Ni naquiiñeʼ ganna ca ni napa xiiñiʼ

Racalaʼdxiʼ ca xpinni Cristu gannaxhii xiiñicaʼ Jehová ne guni dedicarcaʼ xpídacaʼ laabe. ¿Xi zanda gúnicabe para gacanécabe xiiñicabe chúʼnisa? ¿Pora nga maʼ zanda chuʼnísacabe yaʼ?

Biʼniʼ mandar Jesús ca discípulo stiʼ gacanecaʼ binni de guiráʼ guidxi gaca discípulo stibe ne cuʼnísacabe laacaʼ (Mat. 28:19). Nga runi, para ganda chúʼnisa tuuxa naquiiñeʼ gaca discípulo stiʼ Cristu. Ti discípulo stiʼ Cristu naquiiñeʼ guni cré ne guiene ni bisiidiʼ Jesús, peru laaca naquiiñeʼ guni guiráʼ ni biʼniʼ mandar Jesús. Ca ni nahuiiniʼ laaca zanda gúnicaʼ ni.

Lagudii ti ejemplu galán ca xiiñitu ne lagacané laacabe chindá stiidxaʼ Jehová ndaaniʼ ladxidóʼcabe (Deut. 6:6-9). Laguundané laacabe libru ¡Zanda guibániluʼ nayecheʼ! ti gunibiáʼcabe ca enseñanza básica ni zeeda lu Biblia ne chinándacabe ca principiu stiʼ Biblia ora quixhe íquecabe gúnicabe xiixa. Lagacané ca xiiñitu gánnacaʼ gusiénecaʼ ni runi crecaʼ (1 Ped. 3:15). Lagudii conseju ca xiiñitu ne lacuu gana laacabe purtiʼ nga zacané laacabe chuʼnísacabe ne guiniisicabe jma lu stiidxaʼ Dios. Laaca risaca gápacabe estudiu personal, chécabe reunión ne cadi guidxaagacabe tutiica ndaaniʼ congregación. Cadi gusaana de gacanetu laacabe para gápacabe meta espiritual.

Proverbios 20:11 ná: «Dede ti hombrehuiiniʼ rusihuinni lu ca ni runi pa nayá ladxidóʼ ne pa runi ni jneza». ¿Ximodo «rusihuinni» xiiñitu maʼ nuu listu para chúʼnisa yaʼ?

Lu Biblia riete dxi napa Jesús 12 iza ruzuubaruʼ diidxaʼ (Luc. 2:51). Zacaca nga naquiiñeʼ guzuubaʼ ca ni nahuiiniʼ stiidxaʼ bixhózecaʼ ne jñaacaʼ pa racaláʼdxicaʼ chuʼnísacaʼ (Hech. 5:29; Col. 3:20). Gunna ziuu ora zuchee xiiñiluʼ, peru naquiiñeʼ gúnibe stipa pur chinándabe ejemplu stiʼ Jesús ne guʼyaʼ xcaadxi binni ruzuubabe diidxaʼ.

Laaca naquiiñeʼ gusihuinni ca ni nahuiiniʼ racaláʼdxicaʼ guiziidicaʼ jma de Biblia (Luc. 2:46). Zanda gúʼyaluʼ pa riuuláʼdxibe chebe reunión ne pa riuuláʼdxibe gúʼndabe ne guni estudiarbe Biblia (Sal. 122:1; Mat. 4:4).

Ora cá ique ti joven chúʼnisa runi stipa pur guyubi Reinu stiʼ Dios primeru lu xpida (Mat. 6:33). Nánnabe cadi guendariguite nga dxiiñaʼ ni nápabe casi publicador, nga runi cadi caquiiñeʼ chuʼ tu gabi laabe guni predicarbe. Ne ruyúbibe xcaadxi modo guni predicarbe. Qué rituí lube gábibe ca maestru ne ca compañeru de scuela stibe testigu stiʼ Jehová laabe. Laaca raca preparar chaahuibe para ca asignación ni rápabe lu reunión Xhiiñaʼ Dios ne modo nabáninu.

Rúnibe stipa pur gúnibe ni jneza. Nga runi, ruyúbibe guidxaagabe ca ni runi ni jneza ne ribibe xi canción gucaadiágabe, xi película ne xi programa de televisión gúʼyabe, xi videojuego quítebe ne xi sitiu zanda chuʼbe lu Internet (Prov. 13:20; 1 Cor. 15:33).

Naaze dxiichiʼ stale joven ni dxandíʼ ne dede maʼ guyuunísacaʼ purtiʼ gucané bixhózecaʼ ne jñaacaʼ laacaʼ. Cuʼ Jehová ndaayaʼ guiráʼ stipa ni rúnitu para gacanetu ca xiiñitu chuʼnísacaʼ, purtiʼ nabé risaca ni para gaca xhamígucabe Jehová.

Ni naquiiñeʼ ganna publicador ni caʼruʼ chúʼnisa

Cumu runi estudiarluʼ Biblia la? maʼ runibiaʼluʼ Dios, nápaluʼ fe zuni cumplirbe ca promesa stibe ne rusihuínniluʼ maʼ biniisiluʼ lu stiidxabe dede gúcaluʼ publicador. Jneza ni cayúniluʼ (Juan 17:3; Heb. 11:6).

