¿Ñee maʼ biziidiluʼ chuʼluʼ nayecheʼ la?

1. ¿Xi riníʼ chuʼnu nayecheʼ, ne xi cadi naquiiñeʼ guiníʼ íquenu?

¿ÑEE nabániluʼ nayecheʼ la? Pa zacá ni zusihuínniluʼ nuuluʼ nayecheʼ ne gastiʼ cadi cuchiiñaʼ lii purtiʼ rusisácaluʼ ca cosa galán ni maʼ bidii Jehová lii ne qué ridxiichiluʼ purtiʼ si nuu cosa ni qué gápaluʼ. Peru neca nabáninu nayecheʼ cadi caníʼ diʼ nga maʼ qué zaníʼ íquenu xiruʼ zanda gúninu para guibáninu nayecheʼ. Guzéʼtenu ti ejemplu, galán quixhe íquenu gúninu jma lu xhiiñaʼ Jehová (Rom. 12:1; 1 Tim. 3:1). Neca caʼruʼ guicaanu xiixa asignación o xiixa responsabilidad ndaaniʼ xquidxi Jehová qué rusaananu de chuʼnu nayecheʼ.

2. ¿Xiñee zándaca guicaanu decisión ni cadi jneza pa cadi chuʼnu nayecheʼ né ca cosa ni nápanu?

² Pa cadi nuunu nayecheʼ zándaca guicaanu decisión ni cadi jneza. Guzéʼtenu ti ejemplu, nuu binni qué riechené ca cosa ni napa, nga runi rúnicaʼ dxiiñaʼ jma de biaʼ naquiiñeʼ gúnicaʼ para guni ganarcaʼ sti ndaa bueltu ne zacá ganda sicaʼ ca cosa ni cadi caquiiñepecaʼ. Nuu xpinni Cristu huabaʼnacaʼ bueltu ne caadxi cosa ni racaláʼdxicaʼ gápacaʼ. Zándaca guníʼ íquecaʼ: «Napa xidé gácani stinneʼ», «Racalaʼdxeʼ gápani yanna» o «Zanda guicaaʼ bueltu ca yanna ne despué gudxiguetaʼ ni». Peru pa guicaaluʼ xiixa ni cadi stiluʼ la? maʼ cabaʼnaluʼ ni, ne nanalaʼdxiʼ Jehová cuanaʼ binni purtiʼ runi biidini nombre stibe (Prov. 30:9). Nuu hermanu rireecaʼ gana ne huasaanacaʼ de gúnicaʼ ni ná Jehová purtiʼ qué huacaacaʼ xiixa dxiiñaʼ ñuuláʼdxicaʼ nicaacaʼ (Gál. 6:9). Peru ¿xiñee zándaca gueeda guiníʼ ique ti xpinni Cristu ni maʼ guyuunisa guni ca cosa ni maʼ bizéʼtenu riʼ yaʼ? Zándaca guiníʼ íquebe gúnibe ni purtiʼ chaahuiʼ chaahuiʼ bisaana de guibánibe nayecheʼ né ca cosa ni nápabe.

3. ¿Ximodo racané Filipenses 4:11, 12 laanu cadi chuʼnu xizaa?

³ Zándaca zaca nagana para laanu guibáninu nayecheʼ, peru zanda guizíʼdinu guibáninu nayecheʼ. Ndiʼ nga ni bizeeteʼ apóstol Pablo «maʼ biziideʼ chuaaʼ nayecheʼ né biaʼ tiica napaʼ» (biindaʼ Filipenses 4:11, 12). Dxi bicaabe ca diidxaʼ riʼ nuube ndaaniʼ cárcel, neca zacá nuube nayecheʼ. Pa raca nagana para laanu chuʼnu nayecheʼ ni guníʼ Pablo ne modo bibani rusihuínnini guiranu zanda chuʼnu nayecheʼ. ¿Ximodo zanda guizíʼdinu guibáninu nayecheʼ neca guizaaca intiica cosa? Lu artículo riʼ zadúʼyanu chonna cosa ni zacané laanu.

