Ni naquiiñeʼ ganna ca ni chichuunisa

Riuunisa binni lu ca asamblea ni rapa ca testigu stiʼ Jehová. Ora mayaca guiluxe discursu para ca ni chichuunisa zuzuhuaacabe para guicábicabe ca pregunta zeeda raríʼ:

1. ¿Ñee maʼ guca arrepentirluʼ de ca pecadu stiluʼ, maʼ guca dedicarluʼ Jehová ne maʼ biʼniʼ aceptarluʼ Jesúcristu nga biquiiñeʼ Jehová para gulá laanu la?

2. ¿Ñee maʼ riéneluʼ ora chuʼnísaluʼ cusihuínniluʼ nezalú binni maʼ nácaluʼ testigu stiʼ Jehová ne dede yanna maʼ nácaluʼ parte de organización stiʼ Dios la?

Ora guicábicaʼ ca ni chichuunisa «maʼ» guiropaʼ pregunta riʼ «caníʼcabe» nápacabe fe gudixe Jesús para guilácabe ne maʼ guca dedicárcabe Jehová para gúnicabe ni ná (Rom. 10:9, 10). Dede ante naquiiñeʼ guni orárcabe ne guiníʼ ique chaahuicabe guiropaʼ pregunta ca ti ganda guicábicabe de guidubi ladxidóʼcabe.

¿Ñee maʼ bíʼniluʼ ti oración Jehová para gaca dedicarluʼ laabe, para guni prometerluʼ zuni adorarluʼ laasibe ne para gábiluʼ laabe ni jma risaca para lii nga gúniluʼ ni nabe la?

¿Ñee maʼ nuuluʼ seguru naquiiñeʼ chuʼnísaluʼ casi peʼ ganda la?

¿Xi lari naquiiñeʼ gacuʼ binni ora maʼ chichuunisa? (1 Tim. 2:9, 10; Juan 15:19; Filip. 1:10).

Ca ni chichuunisa naquiiñeʼ gácucaʼ lari jneza, «cadi tidisucaʼ ora guzuchaahuicaʼ ne gúnicaʼ ni né guendabiaaniʼ» ne zacá gusihuínnicaʼ dxandíʼ runi adorarcaʼ Dios. Ne cadi naquiiñeʼ gácucabe lari ni gusihuinni cuerpu stícabe o ni cá dibuju o letra lú. Naquiiñeʼ gácucabe lari nayá ne biaʼsi para ca ni chichuunisa.

¿Xi cadi naquiiñeʼ guni tuuxa ora maʼ chichuunisa? (Luc. 3:21, 22).

Naquiiñeʼ gúninu cásica biʼniʼ Jesús dxi guyuunisa. Gúnnabe cadi guendariguite nga chúʼnisa binni, ne bisihuínnibe ni pur ni bíʼnibe ora guyuunísabe. Nga runi, ra riuunísacabe ca, cadi ti lugar diʼ ra guiníʼ binni chiste, xhuʼbaʼ o guni sti cosa ni gusihuinni cadi cayuni respetar dxi ca. Laaca cadi galán diʼ guni ca ni cayuunisa xiixa ni gusihuinni casi ora biʼniʼ ganarcaʼ. Neca naquiiñeʼ chuʼ binni nayecheʼ dxi ca la? cadi naquiiñeʼ tidisú.

Pa qué guiaadxaluʼ reunión ne guidxaagaluʼ ca hermanu de congregación, ¿ximodo zacanécani lii para cadi gusaana de gúniluʼ ni ná Jehová?

Despué de maʼ guyuunísaluʼ, ¿xiñee nabé risaca cadi gusaana de gápaluʼ estudiu personal ne guni predicarluʼ gatigá?

NI NAQUIIÑEʼ GUNI CA ANCIANU DE CONGREGACIÓN

Ora guiníʼ ti publicador maʼ racalaʼdxiʼ chúʼnisa, naquiiñeʼ gábitu laabe gúʼndabe «Ca pregunta para ca ni racalaʼdxiʼ chúʼnisa», ni zeeda lu yaza 12 hasta 53 stiʼ folletu riʼ. Naquiiñeʼ gúʼndabe ndaa ra ná «Ni naquiiñeʼ ganna publicador ni caʼruʼ chúʼnisa», ni zeeda lu yaza 7, racá cusiene laabe ximodo gaca prepararbe ora guiniʼné ca ancianu laabe. Ne lu ndaa ca ná zanda gúʼyabe ca ni bicaabe ne zanda guxhélebe folletu stibe. Peru cadi caquiiñeʼ diʼ chuʼ tu guʼndané ca pregunta ca laabe ante guʼndané ca ancianu laabe.

