Ñee zucaadiáganu Jiobá ora quixhená laanu la?

«Ndiʼ nga neza ca. Lasá luni.» (ISA. 30:21)

1, 2. Xi cá ique Binidxabaʼ guni laanu, ne ximodo racané Stiidxaʼ Dios laanu.

GUZÉʼTENU de ejemplu ra ziuunu de viaje ni guninu lu primé tema que. Guiníʼ íquenu ziuunu lu carretera, ne raqué ridúʼyanu ti seña ni culuíʼ laanu ti neza gadxé de ra chuunu. Pa chuunu neza ra culuiʼni que, zunítinu tiempu ne zaguʼnu xquendanabáninu ra naxoo. ¡Galán nga gudxi ti xhamígunu laanu cadi chuudinu neza ra culuíʼ seña que, purtiʼ nuu ti binni ni guluuni raqué para quítebe cani cheʼ neza que! Zinándanu ni gudxi xhamígunu laanu ne qué zaníʼ íquenu ni chupa biaje.

² Tuu nga zeeda gaca casi binni ni bichaa seña ni bizéʼtenu lu ejemplu ca yaʼ. Binidxabaʼ, purtiʼ laa racalaʼdxiʼ guinítinu neza ra ziuunu (Apo. 12:9). Racaláʼdxibe cueebe laanu de lu neza ra zacaanu guendanabani ni qué zaluxe, ne para gúnibe nga riquiiñebe caadxi cosa ni zeeda gaca casi seña biquiiñeʼ hombre ni bizéʼtenu ca. Ne lu tema gudídinu ca bidúʼyanu chonna de cani riquiiñebe para cueechube laanu (Mat. 7:13, 14). Peru galán nga nápanu ti binni ni nabé xhamígunu ni caguixhená laanu de ca trampa ca, laabe nga Jiobá. Peru riquiiñeruʼ Binidxabaʼ stale trampa. Guidúʼyanu xhonna de laacani. Ora guidúʼndanu ximodo racané Biblia laanu para cadi quite Binidxabaʼ laanu la? zeeda gácani casi ora nuzuhuaa Jiobá neza déchenu ne ñabi laanu paladu nga jma jneza chuunu né ca diidxaʼ riʼ: «Ndiʼ nga neza ca. Lasá luni» (Isa. 30:21). Galán guiníʼ íquenu pabiáʼ nayaguieʼ modo riguixhená Dios laanu, purtiʼ zacá qué zaréʼchunu de neza stibe.

Guixélenu de cani rusiidiʼ «ni cadi dxandíʼ zeeda de Dios»

3, 4. 1) Xiñee rininu zeeda gaca ca maestru ni qué rusiidiʼ ni dxandíʼ casi bizé ni nabidxi. 2) Padé riree ca maestru ni qué rusiidiʼ ni dxandíʼ, ne xi racaláʼdxicabe gúnicabe.

³ Guibiguetaʼ guzéʼtenu de biaje cayúninu que. Zándaca ora tiidinu lu ti pampa guidúʼyanu rihuinni ti bizé zitu de ra nuunu que. Oraqueca ziuunu ra nuu ni purtiʼ guizáʼ maʼ cayátinu nisa. Peru ora chindanu ra nuu bizé que rudiʼnu cuenta nabidxi ni. ¡Triste si ziaananu óraque! Zanda guininu zeeda gaca nisa ca guiráʼ ni rusiidiʼ Biblia, ne ca maestru ni qué rusiidi ni dxandíʼ ca zeeda gácacaʼ casi bizé ni nabidxi que. Binni ni rié ra nuucabe para gusiidicabe laacaʼ ni zeeda lu Biblia, ngueca si rusaanacabe laacaʼ. Peru Jiobá caguixhená laanu para cadi chiguiábanu ndaaniʼ náʼ ca binni ca, ne biquiiñebe Pablu ne Pedru para bíʼnibe ni (biindaʼ Hechos 20:29, 30 ne 2 Pedro 2:1-3). Guidúʼyanu ca conseju bicaacabe ti gudiʼnu cuenta tuu nga ca maestru ni qué rusiidiʼ ni dxandíʼ, padé zeedacabe ne ximodo rúnicabe dxiiñaʼ.

