nga runi, cadi guendaridxagayaa nga chuʼ ca binni riʼ jma nayecheʼ ne cadi gaca estresarcaʼ. Laaca nuu de ca binni riʼ neca huaxiéʼ bueltu nápacaʼ peru nabánicaʼ nayecheʼ purtiʼ ni jma risaca para laacabe nga chuʼnécabe familia stícabe tobi si ne ca xhamígucabe.

«Inque si nápanu ni guidoʼno ne ni gácunu la? né nga si ziuʼnu nayecheʼ» (1 Timoteo 6:8).

NI ZANDA GÚNILUʼ

Cadi guchaagaluʼ lii sti binni. Pa huaxiéʼ cosa nápaluʼ ne cuchaagaluʼ lii né sti binni ni napa stale luju, zándaca guireeluʼ gana o dede gápaluʼ envidia. Peru cadi jneza guni tuuxa nga. Ca binni ni napa stale cosa zándaca guizáʼ nuzaabicaʼ. Ti gunaa de Senegal ni láʼ Nicole guníʼ: «Cadi caquiiñeʼ stale cosa para guibaneʼ nayecheʼ. Pa nuaaʼ nayecheʼ né biaʼ napaʼ siaʼ, zanda chuaaʼ nayecheʼ neca xcaadxi gapa jma que naa».

Biʼniʼ stipa gúniluʼ ndiʼ: Cadi gúʼyaluʼ ca anunciu ne ca cosa caru ni rudxiibaʼ binni lu red social ne laaca cadi gúʼyaluʼ ca cosa runi binni para guluíʼ napa bueltu.

«Neca napa binni stale cosa la? cadi ca cosa ni napa nga rudii laa guendanabani» (Lucas 12:15).

Bidii xquixe peʼ. Ca binni ni rudii xquixe peʼ, ribánicaʼ nayecheʼ né biaʼ nápasicaʼ, ne qué riníʼ íquecaʼ caquiiñecaʼ o runi merecercaʼ gápacaʼ jma cosa. Ti hombre de Haití ni láʼ Roberton ná: «Ribeeʼ tiempu para guiníʼ iqueʼ xi guiráʼ huayuni binni para gacané naa ne xfamiliaʼ. Ne despué rudieeʼ xquixe peʼ laacabe. Laaca rusiideʼ xiiñeʼ ni napa xhono iza gudii xquixe peʼ pur guiráʼ ni rusigáʼdecabe laa».

Biʼniʼ stipa gúniluʼ ndiʼ: Guiráʼ dxi bicaa lu ti cuadernu xi pur nuuluʼ gudiiluʼ xquixe peʼ. Casi pa nuuluʼ gudiiluʼ xquixe peʼ purtiʼ nazaaca nuuluʼ, nabanineluʼ familia stiluʼ nayecheʼ o nápaluʼ xhamíguluʼ, o purtiʼ biiyaluʼ pabiáʼ galán rihuinni guibáʼ ora maʼ ziyaaziʼ gubidxa».

«Binni nuu nayecheʼ qué rusaana de guni saa» (Proverbios 15:15).

Nuu biaje raca nagana para laanu chuʼnu nayecheʼ né biaʼ nápanu. Peru zabeendunu ni galán pa chuʼnu nayecheʼ. Pa chuʼnu conforme né biaʼ nápanu la? ziuʼnu nayecheʼ ne nga nga ti cosa ni qué zanda sinu né bueltu.