Tuuxa ni maʼ racalaʼdxiʼ chúʼnisa naquiiñeʼ guiniʼné coordinador stiʼ cuerpu de ancianu. Despué de maʼ biindaʼ publicador ca «Ca pregunta para ca ni racalaʼdxiʼ chúʼnisa», zanabadiidxaʼ coordinador stiʼ cuerpu de ancianu laabe pa maʼ guca dedicarbe Jehová lu ti oración ra cayábibe laa racaláʼdxibe gúnibe ni ná. Pa maʼ guca dedicarbe Jehová la? maʼ zanda guinabaʼ coordinador ca chupa ancianu guʼndané laabe «Ca pregunta para ca ni racalaʼdxiʼ chúʼnisa». Gadxé gadxé ancianu guʼndané laabe cada ndaa. Cadi naquiiñeʼ diʼ cuézacabe guiete chichuu ti asamblea para guʼndanécabe publicador ca.

Zanda guiuundaʼ guiropaʼ ndaa ca gadxé gadxé dxi ne biaʼ ti hora zanda guiuundaʼ cada tobi, peru zanda guindaacani jma pa caquiiñeʼ gaca ni. Cada ndaa naquiiñeʼ guzulú ne guiluxe né oración. Nin publicador ni chichuunisa ca ninca ca ancianu, cadi naquiiñeʼ guʼndaʼ lúgucaʼ ca pregunta ca. Ca ancianu ni guʼndané publicador ca jma naquiiñeʼ gusisácacaʼ guʼndanecaʼ laabe neca nuuruʼ xcaadxi dxiiñaʼ gúnicaʼ.

Jma galán guʼndanécabe cada tobi de ca ni chichuunisa ne cadi pur grupu. Ti ganda gucaadiaga chaahuicabe ni guicabi cada tobi, nga zacané laacabe gúʼyacabe pabiáʼ maʼ riénebe ca ni rusiidiʼ Biblia ne gúʼyacabe pa maʼ zanda chúʼnisabe o coʼ. Ne zacá qué zatuí lube guiniʼbe xi riníʼ íquebe. Ne ca guendaxheelaʼ ca zanda guʼndanécabe laacaʼ juntu.

Pa ti publicadora nga ni chiguundané ti ancianu la? naquiiñeʼ chúʼcabe ra zanda guʼyaʼ xcaadxi binni laacabe peru sin gunadiágacaʼ laacabe. Zanda guni acompañar tuuxa ni chiguni ca pregunta ca, zanda gaca ni ti ancianu o ti siervu ministerial, según ndaa ra chiguni repasárcabe, casi cusiene sti párrafo riʼ.

Pa huaxiéʼ ancianu napa ti congregación la? zanda iquiiñecabe ti siervu ministerial capacitadu para guʼndané ca ni chichuunisa «Primé ndaa: Ca enseñanza básica ni zeeda lu Biblia». Ne ca ancianu si nga naquiiñeʼ guʼndané laacabe «Guiropa ndaa: Modo naquiiñeʼ guibani ca xpinni Cristu». Pa huaxiéʼ hermanu capacitadu napa congregación ca la? zanda guyubi superintendente de circuito ancianu ndaaniʼ sti congregación ni nuu gaxha para gacané laacabe.

Pa nahuiiniʼ ni chichuunisa ca zanda chuʼ bixhózebe ne jñaabe o tobi de laacabe pa xpinni Cristu laacaʼ ora guʼndanécabe laabe. Pa qué zanda chuʼ bixhózebe nin jñaabe la? zanda guʼndané chupa ancianu laabe (o ti ancianu ne ti ministerial, peru naquiiñeʼ gúʼyacabe pa zanda chuʼ ministerial ca lu ndaa ni chiguiuundaʼ ca).