⁴ Sicaríʼ gudxi Pablu ca binnigola ni nuu Éfeso: «Dede lade ca tu ziuu tu guiasa usiguii ca xcaadxi para chi nanda laacaʼ». Ne Pedru bicaa ra nuu ca biʼchiʼ ne ca bizaʼnaʼ: «Ziuu tu usiidi laatu ni cadi dxandí zeeda de Dios». Maʼ bidúʼyanu padé zeedacabe la? Stale biaje riree ca maestru ca de lade ca binni ridagulisaa. Laacabe nga ca binni ni maʼ bixeleʼ de Dios ne rucaalucaʼ xquídxibe. Xi racaláʼdxicabe gúnicabe yaʼ. Qué rusaanasícabe xquidxi Dios ni zándaca gunnaxhiicabe dxiqué. Pablu bisihuinni xipeʼ nga racaláʼdxicabe: «Para [gucaacabe ca discípulo] chi nanda laaca[be]», casi ora nixubiyúcabe laacaʼ. Zacá nga laani, ca binni ni maʼ bixeleʼ de Dios racaláʼdxicaʼ guireenecaʼ cani maʼ naca discípulo stiʼ Cristu. Qué ruyubidícabe xpínnicabe lade cani qué runi cré Dios, sínuque de lade ca binni ridagulisaa ruyúbicabe binni chinanda laacabe. «Naduxhu cabe casi gueuʼ», ne racaláʼdxicabe guxuuxecabe ca xpinni Cristu ni canayasi, ra gusirácabe fe sticaʼ ne cueecabe laacaʼ lu neza ra caziidicaʼ ni dxandíʼ (Mat. 7:15; 2 Tim. 2:18).

5. Ximodo runi ca maestru ni qué rusiidiʼ ni dxandíʼ dxiiñaʼ.

⁵ Ca maestru ni qué rusiidiʼ ni dxandíʼ nabé nexhenacaʼ para gúnicaʼ dxiiñaʼ. Biblia na nagaʼchiʼ modo zaguítecabe ique ca xpinni Cristu, cásica runi ti binni malu para gutoo xiixa ndaaniʼ sti guidxi, nagaʼchiʼ modo riguube cani. Racaláʼdxicabe guiníʼ ique ca binni ridagulisaa modo riníʼ íquecabe sin gudiicaʼ cuenta. Ne casi racalaʼdxiʼ tuuxa guicaa binni ca billete ni qué ridiʼdiʼ la? zacaca nga racalaʼdxiʼ ca maestru ni rusiguii ca gucaacaʼ laanu guni crenu «intiica ni cadi dxandí». Riguucabe guiráʼ «ni nadxabaʼ» cá íquecabe ne «adxé modo» rusiénecabe caadxi textu para gudiicani modo riníʼ íquecabe (2 Ped. 2:1, 3, 13; 3:16). Rihuinni dxíchica cadi cuyúbicabe chuʼnu galán. Pa chinándanu laacabe la? zabeechusícabe laanu de neza ra ziuunu para guicaanu guendanabani ni qué zaluxe.

6. Xi mandatu cudii Biblia laanu de ca maestru ni qué rusiidiʼ ni dxandíʼ.

⁶ Ximodo zanda gápanu laanu yaʼ. Ra chinándanu ca conseju rudii Jiobá laanu (biindaʼ Romanos 16:17 ne 2 Juan 9-11). Biblia canabaʼ ca xpinni Cristu guixélecaʼ de ca binni ni maʼ bidxiideche Dios, o casi na xcaadxi Biblia «lachuu zitu de laacabe» ne pa ganda dede «laguxooñeʼ de laacabe». ¡Guizáʼ nayaguieʼ modo cayabi Dios laanu xi naquiiñeʼ gúninu! Xi rúninu ora guni mandar ti doctor laanu cadi chuʼnu gaxha de tuuxa ni napa ti guendahuará malu ni ricá ni zanda guuti laanu yaʼ. Pa gábibe laanu xiixa zacá, qué zaníʼ íquenu chupa biaje para chinándanu ni gúdxibe laanu. Jiobá zeeda gaca casi ti Doctor Chaʼhuiʼ, ne cayuni mandar laanu cadi liica guidxaaganu tutiica maestru ni qué rusiidiʼ ni dxandíʼ. Xiñee yaʼ. Purtiʼ zeeda gácacabe casi ti binni ni napa ti guendahuará malu ne racaláʼdxicabe gucaacabe ni laanu, o rápacabe gana guni crenu guiráʼ ni rusiidicabe (1 Tim. 6:3, 4). Racá ridúʼyanu maca gudixhe Dios xi cadi naquiiñeʼ gúninu, peru ñee laaca maʼ gudixhe íquenu chinándanu ni nabe guiráʼ ora la?