GUDIʼNU XQUIXE PEʼ

4. Ra gudiʼnu xquixe peʼ, ¿ximodo racaneni laanu chuʼnu nayecheʼ? (1 Tesalonicenses 5:18).

⁴ Jma riuʼnu nayecheʼ ora rudiʼnu xquixe peʼ (biindaʼ 1 Tesalonicenses 5:18). Guzéʼtenu ti ejemplu, pa dxandíʼ peʼ rudiʼnu xquixe peʼ pur ca cosa ni caquíʼñenu para guibaninenu qué zacá íquenu gápanu ca cosa ni qué gápanu. Pa rusisácanu dxiiñaʼ ni rúninu ndaaniʼ xquidxi Jehová para guni adorarnu laa, zaníʼ íquenu gudiʼnu laabe ni jma galán de laanu ne qué zaníʼ íquenu gudiicabe laanu ti dxiiñaʼ ni ñuuláʼdxinu ñápanu. Nga runi Biblia cayabi laanu gudiʼnu xquixe peʼ Jehová lu ca oración stinu. Gudiʼnu xquixe peʼ Jehová racaneni laanu gápanu «paz stiʼ dede guirutiʼ zanda guiene ximodo ni» (Filip. 4:6, 7).

5. ¿Xi razón gupa ca israelita para nudiicaʼ xquixe peʼ Jehová? (Laaca zanda gúʼyaluʼ imagen ca).

⁵ Guiníʼ íquenu ni bizaaca ca israelita. Stale biaje guca quejarcaʼ nezalú Jehová purtiʼ cabánacaʼ guendaró ni gudocaʼ ndaaniʼ guidxi Egipto (Núm. 11:4-6). Dxandíʼ nagana modo bibánicabe lu desiertu que. Peru galán ñetenaláʼdxicabe biseendaʼ Jehová chii plaga para gulee laacabe de Egipto, lugar ra gucanácabe stale purtiʼ nuucabe casi esclavu. Ora biree ca israelita de ndaaniʼ guidxi Egipto gúxhacaʼ guiráʼ cosa stiʼ ca egipciu, stale plata, oro ne lari (Éx. 12:35, 36). Laaca biquiiñeʼ Jehová poder stiʼ para guxheleʼ nisadóʼ Xiñáʼ ne zaqué ganda guilá ca israelita de lu náʼ ejércitu stiʼ faraón. Ne guiráʼ dxi bidiibe laaca maná para gocaʼ laga nabánicaʼ lu desiertu. Yanna, ¿xiñee qué ñuucabe nayecheʼ yaʼ? Cadi purtiʼ biaadxaʼ laacabe guendaró, sínuque purtiʼ qué nudiicabe xquixe peʼ Jehová pur guiráʼ ni nápacabe.

6. ¿Xi zacané laanu gácanu binni ni rudii xquixe peʼ?

⁶ ¿Xi zacané laanu gudiʼnu xquixe peʼ? Primé, galán guiníʼ íquenu guiráʼ dxi ca cosa galán ni nápanu. Dede zanda gucaaluʼ lu ti guiʼchiʼ chupa chonna cosa ti cadi guiaandaʼ lii gudiiluʼ xquixe peʼ tuuxa pur laacani (Lam. 3:22, 23). Guiropa, biiyaʼ gudiiluʼ xquixe peʼ ca binni ni guni xiixa pur lii ne ni jma risaca cadi guiaandaʼ lii gudiiluʼ xquixe peʼ Jehová guiráʼ dxi pur guiráʼ ni runi pur lii (Sal. 75:1). Guionna, guyúbinu gaca xhamígunu binni ni rudii xquixe peʼ. Pa ca xhamígunu qué rudiicaʼ xquixe peʼ o nabé raca quejarcaʼ la? zándaca zácanu casi laacabe, peru pa ca xhamígunu rudiicaʼ xquixe peʼ zacaneni laanu gácanu binni ni rudii xquixe peʼ (Deut. 1:26-28; 2 Tim. 3:1, 2, 5). Ora nácanu binni ni rudii xquixe peʼ qué zadxiichinu pa qué gápanu ca cosa ni ñuuláʼdxinu ñápanu.

