CA GUENDANAGANA NUU LU GUIDXILAYÚ

3 | Gupa familia stiluʼ

¿XIÑEE RISACA NI?

Ora nuu stale guendanagana, nuu binni maʼ qué rizaalaʼdxiʼ ximodo nuu familia stiʼ.

Rixeleʼ binni de familia stiʼ.
Nabé ridinde diidxaʼ ca guendaxheelaʼ ca.
Qué rizaalaʼdxiʼ binni pa nuu xi riguu xizaa ca xiiñiʼ.

¿Ñee nannuʼ ni la?

Ora nápaluʼ guendanagana, zanda gacané ca xhamíguluʼ lii purtiʼ zaguucabe gana lii ti guni sentirluʼ galán ne cadi tan gaca estresarluʼ.
Pa nabé napa familia stiluʼ estrés zanda gapa guendanagana.
Zanda guchibi noticia ca xiiñiluʼ.

¿Xi zanda gúniluʼ?

Biblia ná: «Ni dxandíʼ xhamígunu la? guiráʼ ora nadxii laanu, ne zácabe bíchinu ora nápanu xiixa guendananá» (Proverbios 17:17).

Guniʼné ti binni ni zanda guiene lii ne ni zanda gudii conseju galán lii. Ora gánnaluʼ nuu ti binni ni nadxii lii racané ni ne rudii ni stipa lii para gudxiiluluʼ ca guendanagana ridxaagaluluʼ lu xquendanabániluʼ.

XI ZANDA GACANÉ LII: Yenanda ca conseju riʼ

Para ganda gápaluʼ familia stiluʼ ca dxi nagana riʼ yenanda ca conseju riʼ

BIʼNIʼ STIPA CHUʼ XQUENDAXHEELALUʼ GALÁN

Biʼniʼ stipa chuʼ xquendaxheelaluʼ galán

Biblia ná: «Jma galán ora nuu chupa binni que tobi si [...]. Purtiʼ pa guiaba tobi de laacabe, stobi ca zanda gacané compañeru stiʼ para guiasa» (Eclesiastés 4:9, 10). Naquiiñeʼ guni ti guendaxheelaʼ dxiiñaʼ tobi si casi runi chupa jugador ni nuu lu ti equipu si ne cadi casi chupa jugador ni nuu lu gadxé gadxé equipu ni cayuni competir.

Pa nuutu estresadu, cadi maʼ cuyúbitu tu guireené ni. Jma galán gápatu paciencia ne guni huantársaatu.
Neca ti biaje lu ti semana lacuee tiempu para guiniʼtu de ca guendanagana stitu. Cadi guyúbitu tu napa donda, laguyubi guni chaahuitu guendanagana stitu.
Laguni xiixa ni riuuláʼdxitu juntu.
Zanda guietenaláʼdxitu dxi bíʼnitu xiixa juntu ne guyuutu nayecheʼ. Casi gúʼyatu foto de dxi bichaganatu o de sti ocasión especial.

«Zándaca qué ziuu ti guendaxheelaʼ de acuerdu lu guiráʼ cosa, peru qué riníʼ diʼ nga qué zanda gúnicabe dxiiñaʼ tobi si. Zanda guicaacabe ti decisión juntu ne gúnicabe stipa para guiree ni jneza» (David).

CADI GUIXÉLELUʼ DE CA XHAMÍGULUʼ

Cadi guixéleluʼ de ca xhamíguluʼ

Cadi cuézaluʼ puru si ca xhamíguluʼ nga cuʼcaʼ gana lii. Lii laaca biyubi modo cuʼluʼ gana laacabe. Pa gacaneluʼ xcaadxi la? laaca zacané ni lii.
Guniʼné ti xhamíguluʼ guiráʼ dxi para gánnaluʼ ximodo nuu.
Gunabadiidxaʼ ca xhamíguluʼ ni gudiʼdiʼ xiixa guendanagana ni cadíʼdiluʼ xi gucané laacaʼ gudxiilucaʼ ni.

«Cásica racané ti biaaniʼ laanu guidúʼyanu ora nacahui ne cayaba dxacha nisaguié, zaqueca racané ca xhamígunu laanu gánnanu xi gúninu ora nápanu guendanagana. Nuu biaje caquiiñeʼ si gusietenaláʼdxicabe lii ni maca nánnaluʼ. Nadxii ca xhamíguluʼ lii ne laaca nánnacabe nadxiiluʼ laacabe» (Nicole).

BIʼNIʼ STIPA GUIÉNELUʼ CA XIIÑILUʼ

Biʼniʼ stipa guiéneluʼ ca xiiñiluʼ

Biblia ná: «Naquiiñeʼ chuʼtu listu para gucaadiágatu, cadi casi zetu gundaa ruaatu xiixa diidxaʼ» (Santiago 1:19). Zándaca cadi casi zeʼ ca xiiñiluʼ guiníʼ xi naguu xizaa laacaʼ. Peru pa gucaadiágaluʼ laacabe né stale paciencia la? jma nagueenda zábicabe lii xi cayuni sentírcabe.

Cadi caquiiñeʼ peʼ gucuiluʼ ca xiiñiluʼ para guiníʼneluʼ laacaʼ. Zanda gúniluʼ ni ora maʼ cayúnitu xiixa o zetu paxaraa. Zacá jma nagueenda zaníʼcabe xi cayácacabe.
Biiyaʼ cadi tan gucaadiaga o guʼyaʼ ca xiiñiluʼ noticia ni guchibi laacaʼ.
Gudxi ca xiiñiluʼ xi cayúniluʼ para gápaluʼ familia stiluʼ.
Gudixhe xi gúnitu pa guizaaca xiixa emergencia ne biʼniʼ practicarné ni ca xiiñiluʼ.

«Guniʼné ca xiiñiluʼ ne bidii lugar guiníʼcabe xi cayuni sentírcabe. Zándaca cadxíbicabe o cadxiichicabe peru qué nácabe gábicabe ni lii. Gudxi laacabe laaca huayuni sentirluʼ zacá ne xi huayacané lii chuʼluʼ jma tranquilu» (Bethany).