7, 8. 1) Gunáʼ nga ca modo rixélenu de ca maestru ni qué rusiidiʼ ni dxandíʼ. 2) Xi razón napuʼ para quixhe íqueluʼ gucaanaluʼ ca maestru ni qué rusiidiʼ ni dxandíʼ.

⁷ Ximodo zanda guixélenu de ca maestru ni qué rusiidiʼ ni dxandíʼ yaʼ. Ra qué guinínenu laacabe ne cadi gudiʼnu lugar chúʼcabe ralídxinu. Qué liica ridúʼndanu ca libru ne revista stícabe, ne qué rucaadiáganu guiráʼ ni rutiidicabe lu televisión o lu Internet, ne laaca qué rucaʼnu xi riníʼ íquenu lu ca yaza ni nápacabe lu Internet. Xiñee maʼ gudixhe íquenu guixélenu de laacabe yaʼ. Primé la? purtiʼ nadxiinu Jiobá, «Dios ni dxandíʼ». Nga runi, qué liica rizaaláʼdxinu guiráʼ ni riníʼcabe para gucaalúcabe ni rusiidiʼ Stiidxaʼ Dios (Sal. 31:5; Juan 17:17). Guiropa razón nga purtiʼ nadxiinu xquidxi Dios, ni maʼ bisiidiʼ laanu caadxi cosa casi tu lá Dios ne xi riníʼ labe, xi pur guyáʼ Guidxilayú, ximodo nuu ca gueʼtuʼ ne nánnanu zadxiña dxi gusibani Dios laacabe. Ñee rietenaláʼdxinu ximodo biʼniʼ sentirnu primé biaje bisiénecabe laanu ca cosa sicarú ca la? Yanna, xiñee ndiʼ gucaadiáganu ca binni ni maʼ bixeleʼ de Dios, cani xcustu guiniʼcaʼ mal de guidxi ni maʼ bisiidiʼ laanu stale cosa yaʼ. Zucaasícabe laanu gutópanu xiana ndaaniʼ ladxidoʼno cásica nuucabe (Juan 6:66-69).

⁸ ¡Zanda guiníʼ ca maestru ni qué rusiidiʼ ni dxandíʼ guiráʼ ni gápacaʼ gana! Qué liica zulábinu laacaʼ. Xiñee ndiʼ gúninu ni yaʼ. Zeeda gácacabe casi bizé ni qué gapa nisa, zusiguiisícabe laanu ne zuchiichicabe laanu. Maʼ gudixhe íquenu cadi guixélenu de Jiobá ne de xquidxi. Guidxi riʼ qué huayuu dxi gusaanatáʼ laanu ne rusiidiʼ laanu stale cosa sicarú ni cá lu Biblia ni zeeda gaca casi nisa nayá (Isa. 55:1-3; Mat. 24:45-47).

Guixélenu de ca «cuentu yooxhoʼ»

9, 10. Ximodo gudixhená Pablu Timoteu, ne xi «cuentu yooxhoʼ» ngue zándaca caníʼ íquebe. (Biiyaʼ nota ni cá ñee sti yaza ca.)

⁹ Ora maʼ ziuunu lu ti carretera, nuu biaje ridúʼyanu ti seña ne nagueendaca rudiʼnu cuenta maʼ bichaacabe ni purtiʼ culuiʼni laanu chuunu sti ladu ni cadi jneza. Peru ziuu biaje zaca nagana para laanu gudiʼnu cuenta de laani. Ngaca nga ni rizaaca né ca trampa stiʼ Binidxabaʼ: nuu cani jma nagueenda zaguite cani laanu que xcaadxi. Lade cani huaxiéʼ rihuinni nuu ca «cuentu yooxhoʼ» o «irá cuentu ribee ca judíu» (biindaʼ 1 Timoteo 1:3, 4; zanda gúʼndaluʼ Tito 1:14). Pa qué racaláʼdxinu guireʼnu de lu neza ra zacaanu guendanabani ni qué zaluxe la? naquiiñeʼ ganna chaahuinu xii nga ca cuentu ni bizeeteʼ Pablu ne xi zanda gúninu para cadi quite cani laanu.

