Nuu lá Dios lade dani

ÑEE huayunadiágaluʼ lá Saint Moritz la? Zándaca huayunadiágaluʼ de laani purtiʼ stale binni riganna lugar ca, ne laani nuuni ndaaniʼ valle de Engadina. Peru Saint Moritz ca nga tobi de ca lugar ra maʼ xadxí riuulaʼdxiʼ binni chiganna ne laani nuuni lade ca dani ni láʼ Alpes. Riaanani ladu gueteʼ de Suiza ni dxaaga Italia. Laaca redagunibiáʼcabe ti lugar sicarú ni láʼ Parque Nacional Suizo, ra nuu stale guieʼ sicarú ne stale maniʼ ni rusisaca Jiobá, Dios ni bizáʼ guiráʼ xixé cani (Sal. 148:7-10). Peru cadi nga si rusisaca Jiobá, sínuque laaca nuu xcaadxi cosa ni bíʼnicabe biaʼ galaa de siglu XVII ni rusisaca laabe.

Lu ca yoo ni nuu lade ca dani que rihuinni xiixa nabé risaca. Cueʼ stale de ca yoo que cá lá Dios ne stale biaje rucaacabe ni ruaa puertaʼ stícabe. Maʼ xadxí gupa ca binni que costumbre gucaacaʼ xiixa cueʼ lídxicaʼ, nuu tu laa runi ni né pintura, xcaadxi ribágucaʼ lu guié ni nápani o ruraacaʼ lu repellu ora guiluxe lídxicaʼ. Lu foto ca zuuyaluʼ ti yoo ni nuu guidxi huiiniʼ ni láʼ Bever ra cá caadxi diidxaʼ. Sicaríʼ riníʼ ca diidxaʼ ca: «Iza 1715. Maca nuu Jiobá dxi bizulú guiráʼ ni ne zaluxe guiráʼ ni nuuruʼ Jiobá. Pur Dios nuu guiráʼ ca cosa ca ne sin laabe qué ñuucani». Casi maʼ bidúʼyanu ca, chupa biaje rieeteʼ lá Dios lu letreru ni maʼ xadxí de gucuá ca.

Ndaaniʼ sti guidxi huiiniʼ ni láʼ Madulain, zadxélanu sti letreru ni jma maʼ xadxí de gucuá. Sicaríʼ na letreru que: «Salmo 127. Pa Jiobá qué ñacané nibí ti yoo la? pur gana si biʼniʼ ca albañil dxiiñaʼ. Lucio Rumedio. Iza 1654».

Xiñee bicaacabe lá Dios cueʼ ca yoo ra zanda guʼyaʼ ni binni yaʼ. Dxi guca ni rábicabe Reforma protestante, bicaacabe Biblia lu diidxaʼ romanche, ti diidxaʼ ni zeeda de latín ni riníʼcabe Engadina. Ne laani nga primé libru ni bitiixhicabe lu diidxaʼ ca. Qué ñuu dxi nusiaandaʼ ca binni de raqué ni biindacaʼ lu Stiidxaʼ Dios. Nga runi, ora bicaacabe xiixa letreru cueʼ lídxicabe o ruaa puertaʼ stícabe qué nucaasícabe lácabe, sínuque bicaacabe textu ni zeeda lu Biblia ra cá lá Dios.

Despué de gayuaa iza, cusisácaruʼ ca letreru riʼ lá Dios. Pa nabezuʼ lade ca dani riʼ o napuʼ gana chigunibiaʼluʼ ni la? cayuni invitardu lii guiziidiluʼ jma de Dios riʼ ndaaniʼ ti yoo ni napa ti letreru ra cá labe ne laani nga: Yoo stiʼ Reinu stiʼ ca Testigu stiʼ Jiobá ni nuu Bever.

[Paraa gucuaacabe dibuju o foto ni zeeda lu yaza 7]

© Stähli Rolf A/age fotostock