7. ¿Xi gucané Aci chuʼ nayecheʼ?

⁷ Guidúʼyanu ni bizaaca ti hermana láʼ Aci, ni nabeza Indonesia. Laabe guniʼbe: «Lu pandemia stiʼ COVID-19, bizulú bichaagaʼ ni cayuneʼ ne ni cayuni xcaadxi hermanu ne pur ngue bisaana de chuaaʼ nayecheʼ» (Gál. 6:4). ¿Xi gucané laabe guchaabe modo riníʼ íquebe yaʼ? Laca laabe guniʼbe: «Guníʼ iqueʼ lu ca ndaayaʼ ricaaʼ guiráʼ dxi ne ca cosa galán ni napaʼ pur nuaaʼ ndaaniʼ xquidxi Dios. Ngue runi bidieeʼ xquixe peʼ Jehová, ne ngue gucané naa chuaaʼ jma nayecheʼ». Pa chinándanu ejemplu stiʼ hermana riʼ zanda gacaneni laanu pa chuʼ ora guni sentirnu cadi nuunu nayecheʼ pur modo nabáninu.

GÁCANU HUMILDE

8. ¿Xi bizaaca Baruc?

⁸ Guyuu ti tiempu, Baruc secretariu stiʼ profeta Jeremías, maʼ qué ñuu nayecheʼ pur dxiiñaʼ ni napa. Guizáʼ nagana dxiiñaʼ ni nápabe que, chigacanebe Jeremías gabi ca israelita xi zazaacacaʼ purtiʼ bisaana de guzuubacaʼ stiidxaʼ Jehová. Lugar de niguixhe íquebe ñuuyabe xi racalaʼdxiʼ Jehová ñúnibe bizulú guníʼ íquebe xi zazaaca de laabe ne ni racaláʼdxibe gúnibe. Biquiiñeʼ Jehová profeta Jeremías para gabi laabe: «Canayúbiluʼ cosa risaca para lii. Maʼ cadi guyúbiluʼ ca cosa ca» (Jer. 45:3-5). O zanda guininu ni sicaríʼ: «Guyuu nayecheʼ né ca cosa ni cayúniluʼ ne ca cosa ni nápaluʼ». Yenanda Baruc conseju que ne zaqué guyuulaʼdxiʼ Jehová ni bíʼnibe.

9. ¿Xi rusiidiʼ 1 Corintios 4:6, 7, laanu? (Laaca zanda gúʼyaluʼ ca imagen ca).

⁹ Nuu biaje zándaca nuu tuuxa hermanu ni riníʼ ique laa nga naquiiñeʼ nicaa xiixa asignación o responsabilidad ndaaniʼ xquidxi Jehová. Zándaca nápabe stale gracia, huayúnibe dxiiñaʼ nadipaʼ, zinebe stale iza ndaaniʼ xquidxi Jehová o zándaca rúnibe guionnaʼ cosa ni bizéʼtenu riʼ. Neca zacá zándaca sti hermanu nga guicaa ni racaláʼdxibe ca. ¿Xi zacané laabe cadi gusaana de chuʼbe nayecheʼ yaʼ? Zanda guiníʼ íquebe ni bicaa apóstol Pablo lu 1 Corintios 4:6, 7 (biindaʼ ni). Nin tobi de laanu cadi naquiiñeʼ guiníʼ ique napa xiixa gracia, xiixa asignación o xiixa responsabilidad ndaaniʼ xquidxi Jehová purtiʼ biʼniʼ ganarnu ni o runi merecernu ni, sínuque zeeda gácacani regalu stiʼ Jehová pur guca nachaʼhuiʼ né laanu (Rom. 12:3, 6; Efes. 2:8, 9).