¹⁰ Primé carta ni gucuá ra nuu Timoteu nga caguixhená laanu de ca cuentu yooxhoʼ ca. Lu carta ca caguu Pablu gana binnigola que para guʼyaʼ chuʼ ca xpinni Cristu nayá nezalú Dios ne gacanebe laacaʼ guzuhuaacaʼ dxiichiʼ (1 Tim. 1:18, 19). Diidxaʼ griegu ni biquiiñeʼ Pablu ora guníʼ de ca «cuentu yooxhoʼ» riníʼcani de ora «cusiguii tuuxa» ne ora «ruzáʼ si tuuxa ti historia». Ti libru na laani nga ti historia ni qué zanda guni cré binni purtiʼ cadi dxandíʼ ni (Diccionario exegético del Nuevo Testamento). Zándaca caníʼ Pablu de «irá cuentu ribee ca judíu» ni zeeda de historia yooxhoʼ bizáʼ binni ni nabé riuulaʼdxiʼ binni gucaadiaga.a Pablu na rucaa ca historia riʼ binni guinabadiidxaʼ stale cosa. Xiñee yaʼ. Purtiʼ ora gunadiaga binni cani rucaacani laacaʼ cueecaʼ tiempu para gúʼyacaʼ pa dxandíʼ cani. Ngapeʼ nga trampa ni jma riuulaʼdxiʼ Binidxabaʼ iquiiñeʼ para quite binni. Zacá nga laani, laabe nabé riquiiñebe stale cosa ni cadi dxandíʼ ni rusiidiʼ stale religión para gusiguiibe cani nayaaguiʼ. Nga runi, qué gápanu paraa quiñeyunu conseju ni bidii Pablu riʼ: ¡Cadi gulábitu ca cuentu ca!

11. Ximodo riguite Binidxabaʼ ique binni ora riquiiñebe religión ni cadi dxandíʼ, ne xi conseju zacané laanu para cadi quítebe laanu.

¹¹ Xi cuentu ndiʼ zándaca quite laanu pa qué gatananu yaʼ. Zanda guininu zeeda gaca ca «cuentu yooxhoʼ» ca intiica historia o xiixa cosa ni cadi dxandíʼ rusiidiʼ ca religión. Ñee zanda guninácani binni la? Biblia na pur laacani «zudxii deche [stale binni] ni zeeda de Dios» (2 Tim. 4:3, 4). Binidxabaʼ «rutiidi laa casi tobi ni zeeda de Dios», ne riquiiñebe religión ni cadi dxandíʼ para quítebe binni (2 Cor. 11:14). Ca religión ca rusiidicaʼ stale cosa ni cadi dxandíʼ ne rúnicabe ni casi ora ñaca Biblia rusiidiʼ cani, caadxi de cani rusiidicabe nga Trinidad, nácabe napa binni ti alma ni qué rati ne laaca rusiidicabe nuu ti infiernu ra raca castigar binni. Laaca rucaacabe binni guni saa casi Navidad ne Nabaana, ne stale de ca saa ca ruluíʼ cadi malu cani, peru bireecani de cuentu ne de ca religión ni qué rusiidiʼ ni dxandíʼ. Para cadi quite ca cuentu ni cadi dxandíʼ casi cani maʼ bizéʼtenu ca laanu la? cadi gusaananu de chinándanu conseju ni cudii Jiobá riʼ: «Laixele de laacabe, ne cadi cana tu ni cadi nayá para naa» (2 Cor. 6:14-17).

12, 13. 1) Xi chonna guendarusiguii rucaa Binidxabaʼ guiníʼ ique binni, peru xii nga ni dxandíʼ. 2) Xi naquiiñeʼ gúninu para cadi guiábanu lu ca cuentu ni biree si de xiga ique binni.