Zándaca ante guʼndané ca testigu stiʼ Jehová lii maca nápaluʼ religión o qué lica riuuláʼdxiluʼ nin ti religión. Zándaca bíʼniluʼ ca cosa ni ná Biblia cadi jneza. Peru yanna maʼ cusihuínniluʼ nápaluʼ fe purtiʼ maʼ guca arrepentirluʼ ne dede naná nuu ladxidoʼloʼ pur ca cosa malu bíʼniluʼ dxiqué. Laaca maʼ bichaaluʼ modo nabániluʼ ne maʼ gudixhe íqueluʼ gúniluʼ ni riuulaʼdxiʼ Dios (Hech. 3:19).

Zándaca dede nahuiiniluʼ bisiidicabe lii xi ná Biblia. Ne nga huayacané lii guibániluʼ jneza ne cadi gúniluʼ cosa ni qué riuulaʼdxiʼ Dios (2 Tim. 3:15). Maʼ biziidiluʼ gucaanaluʼ ca binni o ca cosa ni zándaca gucaa lii gucheeneluʼ Jehová. Ne rusihuínniluʼ nápaluʼ fe purtiʼ cadi cusaanaluʼ de guni adorarluʼ Dios jneza ne rábiluʼ xcaadxi binni xi runi creluʼ. Ne cumu maʼ biziidiluʼ modo guni predicarluʼ la? maʼ gudixhe íqueluʼ gácaluʼ publicador ni caʼruʼ chúʼnisa.

Pa dede nahuiiniluʼ o maʼ huaniisiluʼ binibiaʼluʼ Jehová, zándaca maʼ caníʼ íqueluʼ gaca dedicarluʼ ne chuʼnísaluʼ. Raca dedicarnu Jehová ora rábinu laa lu ti oración maʼ gudixhe íquenu gúninu ni ná para siempre (Mat. 16:24). Ne despué riuʼnísanu para gusihuínninu maʼ guca dedicarnu laabe (Mat. 28:19, 20). Ora maʼ guca dedicarnu Jehová ne maʼ guyuʼnísanu nga maʼ nácanu tobi de ca ni runi xhiiñaʼ Dios. ¿Cadi dxandíʼ nabé sicarú nga la?

Qué nindaa de guyuunisa Jesús «yené espíritu [laabe] lu desiertu para guni tentar Binidxabaʼ laabe» (Mat. 4:1). Ra cayuundaluʼ Biblia maʼ biziidiluʼ zápaluʼ prueba, ne jmaruʼ si despué de chuʼnísaluʼ (Juan 15:20). Zándaca gucaalú familia stiluʼ lii, guni burla ca xcompañéruluʼ lii ra scuela, ra dxiiñaʼ o ca ni guca xhamíguluʼ (Mat. 10:36). Nga runi, galán pa cadi gusiaandaluʼ ca diidxaʼ guníʼ Jesús riʼ: «Gábecaʼ laatu, guiráʼ tu gusaana lidxi, biʼchiʼ, bizaʼnaʼ, jñaa, bixhoze, xiiñiʼ o layú pur naa ne pur ca noticia galán la? zacaa jma de 100 de ni bisaana tiempu riʼ —lidxi, biʼchiʼ, bizaʼnaʼ, jñaa, xiiñiʼ ne layú, neca gucaalúcabe laa— ne lu ca dxi ni zeeda ca zacaa guendanabani ni qué zaluxe» (Mar. 10:29, 30). Cadi lica gusaana de gúniluʼ stipa pur chuʼluʼ gaxha de Jehová ne pur chinándaluʼ ca ley stibe.

Ora maʼ racaláʼdxiluʼ chuʼnísaluʼ, gudxi ni ca ancianu de congregación stiluʼ. Laacabe zuundanécabe lii ca pregunta ni zeeda raríʼ ti gúʼyacabe pa maʼ nuuluʼ listu para chuʼnísaluʼ. Zanda gúʼndaluʼ ca pregunta riʼ lu estudiu personal stiluʼ.

Ora maʼ cayuundaluʼ ca pregunta ca biindaʼ ca textu zeeda lúcani ne guníʼ ique xi cusiidicani lii. Zanda gucaaluʼ intiica ni gacaláʼdxiluʼ lu folletu riʼ o ra naluʼ. Ne ora guʼndané ca ancianu lii ca pregunta ca la? zanda guxhéleluʼ folletu stiluʼ ne gúʼyaluʼ ni bicaaluʼ. Pa nagana cayaca para lii guiéneluʼ xiixa pregunta la? zanda gábiluʼ hermanu ni cusiidiʼ lii de Biblia o tuuxa ancianu gacané lii.

Ora guinabadiidxacabe lii, cadi gúʼndaluʼ respuesta stiluʼ, sínuque bisiene ni biéneluʼ, cadi gutáleluʼ diidxaʼ ne guníʼ modo guiénecabe lii. Laaca zanda guzeeteluʼ tobi o chupa textu ni cusiene pregunta ca.

Pa guʼyaʼ ca ancianu caʼruʼ gunibiáʼ chaahuiluʼ ni rusiidiʼ Biblia la? zuyúbicabe tu gacané lii guiene chaahuiluʼ Stiidxaʼ Dios para ganda gusiéneluʼ ni nani ti ganda chuʼnísaluʼ despué.

[Nota para ca ancianu: Lu yaza 54 hasta 59 zeeda ximodo naquiiñeʼ gaca ca reunión ni zapanetu ca ni racalaʼdxiʼ chúʼnisa].