10. ¿Xi zacané laanu gácanu humilde?

¹⁰ Guiníʼ íquenu ejemplu stiʼ Jesús, racaneni laanu gácanu humilde. Guietenaláʼdxinu gudiibibe ñee ca apóstol stibe neca nácabe xiiñiʼ Dios ne nápabe stale autoridad. Apóstol Juan bicaa: «Cumu nanna Jesús maʼ bisaana Bixhoze guiráʼ cosa lu náʼ, ne nanna beeda de ra nuu Dios ne cheʼ ra nuu Dios la? […] bizulú gudiibibe ñee ca discípulo stibe» (Juan 13:3-5). Ñanda niníʼ ique Jesús laacabe nga naquiiñeʼ niguiibicabe ñee. Peru qué ñuu dxi niníʼ íquebe purtiʼ si nácabe xiiñiʼ Dios naquiiñeʼ ñápabe ti yoo ra nibézabe, ñápabe stale bueltu ne ñápabe guiráʼ ni caquiiñebe (Luc. 9:58). Naca Jesús humilde, ngue runi nuube nayecheʼ ne ca cosa si ni nápabe. Zaca gudíxhebe ti ejemplu sicarú chinándanu (Juan 13:15).

11. ¿Xi gucané Dennis chuʼ nayecheʼ?

¹¹ Ti hermanu láʼ Dennis, de Paises Bajos guníʼ runi stipa pur gaca humilde casi Jesús, peru nuu biaje rácani nagana para laabe. Sicaríʼ guniʼbe: «Ora ruuyaʼ cudiicabe ti hermanu ti asignación ni naa riuuladxeʼ guicaaʼ, nuu biaje ridxiicheʼ purtiʼ riníʼ iqueʼ naa nga nicaaʼ dxiiñaʼ ca. Ora runeʼ sentir zacá ruundaʼ información ni caníʼ ximodo gácanu humilde. Lu aplicación JW Library^®, napaʼ caadxi etiqueta ra nuu caadxi textu ni caníʼ modo gaca tuuxa humilde ti ganda guidxelaʼ cani nagueenda. Laaca maʼ bineʼ descargar lu teléfono stinneʼ caadxi discursu ra caníʼ de laani para guuyaʼ.a Maʼ biziideʼ guiráʼ ni rúninu, rúninu cani para guisaca Jehová ne cadi para guisácanu. Stiʼ Jehová dxiiñaʼ ni rúninu ne rudiibe lugar gacanenu laabe». Pa chuʼ biaje guni sentirnu ni biʼniʼ sentir hermanu ca, gúninu stipa gácanu humilde. Zacá ziuʼnu jma gaxha de Jehová ne ziuʼnu jma nayecheʼ (Sant. 4:6, 8).

GUINÍʼ IQUENU ESPERANZA NI NÁPANU

12. ¿Xi esperanza nápanu ni racané laanu guibáninu nayecheʼ tiempu riʼ? (Isaías 65:21-25).

¹² Ora guiníʼ íquenu ni cayuni prometer Jehová laanu chiguni racaneni laanu chuʼnu jma nayecheʼ. Lu libru stiʼ Isaías riete riene Jehová ridxaagalunu stale guendanagana lu guidxilayú riʼ, peru cayuni prometerbe laanu zabeebe guiráʼ cani (biindaʼ Isaías 65:21-25). Ndaaniʼ guidxilayú cubi ca zabézanu ndaaniʼ yoo galán ne gastiʼ ni zuchibi laanu, zúninu dxiiñaʼ ni riuuláʼdxinu ne zadoʼnoʼ guendaró nanixe ne ni gacané cuerpu stinu. Maʼ qué lica zadxíbinu guizaacanu o guizaaca ca xiiñinu xiixa cosa (Is. 32:17, 18; Ezeq. 34:25). Guizáʼ galán zabáninu despué ne nanna dxíchinu dxandíʼ zácani.