Naquiiñeʼ guʼyaʼ ca ancianu pa jneza riene publicador ni chichuunisa ca ni rusiidiʼ Biblia. Ne naquiiñeʼ chúʼcabe seguru risaca ni rusiidiʼ Biblia para laabe ne pa rusihuínnibe nápabe stale respetu organización stiʼ Jehová. Pa qué riene chaahuibe ca ni rusiidiʼ Biblia la? zuyubi ca ancianu tu gacané laabe ti ganda chuʼbe listu para chuʼnísabe despué. Nuu publicador caquiiñeruʼ gusihuinni risaca para laa guni predicar o chinanda ni naguixhe organización stiʼ Jehová. Ca ancianu naquiiñeʼ gúʼyacaʼ ximodo jma jneza iquiiñecaʼ biaʼ ti hora para guʼndanecaʼ publicador ca. Cadi guirá diʼ ca pregunta ca zaquiiñeʼ biáʼqueca tiempu, peru naquiiñeʼ guʼndanécabe laabe guiráʼ ni.

Guiluxe guʼndanésicabe laabe guiropaʼ ndaa ca, naquiiñeʼ gaca reunir ca ancianu ni biʼndané laabe para gúʼyacaʼ pa zanda chuʼnísabe o pa coʼ. Naquiiñeʼ guʼyaʼ ca ancianu pabiáʼ scuela guzabe, pabiáʼ riénebe ne xcaadxi cosa. Ni jma racalaʼdxiʼ ca ancianu nga gannaxhii publicador ca Jehová ne guiene ni rusiidiʼ Biblia. Ra gacanetu ca ni chúʼnisa zaziidiʼ chaahuicaʼ modo guni predicarcaʼ ca noticia galán stiʼ Reinu.

De racá la? zaniʼné tobi o chupa ancianu ni biʼndané laabe para gábicaʼ laabe pa ziuunísabe o coʼ. Pa ziuunísabe la? zuundané ca ancianu laabe ra ná: «Ni naquiiñeʼ ganna ca ni chichuunisa» ni zeeda lu yaza 51 hasta 53. Pa caʼruʼ guiluxe gúʼndabe libru ¡Zanda guibániluʼ nayecheʼ! la? zabi ca ancianu laabe guiluxe gúʼndabe cani. Naquiiñeʼ gábicabe publicador ca zacá fecha chichuunisa lu tarjeta stiʼ. Naquiiñeʼ gabi ca ancianu laabe zaquiiñeʼ información riʼ para ganda guiaapaʼ guiráʼ dxiiñaʼ cayaca ndaaniʼ xquidxi Jehová lu guidubi Guidxilayú. Ne zacá gúnibe xcaadxi dxiiñaʼ ndaaniʼ xquidxi Dios ne laaca zanda gacanécabe laabe cadi guixélebe de Dios. Laaca naquiiñeʼ gusietenalaʼdxiʼ ca ancianu laabe zaquiiñeʼ guiráʼ información bidiibe casi ná «Política global ni rapa datu stiʼ cada testigu stiʼ Jehová», ni nuu lu jw.org. Cadi naquiiñeʼ diʼ guindaa reunión riʼ jma de chii minutu.

Gusaasibe ti iza de guyuunísabe, zaniʼné chupa ancianu laabe para cuʼcaʼ gana ne gudiicaʼ xiixa conseju laabe. Tobi de ca ancianu ca naquiiñeʼ gaca superintendente de grupu stibe. Ne pa nahuiinibe la? naquiiñeʼ chuʼ bixhózebe ne jñaabe o tobi de laacabe. Naquiiñeʼ uguucabe gana laabe ne guni sentirbe galán ora guiniʼnécabe laabe. Naquiiñeʼ gabi ca ancianu laabe pabiáʼ maʼ biʼniʼ progresarbe ne gábicabe laabe xi zanda gúnibe para cadi gusaanabe estudiu personal stibe, gúʼndabe Biblia guiráʼ dxi, gápabe adoración en familia guiráʼ semana, cadi guiaadxabe reunión ne guni comentarbe ne guni predicarbe guiráʼ semana (Efes. 5:15, 16). Pa caʼruʼ guiluxe gúʼndabe libru ¡Zanda guibániluʼ nayecheʼ! la? zuyubi ca ancianu tu gacané laabe para guiluxe gúʼndabe cani. Zabi ca ancianu laabe guiráʼ ni galán cayúnibe para uguucaʼ gana laabe. Ne zudiicaʼ laabe tobi o chupa conseju si ni jma caquiiñebe.