¹² Binidxabaʼ laaca riguite ique binni de xcaadxi modo, ne pa gásinu la? zanda quite cani laanu. Guidúʼyanu chonna de laacani. Primé guendarusiguii: Zanda guʼnuʼ guiráʼ ni gapuʼ gana. Lii nga guiniʼluʼ xii nga jneza ne xii nga ni cadi jneza para lii. Runadiáganu riníʼ binni zacá lu televisión, lu stale película ne revista, lu periódicu ne lu Internet. Cumu guiráʼ si ora cayunadiáganu ni la? zanda guzulú guiníʼ íquenu zacá ne guluiʼláʼdxinu chinándanu modo zeʼ binni guidxilayú. Peru binni ruchee laanu, nga runi caquiiñeʼ gabi Dios laanu xii nga jneza ne xii nga ni cadi jneza, ne Jiobá si nga zanda guni ni (Jer. 10:23). Guiropa guendarusiguii: Qué ziuu dxi guni chaahuiʼ Dios ca guendanagana napa binni. Stale binni riníʼ ique zacá, nga runi nabánicaʼ para yannadxí si. Pa guiníʼ íquenu zacaca la? maʼ qué zúninu xhiiñaʼ Dios né stale gana ne zusihuínninu «pur gana si runibiáʼ [nu] laabe» (2 Ped. 1:8). Peru nabé nagueenda cadxiña dxi stiʼ Jiobá, ne naquiiñeʼ gatananu ora guedandá ni (Mat. 24:44). Guionna guendarusiguii: Qué rizaalaʼdxiʼ Dios naa. Binidxabaʼ racalaʼdxiʼ guiníʼ íquenu qué zanda diʼ gannaxhii Dios laanu, ne pa guni crenu ni la? zucaani laanu gusaana de guni adorarnu Dios. Peru nadxii Jiobá cada tobi de ca xpinni ne rusisácabe laacaʼ (Mat. 10:29-31).

¹³ Naquiiñeʼ gatananu ne guxhelelunu. Cadi guiaandaʼ ndiʼ laanu: zándaca primeca biaje gunadiáganu modo riníʼ binni guidxilayú ne ora gúʼyanu ni rúnicaʼ chuuláʼdxinu cani. Yánnapeʼ nga jma caquiiñeʼ gucaadiáganu ca conseju ne modo caguixhená Stiidxaʼ Dios laanu. Zacatiʼ nga qué zaguite Binidxabaʼ laanu ne qué ziábanu lu cuentu ni biree si «de xiga ique» binni (2 Ped. 1:16).

Cadi gudiʼnu lugar «gutiixhi Binidxabaʼ íquenu»

14. Ximodo gudixhená Pablu caadxi viuda nahuiinigaruʼ, ne xiñee cadi naquiiñeʼ gusiáʼndanu conseju ca.

¹⁴ Guzéʼtenu ejemplu ra ziuunu lu carretera que sti biaje. Pa nidúʼyanu ti flecha ra na: «Cheríʼ rié guiráʼ cani zinandaʼ Binidxabaʼ», ñee ñuunu neza ra culuíʼ flecha ca la? coʼ, njaʼ. Qué liica niníʼ íquenu ñuunu neza que. Peru Pablu guníʼ zándaca gueeda guireechú ti xpinni Dios purtiʼ «bitiixhi binidxaba ique» ne guzulú chinanda Binidxabaʼ (biindaʼ 1 Timoteo 5:11-15). Conseju riʼ bidiibe ni «ca viuda nahuiini ruʼ», peru laaca zanda guizíʼdinu stale de laani. Ca gunaa xpinni Cristu ni bibani lu primé siglu riʼ, qué gánnacaʼ pa maʼ zinándacaʼ Binidxabaʼ, peru ngue nga ni cusihuínnicabe né guiráʼ ni rúnicabe. Tobi de laacani nga nabé riníʼcabe chisme. Guidúʼyanu xi conseju bidii Pablu de laani, purtiʼ zacaneni laanu para cadi chinándanu Binidxabaʼ sin gudiʼnu cuenta.