13. ¿Pora nga jma caquíʼñenu guiníʼ íquenu esperanza ni nápanu?

¹³ ¿Xiñee nabé risaca cadi gusaana de guiníʼ íquenu esperanza ni nápanu? Purtiʼ nabáninu lu ca últimu dxi ne guiranu nápanu guendanagana nadipaʼ ni raca nagana para laanu guni huantarnu (2 Tim. 3:1). Guiráʼ dxi racané Jehová laanu guni huantarnu. ¿Ximodo rúnibe ni yaʼ? Rábibe laanu xi gúninu, rudiibe laanu stipa ne racanebe laanu ora peʼ caquíʼñenu ni (Sal. 145:14). Ne laaca rudiibe laanu esperanza ni racané laanu guzuhuaʼnu dxiichiʼ ora cadídinu lu guendanagana. Zándaca guizáʼ rúniluʼ dxiiñaʼ para gapa familia stiluʼ ni gó ne gápatu ni caquiiñetu para tíditu dxi. Peru ¿ñee caníʼ nga siempre zúniluʼ stale dxiiñaʼ para ganda gudiiluʼ ni caquiiñeʼ familia stiluʼ la? Coʼ, peru pur esperanza ni nápanu nánnanu maʼ biʼniʼ prometer Jehová zudii ni caquíʼñenu ne jma de biaʼ caquíʼñenu ndaaniʼ guidxilayú cubi ca (Sal. 9:18; 72:12-14). O zándaca cayuniná ti guendahuará malu laanu, nápanu xiixa yuubaʼ o nápanu xiixa guendahuará ni runiná xquendabiaaninu casi depresión. Peru qué riníʼ diʼ nga siempre zabáninu zacá ne qué gápanu esperanza purtiʼ Dios maʼ biʼniʼ prometer laanu ndaaniʼ guidxilayú cubi ca maʼ qué ziuu guendahuará nin guendaguti (Apoc. 21:3, 4). Racané ca promesa riʼ laanu chuʼnu nayecheʼ, cadi guidxiichinu ne cadi guixhacaláʼdxinu modo nabáninu. Nga runi, neca gúnicabe laanu xiixa cosa ni cadi jneza, gaca huaranu, gatiʼ ti binni ni nadxiinu o guidxaagalunu sti guendanagana, zanda chuʼnu nayecheʼ. ¿Xiñee yaʼ? Purtiʼ intiica guendanagana guidxaagalunu nánnanu ti ratu si cani, ne ndaaniʼ guidxilayú cubi ca maʼ qué ziuucani (2 Cor. 4:17, 18).

14. ¿Ximodo zanda guinaaze dxiichinu esperanza ni nápanu?

¹⁴ ¿Ximodo zanda guinaaze dxiichinu esperanza ni nápanu para gacaneni laanu chuʼnu nayecheʼ? Cásica ti binni ni huaxiéʼ ruuyaʼ caquiiñeʼ lente para ganda guʼyaʼ jma nayaʼniʼ, zacaca nga racané esperanza ni nápanu laanu para guxuíʼlunu o guiníʼ íquenu maʼ nuunu ndaaniʼ paraísu. Guzéʼtenu chupa chonna ejemplu, pa nabé nuunu xizaa purtiʼ qué gápanu bueltu, zanda guiníʼ íquenu ximodo zabáninu ndaaniʼ paraísu ca ora maʼ qué zaquíʼñenu bueltu, maʼ guirutiʼ zuzaabiʼ ne maʼ qué ziuu binni pobre. Pa riuʼnu triste purtiʼ qué huacaanu xiixa asignación o responsabilidad ndaaniʼ xquidxi Jehová, zanda guiníʼ íquenu ora maʼ nuunu ndaaniʼ guidxilayú cubi ca maʼ qué zacá íquenu gápanu cani purtiʼ maʼ nácanu binni sin donda ne maʼ zinenu stale iza de cayúninu ni ná Jehová (1 Tim. 6:19). Zándaca pur guiráʼ guendanagana ni nápanu raca nagana para laanu guiníʼ íquenu pabiáʼ galán zabáninu despué. Peru pa gatigá guiníʼ íquenu promesa ni cayuni Jehová laanu jma zacá íquenu maʼ nuunu ndaaniʼ paraísu ca qué guicá íquenu ca guendanagana ni nápanu.

15. ¿Xi rusiidiʼ ni bizaaca Christa laanu?

¹⁵ Guidúʼyanu xi zanda guizíʼdinu de ni bizaaca Christa, xheelaʼ Dennis, hermanu ni bizéʼtenu lu párrafo 11 que. Sicaríʼ guníʼ Christa: «Napaʼ ti guendahuará ni zeʼ dxi cusirá stipa stinneʼ, qué randa rizayaʼ ne riquiiñeʼ silla de rueda ne jma stale biaje nexheʼ purtiʼ cayuubaʼ. Cadi xadxí gudxi doctor naa zeʼ dxi jma zuniná guendahuará riʼ naa. Nagueendaca guníʼ iqueʼ: “Para laabe qué gapaʼ remediu”. Peru naa napaʼ ti esperanza ni racané naa gatadxí ladxiduáʼ. Ni zanda si guneʼ ndaaniʼ guidxilayú riʼ nga guneʼ huantar, ¡peru ndaaniʼ guidxilayú cubi ca maʼ qué zuniná guendahuará riʼ naa ne guizáʼ nayecheʼ zabaneʼ!».

«QUÉ RIAADXAʼ GASTIʼ CA NI RIDXIBI LAABE»

16. ¿Xiñee guníʼ David gastiʼ qué riaadxaʼ ca ni ridxibi Jehová?

¹⁶ Neca nabáninu nayecheʼ peru qué riníʼ diʼ nga qué ridxaagalunu guendanagana. Guiníʼ íquenu ni bizaaca rey David, guti chonna xiiñibe ne bigaanicabe donda íquebe, biʼniʼ traicionárcabe laabe ne xadxí guzanándacabe laabe para guuticabe laabe. Neca bidxaagalú David guiráʼ guendanagana que guyuube nayecheʼ, ne sicaríʼ guniʼbe de Jehová: «Qué riaadxaʼ gastiʼ ca ni ridxibi laabe» (Sal. 34:9, 10). ¿Xiñee guníʼ David zacá yaʼ? Purtiʼ nánnabe neca qué rucueeza Jehová ca guendanagana ni ridxaagalunu, peru siempre rudii Jehová laanu ca cosa ni peʼ caquíʼñenu (Sal. 145:16). Cásica David riuʼnu nayecheʼ purtiʼ nánnanu nuu Jehová gaxha de laanu neca guidxaagalunu intiica guendanagana.

17. ¿Xiñee racaláʼdxiluʼ chuʼluʼ nayecheʼ neca nápaluʼ guendanagana?

¹⁷ Racalaʼdxiʼ Jehová guibáninu nayecheʼ neca guidxaagalunu guendanagana (Sal. 131:1, 2). Maʼ bizíʼdinu ximodo guibáninu nayecheʼ, gúninu stipa gácanu binni ni rudii xquixe peʼ, gácanu humilde ne guiníʼ íquenu esperanza ni nápanu. Pa gúninu ca ni bizéʼtenu riʼ zanda guininu: «Maʼ biziideʼ chuaaʼ nayecheʼ» (Filip. 4:11).