15. Xi racalaʼdxiʼ Binidxabaʼ gúninu, ne ximodo caguixhená Pablu laanu de ca trampa ni riquiiñebe.

¹⁵ Ni jma ñuulaʼdxiʼ Binidxabaʼ nga nucaa laanu nusaana de nucheechenu ca diidxaʼ nacubi ne galán (Apo. 12:17). Cumu qué racaláʼdxibe gusíʼdinu binni de fe ni nápanu la? ruyúbibe ximodo gunítinu tiempu stinu lu xcaadxi cosa o dede ruyúbibe modo gutíndebe laanu. Ngapeʼ nga ni bíʼnibe né ca viuda ni bibani lu primé siglu que. Ca diidxaʼ guníʼ Pablu que rusihuínnicani biábacabe lu caadxi trampa stiʼ Binidxabaʼ. Primé la? «riaa cabe enda nachaabaʼ, ma canazá cabe yoo pur yoo». Ca viuda riʼ biquiiñecaʼ stale tiempu sticaʼ para chigánnacaʼ ca xhamígucaʼ ne güicaʼ diidxaʼ de xiixa ni qué risaca. Naquiiñeʼ gatananu ti cadi gúninu zacaca. Xiñee yaʼ. Purtiʼ zándaca sin gudiʼnu cuenta guzulú gunítinu stale tiempu stinu para gucaʼnu xiixa mensaje ra nuu tuuxa o para guidúʼndanu xiixa ni bicaacabe ra nuunu, nuu ndaʼ tiru cadi dxandíʼ ni bicaʼnu o cadi dxandíʼ ni cayábicabe laanu. Cumu cadi guiráʼ diʼ biaje caquiiñeʼ gucaʼnu xiixa mensaje la? zunítisinu tiempu stinu, peru laaca zabeenu tiempu stiʼ sti binni pa gúninu zacá. Guiropa la? ca viuda que maʼ biaacaʼ guiniʼcaʼ chisme o maʼ «[b]iziidi cabe uchá cabe cuentu». Pa guzulú guininu ti chisme de tuuxa la? zucaa nga laanu guininu mal de laabe ne pur laani maʼ tíndenenu ca bíʼchinu ne ca bizáʼnanu (Pro. 26:20). Pa rudii ca binni ni riníʼ mal de stobi cuenta, o pa coʼ la? maʼ zinándacaʼ modo runi Binidxabaʼ.b Ne últimu la? ca viuda que «riguu ruaa cabe ratiisi». Guirutiʼ qué gapa derechu para saʼ guiníʼ ne gabi xcaadxi binni xipeʼ nga naquiiñeʼ gúnicaʼ né xquendanabánicaʼ. Pa gueeda gúninu tobi de guionnaʼ ni bizéʼtenu ca la? cunítinu tiempu ne ndiʼ nga ni jma feu: zutíndenu binni, purtiʼ maʼ canagudxiga xquíchinu laacaʼ. Peru cadi ngasi, laaca maʼ qué zucheechenu diidxaʼ de guidubi ladxidoʼno, nga ndaʼ nga dxiiñaʼ risaca bisaanané Jiobá laanu. Ora gúninu zacá maʼ cayuʼnuʼ pur Binidxabaʼ, ne maʼ cucáʼlunu Dios. Nga runi, naquiiñeʼ cuinu tu pur chuʼnu (Mat. 12:30).

16. Gunáʼ nga ca conseju ni zacané laanu para cadi guiábanu lu trampa stiʼ Binidxabaʼ ne chinándanu laa.

¹⁶ Xi zanda gacané laanu para cadi gutiixhi Binidxabaʼ íquenu ne chinándanu laa yaʼ. Ra gúninu ni na conseju ni zeeda lu Biblia. Guidúʼyanu caadxi conseju galán bidii Pablu ca biʼchiʼ ne ca bizaʼnaʼ. Laabe guniʼbe: «Qué chuʼ dxi usaana tu de guni tu xhiiña Señor biaʼ ra ganda tiʼ» (1 Cor. 15:58). Pa gucheechenu stiidxaʼ Reinu né stale gana la? zacané nga laanu para cadi gácanu binni nachaabaʼ ne gunítinu tiempu stinu (Mat. 6:33). Naquiiñeʼ guiniʼtu «diidxa jneza ni zanda acané stobi uzuhuaa chaahuiʼ» (Efe. 4:29). Cadi naquiiñeʼ gucaadiáganu o guininu xiixa ni cadi dxandíʼ de sti binni.c Naquiiñeʼ gúninu stipa pur guni crenu ni riníʼ ca xpinni Cristu ne guni respetarnu laacaʼ. Galán iquiiñenu diidxaʼ ni uguu gana laacabe ne ni gacané laacabe iguidxi fe stícabe, cadi ni gusaba laacabe. «Laucaa ique xhiiña si tu.» (1 Tes. 4:11.) Nécapeʼ naquiiñeʼ guizaaláʼdxinu ximodo nuu xcaadxi binni la? laaca napa xidé guni respetarnu modo nabánicabe ne guidúʼyanu laacabe casi ti binni ni risaca. Laaca cadi naquiiñeʼ gucaʼnu laacabe gúnicabe xiixa modo riuuláʼdxinu gácani pa laacabe nga naquiiñeʼ gúʼyacabe xi zanda gúnicabe (Gál. 6:5).

17. 1) Xiñee caguixhená Jiobá laanu. 2) Xi naquiiñeʼ quixhe íquenu gúninu.

¹⁷ ¡Riéchenu stale purtiʼ nayaguieʼ modo cayabi Jiobá laanu xi cadi naquiiñeʼ gúninu! Lu tema riʼ ne lu ni gudídinu ca bidúʼyanu caadxi modo caguixhenabe laanu. Qué chuʼ dxi gusiáʼndanu xiñee bidiibe cani laanu: purtiʼ nadxiibe laanu stale ne qué racaláʼdxibe gacananu pur chinándanu ni na Binidxabaʼ. Zándaca zaca nagana para sanu lu neza stiʼ Jiobá, peru laasini nga zineni laanu ra zanda guicaanu guendanabani ni qué zaluxe (Mat. 7:14). Nga runi, naquiiñeʼ guni crenu ni guiráʼ ora ne chinándanu conseju riʼ: «Ndiʼ nga neza ca. Lasá luni» (Isa. 30:21).

[Cani cá ñee yaza]

Xi riníʼ íqueluʼ

Ximodo zanda guʼnuʼ ni na ca conseju riʼ lu xquendanabániluʼ.

• 2 Pedro 2:1-3

• 1 Timoteo 1:3, 4

• 1 Timoteo 5:11-15

[Dibuju/foto ni zeeda lu yaza 19]

Duubiʼ ni ziné bi

[Cuadru ni zeeda lu yaza 19]

Nuu ti cuentu yooxhoʼ stiʼ ca judíu ni rusihuinni pabiáʼ feu nga guiníʼcabe ti chisme de tuuxa. Nécapeʼ nuu stale modo riníʼcabe cuentu ca la? ndiʼ nga ni riníʼcabe:

Guyuu ti hombre ni bizulú guníʼ stale cosa ni cadi dxandíʼ de ti hombre nuu xpiaaniʼ ni nabeza ndaaniʼ ti guidxi. Despué bidii chismoso que cuenta cadi jneza ni biʼniʼ. Ngue runi guyebe ra nuu hombre nuu xpiaaniʼ que para guinábabe laa gutiidilaʼdxiʼ stóndabe ne gúdxibe laa gabi laabe xi zanda gúnibe para guxhiabe ni bíʼnibe. Hombre nuu xpiaaniʼ que gunabaʼ laabe ti cosa si: guicaabe ti almuhada, guichézabe ni né ti gudxíu ne gusáʼbibe guiráʼ duubiʼ dxaʼ ndaaniʼ ni lu bi. Bidxagayaa chismoso que ni gúdxibe laa, peru biʼniʼ ni. Despué bibiguétabe ra nuu hombre nuu xpiaaniʼ que ne gunabadiidxabe laa:

—Ñee maʼ bitiiláʼdxiluʼ donda stinneʼ la?

—Primeru naquiiñeʼ chitópaluʼ guiráʼ ca duubiʼ ca —na hombre nuu xpiaaniʼ que.

—¡Peru qué zanda diʼ guneʼ nga! Maʼ ziné bi guiráʼ duubiʼ ca —na chismoso que.

—Pue zacaca nga qué zanda guni chaahuiluʼ ni bíʼniluʼ pur guiráʼ ni guniʼluʼ —bicabi hombre nuu xpiaaniʼ que.

Nayaguieʼ ni rusiidiʼ cuentu riʼ laanu: ora maʼ bindaa ruaanu xiixa la? maʼ qué zanda diʼ gudxiguétanu ni, ne stale biaje maʼ qué randa runi chaahuinu modo bininanu tuuxa. Nga runi, ante guininu xiixa de tuuxa la? guietenaláʼdxinu mayaca gundaʼnu caadxi duubiʼ lu bi.

[Dibuju/foto ni zeeda lu yaza 16]

Ximodo zanda chuʼ ca binni ni maʼ bidxiideche Dios ndaaniʼ lídxinu